هدف (سوسواني) وهدف (شقلواني) وهدف (هوبوباني) وتفاصيل بعد الفاصل • انا كنت قايل الموضوع ...(كورة) بس. • الموضوع ظهر اكبر من كدا. • الشيء سياسية ..والشيء فن والشيء ثقافة ...والشيء لافتات لنصرة المصطفى عليه افضل الصلاة والسلام. • الا رسول الله. • قلنا ليكم من البداية ...نحن الحكاية عندنا ما هي كورة بس. • الكورة زايلها. • نحن حسب (فهمنا) ..كنا فاكرينها كورة والسلام في البداية ، (زي أي اتنين بتلاقو صدفة)..اتضح لنا اخيرا ان الحكاية فيها (دروس عصر). • وفيها حصص صباحية كمان. • وفيها تسميع ..وحفظ وامشي جيب ولي امرك وتعال. • فيها تجارب ...وفحص ملاريا ...وكشف حال. • فيها عرضة ..وصقرية ....وبطان ...وفاصل للولاد وفاصل للبنات. • أي حاجة نحن عندنا بي نظام. • أي حاجة. • حتى (الشباك) الفاتح في الشارع. • الشباك هسع ذنبو شنو؟. • ناس مدثر كاريكا ديل عملوا أي حاجة في الكورة ...عملوا عصير الليمون من (الجدعة). • طبق اليوم. • كيف تعمل عصير ليمون من (تمريرة) عمر بخيت؟. • انظر الهدف الثاني. • وخلينا نطلع فاصل ونرجع. • المقادير. • اول حاجة تجيب ليك كورة تقطعها. • ما تقول لي اقطعها من وين؟..ان شاءالله تقطعها من السماء الاحمر ...انا الموضوع دا ما بخصني كتير. • المهم عندي تجيب ليك كورة تقطعها. • واجيب ليك اربع هنود زي (ليما). • طبعا انا ليما دا ما مقتنع انو برازيلي..انا واخوي خلف الله ابومنذر ..ما مقتنعين بالحكاية دي. • نرجع للكورة المقطوعة. • بعد دا انت وتصرفك ...(الجيش تصرف)...تقطعها من شندي ..تقطعها من الفاشر. • انت حر. • الحاجة التانية المطلوبة منك تخت عمر بخيت قدامك. • تضغط نجمة. • ترفع الشراب. • طبعا ح تقول لي الشراب ذنبو شنو؟. • تدور الخلاط على كدا ..بطلع ليك عصير الليمون. • خلوه عصير الليمون دا. • انتوا ما شفتوا (شية الجمر) العملها مهند الطاهر. • قدم سانيه. • رجع كاريكا. • قلب البصلة ...حمر الشية. • طلع بلة جابر. • الطبق دا ساهل شديد...ما عاوز ليه مراجعات كتيرة. • أي اربع باكات ممكن يعملوه. • المهم لو لقيت مهند الطاهر في يومو • بطلع ليك احسن شية جمر في الدنيا. • الكلام دا كلو خلوه. • شفتوا العملية العملها (جمعة). • جمعة دا دخل غرفة العمليات ..وقال جيبوا لي مشاكل دفاع الهلال كلها. • ونزلك معالجات في (الدفاع)..فك وتركيب. • ما خلى ليه مشكلة. • دا مشاكلنا الاقتصادية ..شافها ليك. • ازمة المواصلات ..قطوعات الموية ...تصريف الخريف ...كلها حلحلها ليك. • يجيب مساوي يكورك في عبداللطيف بويا ..وينادي معاوية فداسي ..ويطلع في الكورة. • والله يا جمعة ..نحن نلقى معاك (سبت) واحد كدا ..نجيب كأس العالم. • ما تقعدوا تتغالطوا فينا ساكت. • على العموم نحن ام درمان ما خزلتنا. • ام درمان قعدت تضحك لينا. • مرقت لينا بي شوارعها. • لبست (طرحتها) وطلعت. • هي عارفة الفرح ما بكون إلا في انتصار الهلال. • وقت الهلال ينتصر ..ام درمان دي بتبقى زي (العروس). • الضحك عاوز يشقها. • مشينا المباراة ...لقينا ليك الناس تضحك من الابواب. • الابواب فاتحة 5 ضلف. • عرفنا ليك انو الموضوع دا ما ساكت. • الضحك دا نحن شايفنو قبل كدا. • الناس دي ما بتضحك ساكت. • يا جماعة مالكم ..