سودارس : عنكبة ما لعاب لكن قلبو أبيض

مفاجآت في ختام مجموعات الممتاز: الأمل عطبرة يهبط بعد 22 عاماً والفلاح يتأهل للنخبة شاهد بالفيديو.. فنان سوداني يصل الخرطوم ويوثق لجمال وروعة صالة الوصول بالمطار ويدعو أبناء الوطن للعودة (البلد بتعمر بأهلها) النفط يستقر وسط خسائر أسبوعية والذهب والفضة ينتعشان "ميتا "تسجّل براءة اختراع لمحاكاة المستخدمين بعد وفاتهم تطوير بطارية تُشحن خلال ثوانٍ وتصمد 12 ألف دورة شاهد بالفيديو.. السياسي الراحل غازي سليمان: (لم أعد افرح لأن شعب السودان لم يفرح بعد وعلي الطلاق إبنتي "أم النصر" أرجل من 100 راجل) شاهد بالصورة.. ظهرت بشعار أتلتيكو مدريد وهي تلوح بالرقم 4!! هل قصدت المذيعة السودانية سهام عمر السخرية من برشلونة بعد الهزيمة المذلة؟ الأمل عطبرة يودع الممتاز رسميا رغم التعادل أمام المريخ شاهد.. حسناء الفن السوداني "مونيكا" تشعل مواقع التواصل بجلسة تصوير جديدة شاهد.. الفنان مأمون سوار الدهب بعد زواجه: (زارتني الملائكة) اكتشاف مركبات "زائفة" تشعل نوبات الربو دراسة: القراءة والكتابة تخفِّضان خطر الزهايمر 40% طلاب شرق دارفور يسيرون قافلة وطنية إلى جنوب كردفان برعاية والي شرق دارفور شاهد بالفيديو.. فنان سوداني يصل الخرطوم ويوثق لجمال وروعة صالة الوصول بالمطار ويدعو أبناء الوطن للعودة (البلد بتعمر بأهلها) ترتيبات لإعادة تشغيل مصنع ألبان بركات وإنشاء مزرعة لتربية الماشية من أرشيف كتابات الصحفية سهير عبدالرحيم : (هذا الصحفي كان يصلي خلف البشير من غير وضوء) صحة الخرطوم وأطباء بلا حدود تناقشان رؤية التشغيل الكلي للقطاع الصحي بالولاية تشغيل مصنع الاوكسجين بمستشفى الدبة المركزي الشرطة المجتمعية بولاية سنار تدشّن قافلة دعم تكايا رمضان بولاية الخرطوم سهير عبد الرحيم تكتب: مشاهداتي في جلسة مجلس السلم والأمن الأفريقي النتيجة تؤهل النيل لدوري النخبة مينارتى يواصل إنتصاراته.. يفوز على الوحدة بثلاثية ويعزز صدارته للمجموعة الأولى مساعد قائد الجيش يكشف عن فساد وزير كبير إبراهيم شقلاوي يكتب: مسرح ما بعد الحرب لدى يوسف عيدابي شاهد بالفيديو.. على أنغام أغاني "الزنق".. لاعبو حي الوادي يحتفلون مع راعي الفريق ونائب رئيس إتحاد الكرة أسامة عطا المنان بمناسبة زواجه وزارة المالية توقع إتفاق مع بنك التضامن الإسلامي لتقديم خدمة إيصالي شاهد بالفيديو.. فتاة سودانية تبهر راغب علامة وأنغام بعد ترديدها أغنية هدى عربي في برنامج مسابقات والسلطانة تدعمها وتحتفي بها ارتفاع في اسعار محصول الذرة واستقرار سعر السمسم بالقضارف أمس إلغاء رحلة قطار إلى الخرطوم..إليكم تفاصيل انطلاق دورة متخصصة لتطوير الأداء الرقمي برعاية وزير الشباب والرياضة تطور حاسم بقضية "الاعتداء الجنسي" في منزل لامين يامال الإدارة العامة لشرطة تأمين التعدين تنفذ حملة منعية وكشفية لمكافحة التعدين العشوائي بولاية البحرالاحمر الإدارة العامة لشرطة تأمين التعدين تنفذ حملة منعية وكشفية لمكافحة التعدين العشوائي بولاية البحرالاحمر هيئة مياه الخرطوم: تحصيل فاتورة المياه لا يشمل القطاع السكني حتى الآن ارتفاع طفيف لأرباح زين السعودية إلى 604 ملايين في 2025 مسلسلات رمضان.. هل تقع أيتن عامر فى حب ياسر جلال فى مسلسل كلهم بيحبوا مودى الدولار يواصل التراجع أمام الجنيه فى منتصف تعاملات اليوم مسؤول سوداني يغادر إلى تركيا السودان.. وزير الشباب والرياضة يصدر قرارًا مجموعة الهلال السوداني.. صنداونز يقتنص التعادل ويبقي آمال التأهل في دوري الأبطال أفراد من الشرطة يلقون القبض على السائق الخاص بالقائد الميداني لمليشيا الدعم السريع "جلحة" داخل "ركشة" بحي بري هلال كوستي يدشن برامجه الثقافية بليلة ثقافية كبرى وتكريم رموز النادي والمجتمع شاهد بالفيديو.. سرقة محل مجوهرات بشارع الوادي بأم درمان وقيمة المسروقات تقدر ب(ترليون) جنيه محاولة أوكرانية جديدة لإفشال مفاوضات السلام بعيداً عن ارض المعركة رفض الزوج شراء سجائر لها فقتلته.. جريمة زوجة مصرية تثير الجدل حريق كبير في سوق شرق تشاد رسالة أخيرة في بريد الرئيس البرهان قبل تمرد الحركات المسلحة الدارفورية ترامب يحذر إيران: الوقت ينفد والهجوم القادم سيكون أشد مباحث الخرطوم تعلن توجيه ضربة موجعة لمافيا السيارات..إليكم التفاصيل تلفزيون السودان يستأنف البث المباشر من مقرّه الرئيسي وزير الصحة: التبغ عدو الحاضر والمستقبل و فاتورته الصحية تفوق عائداته الضريبية هل قتل السحر الأسود الإسرائيلي عبد الناصر؟.. كتاب جديد يكشف خفايا خطيرة في مصر سباق اختراق الضاحية باكورة بطولات الاتحاد العربي لألعاب القوى شركة اتصالات في السودان تعلن عن توقف خدمات "مَا حَرَّمَ إِسْرَائِيلُ عَلَى نَفْسِهِ"! أحمد الشاكر: انا أعجز عن شكر جميع الإخوة الأشقاء في المملكة العربية السعودية السودان..حصيلة صادمة بمرض شهير في ولايتين إسحق أحمد فضل الله يكتب: (حديث نفس...) "كرتي والكلاب".. ومأساة شعب!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

