من قصص (الف ليلة وليلة) الميرغني عنده (ضربة جزاء) لم يحتسبها الحكم بعدين انتوا يا مريخاب امام مريخ الفاشر ضيعتوا ضربة جزاء وامام عزام ضيعتوا ضربة ..البجيبها ليكم منو امام الاهلي شندي يبقى مطلوب من الاتحاد العام لكورة القدم ان يوقف تلك التفلتات التى اضحت تظهر في مباريات المريخ تارة من الجمهور وتارة من اللاعبين إعلام المريخ لا يضع ثقة في لاعبي المريخ ..لذلك يبحث عن تحقيق الانتصارات بواسطة الحكام والخرفان * الناس اتعودوا على الحاجات دي – حفظوها وبقت عندهم زي يوم السبت. * وقت تكون طالع..يجوك جاريين ما تنسى (السلطة). * مع ذلك بتنسى (السلطة). * عشان وصوك عليها. * وكل يوم بقولوا ليك ما تنساها. * وبتنساها. * ولمن تجي راجع – بقولوا ليك (اللبن). * ما تنسى اللبن. * وبرضو ما بتجيب (اللبن). * بتنساهو. * اتعودنا. * ما اتعودنا نجيب الحاجات دي – اتعودنا ننساها. * بيذكرونا ننسى. * بيذكرونا (النسيان). * تجي فايت جوار (الطابونة). * يقولوا ليك ما في (رغيف). * طيب فاتحين (تصوير مستندات). * تجي راجع العصر – يلاقيك زول كل مرة بيلاقيك في نفس الحتة. * وكل ما يلاقيك بيجيب ليك خبر وفاة. * تقول باقى نشرة تلاتة – نشرة الوفايات. * بتعرف عباس. * عباس منو؟. * عباس البتلقاه في عز الهجير حايم ليه بي اسطونة غاز. * الراجل الاخضر – ابوشعر كتير داك؟. * ايوا ..بس يا هو. * مالو؟. * اتوفى. * بكرة زولك يلاقيك في نفس الحتة. * يقوم يقول ليك بتعرف عمك عثمان؟. * تقول ليه عثمان منو؟. * يقول ليك عثمان ..الزول التخين ..البكون اليوم كلو شايل ليه كيس رغيف. * عمك عثمان ..ابو هيثم؟. * ايوا – بس كتلتو. * عمك عثمان مالو الراجل الطيب؟. * طقتو عربية. * تجي راجع تاني. * يلاقيك زولك برضو. * يقول لبك بتعرف عيسى؟. * عيسى منو؟. * عيسى العندو عربية (هايس) بيوصل بيها الطلبة المدرسة. * عيسى الكاتب في عربيتو (خارج الخدمة). * مالو؟. * مات – لقوهو ميت في عربيتو. * طلع من الخدمة!!. * الحاجات ماشه كدا. * اتعودنا. * اعلام المريخ بعد اي مباراة يلعبها الهلال يقولوا ليك الفريق الذي كان يلعب ضد الهلال عندو ضربة جزاء الحكم ما احتسبها ليهم. * لو الهلال ما كان لاعب يقولوا ليك في ضربة جزاء لم تحتسب على الهلال. * طبعا الجماعة ديل عندهم (حول) في ضربات الجزاء. * اكرا حسبوا ليه ضربة جزاء في (البجراوية). * في محل الاثار ذاتها ..حسبوها ليه جوة الخط. * عشان كدا اعلام المريخ بقى كل مباراة للهلال يشوف ان هناك ضربة جزاء لم يحتسبها الحكم ضد الهلال. * امس المريخاب مضروبين في شندي بي هدف من الدقيقة العاشرة ..طلعوا يتكلموا عن ضربة جزاء لم تحسب لهم في كسلا. * عاوزين الحكم يحسب للمريخ (ضربة جزاء) قالوا ارتكبت في كسلا في مباراة الهلال والميرغني. * في تخيلات اكتر من كدا. * في توهمات اكبر من دي. * اعلام المريخ اتعود على الموضوع دا – مباريات الهلال يقولوا في (ضربة جزاء) لم تحتسب ضد الهلال. * ومباريات المريخ يقولوا في ضربة جزاء لم تحتسب للمريخ. * يشوفوا ليهم ضربة جزاء من مافي. * ارجعوا لي اي مباراة لعبها