الواحد برة يعمل ليك فيها (غضنفر)..وفي البيت تلقاه قاعد زي (الارنب)..لو عاوز (الريموت) ساكت إلّا يكسر تلج العشرة جنيه شن طعمها ؟..لو اديتها (شافع) ما بشيلها منك ..دا لو ما سمعك كلام فارغ واداك محاضرة في الاقتصاد الموازي يا شماتة كبري المك نمر في كبري المنشية..كبري المك نمر خلوها هسع كبري الدباسيين يقول شنو؟ احسموا لينا الموضوع في مباراة الذهاب...فريقنا دا ما فريق مباراة اياب..ولا عندنا صبر للحاجات دي * عندنا زول في الحلة – عامل فيها صعب. * عندو (شنب) ..لمن يكون نازل من الحافلة بنزّل (شنبو) قبل المحطة النازل فيها بي تلات محطات. * بقدّمو ويلحقو. * بقطع في البص تلاتة تذاكر...واحدة ليه هو - وتذكرتين للشنب. * وعامل فيها الكلمة كلمتو في البيت. * وانو ما في زول في البيت بيفتح ليه (مروحة) لو ما رجع ليه. * مقاطع ليك المسلسلات التركية. * شفتو الزول من يقول ليكم الكلمة في البيت كلمتي ..اعرفوا طوالي الكلمة في البيت في (المطبخ). * الحاجات دي نحن عارفنها. * نحن ناقشناها. * نحن حافظنها. * في واحد شابكنا ليكم بالنظريات دي ..انا (الاسد) النتر. * وانا الغضنفر. * وانا ما بجامل. * وانا صعب. * وانا الزول الدخلوها وصقيرها حام. * وانا لمن يجيبوا لي الشاي ...لو ما عملوا (ساتر) ما بجيبوا لي الشاي. * التربيزة براها بتتقدم. * لو جابوا لي الشاي بارد ..(المرا) طوالي تنزل شنطتها وتمشي بيت ابوها. * ما بتقعد دقيقة. * ولا بجامل في (الشاي). * كرامة (الشاي) من كرامتو. * زولكم دا مشينا ليه في البيت لقيناه بيحمّر في (البصلة). * الواحد برة يعمل ليك فيها (غضنفر)..وفي البيت تلقاه قاعد زي (الارنب)..لو عاوز (الريموت) ساكت إلّا يكسر تلج. * قلنا ليه دا شنو يا عباس ..البتعمل فيه دا؟. * البصلة دي نحن لو جابوها لينا في الملاح بنعمل لينا مشكلة...انت قاعد وبتحمّر فيها كمان؟. * وين ناس كرري؟. * وين ناس توشكي؟. * حليل ناس ام دبيكرات. * العملوه – كلو راح ساكت. * قال لينا الحاجة الوحيدة البعملها في البيت دا بحمّر البصلة..المشاركة مهمة في البيت ..والتعاون ..والاسرة الواحدة. * قلنا ليه ..وقت بتعرف التعاون والمشاركة ..مالك شابكنا السنة كلها أنا الاسد النتر وانا زول صعب. * قال لينا بحمّر البصلة بس..تاني خيط فوق ابرة ما بدخلو. * بعدين البصلة ذاتها بحمرها بي فهم. * انتوا قايلني بحمرها ساكت كدا. * بعد اسبوع تاني مشينا ليه؟. * عارفين لقيناه بيعمل في شنو؟. * لقيناه بيعجن في عجين القراصة. * الموضوع حرقنا. * ما رضيناه ليه. * ونحن الزول عندنا وقت يصل مرحلة (العجين) ببقى لا بينا ولا بينو. * قلنا ليه دا شنو البتعمل فيه دا يا عباس؟. * قال لينا دي الحاجة الوحيدة البساعد بيها المدام في البيت...الجمعة طويلة الواحد لو ما قصرها في العجين دا ما بتنتهي. * عليكم الله انتو النهار الطويل دا هسع بتقضوا وين؟. * العجين احسن من الكوتشينة ..والقطيعة في الناس. * بعد يومين ..مشينا عليه ..لقينا بيمسح في (البلاط). * قلنا ليه يا عباس هي حصلت ..كمان بتمسح في (البلاط). * قال لينا انتو قايلين بلاط الزمن دا بلاط ..الواحد ممكن يمسحو في خمسة دقيقة. * هو عليكم الله ( المسح) بكلف الزول شنو؟. * الزول دا بعد العملية دي قاطعناه رسمي. * قلنا ليه ..لا بينا ولا بينك. * سلام ما بيناتنا. * عندنا زول تاني برضو عامل لينا فيها صعب. * ممكون ..لكن ما بتكلم. * ما قادر يقول اي حاجة. * لكن بيدعي لينا الصعوبة. * زولكم دا ...الدكتور شال ليه (كلية)..وقال ليه ح تشتغل بي كلية واحدة ..عندك كلية ما نافعة. * منتهية رسمي. * زولكم قال للدكتور ..شيلها يا دكتور ..بس عليك الله ما تكلم (المدام)...الولية دي بي (كليتين) ما مريحاني...بي كلية واحدة في البيت ما بتخلينا نقعد. * شيلها لكن كتامي يا دكتور. * الدكتور شالها. * لكن دا كلو ما بحلكم مني. * ما بحلكم من كوبري المنشية. * انتو فاكرين الزول بينسي. * عندنا كباري عبيطة جنس عباطة. * (جقور) تجيب خبرها. * الشماتة طبعا حاصلة. * في اي حاجة في جماعة بيطلعوا كدا للشماتة. * في ناس تخصص (شماتة). * الواحد فيهم يعمل ليه (صلعة) مخصوص للشماتة. * دا كلو ما مهم. * دا كلو ممكن نتجاوزوا ليكم. * زي الحمام. * هسع الحمام الدخلو هنا شنو؟. * بتعرفوا شماتة (الكباري). * ديل عندهم شماتة. * جنس شماتة. * شماتهم تضرس. * قالوا ليك الكباري دي عندها (شماتة) في بعض غريبة ..