الهلال التاريخ والحاضر والمستقبل ..والتطواني في (المقبرة) في عداد المهزومين لمن تسمع تشكيلة المريخ .. زي البتشاهد ليك في فيلم (أبيض وأسود)
من الغلاف للغلاف :يحررها محمد عبد الماجد عند اللزوم فقط الإهداء لو عاوز تشاهد مباراة الهلال أمام النسور (تاني)... جيب (محمد الأمين) يعمل ليك فاصل في (نادي الضباط) ، ورجعوه عشان تجيبوا (عقد الجلاد) للشوط التاني. ما عاوز أقول ليكم الموضوع عاوز (محمد وردي) عديل كدا..عشان ما أصعب ليكم الحكاية. محمد صورة أبيض وأسود غارزيتو اتقدم بيه السن – لمن بقى يمشي (يحفر) الواطة ..غارزيتو دا عليكم الله يا ناس (بي ان سبورت) لو جبتوه لينا جيبوه لينا (أبيض وأسود). الزول دا قديم شديد. ما عاوز أبالغ ليكم – لكن الواحد بقى لمن يسمع تشكيلة المريخ – بشعر بي أنو كأنو بحضر في فيلم (أبيض وأسود). الهلال النادي الذي فاز بالحاضر والمستقبل في جولة واحدة تاريخ الهلال من دون شك تاريخ عظيم ...ارتبط الهلال بالوطنية والخريجين وكان قلعة من قلاع الوطن القوية والصامدة والتى مازالت إلى وقتنا هذا تمثل قلعة للعلم والثقافة الرياضة والفن والحضارة. الفريق عندما يكون في فترة بناء وتجديد في الغالب يفقد حضارة ويحتاج إلى وقت حتى يعود إلى سيرته الأولى. الهلال رغم من أنه في مرحلة بناء زي (الجوهرة الزرقاء) – إلا أنه مع ذلك حافظ على سجله وحاضره. فهو بحمد الله وفضله متصدر للدوري الممتاز – ومتصدر بحمده لمجموعته في بطولة الأندية الأفريقية للأبطال. يعني الهلال رغم النظرة المستقبلية التى تسيطر على فترته الحالية وهي التى تشغل جهازه الفني ومجلس إدارته – إلّا أن الهلال يتقدم بثبات – ربما هو أكبر حتى من حالات الثبات السابقة في الهلال وهو مستقراً. الآن الهلال يمتلك لفريق أول محترم – هو المرشح الأول بإذن الله للفوز باللقب الأفريقي حسب آراء الخبراء (شوبير مثالاً). كفي أن الفريق الأول فيه كاريكا ومساوي وبشه ونزار حامد الذي أشارت الصحف الأفريقية نفسها إلى أنه لن يلعب موسم آخر في أفريقيا. ويملك الهلال فريق (الرديف)..مواهب قادمة بالمستقبل كله ..وعناصر سوف تشكل دعومات المنتخب الوطني وسوف تمضي بعيداً إن شاء الله مع الهلال ومع المنتخب. وكما بنى مجلس الهلال في (الجوهرة الزرقاء) – ويلعب فيها ..يبني مجلس الهلال مع الجهاز الفني كذلك الفريق بعناصر شابة ويحقق بعد ذلك انتصارات مشرفة ويتقدم محلياً وأفريقياً.
حكمة العلم اتقدم.. لو اشتريت ليك (بطيخة) وعاوز تعرفها حلوة ولّا لا – ما تقطع (البطيخة)...دي كان زمان.. أضرب بس نجمة تلاتة أربعات مربع وأعمل إرسال – بتعرف (البطيخة) لو حلوة أو ما حلوة. شفتوا العلم كيف؟. تقنية شديدة. طبعاً في ناس البطيخة لو ما قطعوها ما بشتروها. مالو زعلان ؟ غارزيتو قال لقى ليه (خاتم دهب) في الفاشر ...آه غارزيتو رايو شنو لو في هلالابي من هلالاب الفاشر قال عندو (خاتم) رايح. عندو خاتم مفقود. أنت يا غارزيتو مشيت الفاشر تجيب (النقاط) أم مشيت تجيب ليك (خاتم)؟. عشان كدا جيت راجع بي (نقطة). صاحبكم المباراة كلها مركز في (خاتمو). قالوا ليك غارزيتو بدل ما يطلع (بكري المدينة) من المباراة طلع (خاتمو) من أصبعو. تحذير قالوا ليك واحد طقتو كهربة – بدل ما يفصلو الكهربة، أهلو قعدوا ينططوا في الحوش الكهربة جات...الكهربة جات.
