سودارس : اقرار الدعيع يا دوب بجيب ليكم حارس بري

الخارجية ترحب بالبيان الصحفي لجامعة الدول العربية ألمانيا تدعو لتحرك عاجل: السودان يعيش أسوأ أزمة إنسانية ميليشيا الدعم السريع ترتكب جريمة جديدة بعثة الرابطة تودع ابوحمد في طريقها الى السليم ياسر محجوب الحسين يكتب: الإعلام الأميركي وحماية الدعم السريع الفوارق الفنية وراء الخسارة بثلاثية جزائرية نادي القوز ابوحمد يعلن الانسحاب ويُشكّل لجنة قانونية لاسترداد الحقوق كامل ادريس يلتقي نائب الأمين العام للأمم المتحدة بنيويورك شاهد بالفيديو.. شباب سودانيون ينقلون معهم عاداتهم في الأعراس إلى مصر.. عريس سوداني يقوم بجلد أصدقائه على أنغام أغنيات فنانة الحفل ميادة قمر الدين السعودية..فتح مركز لامتحانات الشهادة السودانية للعام 2025م محرز يسجل أسرع هدف في كأس أفريقيا شاهد بالصور.. أسطورة ريال مدريد يتابع مباراة المنتخبين السوداني والجزائري.. تعرف على الأسباب!! شاهد بالفيديو.. الطالب صاحب المقطع الضجة يقدم اعتذاره للشعب السوداني: (ما قمت به يحدث في الكثير من المدارس.. تجمعني علاقة صداقة بأستاذي ولم أقصد إهانته وإدارة المدرسة اتخذت القرار الصحيح بفصلي) وزير الداخلية التركي يكشف تفاصيل اختفاء طائرة رئيس أركان الجيش الليبي سر عن حياته كشفه لامين يامال.. لماذا يستيقظ ليلاً؟ "سر صحي" في حبات التمر لا يظهر سريعا.. تعرف عليه تقارير: الميليشيا تحشد مقاتلين في تخوم بلدتين شاهد بالصورة والفيديو.. المذيعة تسابيح خاطر تستعرض جمالها بالفستان الأحمر والجمهور يتغزل ويسخر: (أجمل جنجويدية) شاهد بالصورة.. الناشط محمد "تروس" يعود لإثارة الجدل ويستعرض "لباسه" الذي ظهر به في الحفل الضجة والي الخرطوم: عودة المؤسسات الاتحادية خطوة مهمة تعكس تحسن الأوضاع الأمنية والخدمية بالعاصمة فيديو يثير الجدل في السودان إسحق أحمد فضل الله يكتب: كسلا 2 ولاية الجزيرة تبحث تمليك الجمعيات التعاونية الزراعية طلمبات ري تعمل بنظام الطاقة الشمسية شرطة ولاية نهر النيل تضبط كمية من المخدرات في عمليتين نوعيتين الكابلي ووردي.. نفس الزول!! حسين خوجلي يكتب: الكاميرا الجارحة احذر من الاستحمام بالماء البارد.. فقد يرفع ضغط الدم لديك فجأة في افتتاح منافسات كأس الأمم الإفريقية.. المغرب يدشّن مشواره بهدفي جزر القمر استقالة مدير بنك شهير في السودان بعد أيام من تعيينه مكافحة التهريب بكسلا تضبط 13 ألف حبة مخدرات وذخيرة وسلاح كلاشنكوف كيف تكيف مستهلكو القهوة بالعالم مع موجة الغلاء؟ 4 فواكه مجففة تقوي المناعة في الشتاء اكتشاف هجوم احتيالي يخترق حسابك على "واتسآب" دون أن تشعر ريال مدريد يزيد الضغط على برشلونة.. ومبابي يعادل رقم رونالدو رحيل الفنانة المصرية سمية الألفي عن 72 عاما قبور مرعبة وخطيرة! شاهد بالصورة.. "كنت بضاريهم من الناس خائفة عليهم من العين".. وزيرة القراية السودانية وحسناء الإعلام "تغريد الخواض" تفاجئ متابعيها ببناتها والجمهور: (أول مرة نعرف إنك كنتي متزوجة) حملة مشتركة ببحري الكبرى تسفر عن توقيف (216) أجنبي وتسليمهم لإدارة مراقبة الأجانب عزمي عبد الرازق يكتب: عودة لنظام (ACD).. محاولة اختراق السودان مستمرة! انخفاض أسعار السلع الغذائية بسوق أبو حمامة للبيع المخفض تونس.. سعيد يصدر عفوا رئاسيا عن 2014 سجينا ضبط أخطر تجار الحشيش وبحوزته كمية كبيرة من البنقو البرهان يصل الرياض ترامب يعلن: الجيش الأمريكي سيبدأ بشن غارات على الأراضي الفنزويلية قوات الجمارك بكسلا تحبط تهريب (10) آلاف حبة كبتاجون مسيّرتان انتحاريتان للميليشيا في الخرطوم والقبض على المتّهمين إسحق أحمد فضل الله يكتب: (حديث نفس...) حريق سوق شهير يسفر عن خسائر كبيرة للتجار السودانيين مياه الخرطوم تكشف تفاصيل بشأن محطة سوبا وتنويه للمواطنين محافظ بنك السودان المركزي تزور ولاية الجزيرة وتؤكد دعم البنك لجهود التعافي الاقتصادي الصحة الاتحادية تُشدد الرقابة بمطار بورتسودان لمواجهة خطر ماربورغ القادم من إثيوبيا مقترح برلماني بريطاني: توفير مسار آمن لدخول السودانيين إلى بريطانيا بسهولة الشتاء واكتئاب حواء الموسمي عثمان ميرغني يكتب: تصريحات ترامب المفاجئة .. "كرتي والكلاب".. ومأساة شعب! ما الحكم الشرعى فى زوجة قالت لزوجها: "من اليوم أنا حرام عليك"؟ حسين خوجلي: (إن أردت أن تنظر لرجل من أهل النار فأنظر لعبد الرحيم دقلو) حسين خوجلي يكتب: عبد الرجيم دقلو.. إن أردت أن تنظر لرجل من أهل النار!!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

