ألمانيا تدعو لتحرك عاجل: السودان يعيش أسوأ أزمة إنسانية    ميليشيا الدعم السريع ترتكب جريمة جديدة    بعثة الرابطة تودع ابوحمد في طريقها الى السليم    ياسر محجوب الحسين يكتب: الإعلام الأميركي وحماية الدعم السريع    الفوارق الفنية وراء الخسارة بثلاثية جزائرية    نادي القوز ابوحمد يعلن الانسحاب ويُشكّل لجنة قانونية لاسترداد الحقوق    كامل ادريس يلتقي نائب الأمين العام للأمم المتحدة بنيويورك    شاهد بالفيديو.. شباب سودانيون ينقلون معهم عاداتهم في الأعراس إلى مصر.. عريس سوداني يقوم بجلد أصدقائه على أنغام أغنيات فنانة الحفل ميادة قمر الدين    السعودية..فتح مركز لامتحانات الشهادة السودانية للعام 2025م    محرز يسجل أسرع هدف في كأس أفريقيا    شاهد بالصور.. أسطورة ريال مدريد يتابع مباراة المنتخبين السوداني والجزائري.. تعرف على الأسباب!!    شاهد بالفيديو.. الطالب صاحب المقطع الضجة يقدم اعتذاره للشعب السوداني: (ما قمت به يحدث في الكثير من المدارس.. تجمعني علاقة صداقة بأستاذي ولم أقصد إهانته وإدارة المدرسة اتخذت القرار الصحيح بفصلي)    وزير الداخلية التركي يكشف تفاصيل اختفاء طائرة رئيس أركان الجيش الليبي    سر عن حياته كشفه لامين يامال.. لماذا يستيقظ ليلاً؟    "سر صحي" في حبات التمر لا يظهر سريعا.. تعرف عليه    تقارير: الميليشيا تحشد مقاتلين في تخوم بلدتين    شاهد بالصورة والفيديو.. المذيعة تسابيح خاطر تستعرض جمالها بالفستان الأحمر والجمهور يتغزل ويسخر: (أجمل جنجويدية)    شاهد بالصورة.. الناشط محمد "تروس" يعود لإثارة الجدل ويستعرض "لباسه" الذي ظهر به في الحفل الضجة    شاهد بالصورة والفيديو.. المذيعة تسابيح خاطر تستعرض جمالها بالفستان الأحمر والجمهور يتغزل ويسخر: (أجمل جنجويدية)    والي الخرطوم: عودة المؤسسات الاتحادية خطوة مهمة تعكس تحسن الأوضاع الأمنية والخدمية بالعاصمة    فيديو يثير الجدل في السودان    إسحق أحمد فضل الله يكتب: كسلا 2    ولاية الجزيرة تبحث تمليك الجمعيات التعاونية الزراعية طلمبات ري تعمل بنظام الطاقة الشمسية    شرطة ولاية نهر النيل تضبط كمية من المخدرات في عمليتين نوعيتين    الكابلي ووردي.. نفس الزول!!    حسين خوجلي يكتب: الكاميرا الجارحة    احذر من الاستحمام بالماء البارد.. فقد يرفع ضغط الدم لديك فجأة    في افتتاح منافسات كأس الأمم الإفريقية.. المغرب يدشّن مشواره بهدفي جزر القمر    استقالة مدير بنك شهير في السودان بعد أيام من تعيينه    مكافحة التهريب بكسلا تضبط 13 ألف حبة مخدرات وذخيرة وسلاح كلاشنكوف    كيف تكيف مستهلكو القهوة بالعالم مع موجة الغلاء؟    4 فواكه مجففة تقوي المناعة في الشتاء    اكتشاف هجوم احتيالي يخترق حسابك على "واتسآب" دون أن تشعر    ريال مدريد يزيد الضغط على برشلونة.. ومبابي يعادل رقم رونالدو    رحيل الفنانة المصرية سمية الألفي عن 72 عاما    قبور مرعبة وخطيرة!    شاهد بالصورة.. "كنت بضاريهم من الناس خائفة عليهم من العين".. وزيرة القراية السودانية وحسناء الإعلام "تغريد الخواض" تفاجئ متابعيها ببناتها والجمهور: (أول مرة نعرف إنك كنتي متزوجة)    حملة مشتركة ببحري الكبرى تسفر عن توقيف (216) أجنبي وتسليمهم لإدارة مراقبة الأجانب    عزمي عبد الرازق يكتب: عودة لنظام (ACD).. محاولة اختراق السودان مستمرة!    انخفاض أسعار السلع الغذائية بسوق أبو حمامة للبيع المخفض    تونس.. سعيد يصدر عفوا رئاسيا عن 2014 سجينا    ضبط أخطر تجار الحشيش وبحوزته كمية كبيرة من البنقو    البرهان يصل الرياض    ترامب يعلن: الجيش الأمريكي سيبدأ بشن غارات على الأراضي الفنزويلية    قوات الجمارك بكسلا تحبط تهريب (10) آلاف حبة كبتاجون    مسيّرتان انتحاريتان للميليشيا في الخرطوم والقبض على المتّهمين    إسحق أحمد فضل الله يكتب: (حديث نفس...)    حريق سوق شهير يسفر عن خسائر كبيرة للتجار السودانيين    مياه الخرطوم تكشف تفاصيل بشأن محطة سوبا وتنويه للمواطنين    محافظ بنك السودان المركزي تزور ولاية الجزيرة وتؤكد دعم البنك لجهود التعافي الاقتصادي    الصحة الاتحادية تُشدد الرقابة بمطار بورتسودان لمواجهة خطر ماربورغ القادم من إثيوبيا    مقترح برلماني بريطاني: توفير مسار آمن لدخول السودانيين إلى بريطانيا بسهولة    الشتاء واكتئاب حواء الموسمي    عثمان ميرغني يكتب: تصريحات ترامب المفاجئة ..    "كرتي والكلاب".. ومأساة شعب!    ما الحكم الشرعى فى زوجة قالت لزوجها: "من اليوم أنا حرام عليك"؟    حسين خوجلي: (إن أردت أن تنظر لرجل من أهل النار فأنظر لعبد الرحيم دقلو)    حسين خوجلي يكتب: عبد الرجيم دقلو.. إن أردت أن تنظر لرجل من أهل النار!!    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



