مشكلة البلد دي ان الزول وقت يكون عندو قروش ممكن يبقى شاعر وممكن يبقى ملحن وممكن يبقى احسن زول في الدنيا وممكن كمان يبقى رئيس نادي الهلال """""""""""""""""""""""""""""""""""""" الكاردينال اتى به الى الهلال (ماله) – لم تأت به عبقريته ولا موهبته ..حتى يعطّل اهم ما عنده ويضع سقف معين للاعبين """""""""""""""""""""""""" بلجيكي الهلال قالوا ان انجازاته التدربية تتمثل في (طول قامته) – هذا كل ما عنده في عالم التدريب """"""""""""""""""""" تصريحات الكاردينال كانت طاردة ..وكانت محفزة للاعبي الهلال لمغادرة الفريق """"""""""""""""""""""""""""""""""" • كانت لنا ولغيرنا الكثير من الملاحظات في (اشعار) اشرف سيد احمد الكاردينال...باعتبار ان قصايده لا علاقة لها بالشعر. • وان الشعر لو شاف (قصايد) الكاردينال بعتزل الموضوع. • زول ما عندو علاقة بالشعر لا من بعيد ولا من قريب. • وكنا بنقول الكاردينال دا لا شاعر ولا حاجة. • مشكلة البلد دي ان الزول وقت يكون عندو قروش ممكن يبقى شاعر وممكن يبقى ملحن وممكن يبقى احسن زول في الدنيا وممكن كمان يبقى رئيس نادي الهلال. • الكاردينال علاقته بالشعر مثل العلاقة (المستحيلة) التى يمكن ان تكون في تقاطع بين شارع (علي عبداللطيف) الذي يقع غرب الخرطوم وشارع (داوننج ستريت) الذي يقع في قلب لندن. • ما في اي علاقة. • ولا حتى (رجل مرور). • علاقة اشرف الكادرينال بالشعر مثل ذلك (التقاطع). • والاشارة حمراء كمان. • اشعاره (مجرد) (هردبيس) لغوي ، و(كمونية) كلام – جمعها كمال ترباس بقدرة قادر وعملها (اغنيات). • لم نكن نتوقع ان يكون هناك اسوأ من تلك الاشعار. • الى ان جاء اشرف الكاردينال الى الهلال (رئيسا) فتبين لنا من بعد ان (اشعار) الكاردينال افضل مليون مرة من (ادارته). • وان شعره (رحمة) مقارنة مع ادارته. • وان البشوف ادارة الكاردينال للهلال تهون عليه اشعاره. • خليك في شعرك احسن. • خليك في (زول بريدك زي ما في). • للكاردينال ان يعود ليمارس كتابة الشعر والاغاني بالكيفية التى يشاء (ما في زول بسألو). • مهما كان ضرر اغنياته لن يكون اكبر من الضرر الذي خلقه الكاردينال عندما اصبح رئيسا للهلال. • نسألك بالله ان تكتفي بكتابة (الشعر) وتخلي الهلال اذا كانت ادارتك له على ذلك النحو. • فالرجل مازال يغيب خارج البلاد لايام طويلة ثم يعود لتلتقط له مجموعة من الصور توزع على الصحف ليعود بعدها الى لندن او الى الامارات في مهمة هلالية كما يقول اعلامه. • الى وقتنا هذا لم نر للرجل (مهمة) انجزها من اجل الهلال. • المهمات الهلالية التى بقولوا بسافر من اجلها وينها؟. • ما شفنا لينا (مهمة) واحدة. • حتى الجهاز الفني المقتدر الذي كان يبشر به – انقشع لنا عن مدرب (بلجيكي) كل انجازاته في الدنيا انه وصل بفريق ليوبار الذي اقصاه الهلال لمرحلة دور الاربعة...