ود الشيختون ..لمن يشوف ليه (عربية) وقفت في الشارع ..بجري جري على البيت ..عشان يفتح (الصالون) ..ويشغل (المروحة). في ناس عندهم اهم حاجة في استقبال الضيوف ...تشغل ليهم (المروحة). وتتكلم ليهم عن مباراة الهلال الاخيرة. بعد كدا ان شاءالله ما تجيب ليهم (غداء). والعجب لو مع (المروحة) شغلت ليهم معاها (عالم الرياضة). زمن كان برنامج (عالم الرياضة)...عالم رياضة بالجد ..قبل ما يبقى كلو (سبق خيل). هسع تحضر (عالم الرياضة) ..زي كأنك في المنطقة الصناعية ..برنامج كلو (زيوت). وعاوزين الكورة تطور. الغريب في الامر ..ان الجماعة ديل معتبرين تطوير كورة القدم في السودان عن طريق (تحويل) الطبق. انت تعال هنا ..الايامات دي شايفك مركز على (المروحة). تكون (المروحة) دي فيها (سر)..كلامك دا اصلو ما ساكت. فكيت لينا ناس بلة جابر ..ومسكت لينا في (المروحة). بي صراحة. بي امانة. المروحة دي الحاجة الوحيدة الممكن تنتقدها ..وما في زول يقدر يقول حاجة. لا مجلس صحافة ..ولا غيرهم. تقول اي حاجة في (المروحة)..ما في زول يسألك. تنتقدها ..تقطعها ..تلعنها..تلعن ابوها ...لا بتزعل ولا بتحنبك. ود الشيختون شغل المروحة. وطلع مدلدل في ايدو (جركانة) الموية الباردة. الموية الباردة في السخانة دي ما في حاجة زيها. باردة ..متل ضربة الجزاء في الزمن البدل الضائع. متل المسكول من رقم غريب. تفكر فيه ساعة ونص. ود الشيختون ..ابوه علمو على (الكرم) ...خلاهو يقابض في (العربيات) من طرف الشارع. يلاقى في الناس ..ويتلافح عزومتهم ...متل (شاي المغرب) عند ناس عبدالعزيز ...(قنانة) اللبن تجيب الضهبان. عندهم جنس شاي ..طعمو من خشمك (45) يوم ما بروح ..يخلي ليك خشمك ريحتو قنانة ..قنانة زي الحلة (المكدبة). هسع (ود الشيختون) دا انا جايبو ليه؟. جايبو زي (المروحة) دي. تمويه ساكت. ما عندو اي علاقة بالموضوع. ولا عندو اي ذنب. الحاجة البتغيظ. مرات بتمشي للحلاق ..تقول ليه : قدامي في زول. يقول ليك : قدامك في عشرة. دي حلاقة دي ولّا ماشيين الدهب؟. تلقى العشرة مترصرصين ليك في الكراسي زي المنتخب الدينماركي وقت يكونوا طاردين منهم لاعب. عيونهم زي قدحة التوم. شرارة بس. انتوا ما لاحظتوا الزول وقت يجي داخل صالون الحلاقة ..ويلقى قدامو في ناس. الناس يتشمروا ليك فيه وقت يدخل صالون الحلاقة ..زي كأنو دخل القسطينطينية...ما دخل ليه صالون حلاقة. انتوا ليه الناس البتكون قاعدة (مترصرصة) في صالون الحلاقة ..ليه بكونوا زعلانين كدا؟. تقول جايبنهم بعثة (زعل). دافرين قدامهم خشومهم من الزعل زي (الدرداقات). يمكن (الزعلة) دي ..نظام نحن قدامك. ويمكن عدم موضوع. عليكم الله هي البلد ناقصة (زعل) عشان الجماعة ديل يتصدروا ليك موضوع (الزعل) بالشكل دا. هسع الحاجة البتزعل. ناس الحكومة ديل ..ما دعموا الهلال ..وما قدموا ليه اي حاجة. مع ذلك ناس الحكومة متصدرين ليك الموقف ..عاملين فيها داعمين للهلال. وهم الهلال (لوح تلج) ما قدموه ليه. متصدرين المشهد ساكت. جابوا لينا مجلس حكومي كلو ..