[email protected] فلسفة الزيارة الدبلوماسية فلسفة متعمقة ذات دلالات ..ستظل زيارة البشير إلى القاهرة تتأرجح بين دعوة و استدعاء .. إليك أذهب أم إليّ تأتي؟ ما درجة البرتوكولية عند الاستقبال؟ هل تكون زيارة صورية للخروج بحكومة البشير من عزلتها الدولية؟ أم جوهرية تصب في مصلحة الشعبين؟ من سيتكلم و من سيصغي؟ من سيأمر و يطلب و من سيمتثل و يعطي؟ استدعاء أكثر منه دعوة تلك التي لباها البشير إلى القاهرة .. و تبقى العلاقة السودانية المصرية على مر التاريخ علاقة ترتكز على أساس استغلالي على حساب الجانب السوداني .. غرقت حلفا القديمة لتستضيء مصر .. بقر و أغنام و جمال يقابلها فشار و بطاطس مقلية .. لن يتطرق اللقاء إلى نبش قضية حلايب .. و لا قضايا السودانيين العالقين في السجون المصرية .. لن يتطرق اللقاء إلى الجوانب التعليمية .. سيكون إملاء من طرف واحد و تنفيذا حرفيا من الطرف الآخر .. أما لماذا؟ فالسبب هو ما همس به البشير في أذن مرسي. مرسي: أزيك يا ريس .. دي مصر اتنورت البشير: بارك الله فيك .. كل الشعب السوداني بهنيك بالرئاسة المصرية مرسي: هو لسع فيه شعب سوداني و شعب مصري .. يا عم ده نحن أخوات و أبناء النيل البشير: أنحنا واثقين من الكلام ده طبعا مرسي: معليش .. ما تآخزنيش يا عمر يعني ما تزعلش عشان ما قابلتكش في المطار .. ده لسع كان عندي ضيوف و حتة حاجات البشير: و إنت شفت حاجة يا ريس .. الزحمة بتاعة البرنامج الرئاسي ده عارفو كويس مرسي: أهلا بالأخوان .. مش تعرفني عليهم يا عمر؟ البشير: طبعا .. بكري حسن صالح وزير الرئاسة .. على أحمد كرتي وزير الخارجية .. محمد عطا مدير جهاز الأمن و المخابرات الوطني .. و ديل وزراء الزراعة و الكهرباء و السدود و الثورة الحيوانية و الصناعة و مقرر المجلس الأعلى للإستثمار مرسي: أهلا بيكم في مصر .. بس فين وزير الإسكان ما جاش و لا إيه؟ البشير: و الله يا ريس كان مفروض يجي لكن في ظرف منعو .. لكن الأمور حتترتب إن شاء الله. مرسي: طبعا يا بشير إنت عارف البلاوي الورثناها من النظام السابق و زيد عليها الكثافة السكانية العالية العندينا .. و كمان عملنا وعود كتيرة أيام الأنتخابات للشعب و حاجات تلخبط الراس يعني البشير: و الله عارفين و متابعين و انحنا معاكم إن شاء الله مرسي: خلينا نتناول المواضيع الأساسية و باعدين نخليها للوزراء يعملوا الإجراءات التنفيذية .. طبعا إنت عارف إنو المصري مزارع من أيام فرعون و حرام يعني خبرة طويلة زي كده تمشي لدولة تانية غير السودان .. عندنا عشرة مليون غير الأولانيين اللي بعتناهم و السودان أولى بخبرتهم طبعا. البشير: إنت تأمر يا ريس و أرض السودان تحت أمركم .. الأراضي جاهزة و منتظرة الخبرة المصرية. مرسي: و عايزن برضو ترفعوا لينا زيادة الصادر الحيواني بنسبة 600% .. واخد بالك ده احنا بعتنالكم خبراء زراعة بالملايين. البشير: بدون ما تقول يا ريس .. زي ما قلنا طلباتك أوامر مرسي:على أيام مبارك أنا سامع ململة في دول حوض النيل و بتتكلم عن إعادة توزيع حصص مياه النيل .. أصلا دي دول ما بتستفدش من المية .. لذلك إحنا حناخد برضو شوية نسبة من مياهكم في السودان عشان نزود بيها الكهربا بتاعة السد العالي و لا مش كده يا عمر البشير: تمام يا ريس .. تمام مرسي: عندك حاجة تقولها تاني يا عمر قبل ما نخلي الوزراء يعملوا الإجراءات التنفيذية؟ البشير: لا ده كله تمام يا ريس .. بالذات حكاية خبراء الزراعة المصريين .. إحنا الزراعة عندنا لازم تنتعش .. بس في حاجة عايز أقولها لبك على انفراد. يقوم البشير و يهمس في أذن مرسي لدقيقتين و في كل مرة يومئ مرسي بالإيجاب مرسي: دي مصر ترحب بيك في أي وقت يا ريس!! نشرة أخبار تلفزيون السودان بعد عودة البشير و الوفد المرافق إلى الخرطوم: ” بعد زيارة إلى مصر استغرقت يومين عاد إلى الخرطوم الرئيس المشير عمر البشير و الوفد المرافق لسيادته و قد كان في استقباله بمطار الخرطوم النائب الأول لرئيس الجمهورية الأستاذ على عثمان محمد طه و قد أجرى التلفزيون لقاء مقتضبا مع البشير صرح خلالها بالتالي: لقد قمنا بزيارة إلى الشقيقة مصر و التقينا فيها بالرئيس المصري الدكتور محمد مرسي و قدمنا إليه تهانينا و تهاني الشعب السوداني بانتخابه رئيسا لمصر و قد تباحثنا في كافة الأصعدة و القضايا التي تهم البلدين و قد عقد وزراء الدولتين جلسات مطولة قاموا خلالها بعمل الترتيبات التنفيذية لإنزال القرارات إلى حيز التنفيذ. و ستشهد الأيام القادمة حزمة من الإجراءات المصاحبة التي ستعود على البلدين بالخير في كل المجالات الإستراتيجية لما تميزت به الدولتان بالعمق التاريخي و الجوار و الدين”.