اقرار الدعيع يا دوب بجيب ليكم حارس بري

قوون نشر في قوون يوم 15 - 12 - 2013

مرات وقت تمشي السوق ، وانت شايل ليك (قروش شوية)...وتكون عاوز ليك (بنطلون وقميص)..يقوم صاحب محل الملبوسات ..يقول ليك والله قروشك دي بتجيب ليك شرابات...(جوارب) يعني...بنطلون وقميص لا بتجيبو ليك ولا بنغشك.

ومرات تشيل ليك قروش (برضو شوية) ...وتمشي دلالة العربات ، يوم الجمعة من سبعة صباحاً عشان تشتري ليك عربية (إن شاء الله موديل 73)...يقوم السمسار الشفت يقول ليك قروشك دي بتجيب ليك (عجلة) بس ، عربية ما بتجيبها...(عامل سنونك ديل متل صفائح الجبنة).

اول صفائح الجبنة بتعمل كدا.

ومرات تمشي المطعم ..نفسك في سمك (زي كل خلق الله)...تعاين لقائمة اسعار المأكولات ..بتلقى قروشك الفي جيوبك الخمسة ..(اربعة في البنطلون وواحد في القميص) بتجيب ليك طلب فول ...ولو عاوز تشبع كمان إلا تقلب الفول (بوش) عشان تزيد الرغيف وتتمها بي موية الفول.

الزمن دا طبعاً (الرغيفة الزيادة) عاوزة ليها سلفية.

ومرات تغترب بره السودان سبع سنوات ..عشان تعرس ...ترجع تلقى البلد ولعت نار.

حصاد الغربة وقروشك العملتها في الغربة كلها ما بتعرس ليك ..يا دوب كدا بتخطب ليك...(ملوة الفحم بقت بالشيء الفلاني).

ملوة الفحم الدخلها هنا شنو؟.

والخطوبة ذاتها إلا تخطب بنت عمك...(عشان هي الوحيدة البتستحمل قروشك الشوية دي).

