ديل محترفين (حناكيش) شديد ..البتعرضوا لينا للاصابات من فترة الإعداد ومن الاسبوع الاول للدوري الممتاز نحن شفنا الطيارات تتخابط ...شيء قاقارين وشيء امين زكي وشيء دكتور محمد حسين كسلا قلنا اقل لاعب بيجيبوه الهلال ح يكون اخطر من سادومبا عليكم امان الله المحترفين الوصلوا البلاد كلهم اتصابوا...تقول جابوهم لينا من الحرب العالمية الثالثة محترف المريخ المصاب (اوكرا) بلعب زي الطلقة ..واولادنا المحترفين النصاح تعرضوا لاصابات ابعدتهم من المشاركة * شكى كبري المنشية من كثرة (الفئران)..احد المواطنين قال ان اطراف الكبري وردمياته واعمدته (اكلتها) الجقور. * قلنا ليهم (الاكل) دا ما اكل (فئران). * دا ما اكل (جقور). * دا اكل (ناس) عديل كدا. * كمان نحن ما بنعرف اكل الناس من اكل الفئران. * فئران شنو البتاكل ليها صبات خرسانية؟!!. * فئران شنو البتاكل ليها (سيخ)؟!!. * فئران شنو البتاكل ليها (اسمنت)؟!!. * الفئران شن خبرها عشان تاكل الاكل دا كلو. * الطريف ان المجلس التشريعي لولاية الخرطوم شرع يوم الخميس الماضي في استدعاء وزير البنية التحتية بولاية الخرطوم. * عارفين المجلس ح يسأل وزير البنية التحتية في الولاية عن شنو؟. * المجلس التشريعي للولاية سوف يسأل الوزير عن ما تردد من اخبار عن (الجقور) التى تسببت في تصدع (كبري المنشية). * شفتوا التصدع دا كيف؟. * لكن التصدع ما عندكم. * يا ها قدرتكم. * يا ها فلاحتكم. * دي البتعرفوا ليها. * هسع الموضوع دا كان الاتهامات فيه وجهت لغير (الجقور) المجلس ما كان بقدر يقول حاجة. * عاوزين يتشطروا على (الجقور). * الجقور مسكينة عاوزين يشيلوها الشيلة. * كبري المنشية ..تم تشييده قبل سنوات قصيرة ..وصاحب افتتاحه احتفالات وحملات اعلانية كبيرة. * كبري المنشية ذكرني ليك بتسجيلات الهلال الاخيرة. * لولا (القط) الكاميروني (مكسيم) لقلنا ان تسجيلات الهلال الاخيرة كانت فاشلة وفيها الكثير من (التصدعات). * تصدعات يعني (اصابات). * الهلال في التسجيلات الماضية ..ضم (4) اجانب فيهم تلاتة مصابين اصابة تامة ..ابعدتهم من المشاركة مع الهلال. * اول هذه الاصابات تمثلت في اصابة سليمانو كوناتيه. * كوناتيه دا ما شفنا ليه اي حاجة. * من الاعداد (اتلجّن). * خسائر تدريبات. * بعد كوناتيه..لحقت الاصابة بطرف الهلال الشمال بوتاكو ..ومهاجم الهلال بوبكر كيبي اللذان تعرضا لاصابة نحن ما شفناها غايتو في مباراة الهلال والاهلي شندي في الاسبوع الاول للممتاز. * هذا يعني ان ثلاثة اجانب من اجانب الهلال من مجموع اربعة اجانب سجلهم الهلال في التسجيلات الاخيرة تعرضوا لاصابات. * اضافة الى اصابة الوطني فيصل موسى. * اها عليكم الله في (تصدعات) اكتر من كدا. * تفتكروا التصدعات الفي الهلال دي من (الجقور) وإلّا من (الكجور). * على العموم اللاعب المحترف الاجنبي يجب ان يكون اقوى من اللاعب الوطني وبنيته الجسمانية اقوى من السودانية ..