جماعة جابوا ليهم (نجار) روسي ..قالوا ليه : عاوزنك تعمل لينا مجسم خشبي لي هدف عبداللطيف بويا في عصام الحضري...بس عليك ما تكلم زول ..شابكننا السد ..السد ....السد العالي ...سدكم طلع زي خور ابوعنجة (مطرة) واحدة بتجهجهو. النجار قال ليهم : جيبوا لي (لوح خشب)....وزحوا لي بعيد.
جابوا ليه (باسكال).
النجار قال ليهم جيبوا لي (لوح تلج).
جابوا ليه (جبل الجليد) اكرم الهادي.
النجار قال ليهم جيبوا لي (هيثم مصطفى) وشيلوا لي (العجب).
جابوا ليه هيثم مصطفى وشالوا ليه فيصل العجب.
النجار قال ليهم جيبوا لي (مسمار).
جابوا ليه (بشة)....ومعاه (تلاتة) بطيخات.
البطيخ ما عندو اي علاقة بالحكاية دي ...(دخلتوا ليكم بس للتمويه).
النجار قال ليهم جيبوا لي (بوهيّة).
جابوا ليه (اعلام المريخ).
اعلام المريخ اخطر من بوهيّة المهندس ..وبوهيّة ايوب.
النجار قال ليهم جيبوا لي (نشارة).
جابوا ليه (اللوردات)....(17) لورد اقل واحد فيهم عندو مزرعة دواجن.
النجار قال ليهم جيبوا لي (تبن).
جابوا ليه (ضفر).
ضفر كل خمس دقائق يقول عطشان.
النجار قال ليهم جيبوا لي (قرد).
قالوا ليه (القرد) كمان عاوز بيه شنو؟...انت عاوز تعمل لينا مجسم هدف ..وإلا عاوز تعمل لينا (جنينة حيوانات).
النجار قال ليهم عشان (ينطط) بعد الهدف....هدف بويا دا عاوز ليه كمية من (القرود) عشان (النطيط).
النجار قال ليهم جيبوا لي (برمودة) عشان اشتغل بيه.
جابوا ليه (كروجر).
كروجر المباراة كلها يتلفت متل الزول العاوز ليه (كيس) في السوق المركزي.
النجار قال ليهم ..اعملوا لي (سد).
عملوا ليه (سد)...ودوروا ليك في المعارضة ..السد ..السد ...الرد السد.
النجار قال ليهم افصلوا لي الجنوب...شيلوا لي (الجنوب) نهائي من خريطة السودان.
فصلوا ليه الجنوب...خريطة السودان (الفضل) بقت زي (الخرطاية).
النجار قال ليهم زيدوا تعريفة الكهربة.
زادوا الكهربة.
النجار قال ليهم : ارفعوا الدعم عن المحروقات.
رفعوا الدعم.
النجار قال ليهم جيبوا لي (17) لورد.
جابوا ليه اللوردات.
النجار قال ليهم : شيلوا لي (الشرعية) من مجلس الهلال.
النجار قال ليهم جيبوا لي زول كبير في السن...زول خبرة زي (الضرس).
جابوا ليه (اوليفيه).
النجار قال ليهم جيبوا لي (شطة).
قالوا ليه (الشطة) عاوز بيها شنو؟.
قال ليهم عاوز اضرب بيها (المرارة) دي وهو يشير الي دفاع المريخ.
النجار قال ليهم جيبوا لي (شنطة مدرسة)..عشان اشيل فيها دروس نزار حامد..وجيبوا لي (طايوق) عشان اعوس بيه وسط المريخ (عواسة)..وجيبوا لي (13) زول (صفوة) اصلو الجماعة ديل ما بتجاوزوا ال (13)..عشان اقول ليهم انتوا جنيتوا دا فريق تشجعوه.
النجار ..تاني قال ليهم جيبوا لي (اسمنت وسيخ وطوب)...وتاني قال عاوز ليه (لوردات).
الجماعة بعد مدة مشوا عليه ...لقوا (النجار) قاعد متمحن ...قالوا ليه اها عملت لينا مجسم للهدف...النجار قال ليهم عملت ليكم (طابق تاني)...حاجتكم دي بتعمل ليها (طابق) ما بتعمل ليها (هدف)..جايبين لي (17) لورد ..طيب خليتوا لي (ابوكرشولا) شنو؟.
