* والله خايف الجماعة ديل - لو مشيت عشان تأكل ليك (سمك) يقولوا ليك (جيب لينا الرقم الوطني).
* واحد قاعد بيصطاد ليه في (سمك)...قبض ليه (سمكة) زي برج الاتصالات.
* طبعا برج الاتصالات ما عندو اي علاقة بالسمك.
* لو قعدت تعاين ليها ساكت ...عاوز ليك (سنة) شوف.
* صاحبكم طلع السمكة من البحر ..سألها من (رقمها الوطني)...لقاها ما عندها (رقم وطني) رجعها بحرها طوالي.
* زول دغري ..وواضح.
* قال السمكة الكبيرة دي بدون (رقم وطني) ما بشتروها..يقوموا يعملوا لي سين وجيم ..وجبتها من وين؟..وقبضتها كيف؟...والبحر هائج - وعمرك كم سنة؟..وقريت وين؟...وانبوبة غازكم جنسها شنو؟.
* يعملوني ليك (موضوع)...وانا والله ما فاضي للحاجات دي.
* او زي ...واحد مشى يخطب ..(زيو وزي اي زول بخطب - دي فيها حاجة).
* ابو البنت صعب - النوع البكون اليوم كلو واقف في شاحن الموبايل.
* زول صعب شديد.
* اليوم كلو واقف بسقي في الشجر بالخرطوش.
* لو شاف ليه (جدادة) حايمة ساكت - يكورك في الولد ..يا ولد دخل (الجداد) جوة.
* نحن ما عندنا (جدادة) بتحوم في المغارب دي.
* الزول الصعب دا للعريس المتقدم : انت البنت دي شفتها وين؟...قول لي قبل ما تفكر - قول لي سريع...اتكلم ..واقف كدا تقول واقف في (حيطة).
* الولد قعد يرجف ...متل سواق اللوري.
* سواق اللوري برجف.
* برجف وقت يشوف ليه (ركشة)...بفقد تركيزو.
* الولد قال ليه : ابدا يا حاج ..والله انا ما شفتها.
* طيب ما شفتها ...بتخطبها كيف؟...نحن ما عندنا بنات بخطبوهن من غير ما يشوفهن.
* عاوز ليك انبوبة غاز - كيف يعني تخطبها وانت ما شايفها ...(حركات المحترفين دي ما تعملها لي).
* الولد استدرك - قال ليه : شفتها مرة واحدة يا حاج...شفتها (صدفة).
* الاب طلع السكين من ضراعو وقال ليه : وين ؟...اتكلم سريع ...قول الحقيقة..اعترف...نحن صعبين ما عندنا حاجة اسمها (صدفة).
* الولد قال ليه شفتها في الاستاد.
* وبتعمل شنو في الاستاد؟.
* بتلعب طرف شمال.
* الاب رجع السكين لي ضراعو - وقال للولد على بالطلاق لو كان قلت لي كلام غير دا (السكين) دي كانت ابتك...الله شافك بس.
* لو قلت لي ساكت شفتها (متقدمة) بتساند الهجوم كنت (قطعتك) بالسكين.