تخطب ..وترجع تتغرب تاني.

خلوها القروش.

مرات بتمتحن الجامعة ...وانت عاوز الطب ..تقوم تجيب نسبة نجاح 53 %.

ناس القبول يقولوا ليك مجموعك دا ما بدخلك طب (دا كافتريا كلية الطب عشان تدخل تشرب ليك عصير وتطلع ما بدخلك) ...يا تدخل السوق ..يا تشوف ليك (دبلومة كاربة) كدا تقرأها.

طبعاً ما في دبلومة (كاربة)....لكن عشان الموضوع يبقى ليك مقبول ..ويتبلع ليك...بقولوا ليك (كاربة).

في ناس في الدنيا دي ..شغلتهم بس يصلحوا ليك الحاجات الكعبة.

يعني لو قلت ليهم ماشي اغترب في الصومال الكلها حرب وضرب دي ..يقوموا يقولوا ليك : (والله دا أحسن اغتراب..يا زول سافر اتخارج بس من البلد دي).

ولو قلت ليهم عاوز اعرس ..يقولوا ليك يا زول انت ما عاقل ..عرس شنو في الزمن الصعب دا؟...والله تجيب ليك (مرا) المسكولات تقعد تحسبها ليك...(دا منو؟ وضارب ليك وعاوز شنو في الوقت دا؟).

في ناس كدا..تقول ليهم عاوز اخلي الجامعة ..وادخل السوق ..يقولوا ليك والله دي احسن حاجة تعملها ...دراسة شنو؟...هم الناس القرأوا عملوا شنو؟...البلد كلها بقت (شهادات) زي (البطاطس).

طبعاً ما في أي علاقة بين الشهادات الكتيرة والبطاطس.

بمناسبة (العلاقة) دي ...قالوا ليك في واحد لابس ليه (كرفتة) ما عندها أي علاقة بالبدلة.

ولا عندها علاقة بالقميص...ولا بالحذاء.

كرفتة (مشاترة) شديد....زي الحفلة بالرق في قاردن سيتي.

واحد من الجماعة البدخلوا في أي حاجة ..قال ليه : (يا أبو الشباب هسع علاقة الكرفتة باللبسة اللابسها دي شنو؟).

صاحب الكرفتة زول قرفان ..وفارقة معاها ..قال ليه (علاقة) شنو؟..خلاص عاوزين تعملوا ليكم (علاقة) بين الكرفتة والبدلة...أنا عاوز (اعقد) عليهم ..ولاّ عاوز اخطب ليهم...(العلاقة) أعمل بيها شنو؟.

العلاقة نحن في الجامعة ما بنعملها ...نجي نعملها في (الكرفتة).

نهاية الكلام الكتير دا ...ناس المريخ عملوا ليهم (اقرار) مع عبدالرحمن الدعيع حارس الاهلي شندي ...وخطفوا عبدالرحمن حمدي حارس بري.

دا فهم شنو يا جماعة.

تعملوا (الاقرار) مع عبدالرحمن الدعيع وتسجلوا عبدالرحمن حمدي.

الموضوع دا من البداية ما عاوز ليه (اقرار)...ولا محتاج لتلتلة دي كلها.

بعدين (الاقرارات) دي انتوا جبتوها من وين؟.

انتوا بتخترعوا ليكم حاجة من رأسكم.

بتشرعوا براكم.

ما في حاجة اسمها (اقرارات).

الاتحاد العام نفسه ...ما اقر بهذا الاجراء في هذه التسجيلات.

الاقرارات دي حاجة كانوا بعملوها زمان...وقد اظهرت وافرزت الكثير من السلبيات والمشاكل. لذلك تم إلغاؤها بعد ذلك.

المضحك أن (الاقرارات) عندما كان ساري العمل بها..لم تكن ملزمة..وقد تم اختراقها اكثر من مرة.

ناس المريخ الان عاوزين براهم من رأسهم كدا ..يعملوا ب (الاقرارات).

جابوا ليهم ورقة ..وجابوا زكي عباس وعبدالرحمن الدعيع وقالوا ليه وقع لينا هنا.