ليها حق (ابوكرشولا) تسقط ...ما دام اللوردات الفي البلد كلها كبيتوها في لجنة تسيير المريخ.
زي الترزي وقت تشيل ليه (قماش) وتقول ليه اعمل لي (جلابية)...تجي تلقاهو عمل ليك (عراقي)...ويقول ليك والله (القماش) لقيتوا قصّر.
»«««««««««««««««««««««««««««««
حاج تفتيحة
مريخابي عندو (7) بنات ...كل سنة يقول يجيب ليه (ولد)..يجيب ليه بنت.
يوم قاعد متمحن ..ما عارف يعمل شنو؟.
جابوا ليه (انبوبة غاز)...قام سمى ليها.
هسع يا ناس المريخ بطولاتكم الوهمية دي ..زي (انبوبات الغاز)...ما فيها اي فائدة...بتسموا ليها ساكت.
»««««««««««««««««««««««««««««««««««««
الشارع التاني شمال
الكاردينال ..دا وعد واوفي ...سلّم حافزوا في ليلو ....كل لاعب (20) مليون جنيه.
نحن عندنا طلب خاص لاشرف الكاردينال ..نتمنى ان ينفذوا لينا ...وهو ان يقوّم بتحفيّز اسحق كرنقو ب (20) مليون جنيه ايضا ..اسوة ببقية لاعبي الهلال ..عشان عبداللطيف بويا شال (الخرطة)..والنظرية ذاتها حقت كرنقو وسجل بيها هدف (نفس الشيء) في شباك الحضري.
الاختلاف الوحيد هو ان الحضري في هدف كرنقو كان بحرس مرمي الاهلي المصري وفي هدف بويا الحضري كان بحرس مرمي المريخ.
الساعة تلاتة صباحا المريخابي قام من النوم لقى الحرامية بفتحوا في (الخزنة)...اتهجم زي هجمة موسي الزومة في كنبة احتياطي المريخ من هدف بشة الثالث.
قال ليهم بتعملوا في شنو؟...عاوزين شنو؟.
الحرامية قالوا ليه ما عاوزين حاجة ..بس عاوزين نقول ليك هدف عبداللطيف بويا (التاني) جاء من تسلل واضح.
صاحبكم قال ليهم : موش كدا ..انا ذاتي قلت نفس الكلام ...يا ولد افتح (الصالون) لاعمامك ديل وقت طلعوا من (لجنة الحكام المركزية)...وكلم امك تعمل لينا (قهوة).
ابببببببببببببببببببببببببببببب
نزار حامد طبّق في علاءالدين يوسف نظرية (مرقنبو قرنبو)
من غرائب الاهداف التى سجلها الهلال ..وعملا بمبدأ قانون الحريات في امستردام ..وطبقا لي (الشاي البغلي) في نيودلهي ...كان هدف الهلال الثاني الذي سجله عبداللطيف بويا من موقع برة كادر التصوير..بدأ من كورة قطعها عمر بخيت من (هيثم مصطفى)..ومن غرابة الاشياء ايضا ان هدف الهلال الثالث الذي سجله (بشة) كان من كورة قطعها نزار حامد من (علاءالدين يوسف) في منتصف الملعب.
شفتوا النظام دا كيف؟.
نحن اصلا بتوع (اي حاحة عندنا بي نظام)...نحن ما بنعمل حاجة ساكت ...ما تقعدوا تتلفتوا لي في الفاضي.
الاهداف جاءت من كور مقطوعة من اولاد الهلال ...(عشان تفهموا حاجة).
الفهم ..فهم ..والما فهم بي طريقتو.
نقيف عند (النظرية) التى طبقها الصاقعة نزار حامد في علاءالدين يوسف.
بويا دا طبق ليه (نظرية) في علاءالدين يوسف ...مفروض طوالي تحول (علاءالدين يوسف) الي (مريخ الفاشر).
