#النظام_العام_كالعادة #الدورية_رقم_37604_قسم_المقرن أمس القريب دا حوالي الساعة 8 ونص مساء كنتا ماشي في شارع الجمهورية بالقرب من بابا كوستا في فردين بتاعين أمن وقفوني وبدأوا بالسؤال ماشي وين وكنتا في باباكوستا بتعمل شنو وتنظيمك شنو المهم قرروا يجروا بي زمن وبالنسبة لإنو أنا ماشي محصل موضوع مهم في المستشفى قررتا إختصرهم وأمشي ألحق فقرروا يتعابطوا معاي المهم أثناء كلامنا جا بوكس دورية تابع للنظام العام وقالو نحنا نسلم الزول دا البوكس .. الموضوع دا إستفزاني جداً خصوصاً وإنو مسك زمن ساااي وأنا عندي الأهم منهم طبعا ناس البوكس ما صدقو ورفعوني ليك في البوكس بدون ما يعرفوا أي حاجة وبدو الشتيمة وسب الدين وقلة الأدب وأنا معروف أخلاقي ضيقة لكن كونو أنا أشاكل 6 أشخاص في نفس الوقت دا موضوع متهور مني فحددتا هدفي بدقة اللي هو أكتر زول كان بشتمني وبدينا الدق المهم ال5 الباقين كانو برا البوكس فجوا كلهم البوكس وغلبت الكثرة الشجاعة وربطوني بطريقة مؤلمة جداً خلتني لمن أصل رئاسة النظام العام في المقرن ما قادر أحرك يديني نسبة لأنو الرباط حرم الدم إن يسري كالمعتاد وكانت حالتي سيئة جدا خصوصاً وأنا في البوكس من الساعة 8 ونص لحدي ما وصلنا النقطة الساعة 11 نص تلاتة ساعات من التفاهة وقلة الأدب والإزلال وانا غايتو ما قصرتا برضو بعد ما وصلتا ما كنتا عارف البلاغ ال ح يتفتح فيني شنو بالزبط المهم بعد نص ساعة من دخولنا الحراسات أنا أغمى على وما فتحتا إلا الساعة 4 صباحاً وأنا بمستشفى الرباط الجامعي لقيت حوليني 4 أفراد وفي فراشة في يدي والدكاترة ماشين وجايين في الفترة الأولى ما كنتا قادر اتكلم إلا بعد ساعة المهم إكتشفتا إنو عيني اليمين – زي ما شايفين – وارمة ومغلقة كلياً وإنو فكي الأسفل ما قادر أحركو وفي عدم توازن في المشي العساكر كانو بحاولوا إنو نتخارج من المستشفى سريع والدكاترة كانوا مصرين إنو يعملو لي أشعة مقطعية للرأس حتى أطلع .. المهم إستمر السجال وفي الآخر بقينا منتظرين موظفي الأشعة في المستشفى وعملنا الأشعة حوالي الساعة 9 صباحاً و إلى الآن ما طلع التقرير بتاعها .. أنا اصريت إنو ما أطلع من المستشفى إلا أعمل أورنيك 8 وتجاوب معاي المدير الطبي .. بعد عملتا الأورنيك إفتكرتا إنو خلاص ح أمشي البيت وكدا بس النبهني إنو في زول سأل العساكر الود دا مالو فقالو ليهو قبضناهو سكران وداخ في الحراسة قمتا سألتهم بالجد أنا بلاغي شنو قالو لي " 78 " سكر طوالي جريت الدكتور من يدو وقلتا ليهو أعمل لي Alcoholic test " إختبار الكحول " وطلعت النتيجة سلبية وأنا ما سكران ولا يحزنون ففي اللحظة ديك دخلت الوساطات والناس البتكلمو عن العفو عند المقدرة والمسامح كريم والأحناك التبش دي يلا أنا ما مسامح ولا كريم ولا فكة حديد ، أنا عندي حق أخدتو بإنو إتفشيت فيهم وحق تاني ح آخدو بكرة في المحكمة أنا ما زعلان على الحصل لي ولا عن نفسي بس زعلان للطريقة البتعامل بيها النظام العام مع المواطنين البجهلو حقهم يعني في شارع النيل وقفو ولد وبت ظريفين واشتبكوا معاهم فطلعوا اخوان العسكري قال ليهم أنا اعرف كيف عايز الرقم الوطني بتاعكم يعني تاني الواحد يطلع يشرب القهوة بي رقمو الوطني وجوازو واقامتو في دولة السودان الشقيقة والمزعلاني اكتر انو الاختيار عشوائي ساي يعني واحد يشير للماشين يقول ليك الاولاد ديل مساطيل وتوووش يهاجموهم والتاني يأشر ويقول للباقين عاينو البت ديك شر**** وتوووش يهاجموها والبخليك تطرشق من الزعل إنو ياخ إنو الناس بفتكروا العسكري الفاقد التربوي القدامهم دا كأنو وصي عليك وبنكسرو ليهو المهم أنا طلعتا العصر ومبسوط جدا وحايم بي عيني الطافية لمبة لأنو اتفشيت جداً في دق بعضهم قانونياً وقانون حلة حلة ودا بعرفوهو الشفاتة الحاجة العايز أقولها إنو الناس ما تخاف ولا تخلي حقها لأنو النظام العام أسوأ مؤسسة على مستوى الدولة المافيها مؤسسات أصلاً … الحقارة حاجة ما كويسة حاجة ما كويسة الحقارة ما كويسة الحقارة احفظوا الجملة دي .. حسام محمد زول أصلي و ما إنكسر ولا ح ينكسر ..