مع ذلك قرش ما قدموه لهذا المجلس. الوالي يزور المعسكر. رئيس البرلمان يزور المعسكر. ونائب رئيس الجمهورية يزور المعسكر وما في (دعم) حقيقي قدموه للهلال. كل الذي قدمته الحكومة للهلال الذي شرف السودان واتأهل لمرحلة المجموعات هو تقديمهم له مبلغ (300) الف جنيه. يعني ناس الحكومة ..بي صورهم دي ..وتصدرهم للموقف افضل منهم (الخندقاوي) بي حركاتو دي. القدمو الخندقاوي للهلال ..اكتر من القدمتو الحكومة لممثل البلد الوحيد. عليكم الله الموضوع دا ما بزعل. جابوا لينا جماعة كلهم من الحكومة ...غشوا بيهم الناس ساكت ..وقرش ما قدموه لهذه المجموعة. زي كأنهم عاوزين يحرجوهم ساكت. او عاوزين يسكتوا الهلالاب من (النقة). نحن ما عاوزين (قرش) من الحكومة ..لكن في نفس الوقت ما عاوزين ناس الحكومة يعملوا فيها بدعموا في الهلال. يعني ما تجوا تصوروا لينا مع ناس بكري المدينة وبشه ..عندما ينتصر الهلال ويتأهل. وساعة الجد ..ما قاعدين نلقى منكم حاجة. الواحد فيهم يجي شايل ليه (كيس فواكه)..وبكرة تلقى الصور في الجرايد. الجماعة ديل فاضل ليهم بس يتخندقوا. قلنا نحن ما عاوزين قروش من الحكومة ..قروش الحكومة كفاية العملتو في المريخ. قروش الحكومة ..خلت ليك المريخ يطلع من دور ال (64). نحن بدون قروش الحكومة ..لا النفط ..ولا الدهب اتأهلنا لمرحلة المجموعات. عليكم الله..ما تجيبوا لينا (النحس). هسع زياراتكم كترت لمعسكر الهلال وبعد ان اتأهل الهلال لمرحلة المجموعات ...اي واحد في الحكومة عاوز يعمل ليك فيها مع الهلال ..وبدعموا الهلال. وهم زي ما قلتوا ليكم (لوح تلج) ما بجيبوه. خسارة صور ساكت. الهلال هنا في الدوري المحلي ..يظلموا فيه ..ويستهدفوه بي حكام ما عندهم علاقة بالكورة. وينقضوا ليه اهداف صحيحة..ويطلعوا ليه ضربة جزاء من داخل الخط لتلعب خارج الخط ..ويلعبونا بعد دا كلو بدون جمهور وفي مدني. ويقولوا ليك الحكومة بتدعم الهلال. بتدعموا بي شنو؟. بتدعمونا بي نقض الاهداف الصحيحة. بي تحويل ضربة جزاء صحيحة الي مخالفة خارج الخط. بتدعمونا بي شنو؟. هسع الهلال وقت يتقدم في المجموعات ويقدم عروض جميلة ان شاءالله ، ويمشوا لي قدام. الزيارات بتكتر لمعسكر الهلال. ح تكتروا الجية. في رجل غريبة ح تدخل معسكرات الهلال. وانتوا من تجونا ..وتكتروا علينا جيتكم ..بتجيبوا لينا (النحس). هسع زياراتكم الاخيرة للهلال انعكست على اداء الهلال ونتائجه في الدوري الممتاز. كنا ماشيين زي الطلقة. الجماعة فتحوا فينا زيارات ..الاهلي شندي غلبنا في ملعبنا. والله شافنا قدام الامل. عليكم الله تاني ما تجونا. تاني ما تصوروا مع ناس بكرى المدينة. ما عاوزين منكم (قرش). بس كمان ما تعملوا فيها انكم بتدعموا الهلال. ما تعملوا فيها انكم واقفين مع الهلال. خلونا برانا ..نحن بنشق طريقنا. جمهور الهلال ..براهو قادر على دعم الهلال ..والوقوف معه ..ومساندته. ما محتاجين لي اي زول. لكن تتخيلوا ديل (جمهور) الهلال عاوزين يحرمونا منو. وقفوا اتير توماس. وقفوا نزار حامد. وقفوا عبدالله البشير. لقوا الحكاية ماشه ...الهلال ما بقيف. قالوا نحن لو عاوزين نوقف الهلال ..لا بد من ايقاف الجماهير. قام قالوا شنو؟. قالوا الهلال يلعب بدون جمهور. عارفين الهلال قوتو في (جماهيره). عشان كدا ..