الزول دا ..الاسمو نزار حامد ..البنقول ليه في شندي (الصاقعة)...عمل ليه عملية ...تفاصيلها ..عاوزة ليها (ترمسة) قهوة..(فنجان) واحد ما بعمل حاجة.
نشوف الحاصل شنو في النظرية دي؟.
موش زمان وقت الاستاذ يكون عندو نظرية صعبة شوية ..بقوم يطلع (الطلبة) برة الفصل..يقعد بيهم تحت ضل شجرة ..او في ضهر الفصل ..عشان يفهموا النظرية.
نزار حامد الصاقعة ..في مباراة القمة عمل نفس الشيء ...طلع ليك بي (علاءالدين يوسف) برة الفصل.
تذكروا نكتة محمد موسي (القديمة) ديك ..(مرقنبو قرنبو)....اها نزار حامد عمل نفس الشيء.
نزار حامد عمل في علاءالدين يوسف (مرقنبو قرنبو)...جابوا ليك في النص..طرحو ليك ...(شال ليك الركب) برة ...وجمع ليك بقايا علاءالدين يوسف في حركة واحدة ...طلع بالواحد ...ونزل بي امير كمال...رجع شال ليه (اللوز).
في الساعة ديك علاءالدين يوسف اتلخبط ..قام عمل شنو؟..قام (اتكوم) في حركة يسموها (الروس) الكسفرتو...وهي حركة يجمع فيها الزول ويطرح في لحظة واحدة ...يبقى زي (كيس) المخدة.
الهنود بسموا (النظرية) دي نظرية ..(اتغديّت بي شنو؟)...لأن العملية التى قام بها نزار حامد زي لما تنادي ليك (طفل) صغير ..تقوم تنقرو في بطنو بي طرف اصابعيك..وتشم ايدك ..وتقول للطفل انت اتغديّت ب (بامية مفروكة).
نزار حامد عمل نفس هذه التفاصيل في علاءالدين يوسف ..خلاهو ليك متل (شنطة اليد)...حركة برقاوية ..وهى فيها شيء من التنويم المغنطيسي ..لأن علاءالدين يوسف الي وقتنا دا ما عارف الحصل ليه شنو؟.
ما فاهم اي حاجة.
الامضاء الذي قام به نزار حامد احلى من الهدف ..كيميائا...ممكن نقول في تداخل حصل في المصارين داخل معدة علاءالدين يوسف ..وهذا ما جعلنا نقول ان الصاقعة طبق في علاءالدين يوسف نظرية (مرقنبو قرنبو)...وهي يؤكدها مدرب المريخ نفسه (كروجر) والذي (مرق) علاءالدين يوسف طوالي بعد النظرية دي...قال ليه تعال اقعد جنبي هنا.
»«««««««««««««««««««««««
لو الهدف الرابع جا ..كان شالوا الكورة واتخارجوا
في كثيرين زعلانين على الهدف الذي صده (القائم) لبشة عندما انفرد الاخير بحارس مرمي المريخ بعد ان تبادل الكورة مع بكري المدينة على طريقة (الون تو)...من ضمن اولئك الزعلانين الدكتور سامي ...الذي كان ينتظر من بشة الهدف الرابع.
على ما يبدو ان القائم تعاطف مع المريخاب ..فلو جاء الهدف الرابع للهلال ..من غير شك فان المباراة لن تكتمل وربما يكون هناك موت واصابات ..لأن اربع اهداف في مرمي المريخ ..شيء لا يحتمله المريخ في ظل كل هذه التسهيلات التى تقدم له.
على العموم في واحد قال لي احلف يمين ان (القائم) الذي صد تصويبة بشة (مؤتمر وطني).
قلت ليه اكيد (مؤتمر وطني)...واحتمال القائم كمان يكون قابض.
غايتو ما عاوزين نتهم (القوائم) ساكت...لكن كورة بشة دي بالمنطق كدا ما بتصد.
»«««««««««««««««««««««««««««
وان طال السفر
بدل رفع الدعم رجعوا الحضري اهلو
استغل قتلة الدبلوماسي الاميركي (غرانفيل) مباراة القمة التى جمعت بين الهلال والمريخ في يوم الخميس العاشر من يونيو 2010م للهروب من سجن كوبر العتيق.