عنكبة ما لعاب لكن قلبو أبيض

قوون نشر في قوون يوم 26 - 12 - 2013

في الحياة السودانية (الجميلة) مخارج ومنافذ طيبة...واسلوب يخفف الكتير من (كدر) الشيء.

يعني العروس وقت تكون ما سمحة ...وتسأل منها : (اها العروس كيف؟).

ما بقولوا ليك : (العروس ما سمحة) ويصدموك.

ولا بقولوا ليك : غايتو.

بقولوا ليك : (والله العروس عندها اخلاق ..تختها في الجرح تشفيّه)...ويستبعدوا ليك سؤال السماحة دا نهائي من المقرر.

انت افهم براك (المعنى العروس ما سمحة).

الاخلاق اهم حاجة ...جمال الشكل ما دائم ...المهم جمال الدواخل ..(والكلام البنسمعوا في مثل هذه الحالات).

وعندما يصل (محترف) للسودان ...والجرايد تقعد تقول ليك المحترف هذا صغيّر في السن.

وتمسك ليك في الحتة دي (اقنع).

صغيّر في السن ...نحن عاوزين نرسلو.

المحترف يكون عقدو كلو موسم أو موسمين ..ويتحدثوا ليك عن صغر سنه.

أو يقولوا ليك محترف صاحب بنية جسمانية قوية.

نحن عاوزين لينا (سقالة).

من يقولوا ليك كدا اعرف طوالي أن (المحترف) دا كورتو شوية ...وأن مهاراته ما قدر كدا.

طبعاً المحترف عندما يكون ما عنده (مهارات) ببقى ما عندو أي نكهة أو طعم ..لأن متعة الاحتراف في المهارات.

ما معقول تجيب ليك محترف وتصرف عليه بالعملة الصعبة عشان بنيتو الجسمانية الضخمة.

أو لأنو صغير في السن.

هسع عكنبة دا (قلبو أبيض).

قلبو عاوزين نعمل بيه شنو؟.

في لاعب جاب ليه (قون) بي قلبو.

أبيض ولاّ كحلي ..ما فارق كتير.

أو حصل في تاريخ الكورة من زمن حفروا البحر ..قالوا ليك الحكم كان عاوز يمنح اللاعب صاحب المخالفة (كرت احمر) لكن عشان قلبو أبيض قام ما احتسب المخالفة من الاساس.

حصل مرة قالوا زي الكلام دا.

المهم المستوى والمهارات والقدرة على التسجيل والتهديف...بعدين لون القلب دا مرحلة تانية.

لذلك عندما سألت ليكم مريخابي قلت ليه : (اها عنكبة دا كيف؟).

المريخابي قال لي : (عنكبة قلبو أبيض).

وسكت على كدا.