(717) قناة طشت بعد قون بلة جابر بما في ذلك قناة (طيور الجنة)
امس قعدت افكر نشر في قوون يوم 22 - 04 - 2013


بحسب فيها.

قدر ما ضربتها في رأسي ...ما جاءت معاي...دخلت وطلعت (الف مرة).

رأسي ضارب.

لاقني ليك واحد ...(عينو زي البوتجاز)..قال لي انت مالك الليلة حايم زي (السبعة) المقلوبة؟.

قلت ليه دا شنو هسع؟ ..انت ما تقول (تمانية) عديل كدا ..بدل تتعب وتقلب السبعة.

منقصها مالك؟ ..هي ناقصة.

قال لي لو قلت تمانية عديل ...ناس الضرايب بجونا ...عشان اي حاجة فوق السبعة عندهم فيها (قيمة مضافة).

قلت ليه : والله برضو منطق.

طلعت مفتح يا عبدالجبار.

اسمو عبدالجبار ..ما تقعدوا تعاينوا لي كدا ..زي الزول الفتوحو غلط.

وانا بفكر.

بفكر براي كدا.

قلت الامين البرير دا (شفت)...شفت عديل كدا.

الزول دا اتعاقد مع غارزيتو في المرة التانية عشان يتخلص من هيثم مصطفى.

لأن التعاقد مع غارزيتو يعني تلقائيا ان هيثم مصطفى ح يكون برة التشكيلة.

قام البرير عمل شنو؟.

امشوا معاي يا جماعة ...خطوة ..خطوة ...عشان ما تتلخبطوا الكلام دا صعب.

عاوز تركيز.

ركزوا ..عشان انا ما فاضي اشرح ليكم من اول وجديد...الكلام دا في اخر العمود بجيب ليه (غلوطيات).

خلوه (الموبايل) هسع ..ركزوا معاي يا جماعة.

ما عاوزين تركزوا انا بقوم.

الكلام البقول ليكم فيه دا ..انا براي ما واقع لي.

لمن قعدت ليه ...وشربت ليه (لبن) بعد داك ظبط معاي.

بمناسبة (اللبن) دي ..احكي ليكم حاجة بسيطة كدا ..(ما طويلة والله)..وارجع ليكم تاني.

في جماعة ...(القنوات) طشت من تلفزيونهم.

الطبق دا قدر ما قبلوه ...يقبولو فيه جاي ..وجاي (زي العروس) ...ما جاب ليهم شيء غير (اششششش).