وقد حددت (ساعة الصفر) ..ووضعت الخطة تزامانا مع مباراة القمة والتى يكون الكل فيها مشغولا بالمباراة خاصة عندما ينتصر الهلال.
الوزير والخفير ..بحضر في المباراة...وبفرح بانتصار الهلال وبسعد بيه.
اذ نجد ان الهلال هو ملح هذه البلد ..هو طعمها ..ولونها ورائحته...وهو الذي يعطيه ذلك التفرد ..وهذا الانتماء (الدواخلي) العميق.
تخرج البهجة منه هلالا (عريسا) ..وتكون الفرحة به (اغنية) يترنم بها حتى الاطفال..يتشابك فرعا واصلا مع الدواخل ..ويشاركنا في (الانفاس)...ونقاسمه في الحالة ..والظروف ..والماهية.
المعلوم ان تلك المباراة ، التى نفذ فيها الهروب ، كانت قد انتهت بفوز الهلال بهدفين دون مقابل لمهند الطاهر ومدثر كاريكا...وهذا الانتصار يمكن يشغل البلد معارضة وحكومة ..مساجين وسجانين...ويمكن ان ينسى (الشعب) قاطبة هموم العيش وكدر الحياة وصعوبة الظروف...والمواصلات المافي ..والرغيفة التى كلما تضيق تضيق هي مساحة.
وقد كانت تلك الاهداف غطاء جيد لهروب قتلة غرانفيل من سجن كوبر ..اذ انشغل كل الناس بالاهداف بما في ذلك السجانين في سجن كوبر لتهرب المجموعة التى كان محكوم عليها بالاعدام.
اذن بالحسبة ..هدف مهند الطاهر ..وهدف مدثر كاريكا انقذ ناس من الاعدام واخرجهم من مصير كان ينتظرهم على حبال المشنقة.
ومثلما اهتم العالم كله بهذا الحدث... اهتموا بالمباراة التى كانت غطاء للهروب وربطوا اهداف الهلال التى سجلت في تلك المباراة سببا في (الهروب) الذي حدث اثناء مباراة القمة.
وربما من حسن حظ المجموعة التى هربت من سجن كوبر ونجحت في ذلك ان الهلال انتصر في تلك المباراة ..فلو كانت النتيجة غير انتصار الهلال لفشلت المجموعة في الهروب ..لأن خسارة الهلال او حتى تعادله تجعل كل الاشياء متكدرة ..والحظ عابس...ووشك يلعن قفاك.
من عجائب الاشياء ان انتصار الهلال في تلك المباراة كان اشبه بهذا الانتصار الذي تحقق في ليلة الجمعة.
نعم كان الانتصار السابق الذي نفذ فيه (الهروب) في ليلة الجمعة ايضا ..وكان الهلال متخلفا عن المريخ في النقاط في الدوري الممتاز ..وقد جاء الهلال الي تلك المباراة من اجل تقليص الفارق ونجح في ذلك عن طريق هدفين استقبلتهما شباك اكرم الهادي سليم...استقبال الفاتحين.
ومثلما قلص الهلال فارق النقاط في ممتاز هذا العام ...نجح في موسم 2010م الذي نفذ فيه الهروب في تقليص الفارق ..وكما استغلت المباراة وانتصار الهلال في تلك المباراة لتمرير اجندة خاصة ...استغلت مباراة امس الاول من قبل الحكومة ايضا لتمرير وتنفيذ اجندة صارت الحكومة عاجزة عن تحقيقها وتنفيذها إلا بعد ان انتصر الهلال وانصرف الشعب كليا نحو هذا الانتصار الذي تحقق فى ظروف صعبة وغاية في الكدر.