الكلمة ومعناها آخر (ثعلب) شفتو – قابلني في كتاب المطالعة بتاع سنة تالتة..تاني لاقنى (ثعلب) الهلال (صهيب). ما عرفتو دا بتاع سنة تالتة المكار ولّا دا جمال الثعلب؟.
هلال 2015 ......... وهلال 1987 في ناس قعدوا يقارنوا بين هلال 87 وهلال 2015م عندما شافوا ناس وليد الشعلة وبشه الصغير وصهيب الثعلب والصيني ومحمود محمد وأطهر الطاهر بعملوا في المثلثات والمربعات وبفتحوا في صوالين الحلاقة في مباراة الهلال والنسور. في ناس اتخلعوا عديل كدا وقالوا هلال 87 الجابو هنا شنو؟. شفنا الفن والإبداع ...والأقوان البجيبوها من (سقط لقط). قلنا ناس الديبة وحمد دفع الله رجعوا تاني – البعملوا فيها ناس (بشه الصغير) دا ما عمل نصاح. صهيب الثعلب بجيب ليك في الأقوان أشكال وألوان برسم براهو حالة زاهية لي ناس الريح كاريكا وأسامة الثغر ووليد طاشين. الصيني زي منقستو في نص الهلال. الناس في المباراة طلعوا (الصور) وقعدوا يقارنوا ليكم. قعدوا يتفرجوا في الصور. أنا طلعت ليهم. قلت ليهم دا ما هلال 87 ...هلال 87 يا جماعة في المريخ ..(الأولاد) ديل صغار شديد. الناس استغربوا وقربوا يمشوا معاي على القسم. قلت ليهم يا عالم هلال 87 ..ناس المعز محجوب لعبوا (15) سنة في الهلال – ناس عمر بخيت الذي لعب في الهلال (12) سنة...ديل كلهم بلعبوا في المريخ الآن. هلال 87 ..ناس بكري المدينة الذي لعب في الأهلي مدني لمن فتر ومشى لعب في الأهلي شندي ولعب في الهلال وبلعب الآن في المريخ. انتوا ما بتعرفوا كمان. ناس علاء الدين يوسف وضفر وأمير كمال وسيلا والريح علي بلعبوا من سنة حفروا البحر. بلعبوا من قبل ما يخترعوا (الجبنة). الوقت داك (الحنة) ذاتها ما كانت معروفة. العريس لو عاوزين يحننوه بوقفوه في (الشمس). والمراوح دي ولا في زول بعرفها. يطشرنا الوقت داك. غايتو يا ناس المريخ بقى عندكم فريق – الشوط التاني بيتمو بي (رجل الرايه). أي هجمة على المريخ يرفع رايتو. ناس علاء الدين يوسف ما بقدروا على (الجري). كفاية (جري) زيكو. حالة تسمم مهاجم في مباراة للهلال بلعب في الفريق التاني ..جاء واقع طلعوه بالنقالة. الدكتور عاين ليه كدا ..قال مصاب بي حالة تسمم حادة. الناس استغربوا قالوا كمان (التسمم) جاهو من وين؟. مراقب المباراة قال ليهم جاهو من (أتير توماس) في كورة مشتركة.
المروحة وطه سليمان قالوا ليك في واحد دخل ليه على زول لقاهو ليك مشغل طه سليمان والمروحة وقاعد يرقص. الزول استغرب وقال ليه عليك الله هسع دا فنان ترقص ليه الرقيص دا كلو؟. الزول قال ليه أنا ما قاعد أرقص عشان طه سليمان – أنا برقص للمروحة دي – الكهربة كانت قاطعة هسع جات. زولكم قاعد يرقص معاهو – وقال ليه طيب ما تقول كدا من الصباح.