قلت شنو؟..قلت شنو؟.

قال لي : (عنكبة قلبو أبيض).

قلبو أبيض نحن عاوزين نعملو (سفير).

ولاّ جايبنو (ناظر مدرسة).

اقول ليكم بي صراحة ..أنا من قال لي عنكبة (قلبو أبيض) ...قلت اكيد المريخابي دا ما لقى ليه صفة أو ميزة (كروية) عشان يقولها لينا ..قام قال لينا (قلبو أبيض).

صاحبكم عاوز يسكتني ..فاكر لمن يقول لي (قلبو أبيض) بسكت.

وما بقول حاجة.

قال لي (قلبو أبيض) قنعت من كورة فيه.

بعدين المهاجم في السودان لو ما بقى (غتيت) ما بنجح..زول يكون قلبو حار ..ما أبيض.

أبيض ..دولاب هو؟.

قلبك أبيض بتروح ساكت في البلد دي.

المهاجم لازم يكون زول بعفص..وبدافر عشان يقدر يأكل عيش مع مدافعين البلد دي.

المدافعين في السودان الواحد فيهم بدخل الملعب شايل ليه (موس).

عالم حقارة خلاص.

المدافع تلقاه بدل الشينكار ..لابس ليه (طورية).

يضربك ضربة ...سبعة يوم عقلك الباطني غائب من الوعي ..(تودي وتجيب).

زمان نحن كان عندنا مدافع (شفت).

النوع البكفكف اكمام الفانلة.

مدافع صعب ...الحكم ذاتو لمن يكون عاوز يطلع ليه (كرت) بتلفت يمين وشمال ...لو لقاهو واقف جنبو بتراجع من الكرت.

بعمل نفسو بسجل في الوقت.

مدافع ..مدافع بي معنى الكلمة.

اتذكر المدافع دا كان بدخل الميدان شايل ليه صحن (أم فتفت).

المهاجم من يشوف ليك المدافع بيأكل في (أم فتفت)..قلبو بقيف.

يأكل في (أم فتفت) والجمهور كلو بهتف ليه : (اديني ..اديني ..اديني).

اديني افتفت يعني.

مدافعنا دا كان وقت يمشي على (اللاين) ما بمشي يشرب ليه موية ..ولا بمشي عشان يشيل ليه وصايا من المدرب.

المدافع دا كان بمشي اللاين عشان يأكل ليه (كوارع).

ما عندو حاجة اسمها (موية)...ما قاعد يعطش في الاساس.

المهاجم في الفريق المنافس من يشوف المهاجم بيأكل في (الكوارع) ببقى بين بين.

طوالي بطلب الغيار.

مدافع صعب.

بين الشوطين ما بمشي يقعد بره ...المدافع دا كان بين الشوطين بمشي اقرب دكان للميدان ويجيب ليه (طحنية).

زمان (الطحنية) دي كانت حاجة حلوة ...هسع بقى ما عندها أي قيمة مع الحاجات الظهرت حديثاً.

مدافعنا يضرب ليك الطحنية دي في لحظة.

ولا بتلفت ..وما بدي زول ..الحتحت البقع في الواطة بلحقو.

مدافع صعب ..(يقولوا ليكم الكلام الف مرة).

في الدقيقة 74 من عمر المباراة ...مدافعنا كان برفع ايدو ويكورك للجهاز الفني حقنا ويقول ليهم جيبوا لي (كمونية).

يقولوا ليه قلت شنو؟.

يقول ليهم ألحقوني بي (كمونية) سريعة ...أنا جعت عديل كدا.

جيبوا لي كمونية قبل ما يجيني رباط صليبي.

أنا ما عارف علاقة الرباط الصليبي بالكمونية شنو؟.

زمان في حاجات بتحصل كدا ..ما عندها تفسير ...ولا بتتفهم.

عشان كدا ما بنقيف فيها كتير.

اها عليك الله نوع الحاجات دي في مهاجم عاقل كدا بقيف ليها.

لذلك الدوري كلو كان بجي فينا (3) اقوان.

والاقوان التلاتة دي بتجي من النص.

ما في مهاجم بخاطر وبدخل خط 18.

إلا تكون قنعان من نفسك.

ما في مهاجم في الدنيا بتجرأ ويجيب فينا قون ..مع مدافعنا الشرس دا.

اها عليكم الله في الوضع دا ..تقولوا لي عنكبة (قلبو أبيض).

قلبك أبيض تلعب في خرطومك الوطني ...المريخ ما عندك طريقة تلعب فيه.

بعدين أي لاعب قلبو أبيض في المريخ تمت اعارته.

محمد موسى قلبو أبيض مشى الخرطوم الوطني.

مصعب عمر لقوا قلبو أبيض جددوا ليه الاعارة.

مفضل مسكين ..وزول قلبو أبيض ..ودوه الموردة ..طلعوه من الدوري الممتاز.