قالوا يحرموا الهلال من جماهيره. تتصوروا مع حرمان الهلال من جماهيره ..قالوا يلعب برة الخرطوم. شفتوا (التلتلة) دي بجيبوها كيف للهلال. هي المباراة اصلا بدون (جماهير). في داعي نمشي نلعبها في مدني. بس عاوزين يتلتلوا الهلال. هسع العبقرية في دي وين؟. غايتو يا مجدي شمس الدين ..بقينا نشك فيكم ...مجدي تقول في دائرة الكورة بتاعة المريخ. الشغل دا شغل ناس مصطفى توفيق. اكبر انت يا مجدي. معقولة في سكريتر اتحاد ..يفترض فيه القومية ..والامانة ..يعمل البعمل فيه مجدي شمس الدين. الطريف بعد حركات المعارضة البعمل فيها الاتحاد العام دي ..ناس الحكومة عاملين فيها بدعموا في الهلال. يا جماعة ...ما تشيلوا جهد اولاد الهلال ساكت. الحكومة الي الان ما قدمت شيء للهلال. استاد الهلال الذي هو الان في مرحلة التأهيل ..الحكومة (طوبة) واحدة ما قدمتها للهلال. الهلال الذي بلغ مرحلة المجموعات ..الحكومة بتعاند فيه وبتعاكس ..وعبر اتحاد مسيس ..بودوا ليك الهلال مدني عشان يلعب في مدنى بدون جمهور. ديل لو خلونا على راحتنا ما بتجينا اي عوجة. بس ما تحفروا لينا. ما تصوروا لينا مع اللاعبين. ما عاوزين نسمع اسماءكم في نشرات الاخبار. ما تعملوا لينا فيها انكم بتدعموا في الهلال. ملحوظة : لوح تلج ما شافو الهلال منكم. هوامش سميه طه (النجمة) احدى اقلام المريخ الرائعة التى افتقدتها الساحة الاعلامية في الفترة الاخيرة. كما كتب مامون ابوشيبة عنها ..وشهد لها اسماعيل حسن ..نسأل نحن ايضا عن سميه طه ..ونتمنى عودتها (كتابة) في الصحافة الرياضية مرة اخرى. سميه طه ..تعرضت لظلم كبير ...نرجو من اهل المريخ انصافها ..فهي قد قدمت للمريخ الكثير. ويمكن لنا العودة لهذا الموضوع تفصيلا. فقط نتمنى الان ان تسفيد الصحف الرياضية من قدرات سميه الصحفية ..وان يأتي انصافها من اهل المريخ. ود شندي اباذر الكدرو ..مريخابي له مشاركات مميزة عبر زاوية مزمل ابوالقاسم واحمد محمد أحمد. واظن ان اباذر الكدرو عنده القدرة على الاستقلال بكتاباته ..وقد شهد له بذلك الاخ أحمد محمد احمد. فهل تكسب صحف المريخ هذا القلم. صحافة المريخ محتاجة لدعم سريع. دعم فوري..وهي محتاجة لسميه طه ..واباذر الكدرو. بايرن ميونيخ خسر في ارضه من بوروسيا دورتموند 0 / 3. يعني الهلال ما براهو. بايرن ميونخ خسر في ارضه ..يبدو ان الاندية الكبيرة تمر هذه الايام بحالة من (الترنح). وهي حالة عابرة وطبيعية...سرعان ما سوف تنتهي. الغريب في الامر ان برشلونة ..خسرت امام اضعف الاندية في الدوري الاسباني. برشلونة خسرت من بلد وليد ..وخسرت امس امام غرناطة. بلد الوليد وغرناطة كلاهما يحتل مراكز متأخرة في روليت الدوري الممتاز. انتوا ساكت شايلنها مع الهلال. الموضوع خربان من برشلونتو. تتصوروا امس ميسي يضيع في الكور زي (عنكبة). نيمار ...المباراة كلها انا قايلو سعيد السعودي. رغم انو ما في اي علاقة بين نيمار وسعيد السعودي. .... عاجل : الاتحاد الاسباني دا لو فيه (سكرتير) زي مجدي شمس الدين ..كانت برشلونة نزلت التانية...الله شافكم يا ناس البرسا.