الدعيع عارف الكلام دا فارغ ..وقع ليهم في الاقرار ..وقال ليهم اقراركم دا بلوه واشربوا مويته.

المضحك ناس المريخ قالوا ح يمشوا (الفيفا).

أول مرة نسمع ناس المريخ يقولوا ح نمشي الفيفا.

الاتحاد العام هنا ...ما بحوجهم للفيفا.

لكن المرة دي قالوا ماشيين الفيفا ...(والله قوية).

بالله انتوا بتعرفوا (الفيفا).

كدا جربوا وامشوا الفيفا ..شوفوا الفيفا ح تقول ليكم شنو؟.

أول حاجة الفيفا ح تقول ليكم عبدالرحمن الدعيع دا منو؟.

طبعاً ح تقولوا ليهم حارس مرمى.

الفيفا ح تقول ليكم بيلعب وين؟.

ح تقولوا ليهم في الاهلي شندي.

الفيفا ح تقول ليكم..طيب المشكلة وين؟...براكم قلتوا بيلعب في الاهلي شندي ..القضية في شنو؟.

بعد شوية ..وبعد أن تفحص الفيفا (الاقرار) ح تقول ليكم (عبدالصمد) دا شنو؟.

ح تقولوا ليها عبدالصمد دا الأمين العام للمريخ ..(اتذكرت نائب رئيس المريخ).

الفيفا ح تقول ليكم عبدالصمد دا ارتكب خطأ شنيع.

تقولوا ليها كيف؟.

تقول ليكم الزول دا موقع في الحتة التى يفترض أن يوقع فيها عبدالرحمن الدعيع.

وعبدالرحمن الدعيع موقع في الحتة المفروض يوقع فيها عبدالصمد.

لذلك (اقراركم) دا ...(بطيخة) ما بجيبها ليكم...ولا تغشوا نفسكم.

الاقرار دا مضروب.

ناس المريخ التسجيلات دي الظاهر انهم كان عندهم فيها (حول) شوية.

الجماعة ديل عاوزين يسجلوا (مدثر كاريكا)...قاموا سجلوا تراوري.

الفرق كبير طبعاً بين كاريكا وتراوري.

المريخاب السنة دي عملوا (اقرار) مع عبدالرحمن الدعيع ...خطفوا عبدالرحمن حمدي حارس بري.

قالوا ليك المريخ في هذه التسجيلات كان عاوز يعيّر محمد موسى إلى الاهلي عطبرة ..قاموا اعاروا مفضل إلى الموردة.

ما في أي علاقة بين الاهلي عطبرة والموردة...وما في أي علاقة بين محمد موسى ومفضل.

أنا خايف على الطريقة دي ...وحسب ما معلن عن أن يلعب المريخ مباراة مع بايرن ميونخ..أن يلعبوا مع الحرية.

الناس ديل بركزوا في حتة ...وبضربوا في حتة تانية.

زي واحد كدا قال لي زميلته في الجامعة والله أنا معجب بيك شديد..عشان كدا ح اتقدم وأطلب يد اختك من أبوك.

زميلتو قالت ليه وعلاقة أنك تعجب بي وتطلب يد اختى شنو؟.

صاحبكم قال ليها أخير أنا ..اعجبت بيك وطلبت يد اختك ...انتي ما بتشوفوا الأحوال كيف في الجامعات ...الطلاب يعجبوا بي زميلاتهم الطالبات في الجامعة ..وبعدين يمشوا يعرسوا بنات اهلهم في البلد...هسع انا عاوز اطبق معاك النظرية لكن بي احترام وتقدير.

المريخاب ..طبقوا نفس النظرية شبكونا ليك في الجرايد ..وقعنا اقرار مع الدعيع ...وجمال الوالي يوجه ضربة قاضية للارباب...والمريخ يضم الدعيع.

وجمال الوالي حسم موضوع الدعيع.

وعبدالصمد شبكنا ليك (مؤتمرات صحفية)...الدعيع ..الدعيع ..الدعيع.

وفي النهاية خطفوا عبدالرحمن حمدي حارس بري.

