· لم يجد مامون ابوشيبة في مباراة الهلال ومازمبي الاخيرة ...التى اصيب فيها محمد أحمد بشه ، وخرج في موقف مؤثر ...وسقط في المباراة نفسها سيف الدين مساوي في مشهد (دامي) ، وكاد ان يفقد حياته...(بكري المدينة ذاتو يشفق الزول). · انت يا بكري شفقتك دي عاوز تعملها لينا في اصابة سيف مساوي. · لم يجد ابوشيبة شيء يعلق عليه غير تسلل صلاح الجزولي. · صلاح الجزولي ذاتو سجل في الدقيقة 52 من عمر المباراة (هدفا) ثاريا .. مع ذلك لم يجد ابوشيبة في كل هذه الاحداث الساخنة في المباراة إلا ان يتحدث عن حالة (تسلل) لصلاح الجزولي لم يحسبها الحكم في الدقيقة (58) كما قال ابوشيبة. · ديل يقولوا ليهم شنو؟. · ديل يعملوا ليهم شنو؟. · زي الزول الرسلوه لي (شطة)..قالوا ليه لو ما لقيت شطة ..جيب لينا اي حاجة (باردة). · قام جاب ليهم (تلج). · مامون ابوشيبة انتقل (برأيته) الى مرحلة المجموعات ليفتي لنا عن حالات التسلل التى لا وجود لها...وترك (الممتاز) بعد الاجازة الاجبارية التى سوف يدخل لها المريخ. · يا ابوشيبة (المجموعات) دي ما بتقدروا عليها. · الشغل دا فيصل سيحة ما بقدر عليه. · دي (مجموعات)...ما سيكافا. · الغريب في الامر ان مامون ابوشيبة احتسب (تسلل) صلاح الجزولي في الدقيقة (58) رغم عدم مشاركته في اللعبة وعدم تداخله ..وقد كان الجزولي فعلا مستللا لكن الكورة استلمها بكري المدينة القادم من الخلف. · صلاح الجزولي ما عندو اي علاقة بالكورة. · ابوشيبة ظل ينادي ويقول ان (بكري المدينة) متسلل في مباراة الهلال والمريخ في الهدف الذي سجله نزار حامد...وجاء في مباراة الهلال الافريقية امام مازمبي وترك بكري المدينة ..وذهب نحو صلاح الجزولي (المتسلل). · ديل (متلقيين حجج). · ديل متلقيين (تسلل). · يعني مامون ابوشيبة في كل مباراة للهلال يشوف ليه لاعب في الهلال (متسلل) حتى لو كان لم يشارك في اللعبة ليقول ان اللاعب كان في تسلل. · لو في لاعب قاعد في بيوتو ...وما مشارك في المباراة ..ممكن ابوشيبة يطلعوا لينا (متسلل). · المهم يطلع ليه لاعب متسلل والسلام. · ان شاءالله بتاع الخضار. · سيد اللبن. · اي زول مستلل كدا. · في كل مباراة يكتشف لنا الحبيب ابوشيبة (الذرة) في ذلك الامر ..بحثا فقط عن حجة يبطل بها انتصار الهلال. · ويقول لينا الزول داك كان (متسلل). · بهذا الاسلوب لن يتقدم المريخ. · احسن تشوفوا فريقكم البطلع من دور ال (64). · الهلال دا شعر ما عندكم ليه رقبة. · تصدقوا ان اعلام المريخ يتحدث عن (تسلل) لا وجود له للاعب في الهلال ..ويتركوا شئون فريقهم الذي خرج من الدور التمهيدي. · خرج من دور ال (64). · طلعوا زمان ..طلعوا في الموسم الماضي ..ونحن الي الان بنلعب. · انتوا علي شنو؟. · شوفوا ليكم (سيكافا) تشغلكم شوية. · المريخاب يتحدثون عن تسلل (وهمي) في مباراة الهلال ومازمبي التى قدم فيها الهلال احلى العروض وكانت المباراة (ملحمة) حقيقية لا تقل بي اي حال من الاحوال عن (ملحمة) الاهلي المصري ان لم تكن تتفوق عليها بالدماء التى سالت في الملعب والروح القتالية التى لعب بها الهلال امام مازمبي. · غايتو الواحد لو اشترى ليه صفيحة جبنة ..ودفقها ..ما خاطي عليكم. · يا زول جبنة شنو؟. · احسن اقول جبنة من اقول (اطلاق الحريات). · الواحد يبقى حريف. · يعني لو قلت ليكم (صلصلة) اعرفوا طوالي اني قاصد (مكتب الوالي). · الحمدلله نحن في الرياضة عندنا (والي). · عندنا (والي) نقول فيه اي حاجة. · وعصام الحاج ذاتو ما مريحو. · ارجع ليكم للصلصلة ..