محمد عبد المجيد أمين(عمر براق.. ) يفتح الستار علي خشبة خاوية. الشاشة المرتبطة بنظام الحكومة الاليكترونية تعرض شريطا متحركا للمعلومات : كي لا ننسي….. . تاريخ الأسرة 25: ذلك الملك الأسمر البشرة…..هو جدكم بعانخي … واسمه لدي الأجانب (Piye). ” يعتبر بعانخي أول من حكم مصر وهو في السودان ، فيما يعرف بسلسلة الفراعنة السود ، الذين حكموا مصر لمدة ثلاث أرباع القرن ، وهي الأسرة ال25 لمصر. . تاريخ الأسر” الإنقاذية” 1989-2012 : زعيط ، ومعيط وباقي العشرة المبشرين ب…. ” إنهارت دولة السودان تماما في عهد هذه الأسر، إذ أقتطتعت أجزاء كبيرة منه بمعرفة ورضي حكامه ، وهاجر أهل البلاد الي مشارق الأرض ومغاربها، هربا من جور وبطشهم ، وذهب شعب الجنوب إلي حال سبيله بعدما ذاق مرارة الإضطهاد. إندلعت حروب دامية في المناطق المهمشة من الوطن وإزداد المهمشون تهميشا . إزدادت معدلات الفقر والمرض ، وتم القضاء تماما علي كل مظاهر التنمية في البلاد . ……عم الفساد ، وإنتشرت الرذيلة وكل الموبقات. إيدز….. مخدرات…. خمور…. دعارة نهب وسرقة أموال الشعب من أعلي المستويات. ولا أحد إستطاع وقف الفساد …. ولا حتي الرئيس نفسه!!. كلما توضع الأدلة علي الطاولة….. يمحها قانون الحصانات . القضاء في غفوة لأنه محكوم بالمعايش: يتغمض … يالشارع. لا يفعل ذلك إلا حثالة من حثالة!!. لايفعل ذلك إلا عدو للأمة!!. حسبكم الله …حسبكم الله. قال قائل منهم : ..هذا ثمن إنقاذكم….. نحن أنقذناكم من الجوع والمرض والتخلف.! (يسمع صوت ضحكة مجلجلة من الخارج ، ترتفع تدريجيا حتي تصل إلي حد الهيستيريا ، ثم تبدأ في النحيب فالبكاء بصوت عال. بينما يتوقف الشريط عن العرض ، ثم يختفي . بعد قليل يظهر تحذير بخط كبير). Warning.... Your system is at risk. A malicious Virus is around. Please, shout down your PC at once. (تظهر حشرة كبيرة ، في شكل نحلة تحوم أمام الشاشة ،تلقي بظلها علي الخلفية فتظهرها أكبر من حجمها . النحلة تروح جيئة وذهابا وكأنها تقرأ ما يظهر علي الشاشة ، ثم يظهر منها وميض يشبه فلاش التصوير ، يركز علي ما هو مكتوب في شريط المعلومات ، ثم نسمع في نفس الوقت زر كاميرا تأخذ لقطات متعددة). النحلة : ( تخاطب جهة ما )… ألو يالقيادة … ألو يالقيادة …. معاك النحلة اللعبنجية. الصوت الآخر : نحلة شنو؟!. النحلة : ( باستغراب ) النحلة …. اللعبنجية …النحلة ” الغواصة”.إنت نسيت ياسعادتك واللا شنو؟. الصوت الخارجي : الشيخ …. بيتوضا …دقيقة …. بيجيك هسي دي. النحلة : ( تتوقف قليلا ثم تسأل باستغراب) …. إنت ذاتك منو؟والجابك بهناك شنو؟!. الصوت الآخر: أنا أخو الشيخ…. جيت إشيل لي جواب توصية للمطار. النحلة : ( يتنحنح باستغراب) ليه ؟…. شايل ليك ممنوعات؟!!. الصوت الآخر ( مرتبكا) أبدا …ابدا …( يهمس بخبث ) شايل لي دولارات وعملة صعبة قدر كده….. ومعاها دهب ومجوهرات برضو قدر كده ( بسذاجة ) وكمان …داير أمرق من صالة كبار الشخصيات ( بزهو ) VIP. يعني…..