والله عبدالرحمن دا بدون خطف ممكن يسجل ..الموضوع ما عاوز الاجتهاد دا كلو.

الشيء المحيرني..(الاقرار).

الاقرار مالو؟.

الاقرار دا لو شيلتوا ومشيتوا بيهو الفيفا ..بقوموا ناس الفيفا يسألوكم من (البصمة).

ساكت بدخلوا نفسكم في (احراجات).

عشان كدا نوموا بي مغصتكم دي ..واحسن ليكم ما تفتحوا الملفات دي.

عشان الموضوع دا لو مشى لي قدام بجيب ناس مصطفى توفيق وزكي عباس.

احسن تقفلوه قبلو ..وتكتفوا ب (عبدالرحمن حمدي).

عبدالرحمن حمدي مالو...احسن حارس.

بعد (10) سنوات ممكن يبقى الحارس الاول.

اصبروا عليه...وادوه فرصة.

انتوا الفرصة اديتوها عبدالصمد ما تدهوا عبدالرحمن حمدي.

عبدالرحمن حمدي دا اخو حمدي غيث ...(والله ما في أي علاقة)...انت ما تقول ولدو تبقى منطقية اكتر.

ملحوظة : شفتوا (البرد) دا كيف؟...البرد دا برد العجب يمكن.

هوامش
التسجيلات باقى ليها (5) يوم.

وناس الهلال لسع في موضوع فيصل العجب.

مفروض ناس الهلال يستفيدوا من وقتهم ويجنسوا كوليبالي وسيدي بيه..عشان يكون فيما تبقى من أيام التسجيلات عندهم فرض اضافة (3) محترفين.

إلى الان الهلال بعيد عن ايجاد حلول للاطراف.

انشغلوا وانصرفوا كلياً نحو فيصل العجب.

يا قاقارين الموضوع دا كدا ما بمشي.

ما تخموا الناس ساكت.

إلى الان الهلال أضاف فقط كوليبالي ووليد علاءالدين...في الوقت الذي فقد فيه تراوري.

كاريكا وخليفة ومساوي ومحمد عبدالرحمن وسيدي بيه لا تعتبر اضافات وإنما تجديد تعاقد.

عاوزين اضافات حقيقية لكشف الهلال.

نحن نقدر ونثمن المجهودات التى قام بها المجلس وحله للكثير من القضايا ..وسداده حقوق اطراف عديدة.

لكن المحك الحقيقي يبقى في الاضافات الجديدة.

الهلال يحتاج إلى نجوم جديدة من أجل عودة الجماهير وعودة الروح.

عاوزين مواهب جديدة في كشف الهلال.

التسجيلات باقى ليها (5) أيام.

انت سيسيه دا طيارتو (كرت)....الزول دا طيارتو ما (خط).

كل مرة يقولوا ليك تأجل وصوله.

نتمنى أن يكون وصل (فجرًا).

ربيع اللافي ...على الهلال ألا يقفل ملفه.

ما في محترف جيد أقل من هذا السعر حتى لو كان سوف يلعب لموسم واحد.

تراوري في (6) شهور فقط أخذ 300 ألف دولار.

الاطراف والدفاع ..قبل الهجوم والوسط في الاولية.

الدوري المصري فيه أكثر من محترف جيد ...يمكن الاستعانة بهم خاصة في ظل توقف الدوري وعدم استقرار الاوضاع شمال الوادي.

عبدالرحمن الدعيع قال اختار الاهلي شندي عشان عاوز يجيب ليه بطولة خارجية.

الدعيع عارف لو مشى المريخ ما في طريقة للحاجات دي.

عرفتها يا الدعيع.

انتوا وين سيحة؟.

رأيك شنو في اعادة الدعيع لتوقيعه في الاهلي شندي.

هسع سيسيه يقول ليك في اول تصريح صحفي له اتيت للهلال من اجل الاحتراف في اوروبا.

كلامكم دا حفظناه نحن.

.....

عاجل :
البرد دا ما برد تسجيلات.

انقر هنا لقراءة الخبر من مصدره.