حالة مستعجلة بعد مباراة الهلال والنسور قررت إدارة النسور أن تخصم 50 % من راتب حارس مرمى النسور (أبو عشرين) – كما تم خصم 19 % من اسمو. شاحن جلاكسي ناس الزمن دا من فلهمتهم الواحد فيهم قبل ما يعمل الموبايل الجلاكسي ..بعمل شاحنو. فلهمة ساكت. ولا في داعي ليها. الحلة (بصلة). والموبايل (شاحن). والخبرة (صلعة).
احتمال كهربة الزمن دا (دفعها) مقدم. وجيتها متأخرة. يعني نحن بندفع مقدماً لكهربة ما قاعد تجي. كهربة قاطعة – وحسابها خالص.
بداية الشارع مريخابي زعلان ولدو قال ليه يا أبوي (الثعلب) ببيض ولّا بلد؟. المريخابي قال ليه ما عارف – لكن (الثعلب) بجيبها من (النص). اقتراح مباراة المريخ مع الأمل عطبرة في عطبرة الأسبوع القادم – إن شاء الله غارزيتو يلقى ليه (غويشة) مدفونة في إستاد عطبرة – عشان (نقطة) ما يرجع بيها من عطبرة. نقطة (النقعة) ذاتها ما تحلم بيها في عطبرة. قال خاتم قال ...أنت قايل نفسك في (خطوبة)!!.
عفريت بتاع كورة مريخابي ماشي في البحر طلع ليه (عفريت). العفريت قال للمريخابي شخارم – بخارم ..عاوز شنو؟. العفريت قال ليه بس المريخ يشيل (كأس الأندية الأفريقية للأبطال). العفريت زعل ليك وقال للمريخابي – شفت أنا عشان حركاتكم دي – خليت الشغلة...ونزلت شغل في الحكومة.
نظرية مريخابي دخل مباراة الهلال والنسور شاف ليك ولد صغير كدا – بعمل في أي شيء في المباراة. على كيفو – يطلع وينزل. المريخابي الموضوع حرقو – قال ليهم الولد البعمل في حركات (بشه) دا منو؟. قالوا ليه كتلتو كتل – دا (بشه الصغير). المريخابي وضع ايدو في رأسو – وقال والله (جمال سالم) ليه حق يحرس شبكة المريخ بي تلاتة جنسيات. جنسية واحدة ..مع (البشات) دي ما بتنفع. الممتاز ما عندكم فيه غير (خاتم) غارزيتو تقرير مهم ودقيق كتبه (محمد عيسى ساتي) قال فيه (يعتبر فريق الأهلي شندي الذي يلعب موسمه الخامس في بطولة الدوري الممتاز هو الفريق (الوحيد) الذي استطاع أن يحقق الفوز على الهلال منذ العام 2011م ، حيث لم يستطع أي فريق غيره وعددهم (19) فريقاً مختلفاً واجههم الهلال لعبوا (108) مباريات من تحقيق الفوز عليه بما فيهم المريخ والذي حقق آخر فوز له على الهلال في مارس 2011 بهدف سكواها بعدها لعب ثماني مباريات دون أن يستطيع تحقيق أي فوز). وذكر محمد عيسى ساتي : (لعب الهلال طوال المواسم الخمسة الماضية إذا استثنينا الأهلي شندي مع (19) فريقاً مختلفاً وهي المريخ ، الأمل عطبرة ، الخرطوم الوطني ، هلال كادوقلي ، أهلي الخرطوم ، النسور ، الموردة ، النيل الحصاحيصا ، هلال بورتسودان ، هلال الفاشر ،جزيرة الفيل مدني ، حي العرب بورتسودان ، اتحاد مدني ، الأهلي مدني ،الرابطة كوستي ، الأهلي عطبرة مريخ الفاشر ، هلال الأبيض والميرغني كسلا . حوالي (108) مباريات منذ مباراته ضد المريخ في العام 2011 لم يستطع أي فريق من تحقيق الفوز عليه). ويقول ساتي : (بالانتصار الذي حققه الهلال أمس الأول على النسور ضمن مباريات الجولة (21) من بطولة الدوري الممتاز يكون الفريق قد لعب (38) مباراة بدون خسارة، حيث لم يخسر الهلال أي مباراة بعد مباراة الأهلي شندي الموسم الماضي في إستاد الخرطوم بعدها لعب (19) مباراة دون خسارة ليلعب في الموسم الحالي (19) مباراة دون أن ينهزم وبما أن الأهلي شندي هو الفريق الوحيد الذي يفوز على الهلال في الممتاز منذ العام 2011 وبعد أن لعب الهلال مباراتيه ضد الأهلي شندي دون أن يخسر يتوقع أن يكمل الهلال مبارياته في الدوري دون أن يحقق أي فريق الفوز عليه). ما رأي أستاذنا عبده قابل في هذه الأرقام. ناس المريخ (تمانية مباريات) في الممتاز ما قدروا ينتصروا على الهلال – وبعد دا يتفاصحوا. المضحك تصريحات محسن سيد بعد نقطة (النقعة) والتى قال فيها : (استبعد محسن سيد مدرب المريخ المساعد أن تؤثر النتيجة التعادلية التي انتهت عليها مباراة المريخ أمام السلاطين على صدارة فريقه لمسابقة الدوري الممتاز وقال: اكتبوها على لساني.. صدارة المريخ للممتاز مستمرة حتى النهاية، وستكون بفارق النقاط لا الأهداف وأقول هذا الحديث وأنا واثق منه لأنه لا يوجد أي فريق في المنافسة يستطيع أن يقف أمام الأحمر، وأكد محسن أن المريخ سينتظم في معسكر مغلق اعتباراً من اليوم وستأخذ تدريباته طابع الجدية لأن مباراة وفاق سطيف على درجة كبيرة من الأهمية وتمثل لهم مفتاح التأهل لنصف النهائي، مشدداً على أهمية دعم الجماهير للفريق حتى يتمكن من تجاوز عقبة الوفاق والانطلاق بقوة في دوري الأبطال). يا محسن سيد أنتوا الممتاز بتعرفوا ليه شنو كمان؟. الممتاز دا ما عندكم فيه غير (خاتم) غارزيتو الذي وجده مدفوناً.
صفيحة دغالة الزول في الكورة لو عاوز معاك سبب ..لو أنت قاعد وراهو بقول ليك اقعد عشان نشوف. تقول ليه يا زول أنا قاعد وراك. يقول ليك عارف ...بس مرات بتلفت ورا عشان أشوف الحاصل شنو؟. ناس المقصورة مرات أهم من الكورة. واسطة قالوا ليك ناس النسور الشوط الأول كلو فاكرين نفسهم بيلعبوا في (دوري الرديف). الشوط التاني لمن استوعبوا الوضع لقوا ليك (الثعلب) حسم الموضوع. ناس النسور ديل مفروض يدوهم بدل (خلعة)..من دخل المباراة. أقول ليكم شيء ..نحن ذاتنا المباراة كلها مخلوعين ..بنقول البعمل فيه بشه الصغير دا شنو؟. ما فاهمين أي حاجة. ناس النسور لو عارفين كدا كانوا دخلوا المباراة بي دفاتر محاضراتهم. البعمل فيه محمود محمد محمود دا ما شوية.