الحاصل شنو؟. • البترول ظهر في استاد الهلال. • معاوية فداسي مشي يحترف في برشلونة. • مالكم بتضحكوا كدا ...زي الزول العندو مرتبين. • قعدنا ..عرفنا ليك الحاصل..قالوا مشكلة هيثم مصطفى حفظه الله ورعاه اتحلت. • الرئيس ادخل ليك في الموضوع. • اصلو نحن رجعنا للدفاتر القديمة ...لقينا ليك هيثم مصطفى دا (سفير). • والسفير مشاكلو ما بحلوها وزراء الدولة. • السفير مشكلتو بحلها الرئيس. • الرئيس شخصيا ..لا لجنة ...ولا وكيل وزارة شفتو كيف؟. • واحد كان قاعد شفقان. • شفقان شديد ...النوع البشتم ليك حكم الراية قبل ما الكورة تبدأ. • قلنا للزول الشفقان دا يا زول روق ..مالك ضايق كدا ...اي زول يجي ماشي فيك تنزل ليك منو كباية شاي. • يا زول اهدأ...مشكلة هيثم مصطفى اتحلت. • قال لينا عشان كدا. • قلنا ليه عشان كدا شنو؟. • قال لينا عشان كدا ...نجيلة الهلال بتضحك براها ..زي الزول وقت يضرب ليه المدير. • زي القميص الزراريو مفتحة. • يقعد يضحك كدا بدون سبب. • والكراسي ذاتها عيونها (زغللت) ...من الفرحة. • كراسينا دا تقول ضاربة (فراخ)..اتنفت فجأة كدا. • على كدا الكورة دي ح تكون (باسطة). • باسطة عديل كدا. • المباراة بدأت ..ظهر لينا سانيه في قلب الهجوم ..ينزل ويطلع زي (البرق). • يثبت الكورة ...ينزل يقلعها. • في واحد قاعد جنبنا قال لينا دا شنو البعمل فيه سانيه دي؟. • واحد تاني قال ليه : سانيه دا الظاهر كدا ببرف في (الطير المهاجر). • الشغل دا شغل صلاح احمد ابراهيم عديل كدا. • دا ما شغل الكورة البنعرفو نحن. • الزول ما كمل كلامو ..سانيه جاب ليه قون. • القون دا اشرحو ليكم كيف؟. • شفتو مسلسل (رأفت الهجان). • الحلقة رقم 12. • المشهد التاني. • الشغل الحصل في الحلقة دي ..حصل في هدف سانيه تماما. • اتنين نطو قدام سانيه ...الحارس قعد يتعذر( انا ظروفي صعبي وابوي عيان ..وامي كبيرة في السن) ..سانيه ضرب ليك الكورة على الارض ، رغم انه كان هناك ساتر امامه. • الحكم عجبتو (النطة)..حسب ليك الهدف حتى قبل ان يتجاوز خط المرمي. • شاي اللبن دور جنبنا على الهدف دا. • البشرب والما بشرب ...قعد يشرب في شاي اللبن. • في زول تاني قاعد ورا ....طبعو كعب ..والهدف عجبو قال للبنت البتعمل في الشاي..اسمعي ما في (زلابية). • زلابية في السخانة دي. • الزول دا بس نسى نفسو ساكت ..وقعد يطالب بالزلابية. • زي الزول البكون قاعد يحضر ليه في فيلم اجنبي..يمشي التلاجة يشرب ..يرجع يجي يلقى ليك (البطل) كتلوه. • او زي حفلات ترباس ...تغلط ..تقوم ..تمشي تبارك للعريس ..ترجع تلقى كورسيك قعدوا فيه. • اها هدف سانيه دا كان بالسناريو دا. • بعد ما دورنا ليك في شاي اللبن ..(زي قطر المناورة) ....اي واحد فينا عندو اغنية في موبايله ..شغلها ليك. • نسينا ليكم الكورة مع شاي اللبن ..سرحنا عديل كدا. • في اللحظات دي شفنا ليكم عمر بخيت بعمل أي حاجة في الكورة. • الحاجة البتتعمل والما بتتعمل. • البتجي والما بتجي. • يا جماعة في شنو؟. • عمر بخيت دا قايل نفسو بيلعب في (كامب نو). • انت يا عمر بتتمرن فى استاد الهلال وإلا في (اكسفورد). • شنو الحركات البتعمل فيها دي. • والله نحن نلقى تلاتة منك ...نعمل في الدنيا دي جنس عمائل. • لو لقينا واحد زيك بس ...