طيران (ليوبار) من البطولة ما عاوز ليه (طيارة خاصة) المريخ يفاوض سادومبا..انتوا ما تختصروا الحكاية وتندمجوا مع هلال الفاشر اهداء من كلمات (نجيب فاضلكيصاكوريك) وترجمة (أحمدالصغير)...كتب نجيب عن (المتوقّع): وجدتك في غيابك وعندما جئت لم تكن هناك ضرورة لحضورك الذين نعرفهم ...والذين لا نعرفهم ..نلتقى دائماً في الهلال...فقد جعل بيننا وبينكم هذه المساحة ..من الود والمحبة ...والشوف. هل يكتب نصرالدين الشغيل (الشعر)؟...اظنه سوف يفعل ذلك اليوم. محمد فيلم خيال علمي لو الهلال الليلة سجل (5) اهداف في ليوبار ..(ما تستغربوا لي كدا)...لو الهلال سجل هذه الاهداف الخمس في الشباك الكنغولية..ناس المريخ ح يقولوا (ليوبار) حمام ميت..(كفاية اتنين). طيب انتوا الطلعتوا من دور ال (64) تكونوا شنو؟. ناس المريخ ديل زي النسوا كدا ان (ليوبار) هذا ..هو الفريق الذي اطاح بهم الموسم الماضي. كما ان ليوبار معروف في العالم كلو انو بطل الكونفدرالية 2012م...انتوا يا ناس المريخ جبتوا ليكم كأس سيكافا سنة 1986..فلقتونا بيه إلى الان. بعدين اذا كنتوا بتقولوا نحن اقوياء عشان وصلنا دور الاربعة في عام 2012م...ما بال ليوبار الذي فاز بتلك البطولة التى خرجتم انتم منها من دور الاربعة. هسع وينو (الفليم) هنا؟. غايتو الزول وقت يكون عاوز ليه سبب ..بدون مناسبة كدا يقول ليك : (الليلة الواطة حارة). احتمال احتمال روسيا ..تكون فيها مطرة (احتمال تصب) ..يقوم هنا فيصل سيحة يطلع لينا في تلفزيون السودان يوم الجمعة (زي الزول الماشي ليه عقد)..ويقول لينا مطرة روسيا دي مفروض عمر بخيت يأخد فيها (كرت احمر). ذنبو شنو؟. وليه؟. واشمعنا؟. غايتو فيصل سيحة دا بذكرني ليكم بي ناس (الحقيبة) ..ما فاضل ليه إلّا يجيب ناس وديدي الفاتح ومعتز عبدالباسط وخالد عبدالرحمن (كورس) يشيلوا بي وراهو...(القون تسلل...القون تسلل...القون تسلل) ويصفقوا ليك مع الرمية دي. والليلة هوى يا ليل...يا بلالي انا ...(القون تسلل واضح) يا بلالي انا. شوال غتاتة ضفر قالوا ليه الهلال ح يدخل دور المجموعات ...قالوا قال ليهم دي فايدة اللعب في الدوري الاسباني. الدوري الاسباني الدخلو هنا شنو يا ضفر؟. عامل كدا زي الزول البسأل ليه من (بقالة) قريبة. اتخيلوا لينا (ليوبار) دا الاهلي المصري ناس الهلال الليلة مطلوب منهم ان يتخيلوا لينا (ليوبار) هذا ..هو فريق (الاهلي المصري) ...انتوا خسارنين حاجة. اتخيلوه (الاهلي المصري). ولو عاوزين تتأكدوا من (الاحساس) دا ...خليكم عارفين (ليوبار) وصل السودان بطيارة خاصة. الطيارة الخاصة دي تفتكروا جاءت السودان ...عشان تمشي سوق الجمعة. فتحوا عيونكم ...الطيارة الخاصة دي ..هدف ..هدفين ..ما بفشنا فيها ...من تلاتة وامشوا لينا لي فوق. لو عاوزين تتغاظوا منهم ..وتتحمشوا فيهم اتخيلوهم (الاهلي المصري)..وزحوا بعيد. الكلام دا ما بنقولوا للاعبي الهلال وحدهم...الجمهور ذاتو ..يجب ان يتخيل الموضوع دا. اتخيلوهم (الاهلي المصري). تذكروا مباراة الاهلي المصري ..