ملحوظة شفتوا الفرق بين الهلال والمريخ. ناس الهلال في مباراة التطواني أملهم في (نزار حامد). وناس المريخ في مباراة وفاق سطيف أملهم في (ضفر). كرتونة حروف نصب الدكتور قال ليه ما عندك أي حاجة...أنت زي الحصان. قال للدكتور والله يا دكتور دا نفس الكلام القالوه للوالد تاني يوم مات مع أن الدكتور قال ليه أنت زي الحصان. يا دكتور (زي الحصان) دي حاجة خطيرة. أرنب نط مريخ الفاشر لو عمل ليه (طابق تاني) ما بكون عندو أي فرق من المريخ العاصمي. الرقم مشغول غارزيتو شاف رديف الهلال – قالوا قال لي جمال الوالي المباراة القادمة في الدوري الممتاز عاوزين نلعبها بالرديف. جمال الوالي قال ليه لو عاوز تلعبها بالرديف – إلّا نطلع لينا (شهادات تسنين) لي ناس ضفر وأمير كمال. حسن فاروق طلع أخطر من (بشير عباس) مباراة الهلال والنسور أجبرت الزميل حسن فاروق يطلع من وقاره ..ويكتب على طريقة (بشير عباس) وينقطها عديل كدا وهو يكتب في عموده أمس عن متعة مباراة الهلال والنسور. طبعاً حسن فاروق من الصعب تطلع ليك منو (جملة مفيدة) بالمتعة دي – لكن مع ذلك شباب الهلال أجبروه على أن يسطر هذه الكلمات عن الهلال. شوفوا حسن فاروق قال شنو في (أصل الحكاية) أمس : (زمن طويل لم أشاهد فيه كرة سودانية عنوانها العريض (المتعة والإبداع) ، فترة طويلة لم أشاهد فيها الجماهير وهي تتفاعل بانفعال حقيقي بما يجري داخل الملعب، فترة طويلة لم أشاهد كرة (متحررة) خالية من (التعسيم) الذي كاد أن يفقد الكرة متعتها وحلاوتها ، زمن طويل نسيت معه كلمات كنا نقرأها ونرددها كثيراً ( انتزع الآهات وجعل المدرجات تتمايل طرباً) ، كل هذه الأشياء عادت بعد طول غياب في المباراة التي جمعت أمس الأول بين فريق الهلال والنسور الأمدرماني ، ضمن مباريات الدوري الممتاز ، في مباراة حملت كثيراً من المفارقات والمفاجآت ، فقد فاجأ المدرب التونسي نبيل الكوكي الجميع ، بتشكيلة غريبة وعجيبة ، افقد الكثيرين توازنهم ، وأصيب بعضهم بالإحباط ، ووصل البعض الآخر إلى قناعة بخسارة الفريق للمباراة ، وزيادة فارق الصدارة الذي تقلص بينهم وفريق المريخ على الورق بعد التعادل الأخير أمام مريخ الفاشر، ليأتي الكوكي ويزيد الفارق بهذا التشكيل الذي جمع توليفة معظمها من لاعبي الفريق الرديف ( أولاد صغار)، والبقية من البدلاء ، أشكال للاعبين يتعرفون على هيئتهم لأول مع غياب الأسماء ، فكانت الأسئلة تدور في المدرجات عن صاحب الرقم (7) ، والرقم (22) وبقية الأرقام، عدا أتير توماس لا يوجد لاعب من التشكيلة الأساسية ، جمعة جينارو وفيصل موسى وأطهر الطاهر، ووليد الشعلة ، وصلاح الجزولي من البدلاء ، حتى معلق المباراة الزميل ياسر ، هربت منه الأسماء في بدايات المباراة ، فكان يبتعد عن ذكرها عند استلام لاعب من الصغار الكرة ، الشيء الذي زاد من توتر المتابعين على الشاشات). غايتو يا حسن فاروق الشافك بعد كدا في اتحاد المهن الموسيقية بتسجل اسمك للحصول على عضوية النادي ما كضب. قلنا ليكم الهلال خطير ..قعدتوا تغالطوا فينا. محمود علي الحاج (بقيت ما زي زمان) حرمتني من اللعب في الهلال محمود علي الحاج أحد رواد الأغنية الشعبية التى قدمها لنا بطعمها (البلدي) الراسخ – حيث التراب واللوبيا والجلابية والتوب والرق. الأغنية الشعبية ..