مرات وقت تمشي السوق ، وانت شايل ليك (قروش شوية)...وتكون عاوز ليك (بنطلون وقميص)..يقوم صاحب محل الملبوسات ..يقول ليك والله قروشك دي بتجيب ليك شرابات...(جوارب) يعني...بنطلون وقميص لا بتجيبو ليك ولا بنغشك. ومرات تشيل ليك قروش (برضو شوية) ...وتمشي دلالة العربات ، يوم الجمعة من سبعة صباحاً عشان تشتري ليك عربية (إن شاء الله موديل 73)...يقوم السمسار الشفت يقول ليك قروشك دي بتجيب ليك (عجلة) بس ، عربية ما بتجيبها...(عامل سنونك ديل متل صفائح الجبنة).
اول صفائح الجبنة بتعمل كدا.
ومرات تمشي المطعم ..نفسك في سمك (زي كل خلق الله)...تعاين لقائمة اسعار المأكولات ..بتلقى قروشك الفي جيوبك الخمسة ..(اربعة في البنطلون وواحد في القميص) بتجيب ليك طلب فول ...ولو عاوز تشبع كمان إلا تقلب الفول (بوش) عشان تزيد الرغيف وتتمها بي موية الفول.
الزمن دا طبعاً (الرغيفة الزيادة) عاوزة ليها سلفية.
ومرات تغترب بره السودان سبع سنوات ..عشان تعرس ...ترجع تلقى البلد ولعت نار.
حصاد الغربة وقروشك العملتها في الغربة كلها ما بتعرس ليك ..يا دوب كدا بتخطب ليك...(ملوة الفحم بقت بالشيء الفلاني).
ملوة الفحم الدخلها هنا شنو؟.
والخطوبة ذاتها إلا تخطب بنت عمك...(عشان هي الوحيدة البتستحمل قروشك الشوية دي).
تخطب ..وترجع تتغرب تاني.
خلوها القروش.
مرات بتمتحن الجامعة ...وانت عاوز الطب ..تقوم تجيب نسبة نجاح 53 %.
ناس القبول يقولوا ليك مجموعك دا ما بدخلك طب (دا كافتريا كلية الطب عشان تدخل تشرب ليك عصير وتطلع ما بدخلك) ...يا تدخل السوق ..يا تشوف ليك (دبلومة كاربة) كدا تقرأها.
طبعاً ما في دبلومة (كاربة)....لكن عشان الموضوع يبقى ليك مقبول ..ويتبلع ليك...بقولوا ليك (كاربة).
في ناس في الدنيا دي ..شغلتهم بس يصلحوا ليك الحاجات الكعبة.
يعني لو قلت ليهم ماشي اغترب في الصومال الكلها حرب وضرب دي ..يقوموا يقولوا ليك : (والله دا أحسن اغتراب..يا زول سافر اتخارج بس من البلد دي).
ولو قلت ليهم عاوز اعرس ..يقولوا ليك يا زول انت ما عاقل ..عرس شنو في الزمن الصعب دا؟...والله تجيب ليك (مرا) المسكولات تقعد تحسبها ليك...(دا منو؟ وضارب ليك وعاوز شنو في الوقت دا؟).
في ناس كدا..تقول ليهم عاوز اخلي الجامعة ..وادخل السوق ..يقولوا ليك والله دي احسن حاجة تعملها ...دراسة شنو؟...هم الناس القرأوا عملوا شنو؟...البلد كلها بقت (شهادات) زي (البطاطس).
طبعاً ما في أي علاقة بين الشهادات الكتيرة والبطاطس.
بمناسبة (العلاقة) دي ...قالوا ليك في واحد لابس ليه (كرفتة) ما عندها أي علاقة بالبدلة.
ولا عندها علاقة بالقميص...ولا بالحذاء.
كرفتة (مشاترة) شديد....زي الحفلة بالرق في قاردن سيتي.
واحد من الجماعة البدخلوا في أي حاجة ..قال ليه : (يا أبو الشباب هسع علاقة الكرفتة باللبسة اللابسها دي شنو؟).
صاحب الكرفتة زول قرفان ..وفارقة معاها ..قال ليه (علاقة) شنو؟..خلاص عاوزين تعملوا ليكم (علاقة) بين الكرفتة والبدلة...أنا عاوز (اعقد) عليهم ..ولاّ عاوز اخطب ليهم...(العلاقة) أعمل بيها شنو؟.
العلاقة نحن في الجامعة ما بنعملها ...نجي نعملها في (الكرفتة).
نهاية الكلام الكتير دا ...ناس المريخ عملوا ليهم (اقرار) مع عبدالرحمن الدعيع حارس الاهلي شندي ...وخطفوا عبدالرحمن حمدي حارس بري.
دا فهم شنو يا جماعة.
تعملوا (الاقرار) مع عبدالرحمن الدعيع وتسجلوا عبدالرحمن حمدي.