اسكتوا خلوها ساكت. * اخير شماتة البني آدم. * شماتة الكباري (كعبة) عديل. * قالوا ليك لمن كوبري المنشية (اتصدع)...الحكومة داسه موضوع التصدع دا سنة ونص. * انتو فاكرين الحكومة داسه موضوع (التصدع) دا ليه؟. * انتو تفكيركم كعب ..بتكونوا فاكرين الحكومة داسه موضوع التصدع دا من المعارضة. * ابدا. * معارضة شنو؟. * هو وينها المعارضة البدسو منها؟. * المعارضة في رقبتها (مندسية). * هو نحن عندنا معارضة مع الناس. * معارضتنا دي قالوا – قالوا ليها البلد ما فيها (رغيف). * قالت ليهم (الرغيف) تعملوا بيه شنو مع (ازمة الغاز) دي. * قالوا ليهم هو كمان في (ازمة غاز)؟؟. * قالت ليهم ..(الغاز) دا في الدولة (المهدية) كان ما في اصلا ..انتوا شوية ازمة عاوزين تتكلموا فيها. * قالوا للمعارضة ...الدولار بقى بي عشرة جنيه. * قالت ليهم هي العشرة جنيه شن طعمها ..لو اديتها شافع ما بشيلها منك ..دا لو ما سمعك كلام فارغ. * اوعك!!. * ما علينا. * خلونا في شماتة (الكباري). * شماتة السيخ والاسمنت والطوب فينا. * شماتة شارع الظلط. * الحكومة دست موضوع تصدع كوبري المنشية دا عشان شماتة كوبري الفتيحاب. * ما عشان المعارضة. * الما عارفنو انتو ...كوبري الفتيحاب عندو جنس شماتة ..خاصة الجزء الغربي من الكوبري. * عامل خشمو الكبير دا. * الجزء الغربي من كوبري الفتيحاب ..من شدة شماتو لمن حوادث الحركة فيه كترت. * هسع قالوا ليك كوبري المنشية ما عارف يودي وشو وين من الكباري؟. * وشو بقى زي السمسمة. * الوقفة غالباهو. * يقول ليهم شنو؟. * يقول ليهم (الجقور). * الشماتة كدا بتزيد. * جقور!!...هو عاملنو من (ورق). * كوبري من (كرتون). * يقول ليهم (الفيضان). * يا ربي كوبري المك نمر دا عاملنو في (الصحراء الكبري)؟. * كوبري القوات المسلحة معمول في الابيض!!. * فيضان شنو؟. * انت مالك عاوز تشمت فينا (الخيران)!!. * طيب يقول ليهم شنو؟. * يقول ليهم (الردمية) بالاطراف ما كانت سليمة. * كدا ردمية كوبري الحلفايا ..ح تشيل حالنا. * كوبري الحلفايا ردميتو في ام درمان لي شارع الوداي. * وفي الخرطوم بحري حدها (المؤسسة). * يا زول احسن تسكت. * اوعك!!. * يعمل شنو؟. * كوبري المنشية دي ما عندو حل غير تقفلوه. * اقفلوه ..ورجعوا لينا (مراكبنا). * عليكم الله هسع لو في معارضة فاهمة كدا ما كان تنزل ليه (بانطون) في المنشية..يمين الحكومة كانت ما تعرف تمشي وين؟. * على الاقل ..المعارضة لو عملت (بانطون) في المنشية ..كانت غنت غنا. * لكن يا جماعة (بانطون) في المنشية ..الكلام دا ..ما حار على ناس المنشية. * ما حار على ناس الحكومة. * اوعك!!. * طيب نعمل شنو؟. * حالنا وقف عديل كدا. * سمعنا بي بانطون شندي. * وسمعنا بي بانطون رفاعة. * وسمعنا بي بانطون ام الطيور. * وسمعنا بي بانطون المحمية. * لكن اول مرة نسمع بي (بانطون) المنشية. * هسع لو الكلام دا سمعت بيه كباري تحت التشييد ..ح يكون شعورها شنو؟. * شعور كوبري الدباسيين شنو؟. * اوعك!!. * .......... * ملحوظة : غايتو لو كوبري المنشية دا استمر كدا ..ح نفك بلة جابر شوية. هوامش * عزام والمريخ ..نفضل ان نكتب بعد المباراة. * المهم عندنا مباراة بكرة. * الهلال يجب ان يحسم المباراة في خرطومها. * لا عندنا اعصاب. * ولا عندنا حيل لمباراة الرد. * احسموا الموضوع في مباراة الذهاب. * فريقنا دا ما فريق مباراة اياب. * عشان كدا ما تخلونا نقعد نحسب فيها من بكرة. * لكن مباراة المريخ الليلة خلوها لينا. * لو ما تلفزوها. * لو ما ذاعوها. * بكرة بنتلفزها ليكم. * اصلو ما عندكم مشكلة. * بس قالوا لي بكري المدينة ألحق حلل (المليارات) وجيب ليك قون قبل قرار الفيفا. * اوعك. * ............ * عاجل : عندنا (15) فار لو كترتو كلامكم معانا بنفكها ليكم في كوبري الحلفايا.