بنمشي القمر. • ما بنسأل والله في (الروس). • واي واحد فينا يعمل ليه (نضارة). • باقي نحن وقت نتفلهم ..بنلبس لينا (نضارة). • الواحد يلبس ليه نضارة ..ويشيل ليه كتاب ..ويمشي جامعة الخرطوم. • ويقعد يتحدث ليك عن نظرية النسبية ل (بول موران). • ما بنخلى لينا زول..بنثقف في الدنيا دي جنس تثقيف. • غايتو يا عمر بخيت كورتكم اللعبتها دي ..ما كورة عادية. • حاجة كدا فيها (سوناتات) بتهوفن ...شوفوا التمريرة التى لعبها عمر بخيت لمدثر كاريكا. • الاستاد كلو قايل الكورة دي (تسلل). • والله حكم الرأية لو ما كان مجضم (الفيزياء)..كان رفع رأيتو. • مباراة كان فيها كمية من (الهارموني) (والميلودي). • شيء (زي نقر الاصابع لما ترتاح للموسيقي). • كاريكا طلع من وين ما عارف؟. • ذكرني بشة ...وموسي الزومة. • عليك الله. • ابوس يدك. • موسي الزومة ما دخلوا لينا في (الهارموني) دا. • ما تخرب لينا الرصة. • المهم مدثر كاريكا تقول كان شايل (خريطة الكنز). • ذكرني حاجة تانية. • ذكرني جغرافية سنة تلاتة. • الغريبة ..مدثر كاريكا انطلق كدا ....ومشي على الحارس ..استجوبو ليك جنس استجواب. • ما خلى ليه سؤال ما سألو ليه؟. • فحص ليه أي حاجة. • الدم. • والنظر. • والغدد. • والركب. • وقت وصل للبطين الايمن ..في مدافعين كدا الله ما راضي عليهم. • ظهروا من وين ما عارف؟. • برضو. • كاريكا انتظرهم لما وصلو. • شيلهم العفش. • وقعد يمسح ليك فيهم. • مسح ليهم (الذاكرة) نهائي. • شالها بصورة جذرية. • شمال يمين. • ثم يمين شمال. • ثم بدل الكورة. • ودخل ليك في (بناديها). • بناديها حقت عمر الطيب الدوش . • عشان ما تلخبطوا ساكت. • كاريكا جضمها ليك جنس جضيم. • زي الكتاب ما بقول. • وقت خلاص الناس غرقت في المقطع التاني ...حضر ليك الكورة في اللفت. • وسدد بالشمال. • انت يا كاريكا انا عاوز اسألك سؤال. • انت عندك كم كراع. • ما شاءالله وتبارك الله. • غايتو الكرعين العديتها براي وصلن 7 كرعين. • قلت ليكم انا ..كاريكا بجيب ليه هدف شقلواني. • قعدتوا تغالطوني. • اها بعد كدا اعمل ليكم شنو؟. • ادخل ليكم المباراة القادمة بي (قسم بي محيها البدر)...وإلا يا جوهر صدر المحافل. • اذا كان هدف سانيه (سوسواني)..فان هدف كاريكا (شقلواني). • يعني هدف سانيه من مدرسة الاغنية الحديثة. • اما هدف كاريكا فهو من عيون الحقيبة. • الهدف دا عاوز عوض بابكر ..انا ما بقدر عليه. • لذلك يا رضا مصطفى الشيخ يوم الجمعة القادمة اوعك تجيب لينا هدف كاريكا دا. • هدف كاريكا دا خليه لي عوض بابكر يجيبوا في (حقيبة الفن). • انت ما بخصك. • انتوا بتلعبوا وإلا شنو؟. • نحن الحاجات دي ما بنجامل فيها. • الاجمل من هدف كاريكا ... شعار (الا رسول الله). • هكذا هو مدثر كاريكا ..دائما يثبت انه صاحب (رسالة)..وصاحب خلق رفيعة. • هو دائما مهمو بالاخرين. • يطرح في كل اهدافه قضايا ..ويتعايش مع الفكرة. • الموضوع دا برجع ليه. • عاوز ادخل في هدف مهند الطاهر ..واحمد الحاج بدأ يضرب لي. • هدف مهند الطاهر دا اختصروا ليكم سريع. • هو هدف من فصيل (الهوبة)..والهوبة في جبال الانقسنا ...حاجة تفرح. • حاجة تشيل الملاريا. • حاجة تجيب المطر. • (حاجة فيك)..اغنية مصطفى سيد احمد التى كتبها هاشم صديق. • دي يشرحوها ليكم كيف؟. • موش مرات بتدخل البيت ..