لمّينا ليك في الاهلي في الشوط الاول استجواب شديد. ما خلينا ليهم شيء؟. ما فهموا أي حاجة. ناس حسام عاشور ووائل جمعة بقوا ليك زي الفى (ساونا)..بركات من سيد معوض ما بتقدر تفرقو...وائل جمعة من ابوتريكة ما تعرف. الكلام دا كان في الشوط الاول. الشوط التاني ..قبلنا ليك على عصام الحضري ...جندلنا ليك الاهلي بثلاثية بدأت ليك من داريو كان...الحضري طلع للعكسية ..لقى الكورة جوه القون. زي الزول الماشي الفرن. الهدف التاني من مصفاة الجيلي ...هدف كرنقو ...الحضري قدر ما اتمطّى في الدنيا دي ما لحق كورة كرنقو. هدف كرنقو طبعاً بالدليل القاطع اثبت ليك ان حلايب سودانية....المصريون طوالي بعد الهدف دا اتخارجوا ..وقنعوا ليك من حلايب. يا زول شن قدرهم كمان على صواريخ اسحاق كرنقو دي. الهدف الثالث ، وهو الهدف الذي انهى المباراة ...وهو هدف قودوين ..تشربوا ما تروا. عارفين المصريون بعد هذه المباراة قالوا شنو؟. قالوا موية النيل شوية ..وقالوا كمان السودان ظالمنا في الموية. جماعتكم (العطش) كتلهم. نحن هسع عاوزين نقنع ليكم ناس (ليوبار) ديل من اول خمس دقائق ..امسحوهم لينا من بدري. اعصاب ذاتو للحاجات دي بقت ما عندنا ..ولا عندنا ليهم وقت. عاوزنكم من الشوط الاول ..تحسموا موضوع الثلاثية دي ...والجمهور ما ح يقصر معاكم. الملعب ح يكون كل بغني في (سيد البلد). عاوزين نفرح.. عاوزين نطلع من الحتة دي. فترنا نحن من زحمة المواصلات ...والغاز القطع. انتصروا لينا انتصار كبير....وخلوا لينا الباقى. افتراض يا بشه بكرة ركز على (موسى الزومة)..ناس ليوبار ديل عندهم (7) زومات سارحة في تشكيلتهم. هسع دا افتراض. »«««««««««««««««««««««««««««««««««««««««««« طن دغالة مفروض بعد كدا نفتح باب (الانسلاخ) من المريخ والانضمام للهلال...اول زول ح ينسلخ اتوقعو مأمون ابوشيبة. لكن يا ابوشيبة لو جيتنا في الهلال اوعى تتكلم لينا عن (الحكام). اعتقاد الليلة ان شاء الله ناس الهلال لو دخلوا (المجموعات) مفروض ناس المرور اليوم التالي طوالي يعملوا (كشة) مرور ..أي مريخابي مظلل القزاز...أو ما مظلل القزاز مفروض يعملوا ليه (مخالفة). طالعين من دور ال (64) وكمان بتركبوا عربات. مفروض على الاقل يمنعوكم تعدوا (الكباري) زي (الركشات)...ما في زول طلع من (التمهيدي) يقطع ليه (كوبري). هسه الجماعة ديل ذنبهم شنو؟. وينوا (الاعتقاد) هنا؟. جركانة العسل مريخابي شاف ليك (الشغيل) في الهلال يقطع ..ويعمل ارسال طويل ..وون تو ...ويشوت في القون ..وينزل ويطلع ..ويمرر ويمر ..وينفرد بالمرمى.. ويجيب قون ، قام طوالي قال للزول الجنبو ..انت تعال هنا ...الشغيل دا جابوه ناس الهلال من (يوفنتوس). والله يا اخوي جبناه من المريخ ...وكمان جبناه (مصاب). خلاص عاوزين تسحروه لينا. جواب باليد مريخابي حاقد حاقد شديد ..قال لو ما اتأهلتو للمجموعات ح تعملوا شنو؟. قلت ليه ح نعمل (كوبري طاير) في منطقة السجانة... يعني ح نعمل شنو يا ود الناس؟ ..فاكرنا ح نعمل (سيكافا)...ح نمشي (الكونفدرالية).. لكن تأكد بعد كدا ح نلعب في الكونفدرالية بي الفريق الرديف ...