• النيل الذي كان ينوى ان يودي الهلال الي (لوزان) السويسرية (شاكيا) ...عارفين ودي المريخ وين؟. • ودي المريخ (الكاملين). • في حنية اكتر من كدا. • قالوا المباراة كانت اقرب لي اغنية الراحل محمد وردي التي كتبها اسحاق الحلنقى (الحنينة السكري). • مباراة كانت ناقصة بس (التورتة). • مباراة زي (عيد الميلاد). • مباراة كانت في منتهى السلام. • منتصر فرج الله قالوا حايم بي باقات الزهور ..واسامة التعايشة المباراة كلها بغنى في (وسط الزهور متصور). • اما كرنقو فقد كان ما يكون عاوز يصوب ليه (تصويبة) يتذكر ان اخوه الصغير بيلعب في المريخ. • والدم ما ببقى موية. • نحن (المساكين) ناس النيل عاوزين يمشوا معانا لي (لوزان). • عاوزين يحددوها معانا. • نمرقها لي لوزان. • اظن الفرق واضح بين الكاملين ولوزان. • تماسيح النيل طلعوا (قرموط). • ونيل ما فيه تمساح ...يقدل فيه (سكواها). • بمناسبة (البلح) دا. • حبيبك ان بقى عسل ...ما تغلبوا خمسة. • والليك لو كان لبن عشر ..سوي في عينك ..يا ناس النيل. • معقولة ...عملوتها ظاهرة. • كان تخلوها تطلع 2-1..يمكن كان نصدق. • قول 3- 1 ..برضو كان بنصدق...اصلو نحن على نياتنا. • كنا ح نكون معاكم لي 5-1. • ونقول الكورة اصلها كدا. • مدورة ..ومجنونة. • لكن 5 – صفر ..دي مشاترة والله. • ناس همد ذاتو ما بكون مقتنعين بالخمسة دي. • كدا الحافز يا كلتشي بمشي لي حتة تانية. • مفروض تحفزوا على هذه النتيجة يا ناس المريخ محمد آدم. • الحافز وصل. • قدر ما نقول الدوري الممتاز ...خلاص رجعت تكون فيه منافسة ...وفيه قوة وندية...ناس النيل ديل يرجعونا تاني للزمن القديم. • زمن الخمسات ..والستات..وشيلني وبشيلك. • الدوري الممتاز مرات بكون زي حقن الملاريا. • خمسات ...وستات. • الممتاز دا مرات بكون زي جدول سنة سابعة. • الجدول كلو الاسبوع الحصص فيه سبعة ..وستة. • يوم الخميس 5 حصص. • ما في اقل من كدا. • اها الممتاز نحن نقول خلاص اطور. • يرجع لينا تاني لجدول سنة سابعة. • على العموم لم يكن غريبا على فريق النيل الهزيمة بالخمسة ...رغم من انه كان متصدرا للدورى الممتاز. • لكن تبقى هزيمة النيل من المريخ ...هزيمة منطقية. • هزيمة اخوان ...اخوان. • زيتنا في بيتنا. • اقصد نيلنا في بيتنا. • ناس النيل ديل الي الان مدورين من (العرضة جنوب). • الموسم القادم يمكن ناس النيل يعملوا ليهم (نجيمة) في شعارهم. • مفروض اسم النيل يكون على هذا النحو (النيل المريخ) ..بدلا من (النيل الحصاحيصا). • ساكت متعبين معاكم ناس الصاحيصا. • دا نيل العرضة جنوب. • ما حدث في موضوع (ضفر) الذي حلف القسم للعب في الهلال وذهب للتوقيع للمريخ بعد ان شكل مجلس ادارة النيل عليه (ضغطا) من اجل الحنث بالقسم. • الذين يبعون (ضفرهم) بهذه الصورة ...من السهل ان يبعوا مباديهم وقيمهم. • فريق النيل بلبس من المريخ. • وبتمرن من المريخ. • وبصرف مرتبات لاعبيه من المريخ. • ومرتبات الجهاز الفني برضو من المريخ. • عاوزنو بعد دا كلو يأتي ويغلب ليكم المريخ. • دي تبقى حقارة. • الفرق التي تتبع بالرعاية للمريخ لم يسجل لها الممتاز أي موقف. • كلها دخلت للممتاز من اجل تغذية رصيد المريخ ب (6) نقاط. • في هدايا في شكل (نقاط). • امنحنى صوتك ..