حاتم الجميعابي …….. يقول : ساذج البديل منو !!…… ونرد عليه : هو منو الما بديل!!…… إذا كان في واحد من الشباب بحب ليهو بت وفجأة قامت خلتو وأدتو “شاكوش”، أي صاح بخش في حالة نفسية لكن بعد ما يفيق من الصدمة مباشرة بفكر في بديل وغالباً الحكاية ما بتكون سريعة وبعد كم يوم كده يكون آخر ألسطه مع محبوبته الجديدة ومستمتع وحياتو 100%، طيب الحكومة دي أدتنا شاكوك من زماااان… وخشينا في الحالة النفسية لينا 23 سنة .. مفروض بعد الناس ما تفكر في أنها تكب الجرسة وتضرب ليها وتحنسا، لانها خلاص فقلت صفحتنا وطوتا من بدري خلاص.. يعني ما في داعي للرسائل في موبايل الحكومة.. وهااااك يا حنيس( عليك الله حسي بي شوية).. (وانا ما بقدر أخليك) .. (ودي سحابة صيف وبتعدي)، (وقلبك رغم الطيبة الفيهو أنا بستغرب كيف يتحول) ” وهلمجرا، حتى التلفونات مفروض ما نضرب ليها، ياخي جنس كسير التلج ده أصلوا ما حبابو في الزمن ده والناس مفروض تكون عملية شوية؟؟ . في أكتر من خيانتا لينا بعد ما طلقت الجنوب، وهو أبغض الحلال، في أكتر من العدوانية حقتا لينا في حرمان حبيبها الشعب ده من أبسط مقومات الحياة، يعني في أكتر من أنو تقول لي حبيبها “ألحس كوعك” عبارات غريبة على جمهورية المحبيين، في أكتر من أشعالها لحرب في دارفور قتلت وشردت فيهو أبناء شعبنا في دارفور، ياخي دي بلا خجلة قالت لينا ” شذاذ افاق” غايتو مني ومن حبيبها الشعب ده أقعطوا معاها 6/0، وأقوم أطرداً من البيت لانها ما بتستاهل تعيش وسطنا، انا شائف الناس القاعدة تفكر في حنيس الحكومة تشوف ليها شغلة تانية، ده ما كويس عشان مستقبل الأولاد وكده، وفي زول يقول ليك الحكومة بتتصلح، حننضف من الوسخ ده قريب، بس أنتو اصبروا عليها شوية، أصلوا جايها بترول ودهب وقصص فارغة، هو يا ربي الطلع شفنا منو شنو، من سنة 89م ما شفنا لي حاجة عوجا اتصلحت يعني القصة ما تكون بالسذاجة دي !!. بعد الكلام ده بقا طلاق المحبوبة واجب وطني عشان الناس ترتاح من الهم ده، فمذبلة التاريخ خير مكان لهذه” الحبيبة” التي فرطت في شرفها وفي “محبوبها” وفي المال العام والزراعة والصناعة والأكل والشراب وأعراضنا وحتى سماحة الإسلام حولتها لشعارات سياسية، غايتو مني ومن محبوبها ده اديها ” كف ساموطي” واقول ليها خيرك في غيرك، بعدين الموضوع ما صعب للدرجة دي الناس كلها عارفه القصة وما محتاجة لي شرح، واي زول أنكوى بيها، الناس تكون عميقه وتفكر صاح، تفكر في الحياة بمعنى آخر، ما الخلقا خلق غيرا، يعني هي خلاص ملكة جمال العالم سمحة وشعرها وكرعينا طوال وقواما ممشوق وعندها وجنات وقائمة ليها شامة في جضماا، وعندها موبايل “سامسونج جلكسي”، وراكبه أحسن عربية وحسابا في الفيس بوك أقصد في ” ماليزيا وسوسيرا” فيهو مليارات الدولارات، ما كلو حنكتو مننا ودي كلها فضلت خيرنا، اشي ضرائب وأشي زكاة واشي نفايات، وقروش البترول قبل ما يقفلوا أهل المرا الأولى” الجنوبيين” الأنبوب، كمان جنها شحدة من ناس قطر والسعودية والكويت، غايتو عينا قوية خلاص، شائلا كورتا ولافه على العالم يا محسنين لله.. فضحتنا ذااتو ياخي، مع العالم الآخر. انا غايتو جني وجن الناس البكسروا ليها تلج، مرة يقولوا ليك أجندة وطنية ومرة يقولوا ليك حكومة وحدة وطنية، ومرة الأنتفاضة بتحول السودان إلى صومال وعراق وحاجات من هذا القبيل، ويشيلوا ويصعبوا في القصة مرة يشاركوها ومرة يطلعوا منها زعلانين، أخلاق تب مافي وهي الشفته ما شغال بيهم الشغلة. تراوغ في الناس ساكت وشغالة تكذب عليهم، وهمها كلو من القصة دي أنها تطول عمرها مع حبيبها .. كلام في الفاضي : في كثير من الاحيان نكون اسرى لكلمات لا ندري من يروجها وماهي مصلحته في ذلك؛ ولماذا يصر على ان تكون سؤالاً ملحاً لاي انسان؛ بالتالي قد ينجح في الوصول الى استراتيجيته التي اطلق من اجلها السؤال وبكل سهوله؛ بالتالي من كثرة ترديد السؤال يتضح ان الامر مستعصي علينا؛ او لا نجد الحل الجذري له؛ من هذه الاسئلة التي تطرح وفق هذا التفسير (البديل منو؟). صحي الإنفصال عن شبكتك صعب زي ما قال إعلان ” إتصالات” المصرية، وعارف أنو الأنفصال عن الحكومة يحتاج إلى تضحيات عظيمة، لكن هو ” قدر محبب” لسالكي هذا الطريق، وبعدين البديل ساهل أكتر مما تتصوروا، أي زول في الدنيا دي مفروض بفكر في البديل بصورة أكتر من عادية .. بمعني انو إذا جيت ليك مطعم ونفسك في شية( بعيد عنك) ولقيتاكملت،وقالوا ليك في دمعة مش طوالي حتقول لصاحب المطعم اديني دمعة “طيب دي ما بديل” ، أشمعنى الحكومة دي ما عندها بديل !!وإذا مشيت السوق وداير تشتري بنطلون جينز وما لقيتو ولقيت ليك بنطلون قماش سمح مش طوالي حتقوم تشتريهو عشان تستر نفسك، وبالطريقة دي فكرت في بديل الجينز بالقماش، أشمعنى الحكومة دي ما عندها بديل !! الما عندو بديل ما عندو جديد !!! ونحنا شعب متجدد في كل شئ، يلا ارح نجدد الشارع وعفش البيت ونرجع المكتبة والتلاجة والتلفزيون ودهب أمي وامك البعناهو في ظل الأزمة الإقتصادية، يلا ارح نرجع مشروع الجزيرة والسكة حديد والنقل النهري والميكانيكي والتلغراف، والمصانع والمؤسسات العامة التي طالتها الخصخصة وسودانير وكنانة والصمغ العربي والسوق العربي والشهداء وسعد قشرة، والذرة والقمح والقطن، محالج الحصاحيصا، والمدارس والجامعات والطيور المهاجرة. يلا أرح نرجع للمواطن السوداني طيبتو وسماحتو الحببت فيهو العالم، يلا أرح نرجع صينية الفطور والغداء، وشاي المغربية باللبن المقنن، يلا ارح نصنع الفرح في نفوس الأطفال ونهتف جميعاً بأن نحن جند الله جند الوطن ..