ناس عمر بخيت ديل (كونفدرالية) ما بلعبوا فيها. عليكم الله ما تجيبوا لينا سيرة (الكونفدرالية) دي. قال سيكافا قال. حاجة حريصة حاجة حريصة دخلت (Whatsapp)...جات لقت (حلتها) حرقت ...قالت والله (Whatsapp) دا اسرع من (البوتجاز). رأي فني عبدالماجد قلت ليه رأيك شنو في دفاع المريخ؟....قال لي (طيور الجنة) بقيت ما بتابعها ...كبرنا على الحاجات دي. ما قدرت اقول ليه حاجة. قلت اسألو بالفرنسي ...يقوم يقول لي حاجة تانية ...(اخير اسكت). كتلتها في قلبي. حسن تفتيحة حسن تفتيحة عمل ليه (عجلة) كتب فيها (العالمي)...قلت ليه يعني لو قلبتها (ركشة) تكتب فيها (النيل الحصاحيصا). طبعاً نحن النيل الحصاحيصا عندنا اعلى من (العالمي). واحد قال لي انت (العالمي) دا عندهم (سمك)؟. قلت ليه : ابدًا. قال لي طيب (عالمي) في شنو؟. زولكم طبعاً (فهمو) كلو (سمك). شولة هندية ليوبار وصل البلاد بي طيارة خاصة. الطيارة الخاصة دي لو استفدتوا منها في (الكونفدرالية) احسن ليكم. طيارة خاصة على شنو وانتوا اصلكم (طيران). نقطة تركية ناس المريخ بعد (17) سنة و(7) شهور و(27) يوم ح يفاوضوا نصرالدين النابي. هسع قالوا ليك قاعدين يفاوضوا في مدرب الحراس بتاع الهلال. الناس ديل عندهم عقدة ...(مظلة) الراحل والي الدين الله يرحمه لو لقوا ليك طريقة ح ينقلوها في استادهم. بالوصف هدف الهلال الرابع كورة عكسية ..دربكة قدام المرمى ...(عجاجة) في الكورنر ..شوشرة في رأس الخط ....(قون). بكري المدينة يدخل يجيب الكورة من الشبكة...ويمشي على (السنتر). دكان الحلة زول (شفت) مشى ليه على دكان. قال لبتاع الدكان في (طحنية)؟. بتاع الدكان قال ليه : ابدًا. قال ليه في ساردين؟. بتاع الدكان قال ليه : ابدًا. قال ليه في صابون غسيل؟. بتاع الدكان قال ليه : ابدًا. قال ليه في دقيق سيقا؟. بتاع الدكان قال ليه : ابدًا. قال ليه في رغيف؟. بتاع الدكان قال ليه ابدًا. قال ليه في عدس؟. بتاع الدكان قال ليه ابدًا. قال ليه في كبريت؟. بتاع الدكان قال ليه ابدًا. قال ليه في رز؟. بتاع الدكان قال ليه ابدًا. قال ليه في كراسات؟. بتاع الدكان قال ليه ابدًا. قال ليه في زيت؟. بتاع الدكان قال ليه : ابدًا. قال ليه في جبنة؟. بتاع الدكان قال ليه : ابدًا. زولكم اضايق شديد ..قبل ليك على بتاع الدكان سمح وقال ليه : طيب انت وقت الحاجات دي كلها ما عندك ...ما تحول (الطبق)...قاعد لي كدا زي الطالب الما حافظ جدول اتنين. والله انتوا (الضرائب) ما خاطية عليكم ...ليها حق ..تجي وتفرض عليكم (50) مليون في السنة ...على قعادكم دا. قاعدين ساي...زي (العالمي). هسع (العالمي) الدخلو هنا شنو؟. حالة خطرة مريخابي دخل فيه (قندران). شلنا وجري على الحوادث. الدكتور عاين ليه كدا...ظاهر عليه انو قنع منو. طوالي كتب ليه حبة (سيكافا) عند اللزوم. طالعين من دور ال (64) وبتتكلموا كمان في السياسة. قطعة باسطة الخندقاوي فاضل ليه حاجة واحدة...ويبقى صورة طبق الاصل من صلاح ادريس. الخندقاوي فاضل ليه فقط (يلحن)... كتابة العمود...الخندقاوي ما عندو مشكلة فيها .. اليوم بكتبوا عنو (13) عمودًا ...