وإلّا اوصل ليكم في حتة تانية. · نعود الى مامون ابوشيبة ...الذي نجده في حقيقة الامر اكثر اعجابا بالهلال مننا. · مامون ابوشيبة لو يوم لقيتوا شايل ليه (جركانة) وبشجع في الهلال في المدرجات ما تستغربو. · الزول دا قرب يبقى هلالابي. · فاضل ليه (تسلل) واحد كدا ..وابوشيبة يبقى معانا. · قرب ..اصبروا ليه انتوا بس. · ابوشيبة الهلال عنده هو الحد الاعلي ..وهو المثال الانسب للمريخ ليمشي على خطاه ويتبع طريقته. · مامون ابوشيبة في فترة من الفترات كان يتمثل بالهلال في انه جمع كل حراس المرمي الجيّدين في السودان ..ولم يترك للمريخ حارسا واحدا ليتجه المريخ نحو (التجنيس) في منطقة ممنوع فيها التجنيس فيجنس الفلسطيني رمزي صالح ثم عصام الحضري. · طبعا اكرم الهادي سليم دا براهو كدا ما مضمون. · كان ابوشيبة يعتبر ان (لملمة) الهلال لكل الحراس الجيّدين في الساحة ..امر فقط قصد به الهلال ان يضرب المريخ. · دا الهدف ..عشان المريخ ما يكون عندو (حارس). · يقعدوا يتلفتوا كدا متل الزول البنسى الباقي عند الكمساري. · ينزل من الحافلة خشمو ملح – ملح. · كان ابوشيبة يدعو الى ان يدفع المريخ في المعز محجوب (مليار) جنيه ..عندما كانت المليار ..الناس في الكلام ما بقدروا ينطقوها. · المهم ان ابوشيبة كان يحرّض المريخاب على التمثل بالهلال الذي يدبر اهله ويمكر. · ثم مضى ابوشيبة عندما وجد ان الهلال يتقدم عبر صناعة اللعب ..وصناع الاهداف. · وان الحراس الاجانب الذين احضرهم المريخ ...(تسالي) ما بحرسوه. · بشه مسك ليك رمزي صالح وعصام الحضري ..خلى ليك اي واحد فيهم بلعن اليوم الجابو السودان. · وعبداللطيف بويا جاب ليك هدف في الحضري ...الحضري الي الان بقوم نص الليل يقطع ليه (جك موية) ويرجع ينوم تاني من الخلعة. · الود قلبو بيوجعو. · المسكين بعد هدف بويا ..قالوا ليه اسمك منو يا عصام الحضري ..قال ليهم اسمي ايهاب زغبير. · قالوا ليه يا الحضري ليه بتقول كدا؟. · قال ليهم عشان الهدف الدخل في شبكتي دا ما بدخل في مرمى إلّا يكون حارسها ايهاب زغبير. · دا ما انا. · انا ما الحضري. · الحضري دا زول تاني. · انا ايهاب زغبير. · ايهاب زغبير ..هسع ذنبو شنو؟. · زولكم يهضرب متل صابون الغسيل. · اول صابون الغسيل بهضرب؟. · مالكم ما يهضرب ان هضرب ..انا هسع جبت سيرة للحوار الوطني. · براكم انتوا بتلافحو في الكلام. · نرجع للموضوع الرئيسي. · تفتروا الزول ..وتقلعوا ليه (حروفو) من خشمو. · ابوشيبة حسب ان وجود هيثم مصطفى ومهند الطاهر في الهلال هو الامر الذي يضرب به الهلال. · دا السر. · قالوا الهلال بنتصر على المريخ ب (هيثم مصطفى). · حرض ابوشيبة المريخ على البحث والتنقيب في هذا الامر...وكلما انتصر الهلال وتقدم قالوا ان الهلال يمتلك لصناع لعب جيّدين. · جرب المريخ صناعة اللعب ..ولم يترك صانع العاب لم يأتي به سجللوا وارغوا برقم خيالي ثم عبدالكريم النفطي. · وقبل وارغو والنفطي جابوا ليهم واحد من بلغاريا اسمو (مشاوي) قالوا بشبه هيثم مصطفى. · انتوا على شنو؟. · ناس المريخ هيثم مصطفى ذاتو سجلوه في المريخ ..(عاوزين نقطع ليهم رأسهم). · لكن كل ذلك لم تتغير شيء في المريخ ..مازال المريخ يخرج من دور ال (64) بينما وصل الهلال لمرحلة المجموعات. · بعدها ظن المريخاب ..ومامون ابوشيبة صاحب تأثير قوى في مجتمع المريخ ..ظن المريخ بايحاء من ابوشيبة ان تفوق الهلال ناتج من (القيادة). · وان تدهور المريخ ..فقط لأنه لا يمتلك قايد ميداني. · قاموا عملوا شنو؟. · قاموا شطبوا فيصل العجب للتخلص من هذا القايد المسالم ..