وفى البطولة الكونفدرالية كمان. • مدرب قالوا ان انجازاته التدربية تتمثل في (طول قامته) – هذا كل ما عنده في عالم التدريب. • وقد حذرنا في هذه المساحة وخفنا ان تكون تسجيلات الكاردينال والمحترفين الذين يبشر بهم على قدر المدرب البلجيكي الذي جاء به الكاردينال. • ثم اتضح لنا بعد فتح باب التسجيلات – ان تسجيلات الكاردينال اضعف حتى من المدرب البلجيكي. • كنا قد كتبنا وكتب غيرنا منتقدا لتصريحات اشرف الكاردينال التى كان يخرجها قبل شهور من بداية التسجيلات. • تصريحات الكاردينال كانت طاردة ..وكانت محفزة للاعبي الهلال لمغادرة الفريق. • الكاردينال كان عندما يكون في مناسبة عامة – ودون ان يسألوه يقول : (وضعنا سقف معين لن نتجاوزه). • السقوف توضع للبطيخ او للعربات الخردة – ولا تضع للاعبين – لأن كل لاعب تقيّيمه يختلف عن الآخر. • مستويات اللاعبين تختلف من لاعب لآخر – كما ان طموحاتهم وقناعتهم تختلف – فكيف يكون سقف تقييمهم واحد. • لو صمت الكاردينال كان يمكن ان ينجح في ملف التسجيلات – لكن كان الكاردينال يصرح تصريحات تغري المريخ على التقدم نحو لاعبي الهلال وتصدم لاعبي الهلال. • آخر تصريحات الكاردينال الصادمة قوله ان اللاعب اذا كان في مستوى (ميسي) لن يلوي ذراع الهلال. • شفت والله. • الموضوع لا ينظر له على ذلك النحو. • الناس ما في سوق. • ولا في حلبة مصارعة. • وحكاية (لي الذراع) دا – دا موضوع ممكن يطبقو الكاردينال في دلالة او في ملجة. • لا يطبق في الهلال. • جاء الكاردينال الى الهلال ووجد بكري المدينة وعمر بخيت والمعز محجوب ومهند الطاهر – وهم كلهم ارتدوا شارة الكابتنية. • ولعب بعضهم في الهلال اكثر من (10) سنوات قدموا فيها الغالي والنفيس من اجل ..فرحوا من اجل الهلال وحزنوا لحزنه. • افرحوا الناس في ربوع السودان – وحزنوا معهم عندما يخسر الهلال. • هؤلاء لا يتعامل معهم بتلك اللغة الصادمة ولو كان اللاعب في مستوى ميسي لن يلوى ذراع الهلال. • الجاب سيرة (لي الذراع) منو هنا. • والدخلها في الاساس شنو في التفاوض؟. • واضح ان الكاردينال لا يصلح في المفاوضات ولا في الحوار طالما هو ينظر للامور على ذلك النحو. • الكاردينال فشل مرة في مفاوضة مهند الطاهر وخرج بعد جلسة تفاوض معه ليملأ الصحف بالهجوم على مهند الطاهر. • من يومها ادركنا ان الكاردينال ليس رجل مفاوضات. • وهو لن ينفع في التسجيلات. • اذا جلس الكاردينال بفكره هذا مع خليفة او ضفر او بلة جابر لن يستطيع ان يقنعه. • التسجيلات تحتاج الى دهاء وذكاء وخبرات. • الكورة لا تدار على ذلك النحو. • الهلال ليس (دار خيرية) ولا هو (خلوة) حتى نطلب من اللاعبين ان يبقوا فيه بدون مقابل. • وان يرفضوا اغراءات الغير ...ويضحوا من اجل الهلال. • اذا رفض الكاردينال التضحية ببعض (المليارات) من اجل الهلال – هل نطلب من اللاعبين ان يضحوا بانفسهم من اجل الهلال. • الكاردينال اتى به الى الهلال (ماله) – لم تأت به عبقريته ولا موهبته ..