تقول صديق منزول. ناس مصر (السد العالي) ما كتبوا فيهم الكلام البكتبوه في الخندقاوي دا. انت يا الخندقاوي ...حرب اكتوبر كنت مشارك فيها...زي الشفتك قبل كدا. هسع بكرة جماعة كدا ..يطالبوا يمنحوا الخندقاوي نوط الجدارة من الدرجة الاولى. اول شارع روسي دخل مباراة الهلال ...المباراة كلها يكورك يا خليفة ..يا هليفة ..يا هليفة ..يا هليفة. واحد زهج منو قال ليه يا زول ما تكورك فينا ...(خليفة) ما لاعب ..خليفة قاعد بره. الروسي قال ليه طيب (هليفة) دا لمن قاعد بره ..مالو بودي في الكور (الكشافات). غايتو يا خليفة الزول الما بريدك في (الكنبة) يحدر ليك. عنقريب هبابة حسن ود الترزي ود الشيخ سيد الرايحة ..قالوا اشترى ليه تلفون جلاكسي...أي زول يلاقيه ..يقول ليه : (هاك رقم الجلاكسي بتاعي). البضرب ليه كلو يقول ليه : (معليش الجلاكسي كان بعيد شوية). الزول البضرب ليه هو بقول ليه : (انت جرس الجلاكسي دا ما سمعتو؟). ملحوظة الاتحاد العام قالوا بفكر يمنع (النوم) في الاستاد...لأنهم لاحظوا كدا في الفترة الاخيرة في مدرب قاعد ينوم في المباريات. عليكم الله دا (مدرب) هسع ولّا (منوم)؟. شعر حايم براهو تعال نتقسم الاحزان اشيل حزنك ....تشيل حزني يروح جرحك يروح جرحي عشان (دمعك) ...بكون (دمعي) تعال نتحدى دي الايام تفرق فينا بس لي متين تبعدنا وتأكد فينا جرح البين متين كونك تقيف جنبي اقيف جنبك اكون قربك تكون قربي كبر همك صغر وطني عرفتك والحزن معروف تشيل همي ...قبل همك. رسائل إلى هولاء بتعريفة المواصلات العادية عصام الحاج انت عاوز تعمل شنو؟..حدد موقفك ..انت معارض ولاّ ما معارض؟ ..صحفى ولاّ بتكتب ساكت؟..ورينا عاوزين نفهم حاجة ؟...شنو تختفى السنة كلها اول ما المريخ يتعادل أو يطلع ليه من بطولة ..تقعد تتكلم لينا عن محاربة هيثم مصطفى. انت هيثم مصطفى دا جبتو المريخ عشان تديه (نص) في النادي. كرهتنا الطب البلدي. صابر شريف الخندقاوي انت لو عاوز تخدم الهلال بالجد ...شوف ليك لاعب محترف خطير بالتنسيق مع المجلس والجهاز الفني للهلال ..واتكفل بتسجيله. التسجيلات في يونيو ...اوعك تقوم انت ذاتك (ح تتخندق) لينا ..وتختفي في التسجيلات. هيثم كابو كابو قال عاوز يشوف الهلال في (المجموعات)..غالي والطلب الرخيص ...هي المجموعات غريبة على الهلال في 6 سنوات الهلال كان في مرحلة المجموعات (4) مرات. الكلام انتوا يا كابو ...تطلعوا من دور ال (64) ووقت تنتصروا على (النسور) تفرحوا. يا كابو لو كنت في مكانتك كنت رجعت (فنون). خالد الاعيسر ان شاء الله الدوري الممتاز لا ينقل على النيلين ...عشان نشوف قناتكم دي البحضرها ليكم منو؟. غايتو إلا تدخلوها ضمن برامج الخدمة الالزامية. زول عادي كدا بتابع ليكم القناة دي مافي. همد يا همد الخريف باقى ليه (4) شهور...وعليك الله بالمرة كدا ...تكلم اعضاء مجلس المريخ معاك وتقول ليهم رمضان باقى ليه (3) شهور. عارفكم انا الخريف بجرسكم اكتر من رمضان يا ناس ولاية الخرطوم. يا نصر الدين لو في رقم غريب اتصل بيكم ما ترد ...ديل بكونوا ناس المريخ ..عاوزين يشوفوا عقدك بنتهى متين مع الهلال ..عشان يجيبوك المريخ. اتوفيستر ناس شندي زعلانين منك ..