الحاجة ...قالت ليهم بس اجروا نادوا (ود السارة)...الطبق دا ما في زول بظبطوا ليكم غير ود السارة.

الاولاد ....قالوا ليها يا حاجة ود السارة لو ما سكر وإلا اتسطل ...ما بجازف لينا ...ولا بطلع لينا في رأس البيت في السخانة دي.

الحاجة قالت ليهم : انتوا امشوا نادوه ..قولوا ليه ..خالتك فطوم ..قالت ليك تعال اظبط لينا الطبق...عندي (ام فتفت) طاااعمة ..بعملها ليه.

يا حاجة والله ب (ام فتفت) دي ..اذاعة (104) ما يظبطها ليك.

انتوا في العصر الفضائي دا في زول بتابع (104).

104 شنو طوب ..اردب ...قروش ...سيخ ..fm.

شنو بس؟.

الحاجة قالت ليهم انتوا امشوا نادوه لي ..انا بتفاهم معاه.

الولد الصغير ..مشى لقى ليك (ود السارة) قاعد تحت الشجرة ..قرش ما عندو...ما عارف يعمل شنو؟.

الولد قال ليه : يا ود السارة الحاجة قالت ليك تعال اظبط لينا (الطبق) ..القنوات حقتنا من قون بلة جابر ..طشن.

من قون بلة تاني ما شفنا لينا فيهن قناة..(طيور الجنة) طيرة ما فضلن فيها.

ود السارة ..قال ليه : امشي بجي وارك ..اجيب العدة بس وألحقك...(اي زول مهم بقول الكلام دا).

شوية كدا ..ود السارة ...جاء البيت ..في شنو يا حاجة؟...ان شاءالله خير.

ابدا يا ود السارة ...بس قنواتنا دي من قون بلة جابر (العكسي) طشت.

ود السارة قال ليها : وينو هو قون بلة جابر؟...انتوا عاوزين تظبطوا القون وإلا عاوزين تظبطوا الطبق؟.

زولكم ما جايب خبر للدينا.

الحاجة قالت عاوزين نظبط (الطبق) يا ود السارة ...كورة بلة جابر ما بتنظبط ...جابوا ليها الدكتور محمود سعد ومحمد عمر وحسام البدري واتوفيستر ودي سليفا ..وكروجر وريكاردو والكوكي ..ما قدروا يظبطوها ...عاوز تظبطها انت يا ود السارة.

بلة جابر دا ...البنشوفو قدامنا دا ..يمين لو مشى (فرنسا)..يلخبط ليهم كورة فرنسا جت ..موش مفروض يتطور ويبقى محترف ..بلة جابر دا ح يلخبط ليكم كورة فرنسا ..يخليها ليك كلها (بلة جابر).

كور الدوري الفرنسي كلها تمشي (الكشافات).

وبدل ما يبقى بلة جابر ..مستر بلة .. إبراهيموفيتش ببقى ابرا بلة جابر.

الزول دا ح يلخبط الدوري الفرنسي ..يبقى ليك زي دوري السنترليق حقنا دا.

وما في تلفزيون بنقل الدوري الفرنسي.

تاني مع بلة جابر إلا تسمعوا بالدوري الفرنسي في (104).

عليك الله يا ود السارة بس اظبط لينا (الطبق).

بلة خليه...هو (الطشش) لينا القنوات.

717 قناة ما لامين فيها.

طيور الجنة راحت.

جدا ..يا حاجة ..ما في مشكلة.

ساعة ونص ..ود السارة يلفت في الطبق دا من حتة لي حتة...زي (مروحة التربيزة).

ما خلى ليه حاجة.

السلوك دي فكاها قدامو زي السلطة.

الحاجة عرفت ليك ود السارة قاعد يداغل.

ود السارة عاوز ليه حركة.

الحاجة ...دخلت المطبخ وطلعت ..جابت ليها كورية (لبن) سااااقط...(دا اللبن الجات مناسبتو فوق بالمناسبة ..بتذكروا الحتة ديك وإلا نسيتوا؟).

الحاجة جابت ليها (كورية لبن) لي ود السارة..ومشت عليه.

ود السارة من فوق شاف الكورية انبسط ...جاء نازل من رأس البيت.

لقى ليك في الكورية (لبن) الكلام ما عجبو.