قشرة كده علي الماشي. ( يهمس ببلاهة)… أنا مسافر ماليزيا اخت الوديعة الكبيرة دي هناك . النحلة: ( باستهزاء ) يا حلاتك. ..(تواصل بلهجة صارمة) لما الشيخ يخلص … قول ليه: عاجل… من النحلة اللعبنجية. الصوت الآخر: سمح ( بعد قليل يسمع صوت طنين يحوم ، مقتربا رويدا نحو الشاشة حتي نري ذبابة وباعوضة تحلقان نحو الجهة الأخري فتعترضهما النحلة بالأمر) النحلة : ( بصوت عال) ثابت الذبابة : ( تجفل) ووب علي…. بالراحة علينا يالأخت. الباعوضة : ( للنحلة ) أجي !!..خلعتينا يا إنتي… شيفانا عساكر… واللا عساكر؟!. النحلة متجاهلة التعليقات) علي وين إن شاء الله؟ الذبابة : ( باستغراب ) عليكي الله … في ضبانه بسالوها ..ماشة وين؟. الباعوضة : ( منتقدة بحنق) … هو كمان الحشرات خشت في اللستة؟ الذبابة : ( للنحلة) باقي كمان تسالينا : معاكن بطايق؟ الباعوضة : ( للذبابة بمكر ) واللا أمكن دايرين رسوم عبور؟!. النحلة : ( تنظر الي الباعوضة باستغراب ) معقول …. انتي باعوضة وطنية؟ . الذبابة : ( تتدخل )آي … وطنية … وكمان بت بلد … كان ما عجبك!. النحلة : ( باستغراب) ومالك سجمانة ونحفانة كدي؟ الباعوضة : الناس دمها كمل…. ما خليتو لينا ” مصة” تشبع. الذبابة : ده إنتو نشفتو الناس نشيف!!. حتي الكوشة بقت فاضية!. النحلة : ( متجاهلة) وعلي وين إن شاالله؟. الباعوضة : ماشين ع القصر. النحلة : ( بانهاش)… القصر مرة واحدة؟!. الذبابة : ( متهكمة ) لا … مرتين!. الباعوضة : ( محتجة ) آي القصر …مالك؟… ما نشبه … واللا ما نشبه؟ الذبابة : واللا ماقدر المقام؟ النحلة : وماشيات تسون شنو إنشاالله؟ الباعوضة : زبايني كلهم إنتهو …. دمهم كمل . آخر زول جيت أعضو…. حنيت عليهو …. ليقيتو تعبان وهلكان ودمو مافي…. قلت ليهو ياحاج مالك؟ كان عيان امشي أتعالج …. جنب يبكي … قلت ليهو : بتبكي مالك؟ قال لي : كان علي … أنا هين …. الوليدات كلهم راقدين … وما عارف أعالج منو واللا منو…؟! والعلاج داير كم ؟… ومن وين ؟. قلت ليهو: والحل ياحاج ؟ قال لي : إنتي وأخواتك أدعو معاي ( تصمت قليلا)…ودعينا كلنا : شكيناكم ل الله…. شكيناكم ل الله. النحلة : ( وقد تأثرت من القصة ) آهه … وبعيدن …سويتو شنو بعد داك؟ الباعوضة : ابدا…. أخدت منو رشفة صغيرة… عينة يعني… وقلت ليهو: … ابشر ياحاج …. كان ما مشينا القصر وورينا الرئيس ذاتو. الذبابة : ( بحماس) وكان أبو يدخلونا ……طوالي علي كافوري الباعوضة : ( مكملة) وفي المرة…. نخشي المنشية النحلة : ( بتحد واضح) علي بالطلاق كان ما مشيت معاكن أنا ذاتي . الذبابة : ( للباعوضة ) اقول ياخويتي … والله أنا ملاوذة من قصة القصر ديا …. ( تصمت قليلا) يعني الريس ذاتو حيعمل شنو؟