حتى يعطّل اهم ما عنده ويضع سقفا معينا للاعبين. • موهبة الكاردينال تتمثل في (امواله) – لا في اشعاره ولا في منطقه ولا في فلسفته ولا في قدرته على الاقناع. • جابوك للهلال عشان تدفع – ما عندك ما عاوزين (تنظير) ولا محتاجين لينا زول يضع لينا (سقوفات). • السقوفات دي ناس عماد الطيب وهاشم ملاح ممكن يضعوها. • في زمن الاحتراف والمال وكورة القدم التى اضحت صناعة وتجارة ما في حاجة اسمها قناعات – وانتماء. • الاتنماء والقناعات فقط عند الجماهير. • اما اللاعبون فهم مع الشخص الذي يدفع لهم ..وهم من حقهم ان يأمنوا مستقبلهم وان يبحثوا عن العروض الافضل لا عن السقف المحدد. • سقف محدد يا الكاردينال نحن جايبنك لي فريق السلة. • انت (مقاول) – سقف شنو؟. • الكورة الحاجات دي ما بتفنع فيها. • ولا بتخارج. • وطريقتك دي ح تفرتك الهلال. • ريال مدريد عندما تتفوق عليه برشلونة في (الصرف) واغراء اللاعبين في التسيجيلات يتراجع وتتفوق عليه برشلونة. • وعندما يحدث العكس – يتقدم ريال مدريد. • في ريال مدريدوبرشلونة الحكاية ماشه بالقروش والبدفع..ما بي لي الذراع والسقف المحدد. • بعدين اذا كنت انت رئيس النادي تنظر للامور على ذلك النحو – وتستخف بلاعبي الهلال وتقول الواحد فيهم لو بقى (ميسي) ما بلوي ذراع الهلال – الزول العادي يقول شنو؟. • المشجع يعمل ايه؟. • وينها الدبلومسية في الحوار ..وينو التكتيك والعقل في الموضوع دا؟. • لقد فشل الكاردينال فشلا ذريعا. • نرجو ألا يخرج لنا اليوم اعلام الكاردينال ليجمل لنا موقفه – وليحدثونا عن قيم الهلال ومثله. • اظن ان الموضوع لو كان فيه قيم ومثل – الكاردينال ذاتو ما مفروض يكون رئيس نادي الهلال. • خلونا بالله. • عاوزين تطبقوا القيم والمثل على ناس مهند الطاهر وبكري المدينة. • عاوزين تطبقوا نظرياتكم في لاعبين كورة. • يا عالم. • فضوها سيرة عليكم الله. • ... • ملحوظة : ح نواصل في موضوع الكاردينال دا وح نشوفو ح يودي الهلال وين؟. هوامش • الكاردينال اتصور مع بكري المدينة واتوزعت الصور في الصحف ..ووقعوا معاه. • عاوزين نشوف نهاية الكلام دا وين؟. • الهلال عندو حق طبعا. • لكن ادارة الكاردينال للهلال بطريقة (لي الذراع) ما بتجيب لينا حاجة. • ما في نادي بدار بهذه الطريقة. • بكري المدينة مكسب كبير للمريخ – حتى لو دفع فيه (7) مليارات. • بعدين هم دافعين حاجة من جيبهم. • ما خسرانين اي حاجة. • خسرانين بتاعين (لي الذراع) ديل. • اذا استمر الكاردينال بهذه الطريقة – طريقة (لي الذراع) لن يعيد اي لاعب قيده للهلال مرة ثانية في وجود الكاردينال. • الله يستر على نزار حامد في التسجيلات التكميلية القادمة. • اسامة عطا المنان – هذا الرجل لا يصلح لأكثر من الصور. • هسع اسامة عطا المنان البخليه يضحك في الصورة كدا شنو؟. • قوم عليك الله شوف ليك شغلة. • دي شغلتك. • ويبقى الهلال كبيرا. • ويبقى عظيما. • ويبقى كل شيء. • ..... • عاجل : مجلس الهلال اعلن رسميا عدم قيده لعمر بخيت ومهند الطاهر والمعز محجوب – احسن من يقلعوهم منكم.