شرب اللبن وطلع (يطنطن) في رأس البيت تاني.

5 دقائق كدا ...جاب ليك التلفزيون القومي للسودان.

الطبق جاب تلفزيون السودان.

الحاجة من الغرفة جوة ..قالت ليه يا المبروك تلفزيون السودان جا...وعمر الجزلي كمان شغال في (اسماء في حياتنا).

انتوا تعالوا هنا كل ما الطبق يطش ..اظبطو القى ليك (اسماء في حياتنا) شغاله . ..انتوا بتلاحظوا للحكاية دي.

ود السارة ظبط ليك الطبق على كدا...ونزل.

ما جاب اي حاجة غير تلفزيون السودان.

البنات تحت منتظرات روتانا سينما وmbc1 وmbc 4.

والطبق ما جاب حاجة غير تلفزيون السودان.

الحاجة ..شافت بناتها مضايقات ...طلعت على ود السارة برة ..وكوركت ليه..وقالت ليه يا ود السارة ..الطبق دا ما جاب حاجة غير السودان جيب لينا باقي القنوات.

نحن تلفزيون السودان دا بي (حجر بطارية) قاعدين نجيبو.

وان بقي على (اسماء في حياتنا)..نحن الحلقة دي حضرناها عشرة مرات.

ود السارة جاءها طالع في الحوش بي (كوريتو) ...قال ليها المشكلة ما من (الطبق)..المشكلة من (كوريتك) دي.

الحاجة عاينت للكورية ..وقالت ليه (الكورية) مالها؟.

طبعا النسوان الكبار ..ممكن يقبلن اي حاجة...لكن ما بقبلن كلمة في (كواريهن).

الكورية مالها يا ود السارة ..(الحاجة زعلت).

يا حاجة بي صراحة كدا ..(اللبن) الجبتي لي في (الكورية) دي ما بجيب ليك حاجة غير التلفزيون القومي.

عاوزة روتانا سينما ..بدلي اللبن.

اللبن دا لو كان فيه (حموضة) شوية ..كنت جبت ليك قناة النيلين.

(الكلام دا يا جماعة ما يطلع من العمود دا)..ناس الحكومة ما برضوا الكلام دا.

القومي والنيلين ..حقتهم.

بعدين وزير السياحة بتاع السودان قال السواح البجوا السودان من بلاد برة بدل (الوسيكي) يشربوا (لبن الابل).

اتخيلوا فرنسي يجي السودان يقوم يشرب ليه لبن ابل.

يجي من فرنسا ..عشان يشرب ليه لبن ابل.

الفرنسي من لبن الابل ..يبقي زي حمار الوادي ..يكون (مشخط) عديل كدا.

فرنسي ويشرب ليه لبن ابل كمان ..ببقى زي اللابس ليه (كرفتة) وماشي حفيان.

لكن هسع دا ما موضوعنا.

موضوع (اللبن) دا ما مقصود ..جاء عرضا ساكت والله.

ارجع ليكم للبرير.

البرير (الشفت)...اتعاقد مع غارزيتو ..عشان يتخلص من هيثم مصطفى ويكون هو بعيد من الصورة.

يشطب هيثم مصطفى ..(حسب توصية الجهاز الفني)....التقرير الفني بقول كدا.

غارزيتو شطب هيثم مصطفى ..وانتهينا من الموضوع دا.

الدور جاء على مين؟.

على غارزيتو ذاتو.

البرير بعد ما اتخلص من هيثم مصطفى ..قام اتخلص من غارزيتو (صاحب التقرير الفني).

النقطة دي لي غاية هنا واضحة.

تعالوا شوفوا (الشفتنة) التانية وين؟.

قلت ليكم الموضوع دا صعب ...وعاوز (مخمخه)..ما صدقتوني.

تفتكروا البرير اتخلص من (غارزيتو) ليه؟.

عشان نتائح الهلال غير جيدة.

ابدا.

عشان طلعنا من البطولة الافريقية؟.

ابدا.

البرير اتخلص من غارزيتو ...عشان غارزيتو يمشي المريخ.

شفتوا كيف؟.

اصحوا معاي يا جماعة.

وانتوا عارفين وقت غارزيتو يمشي المريخ بعمل شنو؟.

اول حاجة بقول اشطبوا لي هيثم مصطفى وعلاءالدين يوسف وفيصل العجب وبلة جابر وموسي الزومة.