وإلّا ما في فائدة من الاحتراف ولا قيمة له. * ديل محترفين (حناكيش) شديد ..البتعرضوا لينا لاصابات من فترة الاعداد ومن الاسبوع الاول للدوري الممتاز. * نحن جيبناكم نتقوى بيكم ..نجي نلقاكم بتسقطوا من فترة الاعداد. * جيتك يا عبدالمعين تعيني لقيتك يا عبدالمعين تتعان. * الغريبة محترف المريخ المصاب (اوكرا) بلعب زي الطلقة ..واولادنا المحترفين النصاح تعرضوا لاصابات ابعدتهم من المشاركة. * عليكم الله في حقارة اكتر من كدا. * على العموم النسبة العالية للاصابات ..تعطي مؤشر لفشل تسجيلات الهلال..خاصة وان تسجيلات الهلال كان فيها تضخيم كبير وفشخرة شديدة. * انوه ان التضخيم الذي كان في تسجيلات الهلال لم يكن من اعلام الهلال حتى لا يحمل اعلام الهلال وزر غيره. * التسجيلات ضخمها الكاردينال ومجلسه ولجانه التى كونها. * اول حاجة بدأوا لينا من فوق ..قالوا ح يجيبوا مهاجم العين الامارتي الغاني جيان. * اشتغلوا لينا زي شغل السوق – السعر ببدأ من فوق وبنتهي عند (كيبي). * ويا ريت الامور وقفت عند كابتن المنتخب الغاني جيان ..الكاردينال ومجلسه اشاروا الى انهم سوف يأتوا بمحترف الترجي التونسي الغاني (افول). * خلونا نعشم لينا في طرف زي (ماكينة الخياطة) وجابوا لينا بوتاكو. * المريخاب رحلوا من حلتنا. * خلوا لينا الشارع. * الكاردينال وصل به الامر ان اعلن عبر برنامج البحث عن هدف في قناة النيل الازرق عن وصول المحترف البرازيلي (كروز) يوم الثلاثاء القادمة. * مرت عشرة تلاتات ..واتفاجأنا ان كروز وقع في الترجي التونسي. * هذا يثبت ويؤكد ان التضخيم كان من الكاردينال ومجلسه وليس من الاعلام. * مجلس الكاردينال كون لنا (لجان) فنية في الامارات. * نحن شفنا الطيارات تتخابط ...شيء قاقارين وشيء امين زكي وشيء دكتور محمد حسين كسلا قلنا اقل لاعب بجيبوه الهلال بكون اخطر من سادومبا. * عليكم امان الله المحترفين الوصلوا البلاد كلهم اتصابوا. * تقول جابوهم لينا من الحرب العالمية الثالثة. * عليكم الله لاعبين اختارهم امين زكي وفوزي التعايشة وقاقارين وكسلا مفروض يكون فيهم كلام. * جماعتكم ما شفنا ليهم اي حاجة. * كلهم دخلوا السلاح الطبي. * لذلك هذه الاختيارات المسؤول منها الاول اشرف الكاردينال هو الذي كان يراهن على الاجانب. * وهو الذي اعلن وقال سوف احضر محترفين على مستوى عالي. * وهو الذي افرغ الفريق وشطب عدد من الاعمدة الهلالية ..لذلك يفترض على الاقل ان يأتي ببدلاء افضل في ظل الفراغات التى حدثت. * والهلال لا يقبل ولا يستحمل التجريب. * يعني اي لاعب يدخل كشوفات الهلال ما عندنا ليه صبر ..عاوزنو يكون على مستوى ونجومية تأهله على التأقلم والدخول في كشوفات الهلال مثلما فعل (مكسيم). * الكاردينال يعرف قبل غيره ...ان الكثيرين ينتظرونه ..