ضفر ...رجع تاني يلبس هدوم المدرسة ، والشدّة والشراب ..ويشيل (الشنطة) في ضهرو ...وينتظر الترحيل. بتعرفوا (الشدّة)...ما تقعدوا تصنقعوا لي زي (جدول تسعة). اول جدول تسعة بصنقع. الصنقعة الحايمة الايامات دي شنو؟. الزول دا شفتوا بدأ يظهر في مباريات المريخ الاخيرة. المعنى (ضفر) اصبح يشارك في المباريات التى لعبها المريخ اخيرا. رجعتوا تاني لكراس الجرورة...وفتة العدس...ومديدة الحلبة. المعنى تاني ...ما عندهم ثقة في علي جعفر. ولا بجاملوا في حاجة زي دي. باسكال..قالوا ليه اتخارج لينا من هنا ..بقى يلعب في الوسط. باسكال دا انا من شفتو ...قلت (صبغتو) دي ما صبغة مدافع..صبغتو دي صبغة لاعب وسط...او شيّال في كورس. هسع شيّال الكورس الدخلو في العملية المعقدة دي شنو؟. ضفر قنعو منو. الظاهر عاوزين يضحوا بيه في (الدمازين). كشف المشاطيب السنة دي قالوا بطلع في الدمازين. موش ناس المريخ ديل شالوا الكوكي بعد مباراة الظفرة والمريخ ..من حتتو. كافحوه قبلو. هسع النظرية نفس الشيء. الشطب المرة دي في (الدمازين). يا ضفر لو شطبوك في (دمازينك) إلا تبقى (سماكي). البرجعك من الدمازين ما بتلقى. يا ضفر انت عاوز الحقيقة ...وإلا عاوز الجنبها. نكون واضحين معاك. كورتك دي (بص ترحيل) ما بتسوقك ليه. كورتك دي في (النرويج) بتفرجو بيها. لا بتلعب لا حاجة. نكضب عليك يعني. اتخارج من بدري. الدمازين الايامات دي قالوا كلها (سيدي بيه). البتهبشو كلو يقول ليك (سيدي بيه). سيدي بيه بالجبنة ..سيدي بيه سادة ..سيدي بيه بعد الفطور ..سيدي بيه مع الشاي ...سيدي بيه الساعة اتناشر ونص. كلو ..كلو سيدي بيه. سيدي بيه عمل ...سيدي بيه فعل ..سيدي بيه سوا...سيدي بيه رفع الدعم عن المحروقات. هسع عليكم الله لو ما ساكت ...الدخل (رفع الدعم من المحروقات) هنا شنو؟. انت ساكت عاوز تلخبط. ما تبقى لينا زي اللبن المقنن. المشكلة ما في رفع الدعم من المحروقات. اتعودنا. المشكلة في البعمل فيه سيدي بيه الايامات دي. قالوا ليك ضفر من (الخلعة) بقى زي الكوتشينة الدكوها. ضفر ..بقى موزع ورقة ..ورقة ..المسكين قلبو طار ..بقى خفيف ...لو الباب ضرب ساكت ...يقول دا سيدي بيه. يقوم من نومو يكورك ..سيدي بيه ..سيدي بيه ..سيدي بيه. يغطوه بالبطانية ...يرجف زي القصبة. المسكين بردان. سيدي بيه يخلع...معذور والله. ناس المريخ قالوا يطمنوه. عارفين عملوا شنو؟. والله ما عارفين...ما تقعدوا تقطعوا لي من رأسكم ساكت. احلف عليها دي. والله انتوا ما عارفين ..ما تقولوا لي الحصاحيصا ..ومكاتب الاتحاد في الحصاحيصا حصل فيها شنو؟. ما عاوز اكلمكم عن الموضوع دا. ولا عاوز اجيب ليكم سيرتو. المريخاب عشان ضفر واخوانه في البيت يطمئنوا ...