…و…. محمد عبد الماجد ريحتكم بقت سيكافا – سيكافا …و انتوا الجماعة ديل حكايتهم شنو مع سيكافا؟. يتساكفوا فينا من الصباح. قدر ما نحاول نتجاوز ليهم موضوع (سيكافا) دي – يرجعوا تاني يجيبوا سيرة سيكافا. انتوا اصلو ما بتكبروا على الحاجات دي. الزول وقت يكون كبير ..وقاعد يلعب مع الشفع برة (بلّي) ببقى ما ظريفة في حقو. ما جميلة. هسع ناس المريخ بعملوا في نفس الحكاية. فريق فيه مدربين ..كل واحد بي وزنو. وفيه (9) محترفين اجانب ..غير (المقصورة)…وبلعبوا في سيكافا. اجانبكم ديل ..وحارسكم اليوغندي ..وايمن سعيد المصري ..وتلعبوا لي في سيكافا. والله ليه حق هيثم مصطفى يمشي يقعد في بيتو ..وما يرد على تلفوناتكم. ليه حق. البلعبوا مع ديل شنو؟. طموحهم كلو (سيكافي). ما بشوفوا ابعد من كدا ..ولا عندهم حيل لاكتر من سيكافا. ناس الباشا ديل من سيكافا بقوا زي (الخلال). سيكافا كترت عليهم. ريحتكم ذاتها بقت سيكافا – سيكافا. من كترة (السيكفة). سيكافا بقت ظاهرة في عيونكم. ملامحكم بقت (سيكافية)..عيونكم ما عسلية ..عيونكم سيكافية. يعني عيونكم ذاتها مجلية في (الكشافات). و… (وشنو تاني؟). اصبروا اكمل ليكم الكلام – واقول ليكم الكلام الجد. الليلة معاكم في سيكافا دي للصباح. بطولة سيكافا دي مفروض تكون (منكورة)…ما كان تعلونها كدا للناس. نوع دي بدسوها. مفروض وقت يجيبوا ليكم سيرتها …تعملوا ساتر…تعملوا (حيطة). قوموا لفوا ..في زول في شهر رمضان – الشهر الفضيل بيجيب سيرة (سيكافا). و… (نسيت). سيكافا دي نحن عندنا زي (الملاريا). بنكافحها عديل كدا…بنعمل ليها (ناموسيه). بندخل ليها عديل في (الناموسيه). بنردم ليها (البرك) …وبنرش ليها الموية الراكدة. انتوا يا ناس المريخ (سيكافا) عندكم زي الحاجة السمحة؟. زي (الحبوب) الببلعوها عند اللزوم. المريخاب كل ما يكون عندهم ازمة يستعينوا ليك ب (سيكافا). سيكافا يا هي (فرمالتهم). ولا بخجلوا ..ولا بتقعدوا من الموضوع دا. ولا بقولوا حاجة. انتوا يا سلك ما بتشعروا بالاحراج. انتوا يا سلك ..ما قاعد تجيكم ازمة. الناس في كأس العالم …وانتوا قاعدين تتكلموا لي عن سيكافا ..وعن مشاركة المريخ في سيكافا ..وعن جمال سيكافا. سيكافا دي انتوا كبرت عليها. ما معقول كدا. إلّا يقولوا ليكم الكلام عديل كدا. إلّا يختوه ليكم (حطب). الواحد لو قعد كلمكم بالمنطق دا ..وقال ليكم الحاجة دي ما صاح ..ما بتقبلوا الكلام. ناس المريخ ديل كل ما تحصل ليهم (فجوة) بطولية يقولوا المريخ يشارك في (سيكافا). فيلم حضرناه الف مرة. فترنا نحن من المشهد دا. تعيدوا لينا في الفيلم دا مية مرة. و… (اتذكرت). على ما يبدو ان المريخاب ديل قنعوا من بطولة هنا …قنعوا من بطولة يكون فيها الهلال. عشان كدا بقوا يقطعوا ليهم بطولة من رأسهم ..ويشاركوا فيها بي اسم سيكافا. سيكافا لكن ح تبقى ليكم موضوع. ح تبقى ليكم (مجموعات). ح تبقى ليكم (شربات) في رمضان دا. في اخبار الامس ان المريخ سوف يشارك في النسخة الجديدة لبطولة سيكافا المقررة في الفترة من 9 الي 23 اغسطس المقبل برواندا. قالوا لينا الكلام دا بدون اي خجل ..ولا اتعقدوا ولا شعروا بالحياء. انتوا اصلو ما بتخجلوا. الاحساس بتاع (الحياء) دا ..ما قسموه ليكم. انتوا ما شايلين مقرر (الخجل). ما عندكم حصة فيه. شنو كل يوم والتاني تقولوا لينا المريخ ح يشارك في سيكافا. ناس بلة جابر ديل ليهم حق كورتهم تبقى (متسوكفة) كدا. موسى الزومة اصلو ما غلطان. ضفر اصلو ما غلطان. الغلط ظهر. الغلط في سيكافا ..ما في اللاعبين. اذا كان كل طموحات المريخاب تتمثل في المشاركة في بطولة سيكافا. ناس المريخ ديل مرة نظموا ليهم بطولة لسيكافا خسروا فيها مليون دولار. وجاء فريق اتراكو وشال البطولة. خلى ليهم خشمهم ملح – ملح. مليون دولار راحت ساكت. المرة دي ناس المريخ قالوا يتفننوا شوية في حكاية سيكافا دي. عارفين عملوا شنو؟. غيروا الاسم. عملوها دورة حوض النيل. لكن نحن طبعا حاجات زي دي ما بتفوتنا. عرفنها ليكم بالشبه. حوض النيل يعني سيكافا. نقشنا ليكم (التمثلية). انتوا قايلين بتغشوا منو؟. و… (دقيقة يا جماعة). جماعتنا ديل اصلوا ما بقنعوا من حكاية سيكافا دي. ينظموها في السودان ويطلعوا منها…ويمشوا ليها برة عشان يشاركوا فيها. ولا بفتروا. وقت ما يلقوها ..يمشوا ليها برة. وهي بطولة ما بتسوى (بصلة). عاملين ليها قومة وقعدة في الفاضي. وبفرحوا بيها كمان. الحكاية والله ما بتستاهل. بعدين سيكافا دي ذاتها بشارك فيها المريخ بي ياتو حق. مفروض يشارك فيها اندية مثل الخرطوم الوطني ومريخ الفاشر. المريخ مفروض يكون كبر على الحاجات دي. لكن المريخ ما بكبر. يكبر كيف وهم بلعبوا لي مع الشفع ديل. و.. انتوا تعالوا هنا عاوز اسأل سؤال محرج. الصيحة. الصيحة مالها؟. الصيحة وقفوها تاني. معقول طلعت بعد ايقاف (45) يوم لعدد واحد ..تم ايقافها في اليوم التاني. يا زول قول حاجة تانية. قول الدوم. قول الفجل. قول الروب. بس اطلع من هنا. ورسل العمود. الجق. و… وانتهى.
