* براءة شديدة في عناوين الصحف المريخية أمس من المعسكر.. * غارزيتو يطالب بعمر بخيت .. احتفاء كبير بنجوم الهلال في معسكر المريخ !! وخبر بتكلم عن أوامر غارزيتو للمعز بإنقاص وزنو .. غارزيتو يعانق بكري المدينة .. بس نسوا يكتبوا غارزيتو يشكر اكانغا على مصافحة بكري المدينة ! * قالوا ليك غارزيتو دخل المعسكر صاري وشو .. قال ليهم وقفوا تمارين اللياقة والجري حول الملعب .. عايز تقسيمة سريع .. بين الفريق الكان الأساسي وبين الفريق الاحتياطي والنجوم الجدد ! عشر دقائق سأل ناس برهان .. ده الفريق الأساسي ؟ محسن طبعاً سريع في الكلام .. قال ليه أيوه يا كوتش .. ديل كلهم ولا في زول ناقص ؟ لا لا كلهم ما شاء الله !! الخواجة قال ليهم ديل الأساسييين وما سجلتو عمر بخيت ؟؟ وإعلام المريخ ببراءة وبفرح شديد جاب الكلام مانشيت ! يعني لا أشاد بالنيجيري ولا لفت نظروا الغاني ولا تحدث عن جمال سالم ولا سأل من اللاعب المكسور ! أيوه نسيت أقول ليكم .. محسن لما قال لغارزيتو أيوه ديل اللاعبين كلم برهان قال ليهو في لاعب واحد جاي الليلة من غانا بلعب في النص .. غارزيتو ابتسم وقال ليهم إن شاء الله يكون الشال جائزة أفضل لاعب وسط ؟ برهان قال لي : المريخ مافيهو لاعب شال جائزة أفضل لاعب وسط ! غازريتو قال ليهم .. كيف! الغاني الشال جائزة سوداني ! برهان قال لي: أنت قاصد نيلسون ؟ يس يس نيلسون .. برهان ضحك وقال لي: يا كوتش أنت لسه قائل روحك بدرب الهلال ! الجماعة ديل كتيرين هنا لكن لابسين أحمر يا كوتش ! * طيب الغاني الجاي ده منو ؟ اسمو (اوكرا) يا كوتش بلعب في النص .. تمااام .. نشوفو في التدريب (تروشيليه) تروشيليه دي يعني بكره بالفرنسي .. محسن ضحك وقال لي : تشوفو أيوه .. يلعب لا .. ده ملجن يا كوتش .. ملجن !! شو يعني ملجن ! الخواجة عندو حبة كلمات بالعربي طبعاً اتعلمها من الكنغو !! * ملجن يعني توتال لوست ! يعني بجي بتفرج بس .. يعني أنت ممكن تجري أحسن منو يا خواجة !! اووووو ومسجلنو ليه يا مهسن ؟ مسجلنو عشان أهلي الخرطوم ما قدر يسجلو ؟ أهلي كرتوم شنو يا مهسن؟ محسن احتار في القصة الطويلة دي .. قال لي: ( يا غارزيتو دي سياسة عليا لما يجي صديق علي صالح بشرح ليك ) * صديق وييين يا محسن ؟ أنت ما بتقرأ جرايد ولا شنو ؟ صديق ببح .. تاني إلا يجي زيارة للتمارين .. يعاين من بعيد كده وخلال الأسبوع ده بس قبل عبد الصمد يجي ! المريخ اليومين دي حاكمنوا (المدنية) انتهى عهد الجنرالات !!! * مافي مشكلة مهسن بكرة نمشي المستشفى نشوف موضوع أوكرا ده ! أيوه يا كوتش وبالمرة نزور أيمن سعيد ؟ أيمن سييد .. مين أيمن ؟ ده برضو بلعب في النص وفي المستشفى ؟ بورهاااان .. برضو مستشفى .. ليييه ما سجلتو المعلم يا برهان .. لا لا أيمن في المستشفى مع والدو (ربنا يشفيه) ودي مناسبة عشان نقسم الزيارات الاجتماعية .. أنت امشي لأيمن سعيد وأنا بودي اوكرا المستشفى ومحسن يزور القلع عبد الحفيظ (الله يدي العافية ) * طيب .. أنا عايز لاعب وسط زي عمر بخيت ؟ أيوه موجود يا كوتش .. ابراهومة الصغير .. فين ابراهومة .. جاييي بكره يا كوتش .. اووووو ليه بكره!! ما أصلو ابراهومة ده كان عايز يمشي الهلال ! طبعاً برهان أي لاعب لازم يمشي هلال .. هلال ده فريق كبير .. أنا قابلتو في المجموعات ودربتو في المجموعات .. مريخ وين كان يا برهان ؟؟ * وعايز طرف يمين برضو عشان بله جوز ما يجوز ! موجود يا كوتش .. محمد شمس الفلاح .. فين فلاه ؟ جاييي بكره .. أوووو مهسن .. برضو بكره ! ليه ! عشان جواز أخو ؟ أووو .. هو يجي بجواز أخو كيف مهسن ؟ والله يا خواجه بتسأل أسئلة صعبة خلاااااص .. * أصلو محمد شمس الفلاح لقى نفسو فجأة في المريخ ايمن شمس الفلاح ؟ كيف يا محسن ؟ السؤال العصب ده خلي رئيس البعثة حاتم عبد الغفار يتدخل .. قال لي غارزيتو.. عااادي ..ما المريخ ذاتو كان اسمو المسالمة وبقى فكتوريا ! عاااادي .. قبل كده سعيد السعودي المولود في جده لما سجل في المريخ لقى روحو مولود في أمبدة ! عااادي عندنا . مرة المريخ ده يا كوتش كان مشارك في البطولة العربية اتغلب .. قاموا جابو معلق المباراة عملوا مدرب .. عااادي عندنا .. غارزيتو ضحك وقال لحاتم يعني أنا عادي ممكن أبقى الرئيس .. لا ده ما عاااادي أبداً عندنا !!!!.