عارفين عملوا شنو؟. مشوا الاتحاد العام الفيه (3) مساعدين للرئيس عشان يسألوا من عقد سيدي بيه. من الله خلقكم سمعتوا ليكم ب (3) مساعدين. البنطون فيه مساعدين. انتوا اتحادكم دا فيه (3) مساعدين. الميناء البري ما فيه الكم الهائل من المساعدين ديل. بعدين معتصم جعفر دا يساعدوه في شنو؟. إلا ربطة الكرفيتة. او شحن الموبايل. شفتوا الاتحاد العام بقى هملة كيف؟. تقول (كشك ليمون) في سوق صابرين. يا مريخاب دا شنو البتعملوا فيه دا؟. شنو الجرسة دي؟. لكن لمن اشوف (سيدي بيه)...بقطّع في الخيار ...والسلطة ..وبقلب في البصلة ..بقول والله ناس المريخ ديل ليهم حق. معذورين. سيدي بيه دا لو لقى ليكم (ضفر)...ح يعمل فيه عملية. ح يضفرو ليكم ضفر. ضفر بقى زي العنقريب الكراعو الرابعة مكسورة. الزول دا قلبو خف عديل كدا. بقى يمشي السوق ...يدخل (الصيدلية)..يسأل الدكتور ...يقول ليه عندكم (كمونية). يطلع ...يمشي دكان اسبيرات ...يسأل صاحب المحل...لو سمحت هنا في (ملوخية). رأسو شطب عديل كدا. اما علي جعفر ...اسكتوا خليه ساكت. الظاهر كدا ..ناس المريخ قنعوا من خيرا فيه. مرة يقولوا ليك مصاب. ومرة يقولوا ليك موقوف. ومرة يقولوا ملاريا ساكت. عارفين دا كلو من شنو؟. من الدمازين. سيدي بيه ...الايامات دي شغال مذاكرة في باكات الناس. اي باك يلقاهو ليك ...يمسكو يفرتكو ليك ركبة..ركبة. الغريبة ..في باك فرتكو سيدي بيه ..لقى فيه (7) ركب. سيدي بيه اتهجم ...قال معقولة ..اي زول عندو ركبتين ...الزول ال (5) ركب اضافية دي جابها من وين؟. يا سيدي بيه ...انت ما عارف الباكات في السودان اي واحد فيهم عندو (7) ركب. عشان كدا كورتهم ملخطبة ...وعكسيات في الكشافات. الباك لو لقيتو واقف في باب بيتهم ..بتلقى واقف غلط. يا ضفر...رجعنا ليك تاني. هسع في زول عاقل كدا ..في الظروف الفيها البلد دي ..بمشي الايامات دي (الدمازين). والله احسن ليكم. من هنا ما تبارينا. ما تقعدوا تعاينوا لي كدا زي المروحة الشغالة في (3). اول المروحة الشغالة في (3)...بتعاين كدا. انا عارف. يا جماعة ما تلخبطوني. سيدي بيه دا ما اعتيادي. وضفر ما بجازف ليكم..ولا بكضب. زول كورتو زي الحصة الصباحية. والله زي دا ما شفنا. انتوا جنيتوا. ناس ود التويكر ...جابوا ليهم (دش). فرحوا في الدنيا دي جنس فرح. ركبوا الطبق. جابوا السلك. فتحوا الريسفير. صلحوا الشباك. طبعا (الشباك) ما عندو اي علاقة بالحتة دي. ناس ود التويكر قدر ما حاولوا الطبق دا ..ما جاب ليهم اكتر من اذاعة اف ام 104. يلفتوا في الطبق ..جاي ..وجاي...ما في حاجة غير اف ام 104. ود التويكر زعل...قال هسع الموضوع دا عاوز ليه (طبق). اف ام 104 دي ..بدون رسيفير بتجي. قلنا لي ود التويكر يا زول ما تزعل ..انت عندك الضغط ..وما بتستحمل متل الحاجات دي. شن قدرك بيها. تقوم تموت لينا ...