وان التسجيلات هي المقياس الاول في نجاحه او فشله. * لذلك كان يفترض ان يحرص على ان يأتي بمجموعة جيدة من اللاعبين خاصة ان الكاردينال قال ان المال الفي الهلال عند الحكومة ما في. * وقال الكاردينال في قناة النيل الازرق لو عاوزين يجيبوا (ميسي) للهلال ما بغلبهم. * رجل بهذه الثقة وتلك القدرة يفترض كان ان يأتي لنا بنجوم على مستوى اعلى ولهم سمعة اكبر في القارة الافريقية. * نحن نعرف ان الكاردينال اجتهد ..لكننا كنا نريد افضل من ذلك. * الكاردينال مازال في البدايات ومجلسه لم يكمل العام الاول الى الان ..وامامه الفرصة لاعادة ترتيب الاوضاع. * الحكم على المحترفين وعلى الكاردينال مازال مبكرا ..ولكن هذه اشارات لابد ان ينتبه لها الكاردينال حتى لا يقع في الخطر. * اذا انتبه الكاردينال الى اخفاقاته بعد فوات الاوان ..لن يجد احد يقف معه او يستمع له. * لذلك على الكاردينال ادراك الاخطاء مبكرا ..بحمد الله ان الاخطاء الان كلها يمكن اصلاحها. * لم يفت شيء. * مطلوب من الكاردينال التعامل مع الاحداث والاخفاقات بصبر اكبر وحكمة اعظم. * ومطلوب منه ان يبدأ منذ الان في اضافة لاعبين على الاقل في التسجيلات القادمة يعوضوا هذا الاخفاق ..ويشكلوا اضافة للهلال في مشواره المحلي والافريقي. * تحركوا منذ الان من اجل تسجيلات يونيو ..ليس من اجل التخدير او اشغال الناس والاعلام بنجوم من ذهب. * ولكن من اجل دعم الهلال بعناصر قوية ..حتى تحسب تلك العناصر لمجلس الكاردنيال ولشخصه الذي نقدر فيه اجتهاداته وهلاليته الكبيرة. * المجتهدون لا يخسرون شيء وان فشلوا..ونحن نقدر في الكاردينال اجتهاده هذا. * لكن نريد ان لا يكون اجتهاد الكاردينال في الفارغ ..ولا جدوى منه. * ممكن بنصف هذا الاجتهاد الذي شهدناه من الكاردينال في التسجيلات الاخيرة ان يصنع الكاردينال فريق يهز افريقيا كلها. * لذا رتبوا اوراقكم ..ولا تهتز ثقتكم ..وسوف نعمل نحن على ان نقدم وجهة نظرنا دون ان نحبطكم او نكسر ليكم تلج. * سوف نكون معكم في منتهى الامانة والصدق ..لأن البطولات لا تحقق من غير امانة وصدق. * واظن ان كل الهلالاب صادقين وامينين في حبهم للهلال وعشقهم له. * وانت اول العاشقين للهلال يا اشرف الكاردينال ..نعرف ذلك ونقدر فيك الطموح. * ..... * ملحوظة : المجتهد لا بد له من النجاح. هوامش * لا بد من إضافة ثلاثة او اربعة لاعبين من فريق الرديف للفريق الاول. * خاصة في الهجوم. * الهلال الان وفي ظل الاصابات الكثيرة يحتاج الى بعض اللاعبين من فريق الرديف. * يمكن ان يتم ذلك بالتنسيق مع الفاتح النقر. * الفاتح النقر يمكن ان يقدم خدمات كبيرة للهلال من خلاف فريق الرديف. * الكاردينال مطلوب منه التعامل مع الاحداث بدون انفعال ..وهو قادر على تجاوز هذه المرحلة الصعبة. * الهلال يحتاج لجمهوره. * اقيفوا مع الهلال يحتاجكم الان اكثر. * مازال الحكم على باتريك مبكرا. * لكن هذا لا يعني عدم نقده وتقديم بعض وجهات النظر. * يجب ان ندعم باتريك ..وان يقف الجمهور معه ..مازال الوقت مبكرا للحكم عليه. * سوف يأتي الهلال ان شاءالله في الموعد. * ......... * عاجل : نحن هلالنا بنلقى ليه الحلول ..ألحقوا انتوا كبري المنشية.