والمسكين ..(حسب كلام المريخاب). · وقد كان ذلك من اجل فتح الفرصة لقايد جديد. · ذهب هيثم مصطفى من الهلال ..ولم تتأثر القيادة في الهلال ..وذهب هيثم مصطفى الي المريخ ومازالت (القيادة) في المريخ منطقة صراعات وخلافات وقلنا وقالوا. · تارة يمنحوها اكرم الهادي سليم ..وتارة يقولوا ان اكرم الهادي سليم لاعب مستهتر ..وما بقدر المسؤولية. · بل ان ابوشيبة امس خرج علينا بتوصية صلاح يحي الذي اوصي المريخاب بان يجعلوا اكرم الهادي سليم (يتزوج). · تتخيلوا. · عرسوا ليه. · وقال مامون ابوشيبة حسب توصية صلاح يحي ان علاج اكرم الهادي سليم في (الزواج). · ولا تعليق لنا حول هذا الامر ..لكن نكتفى بالقول ان هذا الامر يوضح الى اين وصلت الامور الى المريخ؟. · انتوا بي كلامكم دا يا جماعة انتهيتوا من اكرم الهادي سليم ..زي ما انتهيتوا من فيصل العجب وقلتوا عليه انو لاعب مسكين وما عندو شدايد. · القيادة في المريخ ظلت تتنقل من اكرم الى بلة الي موسى الي سعيد السعودي وبالعكس. · القيادة في المريخ متل (اللستارتر) الواحد في بيت فيه (12) لمبة ، غير لمبة الحوش. · كل ما يكونوا عاوزين يولعوا ليهم لمبة ..يطلعوا (اللستارتر) من لمبة ويركبوه في اللمبة التانية. · الى ان اهتدوا اخيرا ان يمنحوا الكابتنية لعلاءالدين يوسف صاحب هيثم مصطفى. · قالوا علاءالدين بنفع. · ثم خرج علينا اعلام المريح يجمل لنا هذا الامر ..وقدموا لنا حملة صحفية يتحدث فيها كل المريخاب (اخرهم كان جمال ابوعنجة) عن علاءالدين يوسف وحن حسن قيادته ..وعن افضليته المطلقة في الارتكاز. · دا علاءالدين. · يا جماعة. · يا عالم. · كل هذا كان من اجل ان يمنحوا علاءالدين يوسف شارة القيادة. · مامون ابوشيبة في فترة من الفترات ايضا كان يعتبر ان قوة الهلال في (ارتكازه) ..وكان يقول ان الهلال سيطر على لاعبي الارتكاز. · حمودة بشير ما خلينا ليهم. · حتى جاء المريخ وشطب نصرالدين الشغيل الذي جاء للهلال ليؤكد ان السر في الهلال ..وان الفضل في روح الهلال بعد العروض التى اصبح يقدمها الشغيل في الهلال. · السر في الفانلة. · امس في عموده ..خرج علينا مامون ابوشيبة رئيس تحرير الغراء الصدي بتقليعة جديدة ..حسبها هي التى تميز الهلال وتجعله يتقدم. · ابوشيبة لأنه زول واضح ..وما بلف ويدور ..ختاها ليك عديل ..وكشف ليك الحكاية. · كتب مامون ابوشيبة امس : (على المريخ ان يركز في تسجيلاته على لاعبين اقوياء طوال القامة حتى لا يتفوق عليه الهلال بالاجسام والقامات الفارغة ..واذا راجعتم شريط اللقاء الاخير للاحظتم ان لاعبي الهلال كسبوا كل الكرات الهوائية داخل منطقة جزاء المريخ مثلما فعلوا امس مع مازمبي بل هزموه بهدف رأسي). · دا كلام ابوشيبة. · انا ما عندي اي قضية. · ولا عاوز اقول حاجة. · هذا كلام مامون ابوشيبة الذي يثبت ان القياس عندهم هو (الهلال). · شابكننا (العالمي ...العالمي...العالمي) لمن طلعتوا من دور ال (64). · تسجيل لاعبين اقوياء طوال القامة ..هذا امر برع فيه رئيس نادي الهلال السابق الامين البرير الذي كان يشترط البنية الجسمانية القوية في اللاعب الذي يريد ان يسجله الهلال. مع بعض الاستثناءات. · الان المريخ يريد ان (يقلد) الهلال حتى في ذلك الامر ..لكن نذكر اهل المريخ انهم مرة حاولوا ان يقلدوا الهلال في ذلك الامر فسجلوا (جوقة) من اصاحب البنية القوية. · جابوا ليهم ناس ما عندهم علاقة بالكورة. · فكان عالم خميس وصلاح الياس ...