الهلال – ح يقولوا ليك في ضربة جزاء ضد الهلال. * واقرأ للمريخاب بعد اي مباراة للمريخ – ح يقولوا ليك في (ضربة جزاء) الحكم لم يحسبها للمريخ. * الحاجات دي بقت محفوظة. * وجماهير المريخ ذاتها بقت ما بتقتنع بالحنك دا. * الموضوع دا اعملوه مرة في الموسم. * مرتين. * عشر مرات في الموسم. * لكن ما معقول تعملوه كل مرة. * امس العنوان الرئيس في صحيفة (الزعيم) – (التحكيم يذبح المريخ والميرغني ويهدي النقاط للارسنال والهلال). * شفتوا الجماعة ديل اتأثروا بالذبح كيف؟ - من كترت الخرفان. * لغتهم ذاتها بقت لغة (ذبحية). * بعدين يا ناس (الزعيم) فهمونا ...نحن الموضوع دا ما وقع لينا. * التحكيم يذبح المريخ في شندي كيف؟. * وقّعوا لي الكلام. * شندي بيحرقوا فيها – ما بضبحوا. * مباراة الاهلي شندي والمريخ كان حاكمها (علي جعفر)؟؟. * الذبحكم يا مريخاب (علي جعفر). * علي جعفر ذبحكم في تنزانيا وفي شندي. * ويقولوا ليك الحكم ذبح المريخ. * يمكن. * علي جعفر حكم النص – والمعز محجوب وبكري المدينة (رجال خطوط). * ديل الذبحوكم. * ديل الفرحونا – وبسطونا. * الديل الما بقصروا معانا. * انتوا جماعتنا ديل ما بتقدروا تقولوا فيهم حاجة ..يمكن بتخجلوا منهم. * لكن انتوا ما بتقدروا تشطروا إلّا على (التحكيم). * طيب لو ذبحكم التحكيم – جمال الوالي عاوز يقدم استقالتو ليه؟. * علاقة الاستقالة بالتحكيم شنو؟. * اذا كان المريخاب بتكلموا عن (ضربة جزاء) كان يفترض ان تحتسب لهم – فإن صديق الطريفي حكم المباراة حرم الاهلي شندي من ضربتين جزاء. * ولا في زول من الاهلي شندي قال حاجة. * الغريبة بعد (المناحة) التى كانت من اعلام المريخ ..مامون ابوشيبة اعترف. * وقالها بي وضوح. * ابوشيبة كتب امس : ( عموما لم تكن اخطاء الحكم سببا في هزيمة المريخ). * الموضوع واضح وصريح. * بعدين انتوا يا مريخاب امام مريخ الفاشر ضيعتوا ضربة جزاء وامام عزام ضيعتوا ضربة ..البجيبها ليكم منو امام الاهلي شندي. * البسمعهم بتكلموا عن ضربات الجزاء – يفتكرهم بيجبوها. * وهم ضربات الجزاء التى تمنح لهم بتمشي (الكشافات). * على العموم الحديث عن ضربات الجزاء في المريخ بقى قصة من قصص (الف ليلة وليلة). * قصص خيالية ساكت. * لو ركز اعلام المريخ في فريقه بكون احسن ليه. * اعلام المريخ مركز مع ضربات الجزاء. * اي صحفي في المريخ عمل ليه (صفارة) وبقى حكم. * مباريات الهلال ما بخلوها. * امس في صحيفة الصدي تصريح شجاع لامين لجنة التحكيم المركزية أحمد النجومي. * احمد النجومي اشاد بالحكم صديق الطريفي الذي ادار مباراة المريخ والاهلي شندي، وقال انه كان نجم المباراة الاول بلا منازع واستطاع ان يدير اصعب مباراة بأقل قدر ممكن من الاخطاء وكانت كل قراراته سليمة نظرا لتواجده في موقع الحدث، واضاف: "شخصيا وبلا تردد امنحه درجة 10 من 10 وان كان هناك شيء وحيد يحسب عليه يتمثل في عدم إشهار البطاقة الصفراء لعدد من لاعبي المريخ الذين اكثروا من الاحتجاج على قراراته الصحيحة وبصورة مزعجة؛ تابعت المباراة منذ البداية وحتى النهاية ولم اشاهد اي خطأ مؤثر وقع فيه