امنحك 6 نقاط. • أي نادي تابع للمريخ ...وبصرف من تحت التربيزة ...ما تنتظروا منه حاجة. • يا ها قدرته ...ما عندو اكتر من كدا. • ممكن يتفاصح في الجرايد. • ويهدد ..ويتوعد...بس عشان (الدخل). • ديل ناس جانا (تلفون) من جمال الوالى. • تلك الاندية المحسوبة على المريخ قمة طموحها (مسكول) من الوالى. • مسكول ..وبتموا الباقى (دراب). • متين في نادي محسوب على المريخ ..لعب ليه مباراة مسؤولة. • عكس الاندية المحسوبة على الهلال والتى كانت دائما تشكل عقبة للهلال. • اخر هذه الاندية ...فريق الاهلي شندي الذي يلعب في كشوفاته نصف لاعبي الهلال...كان دائما يشكل للهلال (شوكة حوت). • بل ان فريق الاهلي شندي صعد للممتاز من استاد الهلال الذي كان يتمرن فيه ..وكانت كل الاجهزة الفنية للهلال تساعد هذا الفريق. • ولعل فتحي بشير يقف شاهدا على ذلك. • هذا الفريق جاء وفي اول مواسمه فاز على الهلال في شندي. • وتعادل في هذا الموسم مع الهلال. • وحتى لا يحسب ان ذلك الذي كان من الاهلي شندي بسبب خلاف صلاح ادريس مع الامين البرير...نقول اذا كان (الخلاف) يؤثر بهذا الشكل في اداء الاندية فانه من الاحرى ان نقول ان العلاقة الجيدة التى تربط بين النيل والمريخ والمتمثلة في عبدالله حسن عيسي الداعم والراعي الاول للنيل كفيلة ان تقود فريق النيل لهذه الخسارة الكبيرة من المريخ. • شيء اخر نؤكد وهو ان الاندية التابعة للهلال او التى تربطه معه علاقة الاسم واللون ظلت هى العقبات الدائمة للهلال في الممتاز. • سبق ان فاز هلال الحصاحيصا على الهلال ...وهبط بعد ذلك فريق هلال الحصاحيصا. • وخسر الهلال اكثر من مرة من هلال الساحل ومن هلال كادوقلى. • وغير هذه الاندية ..فان الاندية القريبة من الهلاليين والتى يحملون لها محبة خاصة دائما ما تفوز على الهلال او تتعادل معه...وفي ذلك يمكن ان تكون مبارايات الهلال مع الامل وحى العرب والخرطوم دائما موضع اثارة وقوة ..ودائما هناك ندية. • وقد سبقت هذه الاندية ان عرقلت الهلال. • هذا مع التذكير ان الهلال هو الاكثر فوزا بالممتاز ..وهو الاوفر انتصارات في هذه البطولة ...مع ذلك ظل يخسر من اندية محسوبة عليه. • فريق النيل الحصاحيصا ...اثبت لنا اخيرا ان اتفاقية المريخ والنيل في (ضفر) اكتملت تفاصيلها في (الكاملين). • نقاط الكاملين دا (القسط) الثاني. • القسط الثاني تلات نقاط ...وخمسة اهداف. • ادفعوا لهذا الفريق 3 نقاط. • تستكمل في الدورة الثانية لسادسية. • خماسية توزع محترفى المريخ في تسجيله. • فريق النيل الذي مازال يدار بتلفون عبدالله حسن عيسي يبقى لنا ألا ننتظر منه أي مقاومة امام المريخ. • مجلس ما عندو كلمة ...ح يكون عندو قدرة يفوز او حتى يتعادل مع المريخ. • لا تنظروا أي شيء من هذا الفريق. • الفريق الذي ارتضى لنفسه ان يكون تابعا لا يملك ان يكون له (كينوينة). • لا يملك ان يقولوا لا. • سوف يظل النيل هكذا ..من غير أي طعم او لون ..وسوف يعود مجددا من الاندية المهددة بالهبوط ..حتى بعد ان كان متصدرا للممتاز في اسابيعه الثلاث الاولى. • اعود واقول اذا كان موسي الزومة هو نجم مباراة المريخ والموردة التي انتهت بفوز المريخ 3-2 ..