ونحن في النهارية دي ...ما عندنا طريقة نمشي الدافنة ..ولا فاضيين ليكم. عليكم الله ما تتلتلنا ساكت. الدنيا دي ما بتستاهل ...انت قايل اف ام 104 كعبة ...الشيء دا لو نمت فيها ما في احسن منها. 104 اخير ليك من فتة البوش البتظبطها في الفطور. ود التويكر قال يا جماعة انا الطبق دا دافع فيه (350) جنيه ..والريسفير براهو ب (450) جنيه...انا ادفع القروش دا كلها عشان الطبق يجيب لي (104). هسع (104) دي لو جابوها لي في (نقالة) بمشي عليها. والله (104) دي انا لو لقيتها شغالة في حافلة ..بنزل اخلي الحافلة...تقوم تجيبوها لي هنا بالطبق. قلنا ليه يا ود التويكر روق ...بعد رفع الدعم من المحروقات (الطبق) دا ما بجيب ليك اكتر من (104). الحياة بقت صعبة ...الحاجات ولعت. قالوا ليك العدس ...(13) عدساية بقت ب (7) جنيه. الفول سبع فولات ...عليها شوية بصل ب (11) جنيه. الرغيف ...اللقمة بقى فيها (7) رغيفات. زمان (7) رغيفات ...تأكل فيها الحلة كلها. المناسبة كان بجيبوا فيها (14) رغيفة. دحين يا ود التويكر (طبقك) الشايفو دا لو بالغ كدا ..بجيب ليك قناة النيلين الرياضية. قال لينا انا قناة النيلين لاقيها...ما تقعدوا تفتحوا لي خشومكم كدا ...زي (البنابر) الما منجدة...زي المرتبة الما فيها ملاية. اول البنابر الما منجدة بتفتح خشمها...وإلا المراتب. المهم بعد مجابدة كدا ...قناة النيلين جات. زولكم بظبط في القناة كدا ...شاف ليك قون سيدي بيه في الخرطوم الوطني. قون زي (الطرحة) كدا. غرفو ...من فوق. زي كأنك ...راجع البلد ..مبسوط وتضحك زي العيش الدراش. اول العيش الدراش بضحك. ود التويكر ..قعد يصرخ ..قال لينا ألحقو ..طبقى جاب الجزيرة +9. قلنا ليه ها زول ها...دي ما الجزيرة +9 ..دي قناة النيلين. الجزيرة +9 فيها زهير عبادي. الجزيرة +9 فيها ايمن اليماني ...انت يا زول ما واعي. روق...انت عندك الضغط ...ما تفرح كدا ..تقوم تموت لينا في النهارية دي. ما في زول فاضي يمشي ليه مقابر في وقت زي دا. ود التويكر ....قال لينا قون ميسي دا طيب الجابو في قناة النيلين دي شنو؟. الجماعة ديل بسرقوا الاهداف. قلنا ليه دا ما قون ميسي ...دا قون سيدي بيه. قال لينا سيدي بيه دا بتاع (السيستم قفل). قلنا ليه بس...كتلتو كتل ...دا هو ذاتو بتاع (السيستم قفل). دا القفلو ليه السفارة. دا بتاع الختم رايح ..والسكرتير بتاع الفيفا عندو قريب المرا اتوفى. عليكم الله من الله خلقكم ...سمعتوا ليكم زول في الفيفا ...قريب زوجتو اتوفى. الحاجات دي ..عندنا نحن بس...ما تقعدوا تقلعوا لي عيونكم زي الديك العندو احساس عالي بالنرجسية. اول الديك العندو احساس عالي بالنرجسية بقلع عيونو. ود التويكر ..قال لينا ان بقى كدا ...السيستم دا ما ليه حق. المريخاب ديل عاقلين ...