حكاية (التقليد) التى ينتهجها المريخاب تتبعا لمسيرة الهلال وخطواته ..تحدثنا عنها كثيرا ...حتى اصبح لا جديد في ذلك الامر...نحن ذاتو فترنا من الكلام دا. كترتوا الكلام.
يا اولاد الاسبوع القادم عندنا اختبار (فيزياء)...الاستاذ لمن يزهج من الطلبة ..بقول ليهم الاسبوع القادم عندنا (اختبار).
الفصل كلو ..يصن..صوت المروحة يبقى زي (البابور).
اقيف ..اقيف.
انت قلت (بابور) ..وإلا حاجة كدا.
لا قلت ..(بابور)...انا سمعتك.
والله العظيم يا جماعة انا ما قاصد ...والله ...موضوع (البابور) دا دخل ساكت في ثنايا الكلام ...من غير اي قصد.
ولا قاصد حاجة.
جاء عفوا كدا.
لكن انا اعمل ليكم شنو ؟...(بوابركم) كترت.
من الابرول ابت تطلع...!!
من العمال ابت تطلع...!!
من البابور طلع (خازوق)...!!
خلاص ..هذا الامر اصبح من الثوابت في المريخ ...وهي طبيعة نشأ عليها المريخاب ..وصارت عندهم (عقيدة) راسخة ..لا تقبل النقاش ..ولا الجدل.
والحديث هنا عن (التقليد)...وليس عن (الخوازيق).
عشان تبقوا عارفين ...ما تقعدوا تتطارشوا في الكلام ساكت.
يا ولد ..اعملوا الغداء.
ويمكن ان نثبت ذلك ...في كل يوم ..ونأكد هذه الوقائع ..بقرائن مشهودة ..ومعروفة ومحفوظة...ترجح بل تأكد تقليد (الوصيف) للهلال في كل الاشياء ..ما ظهر منها وما بطن.
اتوقف اولا عن الاداء (الفاتر) الذي ظهر به المريخ امام هلال كادوقلي ..واحسب ان ذلك الاداء الفاتر والتعادل المخيب لامال المريخاب طبعا ...هو امتداد طبيعي لاداء الهلال ومظهره الذي كان امام فريق الاهلي عطبرة ...وكأنهم كانوا يقلدوننا حتى في السوء والاداء الفاتر.
دي عاوزين تقلدونا فيها يا مريخاب.
الاحساس والفتور الذي كان في مباراة الهلال والاهلي عطبرة ...سيطر على مشاعر المريخاب وهم يلعبون امام هلال كادوقلي ليخرج الاخير بنقطة سمينة امام المريخ وهو يلعب في ارضه ووسط جمهوره.
نقطة وسطر جديد.
بابور عمل فيكم كدا ..تراوري يعمل فيكم شنو؟.
بشة لو قابلكم بي حالتكم دي طوالي بكتب ليكم (رقاد).
في العيادات ..والمستشفيات ..الزول وقت يكون تعبان وحالتو خطيرة ..الدكتور بكتب ليه (رقاد).
طوالي يحولوه العنبر.
غرابة الامر هنا ...تعليقا على ارض المريخ التى لعب فيها المباراة ...هو التصريح الغريب الذي ارجع فيه الكوكي الخسارة لسوء ارضية الملعب ..وكأن المريخ يلعب على ارض في الفاشر او كادوقلي ..ولا يلعب في ارضه.
ناس هلال كادوقلي ديل ..ارضية الملعب دي ...حضروا شايلنها معاهم.
السنة الفاتت قلتوا ما بنلعب مع هلال كادوقلي في (كادوقلي)...هسع كمان في استادكم ما عاوزين تلعبوا مع هلال كادوقلي.
يا جماعة دي جرسة شنو؟..الوقعنا فيها دي.
لا اعرف ماذا يريد الكوكي من ذلك التصريح (الفرقعنابي)؟ ...هل يريد من الاتحاد العام لكرة القدم ان يحول لهم المباراة الي ملعب اخر؟ ..كما فعل الاتحاد نفسه الذي حول مباراة هلال كادوقلي والمريخ من كادوقلي في الموسم السابق لتلعب في (كوستي) بحجج واهية ..ومضحكة شككت في استقرار مدينة كادوقلي وفي امنها ...ليكون المريخ هو النادي الوحيد من اندية الممتاز الذي لم يلعب في (كادوقلي).
ابناء الجبال ...واسودها ...جاءوا هذا الموسم واقتلعوا (نقطة) غالية من المريخ ...وهو يلعب في ارضه ..ووسط جمهوره ..ليكون ذلك منهم ردا شافيا وكافيا ...(سوف يدرككم الهلال اينما كنتم).
نمسك ملف اخر في (التقليد)..وفي تتبع خطوات الهلال حتى في الامور الفنية.
اذا تجاوزنا حكاية (الاداء) الذي كان فاترا في مباراة الهلال السابقة ..وتكرير نفس الاداء الفاتر من قبل فريق المريخ في مباراته امام هلال كادوقلي.
اذا تجاوزنا هذا ..وقلنا دي (صدفة) ساكت ..وحاجة (لا شعورية) لا فيها قصد ..ولا فيها ترتيب ...وان كانت تكشف النوايا وتثبت تأثر المريخ (معنويا) بما يحدث في الهلال.
اذا تجاوزنا ذلك ...(والكلام دا ما يطلع من العمود دا)...وقلنا يخلق من الشبه اربعين ...او 110. ماذا تقولون عن (التقليد) الذي حدث من قبل الجهاز الفني للمريخ متتبعا نفس النهج الذي اتبعه الهلال؟.
في مباراة الهلال والاهلي عطبرة ..الناس كلها وضعت يدها في رأسها ...وغارزيتو يبعد (ترواري) من التشكيلة التى بدأ بها المباراة ..رغم من ان هذا الانفراد كان حصريا من الزميل الطاهر الطيب ...الذي قدم تشكيلة الهلال قبل 24 ساعة من المباراة ..وجاء غارزيتو واكدها في اليوم التالي.
هداف الممتاز ...واللاعب الذي اعاد الجمهور الي المدرجات ..ورجع الفرحة ...غارزيتو ..ابعدو من التشكيلة الاساسية ..ووضعه على كنبة الاحتياطي.
الموضوع دا موش فيه كمية من الاستغراب ..والدهشة ..والاعتراض وقفل التلفونات ..والزعل..والشكلة مع سيد اللبن.
سيد اللبن هسع الدخلو شنو؟.
والله ناس الهلال ديل في كورتهم ..يدخلوا ليك اي شيء من سيد اللبن للسيد السفير.
المهم قبلنا ابعاد تراوري ..وقلنا الخواجة دا اصلو عندو (فلسفة) كدا ...نحن عارفنو من ما كان في فريق مازمبي.