حكم المباراة بدافع استهداف المريخ وإجباره على قبول الخسارة، واندهشت كثيرا للحديث عن ركلة جزاء غير محتسبة للفرقة الحمراء رغم انني تابعت المباراة حتى النهاية ولم اشاهد اي حالة تستحق ركلة جزاء؛ وأشار النجومي الى ان المريخ الذي لم يسجل على مدى 93 دقيقة يحتج على عدم إكمال دقيقة من الوقت بدل المبدد وكأنه سيفعل في تلك الدقيقة ما لم يفعله في 93 دقيقة؛ ورأى النجومي انه الأفيد للأحمر ان يعالج اخطاء حارس المرمى والهجوم بدلا من مهاجمة الحكام. * هذا تصريح الحكم الدولي المتقاعد احمد النجومي وهو تصريح شجاع ..يجعلنا نقول ان اللجنة المركزية للحكام رغم الهجوم والارهاب الذي تجده من الاعلام الرياضي تشكل حماية قوية لحكامها. * وهذا امر مطلوب حتى لا يصبح الحكام تحت ايد الاعلام الرياضي يرهبهم ويحدد لهم حتى ضربات الجزاء التى يفترض ان يحتسبوها والتى يجب ان يصرفوها. * تبقى التحية خالصة للحكم الدولي المتقاعد أحمد النجومي الذي يجاهر برأيه ولا يخشى الهجوم الذي يمارس عليه وعلى حكامه في الصحف. * كذلك يشكر صلاح أحمد محمد صالح ..وقد حافظ على حياد حكامه الذين تحسنوا كثيرا في هذا الموسم رغم الضغوط التى تمارس عليهم. * التحية والتقدير للجنة الحكام المركزية ولكل الحكام الذين لا يتأثروا بالكتابات الصحفية من صحافة الهلال ومن صحافة المريخ. * يبقى مطلوب من الاتحاد العام لكورة القدم او يوقف تلك التفلتات التى اضحت تظهر في مباريات المريخ تارة من الجمهور وتارة من اللاعبين. * الاتحاد اذا لم يضع حدا لهذه التجاوزات ..سوف نشاهد كوارث قريبة في الدوري السوداني في مباريات المريخ. * .......... * ملحوظة : الحملة ضد الحكام سوف يأتي اكلها في مباراة المريخ والامل القادمة. هوامش * بعد اي مباراة للمريخ اصبحنا نرى مثل هذه المناحات. * مباريات المريخ اصبحت تلعب في الصحف. * اعلام المريخ لا يضع ثقته في لاعبي المريخ ..لذلك يبحث عن تحقيق الانتصارات بواسطة الحكام والخرفان. * مباراة شندي انتوا ما ضبحتوا ليها. * لو ضبحتوا ليها ..دا كلو ما كان حصل. * قالوا ليك ميزانية المريخ نصها بتمشي للتسجيلات...ونصها بيمشي للخرفان. * قروش الرعاية والتلفزة في المريخ كلها بتمشي للخرفان. * كدا حاولوا جيبوا ليكم خروف محترف. * جيبوا ليكم خروف (اجنبي). * الخرفان السودانية دي ما بتعمل حاجة بقت. * تقول عندهم سماية. * كل يوم يضبحوا ليهم تلاتة خرفان. * الاستقالات وجبت. * لو قدمتوها تاني ما تسحبوها. * في اسبوعين المريخ فقد (6) نقاط. * يا سلك يا اخوي بقيتوا تفتشوا للنقطة ما تلقوها. * سلك قال حتى الفرصة التى وجدها سيدنا تراوري في اخر دقيقة لعبها بتراخي كبير. * بقيتوا تنتظروا اخر دقيقة يا سلك. * لو ضبحتوا دا كلو ما كان حصل. * يا احمد الحاج قلت ليك الجماعة ديل لو مشيت ليهم شندي لو ضبحوا (120) خروف ما بيفوزوا. * قعدت تغالط يا احمد وتقول لي الاهلي ما بقيف قدام المريخ. * السنة كلها تغالط فيني. * يمكن محسن سيد ما سافر الفاشر. * يمكن باسكال. * باسكال – خرب طبعكم. * ............ * عاجل : باسكال الدخلو هنا شنو؟.