وبتكون جيعان كدا. • تمشي طوالي على التلاجة. • تقوم تلقى ليك حاجة ترم ليك عضمك. • تجي طالع من المطبخ زي (المأمور). • ما سائل في زول. • زي الضابط. • هدف مهند الطاهر دا هدف (هوبوباني)...سادومبا لعب فيه دور كبير. • سادومبا خيط بيه الطرف اليمين كلو...ثم سلم الكورة لي مهند الطاهر. • مهند الطاهر استلم ..ما خلي ليه قطعة ما خيطها. • الما بخيطها ..بغسلها. • طقطق ليك باقي الجماعة ..ووضع الكورة بي يمينو. • يتخيل لي كاريكا سجل بالشمال. • ومهند الطاهر سجل باليمين. • شفتوا كيف؟. • نحن أي حاجة عندنا بي نظام. • تاني كدا اسمع لي واحد فيكم يقول انا عطشان. • ملحوظة : احمد الحاج مسكولاتو كترت. هوامش • نجم المباراة الاول ..عمر بخيت ..لعب مباراة بعقل. • استغرب. • واستغرب ..لاعب بهذا المستوى كيف يجلس على دكة الاحتياطي يا مازدا؟. • عليك الله تاني خت عمر بخيت اول ..وفكر في الباقين. • عودة سيدا ..كان لها الاثر الكبير ..في مزاج الجمهور ..ومزاج اللاعبين. • ولاعب بهذا الاثر ...حرام يكون بعيد. • هيثم مصطفى في بيتو ..ظبط ليك الكورة. • نتمنى استقرار الهلال ..لأن انتصارات الهلال وبطولاته في استقراره. • بدون استقرار ..يمكن ان نفوز. • ويمكن ان نتأهل. • لكن ما بنشيل كأس. • في كل مرة ..كنا نفقد الكأس ..بسبب المشاكل وعدم الاستقرار. • الفترة القادمة ما عاوزين مشاكل. • كان جميلا ..ان يتحدث معلق المباراة سوارالذهب عن هيثم مصطفى ..وعن اثر عودته. • سوار الذهب انصف البرنس ..في الوقت الذي تفرغ فيه الرشيد المهدية لانتقاد هيثم مصطفى. • الرشيد المهدية عاوز يحلل قروشه بانتقاد هيثم مصطفى. • يا الرشيد ..شوف ليك شغلة تانية ..لو دا تحليلك. • العالم كلو بتحدث عن اثر هيثم مصطفى ..وانت لسه في محطة هيثم مصطفى ما سلم عليّ. • عودة للمباراة. • بويا وفداسي وكايا ومساوي لعبوا مباراة كبيرة ...مع ذلك دفاع الهلال كان ضعيفا. • افتقد الهلال بشكل واضح ايكانغا. • بعد عودة الاستقرار للهلال ..ناس المريخ ممكن يتكلموا عن (الوصافة). • ما تفكروا في حاجة اكتر من كدا. • جمعة يستحق احتفاء خاص. • يستحق تكريم. • اجمل ما في مباراة الامس ..هي اللافتات التي ادانت الفيلم المسييء لرسول الله. • هذا هو الدور الذي نريده من الرياضة. • وهذا هو الدور الذي يجب ان يقوم به الهلال. • الهلال ما كورة بس. • غارزيتو امس لعب المباراة بالمعطيات الموجودة عنده فكسب المباراة من الشوط الاول. • عشان كدا ما اشتغل بالشوط التاني كتير. • حسمها في ال 45 دقيقة الاولى واتفرغ للحاجات التانية. • كدا ممكن نقول الهلال اصبح قريب من الكأس. • مباراة الهلال مع الموردة في الممتاز نريدها احتفالية خاصة. • الناس مبسوطة. • الناس فرحانة. • واكيد ..الناس دي ما غلطانة. • سادومبا اجتهد كثيرا ..ولكن لم يحالفه الحظ. • ما عاوزين أي تأجيل لمباراة القمة. • الهلال جاهز موية ونور. • اقول ليكم حاجة. • في الوضع الشفتو دا ..عاوزين هلال مريخ كل (خميس). • ريكاردو شكلو كدا ح يرجع. • خلاص يا ريكاردو عقدك ح ينتهي مع المريخ. • لقيت لي ناس الخرطوم ديل وصدقت. • عالم (روش). • عاجل : والله يا اكرم مع الحالة دي اخير ليك (الكنبة).
