و…. محمد عبد الماجد الزمالك خسارة تالتة ويقلب محل كشري . …و . زمان نحن كنا بنشطح في (الخيال)….جدول تلاتة عادي نتخيلوا ليكم جدول تسعة. . زمان الدنيا كانت حلوة ..جدول سبعة بنزل ليك بي (اجابتو). . ما زي هسع يقولوا ليك 7 × 7 بي كم ؟..ويسكتوا على كدا.
. استاذ اللغة العربية كان ما بعجبو خيالنا دا…الاستاذ كان بقعد لينا في كراسة الاملاء متل حالة الاستفهام. . ونحن نشيل ونمعط في الحروف. . الحروف وقت يمعطوها بتبقى زي شوارع الخرطوم في الخريف. . يقولوا ليك الولاية استعدت للخريف…اول ما تجي مطرة تكتشف انو استعدادات الخريف دا كانت في الجرايد والمؤتمرات الصحفية. . و… . (نرجع لموضوع الخيال). . استاذنا كان بغضبو خيالنا دي ..وبكرفس ليه طحلبو. . لذلك كان اول ما يدخل الفصل بقعد يقول لينا : (اوعكم تقعدوا تتخيلوا لي كدا وما تشتغلوا الواجب المدرسي). . نحن من الوقت داك عرفنا ليك (الخيال) بتنافى مع الواجب المدرسي. . هو لو ما ساي في داعي للواجب المدرسي دا. . والله انا شايفو تعب ساكت للطلاب ، وتعب برضو للمعلمين. . واجب شنو؟. . هسع في الحكومة دي القايم بي واجبو منو اتجاه الشعب عشان يقوموا الطلبة بالواجب المدرسي. . و… . (اكمل). . المهم في المدرسة زمان كنا بنقعد (نتخيل). . نجيب لينا (شمعة)..ونقعد نتخيلها ليكم (قمرة)…ثم نتفرع لكتابة الشعر عن (القمرة) البنتخيل فيها دي. . هي شمعة ما تشتريها بي قرش. . نجيب لينا كيلو باسطة ونتخيلو ليكم (صينية) كاملة. . الفصل كلو يقعد يضرب في الخيال دا. . تموها خيال. . بنشطح شديد في الخيال. . الاستاذ كان مزعجو (خيالنا) دا. . ونحن بي صراحة كدا بتاعين خيال مدرسي ..ما خيال (واسع) عشان ما تقعدوا تلخبطوا لينا في الخيالات. . اي خيال بي طريقتو. . جيب ليك عدس (واقعي). . واقعية (العدس)..يعني عدس مسيخ وبصلتو مطفحة. . جيب ليك (عدس)..واتخيل نفسك قلبت فيه طلب (كبدة). . العدس (واقعي)…وطلب الكبدة (خيال). . اخلط المدرسة الواقعية دي مع المدرسة الخيالية. . قوم ابقى فالح ..طلع (الواقع) من الصحن ..واضرب (الخيال). . والله الجنبك ما تديه. . الحياة عاوزة كدا. . الواقع بقى صعب. . صعب شديد. . هسع البحصل في الهلال دا واقع وإلا خيال. . نحن غلبنا نعرفو. . الجماعة ديل يكونوا ماشيين زي الطلقة ..ويقربوا للبطولة والتقدم في المحافل الافريقية. . يقوموا فجأة (يتشاكلوا). . يقوموا يتصارعوا (ادرايا). . يضيعوا لينا (البطولة). . عليكم الله هسع في داعي للبحصل في الهلال دا. . طعونات ..ومشاكل وانتخابات ..وحاجات تانية. . خلاص عاوزين يضيعوا لينا الهلال. . تاني ح نبدأ من دور ال (64). . ح نبدأ من نفس الحتة البطير منها المريخ ..ونحن على مقربة من التأهل لدور الاربعة. . بعد ما نقرب ..تحصل مثل هذه الصراعات. . هذا يثبت ان الخلل في الهلال في (الادارة). . نحن ما عندنا ادارة ..دائما مختلفين ..ودائما اداراتنا بدمر في الهلال. . ونحن قاعدين نتفرج. . الهلال في المواسم السابقة كان قاعد بس في المحاكم ..طعون واستئنافات …ومفوضية. . نحن ذاتو ما عارفين دا فريق وإلا امم متحدة. . عليكم الله من متين نحن في الحالة دي. . صلاح ادريس يطعن في اشرف ..والكاردينال يطعن في صلاح ادريس. . والبرير يمشي المحكمة ..والمحكمة تحجر على اموال الهلال. . لكن بي امانة كدا. . صلاح ادريس لو ما طعنوا فيه ..ممكن يقوم يطعن في نفسو. . نحن الافلام دي حافظنها. . و… . (اطلع لينا من هنا عليك الله). . الزمالك. . الزمالك مالو. . الزمالك دا كمان كل ما نقول خلاص بقى كويس ..نلقاه اتراجع وادهور. . وهذا يعني ان الزمالك رغم التسجيلات الاخيرة والاضافات التى احدثها في كشفه ..إلّا انه سوف يكون بعيد من فرص المنافسة للتأهل من مرحلة المجموعات. . يؤكد ذلك ان الزمالك لن يكون منافسا للهلال ..وخياراته ضعيفة في التأهل. . الزمالك خسر امام الاهلي المصري الذي كون فريقه حديثا ..ومعظم لاعبيه صغار السن وتنقصهم الخبرة – مع ذلك استطاعوا ان ينتصروا على الزمالك. . وجاء الزمالك وخسر امام سموحة في الدوري المصري. . هذه الخسائر سوف تجعل الزمالك يتصدع اكثر ..خاصة ان بنية الزمالك المصري (هشة)..ومجلس ادارته بقيادة مرتضي منصور مجلس منفعل ..وقراراته عند الهزائم دائما بعيدة عن العقلانية والصواب. . الزمالك سوف يدخل مبارياته الافريقية وهو في حالة غير مستقرة. . واظن ان الفرصة سوف تكون سانحة لفريق مازمبي للانتصار او التعادل على الاقل مع الزمالك في مصر. . مطلوب من الهلال اذا اراد ان يتأهل ان ينتصر على فيتا كلوب في الكنغو. . انتصار الهلال في الكنغو على فيتا كلوب مع خسارة الزمالك في مصر سوف تجعل التأهل من هذه المجموعة من نصيب الهلال ومازمبي. . الكورة في ملعب الهلال الان ..عليه فقط ان ينتصر في مباراته المقبلة امام فينا كلوب ..وعندها سوف يتحسن موقف الهلال. . لا نريد ان تصرف الانتخابات الهلال عن مبارياته القادمة – خاصة في ظل الطعون التى قدمت امس. . لا نريد ان تتمدد الصراعات والطعون على الهلال وتبلغ حتى ملعبه. . نقولها الان الزمالك (فلكيا) خرج من البطولة …واظن ان الخسارة القادمة للزمالك امام مازمبي سوف تحول النادي المصري العريق الى محل كشري. . لن ينفع الزمالك في اكثر من ان يبيع اطباق الكشري. . ثم خلوا الباقى علينا ..وقت تبقوا على الكشري. . و… . انتوا امس جاءت مطرة؟. . مطرة شنو يا زول؟..الكلام دا بيزعل ناس الولاية ..ما في اي مطرة. . دا زول كان برش بالخرطوش برة في الحوش. . و… . اطلع سريع واتخارج ..ما تلخبط ساكت. . و… . انتهى.