كتب الاستاذ (اسعد الطيب العباسي) الماما بالموضوع عن هروب قتلة (غرانفيل) في سلسلة نشرت له في مواقع مختلفة عن الهاربين توصيفا وتحديدا : (المحكوم عليهم بالإعدام محمد مكاوي و عبد الرؤوف وعبد الباسط ومهند في قضية مقتل الدبلماسي الأمريكي جون مايكل غرانفيل وسائقه السوداني عبد الرحمن الذين نفذوا أكبر وأجرأ وأعجب وأخطر عملية هروب تشهدها السجون السودانية منذ نشوئها فقد عوملوا داخل السجن معاملة مختلفة إذ تم عزلهم بمنأى عن محكومي الإعدام الآخرين و تم إيداعهم في قسم يسمى (جيم) و هو في الأصل قسم للمعاملة الخاصة به ثلاث غرف وفناء به مطبخ و حمامين والقسم جيم يتوسط القسم الشرقي في السجن وهو من أكثر أقسام السجن تحصينا لموقعه ولصغر حجمه، ولا ندري السبب في عزل هؤلاء السجناء من محكومي الإعدام الآخرين هل لخطورتهم أم لخطورة أفكارهم التي ربما ينقلونها إلى غيرهم من السجناء أم لأمر غير ذلك؟ لا ندري. على كل فإنهم كانوا مهابين في السجن سواء من حراسهم أم من بقية السجناء رغم ما كان يبدونه من لطف كل ما تيسر لهم الإلتقاء أو الإختلاط بسجناء آخرين وهذا الإختلاط يتم عادة أثناء خروج هؤلاء السجناء من زنازينهم إلى الأماكن المسموح لهم بالخروج إليها وهم يرزحون تحت قيودهم الحديدية).
ما يهمنا هنا ان هذه المجموعة تخيّرت مباراة الهلال ونفذت مخططها عبر اهداف مهند الطاهر وهوبته المدهشة ...وسحر مدثر كاريكا وهدفه (المثالي)...بغض النظر عن تفاصيل القضية ..والتى اعرف ان الكل ملم باطرافها.
الهروب في هذا التوقيت من قبل مجموعة متشددة دينيا ..ومنغلقة في معتقداتها يثبت مدى تأثير الهلال وقوته على واقع الحياة في السودان حتى ان تلك المجموعة تخيّرت اهداف مهند الطاهر ومدثر كاريكا للهروب عبرها...ان جاز التعبير.
وقد حملت بعد التقرير التلفزيونية ذلك الهروب تفاصيل مباراة الهلال والمريخ والانتصار الذي حققه الازرق على الاحمر في استاد المريخ.
عندما كان هيثم مصطفى قائدا وقتها للهلال يمرر (رسائله) وتمريرته المدهشة كان حرس سجن كوبر ..ينصرف دهشة في التمريرة..وكانت المجموعة تمر عبر الانفاق وتحفر للخروج ..ومهند الطاهر في استاد المريخ يعلن عن (هوبته) الطروبة.
والعقيد (د) في بوابة السجن العتيق يشرب في الشاي ..ويمد لسانه ساخرا ومستمتعا بما يحدث في استاد المريخ من اهداف.
وتفلت المجموعة الهاربة من مطب الي كمين ..ومدثر كاريكا في استاد المريخ يفعل الاعاجب كما فعلها في ليلة الجمعة الماضية ..فات الكبار والقدرو ..وقعد ناس باسكال في مواعينهم ..وعمل الممكن وألا ممكن...المتاح والمستحيل..والبعيد والقريب في كرة قدم يقال بعيدا عن ابناء الهلال انها (مجنونة).
لا تتعقل هذه المجنونة إلا في حضرتكم وهي في جناب سيّد الناس وخادم الهلال مدثر الطيب كاريكا...(فريد زمانه ووحيد عصره).
فلتت المجموعة وهربت وتعدت كل مكامن الخطر ...عندما غزل الهلال فنه ونثر ابداعه في ربوع ام در ..غاشيا كل الامكنة والازمنة بعطر انتصاره الشفيف.
هذا هو الهلال يمنح عند الانتصار كل ذو حاجة حاجته ..ويفرد اجنحته بالفرحة ..والخير ...والغنا.
مباراة الخميس التى كانت في ليلة الجمعة الماضية ..كانت مسرحا اخر للفرح ..غازل انتصار الهلال الناس في الطرقات بالطريقة نفسها التى وصفها الدكتور بشرى الفاضل في (حكاية البنت التى طارت عصافيرها).