…. إذا كان غلبو يحارب الفساد … معقول حيحارب الفقر والجهل والمرض؟!!. النحلة : ( بغيظ وقد نست نفسها ) تقولي شنو .. فاتح ليهو ستين جبهة .!! .. وكل ما يفتح جبهة بزيد الفقر والجهل والمرض.( تنادي بصوت عال) أوقفوا كل الحروب….. أوقفوا كل الحروب. الباعوضة : ( متحيرة ) والحل شنو يعني ؟ الذبابة : ( للباعوضة بعد تفكير) إنت مش الناس قاعدة تدعي عليهم صباح ومسا ؟ الذبابة : آي ….ونحنا ذاتنا بندعي عليهم!. الباعوضة : خلاص … وكت ما الناس حيلا إنهد وما قادرة تسند طولا…. نلم نحنا كل الحشرات الطايرة والزاحفة ونطلع علي القصر في مسيرة احتجاج سلمية . الذبابة : وكان فكو فينا البمبان؟ الباعوضة : نفك سنتيناتنا ونعملها كمامات وننزل فيهم قريص وعض. النحلة : ( باعجاب ) نحلة وباعوضة وضبانة؟!!… الثورة .. الثورة يا حشرات. (الذبابة والباعوضة يرددن معا ) الثورة الثورة ياحشرات. ( النحلة والباعوضة والذبابة يغادرن الخشبة وهن يهتفن حتي يختفين). ( بعد قليل يظهر من يمين الخشبة حمار حقيقي يحمل علي ظهره حمولة من الكتب ، ثم يظهر من وراءه مباشرة الأحفاد ومن خلفهم الجد يدفع بكرسيه حتي يتوسطون جميعا الخشبة). الجد : ( يتحرك بكرسيه محلقا علي الحمار كي يوقفه ) تشر… تشر الفتاة : ( لجدها باندهاش)معقول يا جدو!!…. كل دي ألقاب حفيد2 : (وهو يقلب الكتب في مخلاة الحمار)…. بروف ، دكتور مستر ، خبير، عالم ، فريق ، لوا حفيد3: ديل كتار كترة حفيد1 : كغثاء السيل الجد : ( مستغربا ) وأنا بقول البلد ماشه لورا مالا ؟!.( يصمت قليلا) … والحمار ده … لقيتو وين ؟ حفيد3: لقيناه واقف قدام القصر حفيد1 : أي زول يخش … يقوم يملص لقبه ويختو في المخلاية. حفيد2: إحترام ياجدو… إحترام … ماهو الجماعة ديل لما يخشو في اجتماع مع الريس بخرخرو…وبرجفو.. زي التلامذة الصغار الفتاة : ولازم كل زولا ينزل نخرتو ويدنقر راسو في الواطه. حفيد1 : بعد ما ختو مصايبهم دي في المخلاية…. قام الحمار عطش ياجدو… وما في زولا سأل فيهو والا جاب خبرو. حفيد3: وهو الشغال طول عمرو …زي ” الحمار” في خدمة الوطن. ( الحمار ينهق بحرقة كأنه يبكي). الفتاة : ( وهي تربت علي رأس الحمار برفق) كور علي يالحمار … حتي أكلك لهفوه ومويتك شربوها ؟ حفيد3 : الحمار حرد ياجدو وزعل زعل شديد خلاص. حفيد1: قام شرد بحمولتو دي ياجدو….كيتن فيهم. ( الجد ينهض من كرسيه فجأة ، سليما معافي. يذهب نحاية الحمار ويتفقد حمولته) الجد : ( لأحفاده وهو يقرأ الألقاب ثم يلقي بها بعيدا واحدا تلو الآخر ) كده .. اقفلو لينا الستارة دي. ( الأحفاد ينقسمون الي مجموعتين ويغلقون الستار من الجهتين). ( نواصل). ملحوظة إخراجية : بالنسبة لادوار الحشرات ، يفضل الاستعانة بنظام العرائس المدلاة (Puppets)من سقف الخشبة ( أداء في الهواء) وإن كان يمكن تأدية نفس الادوار بممثلات محترفات وملابس تنكرية ( أداء أرضي)ولكن..علي مسئوليتهن . الدمازين في:2012/01/19 [email protected]