حسن كمال برضو قلبو أبيض عشان كدا مشى المريخ الفاشر.

انتوا ما شفتوا المريخاب ديل بعملوا في (ايهاب زغبير) شنو؟.

يسجلوه...يقوم يعيروه.

يلقوا الاعارة شوية عليه ...يشطبوه.

يقوموا تاني يرجعوه.

يقولوا ليه ما بنقدر نسجلك ..بنجيبك بس (اعارة) عشان في أي لحظة نرجعك.

لقوا (القلب الابيض) دا ..واشتغلوا فيه (اعارات)..يجيبوه ..يرجعوه ..يجيبوه تاني ..يرجعوه.

أنا خائف بالطريقة دي ..ايهاب زغبير تاني في المباراة يلعب الشوط الاول في المريخ ..والشوط التاني يلعب في الاهلي الخرطوم.

اغرب حاجة في موضوع ايهاب زغبير هذا ..هو أن المريخ في التسجيلات الماضية سجّل الحارس الاحتياطي له في الاهلي وهو محمد ابراهيم.

المريخاب اقنعوا ليك العالم كله أن الحارس الاحتياطي محمد ابراهيم افضل من الحارس الاساسي ايهاب زغبير.

جابوا الحارس الاحتياطي الموسم الماضي ...وفي هذا الموسم جابوا الحارس الاساسي (اعارة).

فاهمين حاجة.

عليكم الله لو (ايهاب زغبير) دا ما قلبو أبيض كان ممكن المريخاب ديل يعملوا فيه كدا.

فيصل العجب ذاتو قلبو أبيض.

اجبروه على كتابة خطاب الاعتزال ..وقالوا ليه بنعمل ليك اكبر مهرجان.

العجب كتب خطاب الاعتزال ...ما في زول اشتغل بيه.

تلفون بقوا ما بضربوه ليه.

العجب قال عاوز يرجع يمارس الكورة.

المريخاب غضبوا ..وما عجبهم الكلام دا قالوا كيف العجب يرجع للكورة ..ونحن ح نعمل ليه اكبر مهرجان.

العجب كان عاوز الهلال.

المريخاب عارفين قلب فيصل العجب أبيض ..قالوا ليه خلاص لو عاوز ترجع تلعب كورة ..ترجع تلعب في الفاشر.

سجلوه في مريخ الفاشر.

وعشان قلبو أبيض ..دفعوا ليه حافز تسجيلو في المريخ الفاشر.

قلت ليكم (القلب الابيض) في البلد دي ..لا بنفع ولا حاجة.

لذلك نجاح (عنكبة) في المريخ ..فرصو ضعيفة ..عشان قلبو الابيض دا.

ملحوظة : خلاص الهلالاب عاوزين يقبلوا على (عنكبة).

هوامش

نحن ما عندنا قضية مع عنكبة.

كل قضيتنا ..أن المريخ قال عندو مفاجأة في اليوم الاخير.

الساعة 11 ..جابوا المفاجأة ...طلعت (عنكبة).

نحن خلونا...هسع عنكبة دا (مفاجأة).

طيب لو عنكبة مفاجأة ..صلاح الجزولي شنو؟.

في واحد منطقني ليك.

لقيتو الصباح حايم.

قلت ليه الجابك بي جاي شنو؟.

قال لي عاوز لي (نضارة) للبرد.

قلت ليه أنت قلت نضارة ولاّ نضارة ..(يمكن اكون سمعتو غلط).

قال لي (نضارة).

قلت ليه طيب علاقة النضارة بالبرد شنو؟...انت يا زول جنيت.

قال لي اول علاقة رفع الدعم عن المحروقات بالزيادة الحصلت في (الخبز) شنو؟.

بس فلاحتكم في (نضارتي).

اتمنطقت ..ما قدرت اقول حاجة.

كلامو برضو منطقي..ومعقول.

مجلس الهلال قبل بصورة علمية وبخطوة عملية على الاستاد.

في انتظار فقط المدير الفني الجديد.

يبدو أن المدير الفني الجديد سوف يكون اخر امتحان يتعرض له مجلس الهلال.

لذلك لابد من نجاح ملحوظ وكبير في ملف المدير الفني.

لأن الاخفاق في الاختيار ..سوف يؤدي إلى افشال كل الملفات السابقة التى نجح فيها المجلس في فترة وجيزة.

دائرة الكورة أيضاً ...جسم يبنى عليه الانجازات والبطولات أن أحسن اختيارها.

.............

عاجل : لو عاوزين تقابلوا بايرن ميونخ بي اعدادكم دا شيلوا ليكم معاكم للدوحة (قفف)...جمع (قفة) عشان ما تقرأوها لي غلط.

انقر هنا لقراءة الخبر من مصدره.