وقد طارت كل عصافير المريخ ..بما في ذلك (ضفر)..واكرم الهادي سليم حبيس مقاعد البدلاء ..والذي اختزل دوره واختصره في (رقصة) او (عرضة) عندما يسجل المريخ هدفا.
هذا كل دور اكرم الهادي سليم في المريخ ...اقصى ما يمكن ان يقدمه في هذا التوقيت هو ان يقدم (قارورة مياه) لكابتن الهلال السابق هيثم مصطفى.
منحنا الهلال شيئا من الفرح الغائب ...كأن الجنوب يعود لنا في تلك الامسية ..واتير توماس ..يتألق بقامته الابنوسية ..وفدائيته الكبيرة.
نسى الناس في انتصار الهلال حاجتهم ..ووجعوهم ...وسخف السياسة وقبحها الذي يقودنا الي مقاصل شتي ..تارة بالانفصال وتارة برفع الدعم عن المحروقات.
وهنا مربط الفرس ..مثلما استغل قتلة الاميركي غرانفيل مباراة الهلال واهداف مهند الطاهر ومدثر كاريكا في المريخ ..استغلت الحكومة بنفس الفهم ..اهداف عمر بخيت وعبداللطيف ومحمد بشير بشة لترفع الدعم عن المحروقات.
يا دوب لقوا فرصتهم ....وقرروا يطبقوا القرار الذي اتخذوه قبل فترة وفشلوا في تنفيذه ...إلا بعد ان انتصر الهلال ...ونسى الشعب ولع الحاجة وقهر العوزة.
كانت الكورة التى (رفعها) عمر بخيت ..وتهادت في الشباك الحمراء ..ينظر اليها عصام الحضري وهو تغازل الشباك كأنه غير معني بذلك ..وليس هو وكيلا للمريخ في هذه اللحظة للحراسة.
رفعت عمر بخيت دي ..رفعت (الضغط) للحضري واخرين...ورفعت الحكومة بعدها (الدعم) من المحروقات ..ليكون (الشعب) كما الحضري تماما يتفرج على (رفع الدعم عن المحروقات) كما تفرج عصام الحضري في كورة عمر بخيت الي جاءت الي شباك المريخ من بلاد طيره عجمي.
من اخر الدينا ..من اقاصي الدنيا جيتي ..كما يغنينا محمد وردي من كلمات حبيب الشعب محجوب شريف في (جميلة ومستحيلة) وقد كانت اهداف الهلال حقا جميلة ومستحيلة.
يا محجوب ..الجماعة رفعوا الدعم من المحروقات ...زادوا الحريق ..والبلد ما ناقصة (محروقات)..عشان ترفعوا دعمكم عنها.
هذا الفرح الذي نسجه الهلال كما ينسج النساجون في البوادي والقري ..واشباه المدن ..قابلته الحكومة بوجع كبير ...وهو رفع الدعم عن المحروقات.
انتصر الهلال نعم.. لكن (الوجع) من ذلك القرار مازال يمتدد في الدوخل والجروح ..فيحصد ابناء الوطن شقاوة ..ومجلس المريخ واعلامهم الطائش يتحدث عن اتلاف جمهور الهلال لكرسي او بضع كراسي في استاد المريخ.
اللقمة ..مملحة بالويكة ..او معطونة بموية الفول ..او (مغمسة) في العدس سوف تقبل القسمة على اتنين بسبب (رفع الدعم عن المحروقات).
نص ليك ..ونص للحكومة.
عليك ان تنقص من اليوم وصاعدا ..(ملعقة) سكر من كباية الشاي ان كنت تشرب في الشاي (ملعقة واحدة)..فقد رفعوا الدعم.
يحاولوا ان يستغلوا حلاوة انتصار الهلال ..وروعة هدف عبداللطيف بويا الذي يحتاج الحضري ان ينقص من عمره (20) سنة عشان يقدر يصد التهديفة التى وصلته بلاد ما هنا.
لا اريد ان افسد فرحة الناس ...ب (رفع الدعم من المحروقات) كما فعلت الحكومة ..لكن بالتأكيد للحديث بقية.
تابع اعادة المباراة لتمسح كل الاوجاع ....والطشاش الذي يعاني منه عصام الحضري بعد السادسة مساء.
