قالوا ليك مصطفى النقر كان في الملعب ولا بتعب ولا بجري – بعمل اي حاجة وهو قاعد في مكتبو جمال فرفور دا بقى (سيكافي) اكتر من السيكافيين نفسهم عزالدين الدحيش كان (المدافع) اول حاجة بعمل ليه (معاينات) يمتحنو عديل كدا في التاريخ والجغرافيا والانجليزي واللغة العربية والمعلومات العامة المريخ بقى زي جامعة افريقيا العالمية – محترف يوغندي ومحترف كيني ومحترف مالي ومحترف عاجي ومحترف مصري العالم اطور. الناس اتقدمت. نحن لسه واقفين في نفس الحتة – ما عاوزين نمشي (خطوة) واحدة الي الامام. مشكلتنا – الموبايل ناقص شحن. الموبايل عاوز كهربة. دي قضيتنا. بنبدأ من فوق – ونمشي لي تحت. من القمة الى اسفل. شغالين بالعكس – الكلام دا بالتأكيد ما في الكورة بس . الكلام دا في اي حاجة. في اي مجال. في السياسة والفن والاقتصاد والثقافة والرياضة. في اي حاجة اتراجعنا. في التعليم وفي الخدمة المدنية وفي الاعلام. في اي حاجة. طبيعي لمن نتراجع في تلك الاساسيات ان نتراجع بشكل اكبر في الرياضة. اذا كان هنالك تراجع في العلاج – عادي الواحد يدخل المستشفى زي الحصان ويطلع على عجل. او يطلع على احمد شرفي بسبب خطأ طبي. اذا كانت الارواح رخيصة كدا – ح تبقى القضية يعني في اننا اتهزمنا او طلعنا من بطولة. ولا حاجة. ناس بموتوا. ناس بروحوا. بقت على (الكورة) يعني. بدينا من صديق منزول ومشينا لي (افياني). من عثمان حسين ومحمد وردي الى جمال فرفور. فرفور. بالمناسبة جمال فرفور دا بقى (سيكافي) اكتر من السيكافيين نفسهم. يا فرفور (اتقل) شوية. شلاقة (اغاني واغاني) دي ما تعملها كمان في (سيكافا). الموضوع ما بستاهل. يا فرفور شغلك البتعمل فيه لو كان كان شغل (فن) بنقول ليك البتعمل فيه دا ما عندو اي علاقة بالفن. الفن في حتة والبتعمل فيه دا في حتة تانية. ممكن غايتو تتلاقو انت وبلة جابر في (الكشافات). وان كان الذي يفعل فيه جمال فرفور هذا يظنه (روح رياضية) بنقول ليك ما في روح رياضية مبنية على استفزاز الاخرين – والمتاجرة بتصريحاتك التى لا تعيها. ناس مزمل ابوالقاسم وهيثم كابو خلوا (طه سليمانهم) واحمد وحسين الصادق وقبلوا على (جمال فرفور). ليس حبا في جمال فرفور ولا ايمانا بفنه – لكن بس اتجهوا اليه من اجل (المكاواة). ليس اكتر. وان كان ما يفعله جمال فرفور مجاملة لجمال الوالي – فيجب ألا تكون على حساب جماهيرتك. اما لو كان ما تقوم به الان يا جمال فرفور شغل خاص ..ما عندو علاقة بالفن ولا الرياضة فانت حر فيه. دي الحالة الوحيدة الممكن نعذرك فيها. ربما يكون جمال فرفور بقوم بتنفيذ اوامر. ومن لا يملك قراره لا يملك قراراته. يبقى في الحالة دي نحن ما عندنا معاك قضية. يمكن (اكل العيش) عاوز كدا – (كان ترضى وكان تزعل). بس اعمل الحاجات دي بعيد عن الهلال. ما اي زول يشيل اسم الهلال والانتماء اليه – ويقعد يمثل بذلك الانتماء. بعدين اذا كان جمال فرفور دا شايف كأس سيكافا دي حاجة كبيرة – وحاجة تستاهل انو يمشي ليها في المطار ويستقبل بسببها المريخ – فاننا نقول ان سيكافا توازي تماما جمال فرفور. يا حليل وردي ..مليون سيكافا ما بتهز شعرة في رأسه. الخلعة البعمل فيها جمال فرفور بعد السن دي شنو؟. يا فرفور معليش حركاتك دي حركات (نجوم الغد). حركات ناس صغار. جمال فرفور طالما هو فرحان ب (سيكافا) – يبقى شبهينا واتلاقينا. اصلنا نحن اتراجعنا برضو في الفن. ادحرجنا. في الفن برضو بقينا سيكافا. جمال فرفور (سيكافا) الفن. نحن اتراجعنا في الفن. اتراجعنا في البطولات بشكل مخيف. من عثمان حسين لجمال فرفور. من جكسا – وصلنا (اوليفيه). بلد طلعت عزالدين الدحيش وعلي قاقارين ومصطفى النقر ووالي الدين محمد عبدالله وشغالة لي ب (كوليبالي). انغا. مهاجم كيني في بلدو (مشجع) غير مقبول. هنا في البلد دي بنعملو (مهاجم). وبنمنحه الجنسية السودانية كمان. اتراجعنا. اي حاجة بدأت عندنا من فوق – ونزلنا تحت. دقينا الدلجة. عزالدين الدحيش زمان كان بلملم ليك الدفاع كلو في (سطر واحد) وبنزل بيه للسطر التاني. عزالدين الدحيش كان (المدافع) اول حاجة بعمل ليه (معاينات) يمتحنو عديل كدا في التاريخ والجغرافيا والانجليزي واللغة العربية والمعلومات العامة. وبعد دا بعمل ليه فحوصات طبيبة للسكري والضغط والقلب ...