…و… محمد عبد الماجد فوكو اوليفيه – ( يا غريب يلا لي بلدك) . …و . قبل ايام وقع في عيني خبر عن محترف المريخ الجديد الكاميروني (فوكو اوليفيه) الذي جاء للتوقيع في كشوفات المريخ فكان ان تم اختباره وتجريبه في بطولة سيكافا. . ديل ما فضل ليهم إلّا يمشوا يفحصوا ليه (الملاريا). . محترفكم دا عندو (كرت الحمى الصفراء). . و… . (اكمل يا جماعة). . شارك اللاعب امام فريق البوليس الزنزباري مع المريخ في اخر ربع ساعة من عمر المباراة. . لم نستطع وقتها من التعليق على هذا الامر ..نسبة لمباراة الهلال مع الزمالك المصري في مرحلة المجموعات في بطولة الاندية الافريقية. . ما كنا فاضيين للحاجات دي. . نعود الان للتعليق عن اللاعب الكاميروني الذي شارك (تجريبيا) مع المريخ في بطولة سيكافا من غير ان يستخرج له بطاقة للمشاركة او حتى ان يتم تسجيله في كشوفات المريخ. . بل اني اجزم ان المريخ لم يضم اللاعب حتى لكشفه المشارك به في بطولة سيكافا. . و… . (اصبروا اكمل ليكم). . مع ذلك شارك اللاعب مع المريخ …في بطولة يريدون منّا ان نحترمها وان نعتبرها بطولة. . وهي بطولة لا تمتلك لاقل مقومات البطولات. . هذه هي بطولة من جنس البطولات التى فاز بها المريخ ..حيث يشارك فيها لاعب دون تسجيله في كشوفات المريخ. . الغريب ان بطولة سيكافا رغم هذه الفوضي التى احدثها المريخ ..ورغم التجاوزات الواضحة فيها ..هي بطولة لها سكرتير ..جاء من بلاده لاجل هذا البطولة ..بل وصرح عنها وتحدث فيها ..وهي بطولة لا تحكمها لوائح ولا قوانين. . تلك البطولة خسارة (السكرتير) فيها. . سكرتير شنو؟. . وسكرتير على شنو؟. . وهي بطولة تدار على هذا النحو. . الان اذا وصل اي محترف من الخارج لكي ينضم لكشوفات المريخ يمكن ان تجري له (اختبارات) في بطولة سيكافا. . نتوقع ان يختبر المريخ في الايام القادمة محترف جديد…وان يكون ذلك في بطولة سيكافا. . المضحك ان المحترف الكاميروني اوليفيه الذي اختبر في مباراة المريخ والبوليس الزنزباري اتضح ان علاقته بالكورة مثل علاقته بكلية الطب جامعة الخرطوم. . ما في اي علاقة لا من بعيد ولا من قريب. . صاحبكم طلع قاعد في (الصقيعة) ..طلع ما عندو اي علاقة بالكورة. . الاسوأ من هذا ان المحترف كبير في السن …وهو اكبر من اوليفيه محترف المريخ الذي تتقدم سنه حتى على محترف الهلال البرازيلي سيرجيو. . المحترف الكاميروني هتفت ضده جماهير المريخ في مباراة المريخ الثانية في بطولة سيكافا ..اذا جاز لنا تسمية (سيكافا) ب (البطولة). . قالوا ليك جماهير المريخ كلها تغنت وقابلت المحترف الكاميروني باغنية حسن خليفة العطبراوي ( يا غريب يلا لي بلدك). . زولكم رغم السيرة (العطرة) التى كتبها عنه اعلام المريخ طلع ما عندو اي علاقة بالكورة. . لو ذهب المحترف الكاميروني وعمل اختبارات في احدى شركات النفط ..قد يحقق نجاحا اكبر من هذا النجاح الذي لن ولم يحققه في كورة القدم مع المريخ. . نحن نعرف ان المريخ لن يسجل هذا المحترف (الكارثة) فهو غير صالح حتى لأن يجيب الكورة من برة. . غير صالح للاستعمال الكروي. . لكن نقول ان المريخ اذا كان سوف يسجل محترفين في هذا المستوى ..فان المريخ سوف يكون قريبا في المواسم القادمة من مغادرة الممتاز. . المريخ في ظل الازمة المادية التى يعانيها مجلس المريخ الان واضح ان تسجيلاته لن تتجاوز في المستويات مستوى ذلك المحترف الذي غنت له جماهير المريخ (يا غريب يلا لي بلدك). . المحترف دا يا جماعة دخل عن طريق المطار ..ام انه جاء عبر (التهريب). . اشك في ان يكون لهذا المحترف جواز سفر ..وجنسية ..فهو يبدو عليه من وارد الحدود. . من الناس البدخلوا البلد من غير اوراق ثبوتية. . المريخ بعد مباراته الاولى امام البوليس الزنزباري ..لعب مباراة مع جامعة فكتوريا. . المباراة تتصوروا بعد فصاحة المريخاب ديل ..انتهت نتيجتها (تعادلية). . وناس بابكر سلك بتكلموا عن مباراة الهلال والزمالك..واصحابكم امام فريق نسمع بيه اول مرة في حياتنا اتعادلوا. . ناس فكتوريا ديل يا سلك ما بتعادلوا معاهم. . ناس فكتوريا ديل بيدوهم عشرة. . تتعادلوا معاهم ..كانوا من بقية اهلكم. . انا لو الهلال اتعادل مع فكتوريا في سيكافا ..شهر ما بكتب. . بخجل عديل كدا بعد التعادل مع فكتوريا. . المريخ اتعادل مع فكتوريا يا جدعان. . يمكن عشان العرق دساس ..ظهرتوا على حقيقتكم يا سلك ..تتكلموا في المجموعات ..وتتعادلوا في ارضكم مع فكتوريا في بطولة سيكافا. . نوع ديل ..نحن بنتعامل معاهم بالدستة. . زي البرتكان. . ما في زول بشيل ليه ربع دستة برتكان. . اقل حاجة نص دستة. . ونص الدستة دي كنا بنعملها مع (فكتوريا). . على العموم الطيور على اشكالها تقع. . الناس في المجموعات ..وجماعتكم بتعادلوا مع (فكتوريا) في بطولة سيكافا. . المريخاب ديل لو دي كورتهم مفروض ينوموا من (تسعة). . يقفولوا الابواب ..ويقفلوا الموبايلات ..ويطفوا الانوار ..وينوموا. . زمان نحن وقت كنا في دور ال (64)..وقت كنا صغار ..كان من تجي (النشرة الجوية) اهلنا الكبار بقولوا لينا ..يلا امشوا نومو خلاص. . كفاكم سهر. . هسع نحن بنقول نفس الحاجة للمريخاب. . امشوا نوموا. . لو تابعتوا (مجموعاتنا) دي ..بتجيكم (ضغط) ساكت. . دا شعر ما عندكم ليه رقبة. . ولا بتقدروا على الحاجات دي. . دخلوا التلفزيون. . واقفلوا الانوار. . ونوموا…السهر ما كويس مع الناس البطلعوا من دور ال (64). . يطلعوا من دور ال (64)..ويتعادلوا مع فكتوريا اليوغندي في سيكافا. . اسكتوا ساي. . و… . انتوا تعالوا هنا. . الكتمة دي ما جايبه مطرة؟. . مطرة شنو؟. . عاوز تطلع من الموضوع. . ارجع..واقيف. . انتهى.