أسرع للدخول في وجدانيات الناس – هي أكثر صدقاً وأقدر للتعبير عن الإنسان السوداني (بقرويته) الجميلة. لا تخلو حفلة من حفلات الأعراس من أغنية من أغنيات محمود علي الحاج فهو صاحب (بقيت ما زي زمان) الأغنية التى تحكي وحشية التنكر وحرقة التغيير – وهو الذي قدم لنا (مالك مجافي الناس عايش براك في غربة) الأغنية التى كسرت عزلة المحبين وجعلت البساط أحمدي بين العشاق. وهو الذي غنانا (أنا في هواك ضحيت يا حبيبي لو تعلم) ...لتبقى التضحية في الحب أمر مسلم به. محمود علي الحاج ..جلست له ..اسمع بعض (أسطر) من كتاب حياته الضخم. (1) محمود علي الحاج ولد في مدينة بربر في (القدواب) كان المولد ، والده درس في كلية غردون ثم عمل في مصلحة الأشغال. نقل والده ومحمود علي الحاج في سن صغيرة من الدامر إلى الخرطوم لتنتقل الأسرة إلى العاصمة. عندما كان محمود علي الحاج في مدينة بربر وهو طفل كان مغرم بأغنيات الفنان إبراهيم عوض – حيث كان يردد دائماً أغنية (ألم الفراق). لم يكمل العاشرة عندما انتقل مع والده إلى الخرطوم ليشهد في أحد الأيام حفل للفنان محمد أحمد عوض الذي حوّل مزاجه من أغنية إبراهيم عوض الحديثة إلى أغنية محمد أحمد عوض الشعبية. إعجابه بمحمد أحمد عوض كان سبباً في أن يزور محمود علي الحاج الفنان محمد أحمد عوض في بيته في سوق الشجرة بأم درمان. محمد أحمد عوض أعجب به وكان أستاذه الأول كان عندما يزوره في البيت يمنحه أحد نصوص أغنياته ليحفظها – حتى إذا عاد المرة القادمة منحه أغنية أخرى ليحفظ كل أغنيات محمد أحمد عوض القديمة. (2) عندما شعر محمود علي الحاج بموهبة الفنان فيه ..غادر الخرطوم إلى مدينة عطبرة حتى يجد حريته في الغناء والتحرك بعيداً عن قيود الأسرة الكبيرة. في عطبرة عمل محمود علي الحاج وكوّن فرقة خاصة به – لتكون أول أغنياته الخاصة (لسه صغيرة تبت دابها) التى كتبها له في عطبرة (سوركتي) فلحنها محمود علي الحاج وتغني بها. بعدها عاد محمود علي الحاج للخرطوم وهو فنان مكتمل. (3) غني محمود علي الحاج (24) أغنية من كلمات الشاعر عوض جبريل أشهرها أغنية (بقيت ما زي زمان) التى لحنها عوض جبريل بنفسه. عوض جبريل لحن كل الأغنيات التى منحها محمود علي الحاج عدا أغنيتين لحنهما محمود علي الحاج بنفسه. كذلك غنى محمود علي الحاج (5) أعمال للشاعر عبد الرحمن الريح. أغنيات الفنان محمود علي الحاج الخاصة أكثر من (150) عملاً ، غنى فيها لأكثر من ثلاثين شاعراً ..أشهرها (مالك مجافي الناس عايش براك في غربة) وهي من كلمات بابكر الطاهر شرف الدين ومن الحان محمود علي الحاج نفسه. ومن أغنيات محمود علي الحاج الشهيرة (أنا في هواك ضحيت يا حبيبي لو تعلم) الأغنية التى كتبها حسن مصطفى الماحي...وأغنية (رغم بعدك يا مسافة) للشاعر عباس علي عباس. وتبقى أغنية (دروب الريدة مهما تطول) من أشهر الأغنيات العاطفية الشعبية على الإطلاق وأكثرها صموداً وثباتاً. غنى محمود علي الحاج أيضاً للشاعر عبد العال السيد (زولي الوفي) وهي آخر الأغنيات التى سجلها في الإذاعة ثم غنى (شوق السنين) التى لم يسجلها حتى الآن في الإذاعة. (4) محمود علي الحاج كان لاعباً خطيراً في كرة القدم ولولا ارتباطه بالغناء وتعلقه به – للعب محمود للهلال في فريق شباب الهلال – حيث حرمته (بقيت ما زي زمان) من الالتحاق بالهلال باعتبار أن درب الوتر لا يتوافق مع درب الفكر.