من ثم بدخل بيه خط (18) وبجردو ليك من كل هذه الاشياء. الكورة عند عزالدين الدحيش كانت فهم وثقافة – قبل ما تكون لعب وهزيمة وانتصار. لاحظ اي مباراة لعزالدين الدحيش بتلقى هناك (حوار) كلامي بينه وبين المدافع قبل (المحاورة) البتحصل في الميدان. تعال شوف المهاجم الان – التدريب بقى اعلى – القروش بقت اكتر – العالم مفتوح. اي زول بقى متابع للدوري الاسباني والايطالي والانجليزي والالماني – مع ذلك ما في اي نقلة من هذه الدوريات في كورتنا. كورتنا كلها في الكشافات. ووقت يجيبوا (سيكافا) يقعدوا يفرحوا فينا. يعملوا ليهم مهرجانات واحتفالات وبصدقوا. يملأوا فراغهم بتلك (الاوهام). بقينا نفرح ب (سيكافا). الهلال والمريخ اي واحد فيهم بقى فيه (7) اجانب. المريخ بقى زي جامعة افريقيا العالمية – محترف يوغندي ومحترف كيني ومحترف مالي ومحترف عاجي ومحترف مصري. طيب المريخ هنا وين؟. من الحراسة الى رأس الحربة كلهم (اجانب). والحكومة وقت الاجانب ديل يجيبوا كأس سيكافا بفرحوا وبكرموهم وبعملوا ليهم مهرجانات. والمنتخب يسافر بالقطاعي. ويرجع بالقطاعي. يلملموا فيه بي (امجاد). ويسيروا نشاطه ب (الشيرنق). يا جمال فرفور انت فاكر المنتخب البلعب باسم السودان دا مشارك فيه باسم دولة اليمن الشقيقة. المنتخب دا بمثلنا. وإلّا انتوا بقيتوا ما بتشوفوا إلّا من خلال جمال الوالي. اتراجعنا. ادهورنا. بقى عندنا افياني في الرياضة – وجمال فرفور في الفن. وسيكافا. كان زمان عندنا مصطفى النقر – مهاجم كان بدخل الملعب بي اناقتو كاملة. وبطلع بي نفس الاناقة. قالوا ليك مصطفى النقر كان في الملعب ولا بتعب ولا بجري – بعمل اي حاجة وهو قاعد في مكتبو. كان بعمل الشغل كلو من غير ما يتعب – يفلفل ليك الدفاعات ويجيب ليك القون في الحتة البحددها الحارس. تعال شوف ناس رمضان عجب وبكري المدينة يجروا جرى الوحوش. وما في اي اثر. ما في نتيجة. بصراحة كورتنا بقت زي الفيلم الاجنبي البكون شغال في قناة – وترجمتو في قناة تانية. لو عاوز تتابع المشاهد في قناة ما بتشاهد الترجمة. لو شاهدت الترجمة ما بتشوف المشاهد. هسع كورتنا دي لو دخلت ليها الاستاد ..وخشيت عشان تدخل المباراة من جوة ..من الاستاد ذاتو – لو ما شلت (الراديو) معاك وشغلت المباراة وقعدت تشاهد فيها ما بتفهم حاجة. ناس بويا وخليفة ديل إلّا تشيل لهم (الراديو). عشان لمن تصنقع في الكشافات – ما تفوتك لعبة وقت ترجع تدنقر. لذلك الواحد في السودان بكون جوة الكورة وشايل الراديو او مشغل الاذاعة في الموبايل. عشان شنو؟. عشان يفهم حاجة. اها عليكم الله يا جماعة الموضوع دا ما زي حكاية الفيلم يكون شغال في (MBC) تو ..والترجمة في (MBC) اكشن. ........... ملحوظة : المريخ فعلا عالم (جميل) – جمال الوالي - وجمال سالم – وجمال فرفور. هوامش الاتحاد العام حتى في برمجته ما عندو كلمة. كل مباراة يتم تأجيلها. برامج الممتاز طبعا بيضعها المريخ. ناسنا ديل يكونوا منتظرين تراوري. اسامة عطا المنان بتاع (الشيرنق) شغال تأجيلات للمريخ. اصلو ما بقصر معاهم. وقت الموضوع يبقى على المنتخب يقول ليك نحن بنصرف على المنتخب ب (الشيرنق). انتوا لو كنتوا ملتزمين في البرمجة كان المنتخب وصل نهائيات كأس العالم. جمال فرفور بقى يعملها بائخة. يمكن نشوف جمال فرفور في تسجيلات المريخ القادمة. ............. عاجل : يا فرفور حمد الريح لعب في المريخ عديل كدا – ما سمعناه يوم جاب سيرة (سيكافا) ولو بالغلط...انت لعبت في (الامير) ومعسكر عديل في المريخ