ديل كلهم بقول اشطبوهم لي بي (تقرير فني) واحد.

وبي كدا يكون (البرير) دا شطب ليك هيثم مصطفى من (الهلال)..ولحقو ليك بي غارزيتو وشطبو ليك في المريخ.

اها دي انتوا بتسموها شنو؟.

دي عليكم الله ما (شفتنة).

لو عندكم ليها اسم غير (الشفتنة) قولوه.

بعدين ناس المريخ ديل لو عاوزين يتخلصوا من (العجب)..جيبوا ليه (غارزيتو).

العجب دا بي اخوي واخوك ...ما بعتزل ليكم.

الزول دا احسن حل تجيبوا ليه (غارزيتو) ..عشان يقشطو ليكم ب (تقرير فني) ويريحكم منو؟.

غير كدا ما بتقدروا تتخلصوا من العجب.

قرار اعتزال العجب دا قرار صعب عليه ..ما بقدر يتأخذو.

الزول دا قال عاوز يعرس من سنة 2005 وما عرس الي الان.

يعني لو قال عاوز يعتزل في سنة 2014 ...لي سنة 2020 ما بعتزل.

الحكاية واضحة من العرس.

عشان كدا احسن تجيبوا ليه (غارزيتو).

جيبوا ليه (غارزيتو)..وخلوا (القارورة) علينا نحن الهلالاب.

نحن بنعرف (القارورات).

قوراراية واحدة كفاية.

حكاية شطب غارزيتو لي هيثم مصطفى في الهلال ..وملاحقتو في المريخ ..ذكرتني ليك بي قصة كدا.

قصة الاسد والخروف والقش والراعي.

تذكروا القصة دي.

خلوني افلترها ليكم.

موش قالوا في زول عندو اسد وخروف وقش ..وعندي مركب وعاوز يعدي (البحر)...ومركبو ما بتشيل غير حاجة واحدة معاه.

والمشكلة بتكمن في انه لو شال (الاسد) اول حاجة عشان يوديه الغرب ...الخروف بقوم يأكل القش في الشرق.

ولو شال القش اول حاجة ..الاسد بيأكل الخروف.

ولو شال الخروف اول حاجة ..الاسد ما بياكل القش ..لكن تاني وقت يجي يشيل الاسد ..لو وداهو للخروف هناك وقت يرجع للقش بيلقي الاسد اكل الخروف..ولو جاء شال القش وعداهو للخروف ..وقت يرجع للاسد بيجي يلقى الخروف اكل القش.

غلوطية كبيرة..الزول دا يتصرف كيف؟.

اها الحكاية دي هسع زي حكاية هيثم مصطفى وغارزيتو والبرير.

غارزيتو لو مشي المريخ ...بقوم يشطب هيثم مصطفى.

هيثم مصطفى لو رجع الهلال ..البرير بيجيب ليه غارزيتو.

ورونا انتوا بتحلوها كيف؟.

خلوه موضوع هيثم مصطفى وغارزيتو...اتذكروا لي حكاية الاسد والخروف والقش ...الزول دا يعديهم كيف بي مركبه ..واحد ..واحد دون ان يفقد شيء.

طيب نقول ليكم الحل ..لو نسيتو.

الزول الشفت دا اول حاجة في المركب يشيل الخروف للغرب ..ويخلي الاسد والقش في الشرق ..ما بتجيهم عوجة.

في المرة التانية يجي يشيل القش..وعشان الخروف ما ياكل القش يرجع تاني بالخروف للشرق..عشان يخلي الخروف في الشرق براهو ويجيب (الاسد) للقش في الغرب.

الاسد والقش ما بتجيهم عوجة في الغرب ..يقوم يرجع يجيب الخروف من الشرق للغرب.

وبالطريقة دي يكون جاب حاجاتو التلاتة من غير ما يخسر اي حاجة.

اها نحن عاوزين نطبق النظرية دي مع هيثم وغارزيتو.

وروني نعمل شنو؟.

نحلها كيف؟.

نقول عندنا اول حاجة تلات حاجات ..البرير وهيثم مصطفى وغارزيتو.

وعندنا الهلال والمريخ بمثلوا (الشرق والغرب).

البحر ..نقول (التسجيلات).

لو جبنا غارزيتو لهيثم مصطفى في المريخ بقوم يشطبو...لو رجعنا هيثم مصطفى للهلال ..بقوم البرير يرفض.