قالوا ما شفتا هدف الاهلي في مرمى اكرم الهادي سليم ..عشان كنت الوقت داك نايم ...انت واكرم الهادي سليم. اكرم ذاتو كان نايم. قناة الشروق قناة الشروق سوف تنقل مباراة الهلال وليوبار على الهواء مباشرة. عليكم الله يا ناس الشروق ..لمن الهلال يجيب ليه (هدف)..عيدوا لينا (الهدف)..ما تعيدوا لينا (ظلال الاصيل). »«««««««««««««««««««««««««««««««««««««« حوار من طرف واحد واحد سأل نفسو ..قال هسع الهلال دا وقت يصل مرحلة المجموعات ما برفعوا العقوبات الاقتصادية على السودان. غايتو الهلال بقى الحاجة الوحيدة البدخل ليه عملة صعبة للبلد دي. مشروع الجزيرة وقف. الصمغ العربي ..وقف. السكر ..القمح. الدولارات بدخلها الهلال براهو. اول السطر عندنا (شارع) في الحلة قفلوه ..عاوزين يعملوه (مول) تجاري. وعندنا (ميدان) في الحلة ..قلبوه (شركة استثمارية اجنبية). الواحد بقى خايف على (موبايلو)..ما يقوموا يعملوه (بوتجاز). روسي تجميع روسي وقع من الطابق العاشر ما جاتو أي حاجة. تاني يوم عمر الجزلي سجل معاه (اسماء في حياتنا). ولا كضب. الولد الشفت قلت لي (عبدالماجد) المباراة ح تنتهي كم؟. قال لي شوف لو ما جات (مطرة) بتنتهي خمسة. قلت ليه طيب لو جات مطرة؟. قال لي برضو ح تنتهي (خمسة). الكلام دا طبعاً ما بعجب المريخاب. صفحة جديدة ناس المريخ الليلة مفروض المباراة يتابعوها في الاذاعة. لو تابعوها في التلفزيون برفعو (ضغطهم) ساكت. توقعات تاني في حتة تانية في موضوع مختلف قلت لي عبدالماجد المباراة ح تنتهي كم؟. قال لي لو ما ظلمنا الحكم ح تنتهي خمسة. قلت ليه طيب لو ظلمنا الحكم. قال لي برضو خمسة. قلت ليه : قومت نفسي ساكت. رياضة عالمية في مصر فاز المستشار مرتضى منصور في انتخابات الزمالك المصري برئاسة النادي الابيض. هنا الله يستر من صلاح ادريس. بتاع قندران بتاع قندران زعلان زعل شديد من رجل مرور ..قال كل ما اجي ماشي فيه يقول لي (اللستك الرابع) وين حق القندران؟. انا القندران دا لو فيه لستك رابع ..كان طلعت ليه (رخصة). شفع الزمن دا في ركن مختلف خالص ..قلت لي عبدالماجد توقعاتك شنو لمباراة اليوم. قال لي عندي توقعين. قلت ليه التوقع الاول؟. قال لي الهلال يغلب خمسة. قلت ليه والتوقع التاني؟. قال لي برضو الهلال يغلب خمسة (ان شاء الله). سؤال يا جماعة الواحد لو عاوز يمشي شمبات بي كبري الفتيحاب..الحكاية دي ممكنة ..ولاّ عندكم رأي تاني؟. عقدة المريخاب بقوا عندهم عقدة من (المجموعات)...الواحد فيهم لو لقى ليه جماعة قاعدة في (مجموعة)..بقوم منها. اصغر مشجعة في العالم هذه الصورة ...لأصغر مشجعة في العالم ...وهي للطلفة شيماء وليد حيدر ...حفيدة رئيس اتحاد شندي السابق حيدر كرموش ..واحد ابناء منطقة أم الطيور غرب عطبرة. شيماء ولدت يوم مباراة المريخ وكمبالا سيتي والتى خسرها الاحمر في ارضه ووسط جمهوره 0 / 2. الطريف في الامر ان اسرة هذه الطفلة ..زملتها ودثرتها بشعار الهلال ..وقيل ان (شيماء) ما بتوم إلا بي نشيد (سيد البلد). هذه الطفلة ..تنتظر اليوم هدفاً من الشغيل ..بالتحديد كدا.