المجموعة التى فرتكها علاءالدين بابكر واعادها الى ود مدني في اول بص راجع الى ارض الجزيرة. · قام ناس المريخ عملوا شنو؟. · شطبوا اصحاب القامات الطويلة دي ..وسجلوا علاءالدين بابكر صاحب القامة القصيرة. · يعني اصلو ما بثبتوا ليهم على حاجة. · نحن ذاتو ما عارفين نتصرف معاهم كيف؟. · والله نحن يوم نمقلبكم ..نسجل لينا (موظف)...نقلب ليكم فريقكم كلو (موظفين). · اتمقلبتوا بالمرة دي. · هسع كامبوس دا قاعد خمس سنوات ..مالكم ما مشيتوا عليه. · جايبين ليكم مدرب بلة جابر من صديق علي صالح ما بفرزو وقت تمغرب. · زولكم ما بشوف. · قالوا ليك في عطبرة وقت الامل جاب القون في الدقيقة (98) ..اتوفيستر لمن وصل الجيلي كان مفتكر المريخ فايز. · عندكم مدرب وقت يكون عاوز يدخل راجي بقول لي موسى الزومة قوم سخن. · موسى الزومة يقوم يسخن ..يقوم يدخل رمضان عجب. · مدربكم دا (خرف). · قالوا وقت يجيبوا ليه (عدس)...بقوم يقول ليهم – (السمك) دا الليلة مالو ما فيه شوك؟. · ملحوظة : لمّوا مدربكم دا عليكم. هوامش · الهلال سجل جيرسيو ..من اجل مرحلة المجموعات ...مهاجم برازيلي كان بلعب في روما. · والمريخ سجل مدافع الجريف ومدافع مريخ الفاشر. · تسجيلات دورة (حوض النيل) واضحة ..وظاهرة. · فرق. · تسجيلاتكم دي ...ما بتمرقكم من دور ال (64). · تسجيلات بتاعة (تمهيدي) ساكت. · لكن زي ما قال ليكم مامون ابوشيبة شوفوا (الطول) كويس قبل التوقيع. · غايتو انا من شفت لاعب الجريف ولاعب مريخ الفاشر ..وقع معاهم المريخ بواسطة صديق علي صالح ..قنعت ليك منهم. · الجماعة ديل معناتها جمال الوالي ما مقتنع بيهم ..عشان كدا وقع معاهم صديق علي صالح. · صديق شنو؟. · كلامكم دا كلو ما قانوني ولا اثر له. · امشوا بيهم الاتحاد. · صديق علي صالح دا ..اكتر حاجة ممكن يعملها يجيب ليه (تذاكر) سفر. · يجيب ليه تأشيرات. · لكن يسجل ليه لاعب ..دي ما بقدر عليها. · صديق علي صالح تسجيلات (الرديف) كتيرة عليها. · الظاهر السنة دي ما عندكم (تسجيلات). · الحاجات دي زمان كان بحسمها جمال الوالي براهو. · من تركها لي صديق علي صالح ...معناتها قنع منها. · مباراة الهلال والزمالك بعد اسبوع. · مطلوب من الهلال ان يحسم امر التسجيلات ..بدلا من ان يترك الامور هكذا للاتحاد العام الذي يعطل دائما مصالح الهلال. · ما فائدة فتح باب التسجيلات ..اذا كان الاتحاد العام معطل التسجيلات. · هذا الامر متضرر منه فقط الهلال. · لو كان هذا الامر بخص المريخ ..كان مجدي شمس الدين سافر القاهرة عديل كدا. · هسع عامل فيها اضان الحامل طرشه. · اخبار دورة حوض النيل شنو؟. · اصلو ما شفنا ليها (خبر). · اوعكم ناس المان الصومالي يقوموا يتعذروا ليكم. · لو المان الصومالي اعتذر ..الدورة ح تنهار. · قالوا ليك المان الصومالي فيه مهاجم خطير. · يمكن المريخ يدخل في مفاوضات معاه ويسجلوا مهاجم المان الصومالي. · يا ابوشيبة ما تخاف ...مهاجم المان الصومالي صاحب قوام فارع. · يعني ما تشيل هم للموضوع دا. · باسيرو قالوا طالب بحقوقه. · الزول دا (6) شهور قاعد يتعالج في الامارات على حساب المريخ ..وقت يبقى كويس ..يطالب بقروشه. · دي حقارة بس. · تراوري قالوا زي الطاهر الحاج ..جاتو (نفسيات) بعد ما شاف الهلال في المجموعات بيلعب امام مازمبي. · تراوري بقى يطلع من دور ال (64). · هسع لو كنت بتلعب في الهلال ..كان مشيت اوروبا. · في المريخ في دورة حوض النيل ناس شندي ما بشوفوك. · .... · عاجل : دورة حوض النيل لو فيها (سمك) ما تنسونا.