طبقوا نظرية الخروف والقش والاسد.

اول حاجة نودي غارزيتو للمريخ ..عشان نشطب هيثم مصطفى من المريخ.

في المرة التانية نجي نشيل هيثم مصطفى ونودي الهلال (غارزيتو بقى ما في الهلال).

البرير وهيثم ممكن يتفقوا بعد ما يتخارج هيثم مصطفى.

والله الغلوطية دي لا مفهومة ولا حاجة.

يا جماعة اكتر من كدا ان اعمل ليكم شنو؟.

اجيب ليكم (لبن).

طيب ممكن نسأل سؤال.

اسأل.

فتحي بشير داخل في العملية دي؟.

يا جماعة انا ما بقدر افسر ليكم اكتر من كدا.

الحكاية كدا بتنكشف.

خلي المريخاب المسطحين ديل يصدقوا.

الموضوع خلاص طلع من ايدي.

ملحوظة : غايتو يا بلة قونك دي نزل ليك في شبكة المريخ زي (الرصيد).

هوامش

ناس عصام الحاج بقوا يلقطوا في القروش.

اول مرة اشوف عصام الحاج مبتسم ..وقت استلم تبرع المستشار مدحت.

الضحاكات بتعمل اكتر من كدا.

انت يا عصام الحاج اول ما تقول لينا الحاجة المزعلاك (الفلس).

السنة كلها (صاري)..تقول ضيعت ليك ضربة جزاء.

يا ضياءالدين بلال ..والله انا اول مرة اشوف لي (مستشار) عندو قروش كتيرة كدا.

مستشار اتبرع ب (150) مليون جنيه للمريخ.

دا مستشار شنو دا؟.

نعم الاستشارة.

لماذا لا يتعاقد الهلال مع مدرب المريخ السابق (كروجر).

على البرير ان يبحث عن التعاقد مع هذا المدرب الذي كان من افضل المدربين الذين عملوا في الدوري السوداني في الفترة الاخيرة.

كروجر الان يحقق نجاحات كبيرة مع فريق سان جورج الاثيوبي وهو قد قاده امس الاول الي تعادل مع الزمالك في القاهرة.

كروجر من سان جورج ...التعاقد معه سهل ..اكيد مرتبه ليس كبير.

فقط نتمنى ألا يكون تعاقده طويل الامد وملزم في سان جورج.

لكن لو فيه (غرامة)..الهلال مفروض يدفع تلك الغرامة ..لأن كروجر عارف الهلال وعارف الكورة السودانية ..وهو مدرب ملتزم ومنضبط.

يا البرير ..شوفوا كروجر ..وما ترجعونا الف خطوة بالتعاقد مع مدرب وطني.

الاجنبي ..هو الافضل.

الالماني كروجر بصمته ظهرت في سان جورج الذي قدم مباراة كبيرة امام الزمالك وكما كان يقول معلق المباراة ان لاعبي سان جورج ينقلون الكورة فيما بينهم اكثر من (30) تمريرة.

كروجر ..كروجر ..كروجر.

البرير بعد ان تعاقد مع مدرب كبير في حجم غارزيتو ..لا اظنه يتراجع من هذا السقف العالي.

تاني نحن من غارزيتو ولي فوق.

مباراة الهلال والامل ..تحدي خاص لاللاعبين.

ما تعملوها لينا كلها ايام ترفيهية ..وتفقدوا في النقاط.

صالح الامين كان اكثر الذين ظلمهم غارزيتو في الهلال.

ربما ظلمه اكثر من هيثم مصطفى نفسه.

مشاهدة صالح الامين في دفاع الهلال ضرورية.

تسجيلات يونيو يجب ان يدخلها الهلال بقوة.

اذا اراد البرير ان يعيد الجماهير الي المدرجات وان يكسب جولة ..عليه ان يحسن في التسجيلات القادمة.

البطولات الافريقية القادمة ..يجب ان نجهز لها منذ الان.

المحترف في العادة لا يعطيك شيء إلا بعد سنة.

لذلك سجلوا منذ الان ..عشان نحصد في الموسم القادم.

محليا لا تفريط في الممتاز وكأس السودان.

الجمع بين البطولتين ..هو الهدف الاول.

عاجل : بلة جابر خصمو منو (وجبة) بعد الهدف العكسي.

انقر هنا لقراءة الخبر من مصدره.