واعيين عديل كدا. يا دوب عذرتهم في قفلة السيستم. انتوا عارفين ..السيستم دا لو ما قفل في ديسمبر الماضي ..ناس ضفر ديل كانت (ضروسهم) قامت ليهم في نص رأسهم. وناس باسكال ديل ...(الركب) حقتهم كانت ح تكون في الصرة. انتوا جنيتوا. دا ما زول يفتحوا ليه السيستم. ناس معتصم جعفر واسامة عطا المنان ...ليهم حق يقفلوا السيستم. قلنا ليه...يا ود التويكر هو سيستم وإلا صالون حلاقة ..البقفل بالطريقة دي. غايتو انا ما عارف. اعتبروني ما سمعت اي حاجة. اعتبروني ..بتكلم ساكت. بقطع من رأسي دا. السيستم دا لو ما قفلتوه قبل الدمازين ...خزان الدمازين دا بغرقكم. بتروحوا فيها. امشوا من هسع ..شوفوا مجدي شمس الدين بتاع وكالة السفر...خلى يشوف ليكم (السيستم) دا بقفل متين؟. المعني سيدي بيه دا عقدو بنتهي متين مع الهلال؟. الزول دا سيستمو دا ما سيستم اعتيادي. دا ما سيستم نصاح. انتوا جنيتو. السيستم دا (ضفر) لا بفهموا ليكم ولا حاجة. ولا بجاملكم في حاجة زي دي. ما تغشوا نفسكم ساكت. السيستم دا والله في الدمازين ..ح يفتح فتح. ناس ضفر لا بنستروا ولا حاجة. ديل في استادهم بتلفتوا. في الدمازين يعلموا شنو؟. كمان قالوا ليك الدمازين دي فيها جنس (فحم). عليك الله ...لو ما ساكت ...الدخل (الفحم) في الموضوع دا شنو؟. انت مالك عاوز تلخبطنا. الدمازين دي فيها حاجات رهيبة. سيدي بيه في مدني في (15) دقيقة فقط ...حير الجماعة في الدمازين ح يعمل شنو؟. اتخيلوا الحكاية انتوا براكم. وارجعوا لي. مرة كنت قاعد بحضر في مباراة برشلونة وريال مدريد في التلفزيون. جات مطرة. الاشارة طشت. فتحت (104). عارفين لقيت شنو؟. لقيت ليك يوسف السماني بتكلم. رجعت للتلفزيون ...قلت اخير لي التلفزيون بي اشارتو الطاشة دي من يوسف السماني. ملحوظة : هسع الكلام دا علاقتو بي سيدي بيه شنو؟. هوامش في المريخ في زول اسمو عبدالصمد ..مسيطر على كل الاشياء في المريخ. عبدالصمد دا بقى اخطر من جمال الوالي. قالوا ليك ضربة الجزاء بحددها عبدالصمد ..متين يحسبوها...ومنو البشوت...وفي ياتو زاوية. انت يا عبدالصمد ح تمشي الدمازين. لو شفناك هناك ..ح تتعب. عبدالصمد دا مفروض يكون مساعد مدرب في فريق درجة تانية ...عشان يتعلم السكات. بعدين يجي المريخ. يا عبدالصمد اللاعبين ديل ما اسبيرات. في الممتاز انضربت (3). في الدمازين ح تنضرب كم؟. ما تقعد تتفاصح ساكت. انت ذاتك ضفر. ضفر الادارة. ضفر معدل. الدمازين قربت لكن. كروجر حايم بالبرمودة ...وعاوز يشيل الممتاز. والله هانت الزلابية. بمرمودتك دي قالب حلو ما بتشيلو بيها. نحيا ونشوف. اصبروا انتوا بس ما تضيقوا. .... عاجل : سيدي بيه قالوا عاوز يفتح ليه (صالون حلاقة) في الدمازين. وإن طال السفر - محمد عبد الماجد صحيفة قوون