الموضوع دا من البداية ما عاوز ليه (اقرار)...ولا محتاج لتلتلة دي كلها.
بعدين (الاقرارات) دي انتوا جبتوها من وين؟.
انتوا بتخترعوا ليكم حاجة من رأسكم.
بتشرعوا براكم.
ما في حاجة اسمها (اقرارات).
الاتحاد العام نفسه ...ما اقر بهذا الاجراء في هذه التسجيلات.
الاقرارات دي حاجة كانوا بعملوها زمان...وقد اظهرت وافرزت الكثير من السلبيات والمشاكل. لذلك تم إلغاؤها بعد ذلك.
المضحك أن (الاقرارات) عندما كان ساري العمل بها..لم تكن ملزمة..وقد تم اختراقها اكثر من مرة.
ناس المريخ الان عاوزين براهم من رأسهم كدا ..يعملوا ب (الاقرارات).
جابوا ليهم ورقة ..وجابوا زكي عباس وعبدالرحمن الدعيع وقالوا ليه وقع لينا هنا.
الدعيع عارف الكلام دا فارغ ..وقع ليهم في الاقرار ..وقال ليهم اقراركم دا بلوه واشربوا مويته.
المضحك ناس المريخ قالوا ح يمشوا (الفيفا).
أول مرة نسمع ناس المريخ يقولوا ح نمشي الفيفا.
الاتحاد العام هنا ...ما بحوجهم للفيفا.
لكن المرة دي قالوا ماشيين الفيفا ...(والله قوية).
بالله انتوا بتعرفوا (الفيفا).
كدا جربوا وامشوا الفيفا ..شوفوا الفيفا ح تقول ليكم شنو؟.
أول حاجة الفيفا ح تقول ليكم عبدالرحمن الدعيع دا منو؟.
طبعاً ح تقولوا ليهم حارس مرمى.
الفيفا ح تقول ليكم بيلعب وين؟.
ح تقولوا ليهم في الاهلي شندي.
الفيفا ح تقول ليكم..طيب المشكلة وين؟...براكم قلتوا بيلعب في الاهلي شندي ..القضية في شنو؟.
بعد شوية ..وبعد أن تفحص الفيفا (الاقرار) ح تقول ليكم (عبدالصمد) دا شنو؟.
ح تقولوا ليها عبدالصمد دا الأمين العام للمريخ ..(اتذكرت نائب رئيس المريخ).
الفيفا ح تقول ليكم عبدالصمد دا ارتكب خطأ شنيع.
تقولوا ليها كيف؟.
تقول ليكم الزول دا موقع في الحتة التى يفترض أن يوقع فيها عبدالرحمن الدعيع.
وعبدالرحمن الدعيع موقع في الحتة المفروض يوقع فيها عبدالصمد.
لذلك (اقراركم) دا ...(بطيخة) ما بجيبها ليكم...ولا تغشوا نفسكم.
الاقرار دا مضروب.
ناس المريخ التسجيلات دي الظاهر انهم كان عندهم فيها (حول) شوية.
الجماعة ديل عاوزين يسجلوا (مدثر كاريكا)...قاموا سجلوا تراوري.
الفرق كبير طبعاً بين كاريكا وتراوري.
المريخاب السنة دي عملوا (اقرار) مع عبدالرحمن الدعيع ...خطفوا عبدالرحمن حمدي حارس بري.
قالوا ليك المريخ في هذه التسجيلات كان عاوز يعيّر محمد موسى إلى الاهلي عطبرة ..قاموا اعاروا مفضل إلى الموردة.
ما في أي علاقة بين الاهلي عطبرة والموردة...وما في أي علاقة بين محمد موسى ومفضل.
أنا خايف على الطريقة دي ...وحسب ما معلن عن أن يلعب المريخ مباراة مع بايرن ميونخ..أن يلعبوا مع الحرية.
الناس ديل بركزوا في حتة ...وبضربوا في حتة تانية.
زي واحد كدا قال لي زميلته في الجامعة والله أنا معجب بيك شديد..عشان كدا ح اتقدم وأطلب يد اختك من أبوك.
زميلتو قالت ليه وعلاقة أنك تعجب بي وتطلب يد اختى شنو؟.
صاحبكم قال ليها أخير أنا ..اعجبت بيك وطلبت يد اختك ...انتي ما بتشوفوا الأحوال كيف في الجامعات ...الطلاب يعجبوا بي زميلاتهم الطالبات في الجامعة ..وبعدين يمشوا يعرسوا بنات اهلهم في البلد...هسع انا عاوز اطبق معاك النظرية لكن بي احترام وتقدير.
المريخاب ..طبقوا نفس النظرية شبكونا ليك في الجرايد ..وقعنا اقرار مع الدعيع ...وجمال الوالي يوجه ضربة قاضية للارباب...والمريخ يضم الدعيع.