فان عبدالله حسن عيسي هو من غير أي منافس نجم مباراة المريخ والنيل والتى فاز فيها المريخ بخماسية نظيفة. • وان كان البعض يحسب ان اهداف المريخ سجلها كلتشي واديكو وسكواها ونجم الدين ...نحن نحسب ان هذه الاهداف سجلها عبدالله حسن عيسي. • الخمسة سجلها عبدالله حسن عيسي. • طلع هداف الدوري. • والما عاجبوا يشرب من البحر. • اقصد والما عاجبوا يشرب من النيل. • النيل بقى (ترعة). • بقى (خور) عديل. • بلا نيل بلا لمة. • ملحوظة : كورتكم يا ناس النيل زي كلمتكم. هوامش • كنت عاوز اكتب عن هيثم مصطفي حفظه الله ورعاه وكيف استقبله جمهور الهلال. • لكن موضوع النيل ما بستحمل. • سوف نعود لاحقا لهذا الموضوع. • ما يهم هو ان الهلال قدم امام جزيرة الفيل ...مباراة غاية في الروعة. • اربعة اهداف ما فيها أي (ضفر). • اربعة اهداف عديل كدا. • والمباراة في مجملها كانت مباراة رائعة. • حتى جزيرة الفيل لعبت مباراة كبيرة. • وقفلت كويس ..ودخلت الهلال في حتة ضيقة. • لذلك المباراة كانت جيدة. • مهند الطاهر بهذه المباراة يستحق ان يكون نجم الموسم. • تقولوا لي نجم المباراة. • خلاص يا موسي الزومة ...ناس هيثم ومهند ظهروا ...تاني (النجومية) البتموها موية ديك ما عندك ليها طريقة. • ناس الزومة ديل ...النجومية بتموها (بصل). • منتخب المقاطعة البرازيلية لعب امس مباراة عنيفة مع الهلال. • وكان يمكن ان نفقد جهود اكثر من لاعب بسبب حماقات بعض لاعبي منتخب الماقطعة البرازيلية. • المنتخب دا يكون ملقطنو من (المنطقة الصناعية) للبرازيل. • فريق كلو (عتالة). • اول مرة اشوف لي برازيليين بالشكل دا. • بالمناسبة دي. • اول مرة افقد (خليفة). • تصوروا امس قلت يا حليل خليفة. • لكن مع ذلك اعتقد ان فريق الهلال استفاد من هذه التجربة التي كان مهزوم فيها وعاد سادومبا وعادل للهلال في اخر لحظات المباراة. • المباراة افتكر قدمت لنا عمر بخيت. • مدرب الهلال البرازيلي غارزيتو ...يجعل لاعبي الهلال في (ضغط) مستمر. • تمارين بعد المباراة ..ومباريات بصورة مستمرة. • هذا يجعلنا نقول ان القوة البدينة للهلال سوف تكون خطيرة في الايام القادمة. • عندما تكتمل قوة العائدين من الاصابة ..سوف تكتمل قوة الهلال. • وسوف تكون القوة البدينة للهلال اخطر اسلحته. • نزار حامد ..يحتاج الي ان يعود الي نزار حامد. • نزار حامد محتاج للاجتهاد اكتر. • سعدت امس بعودة ديمبا. • دفاع الهلال يحتاج لهذا اللاعب. • نتمنى من مدير الكرة خالد بخيت ان يحل مشاكل هذا اللاعب. • ما معقول ديمبا كل اسبوع يقول عاوز قروشو. • اعطوا ديمبا قروشه وريحونا من الحتة دي. • خاصة وان دفاع الهلال يحتاج له. • جمعة علي ..لو شطبتو لينا من الان يكون احسن. • الزول السجل جمعة دا مفروض يحاسبوه. • ما تقولوا لي اعطوه (فرصة). • اوعكم تقولوا كدا. • الهلال في التسجيلات الماضية تخلص من دفاعه كله ..وسجل (جمعة). • الهلال منذ الان مفروض يبحث عن مدافعين. • ما ضيعوا لينا الوقت ساكت. • يونيو باقى ليه شهرين و12 يوم. • عشان تكونوا عارفين. • معتز رابح ...ركز شوية. • الهلال سوف يعود بنتيجة اجابية من افريقيا الوسطى. • الهلال سوف يعود ان شاءالله بالنقاط التلاتة. • عاجل : عبدالله حسن عيسي لو عمل ليه (نيل) في الكاملين مع نيل الحصاحيصا ..المريخ بشيل الممتاز.
