بالعربى الكسيح محمد الطيب حليل زمن الخروف بيأكل (الملايا) يا بكري المدينة !! * قبل اليوم كان (الخروف) يأكل (القش) و(البرسيم) و(الملايا) و(توب الحرير) .. * أما الأن فأن الخروف لو أكل (القش) يكون ما قصر .. * خرفان هذا الزمان ليس لديها (شهية) للأكل .. * الخروف تلقاهو (مسكين وعوير وشايل هم) ..
* لا بيقطع (حبل) ولا بيأكل (كيس المخده) .. * خروف والله أ تقول بيحب .. * شايل هموم الدنيا كلها .. * خرفان تخجل .. * حليل خرفان زمان .. * لكن بكري المدينة لازم يجيب ليهو (خروف) شليق .. * يا بكري خروفك لابد ان تكون (كرهبتو زايدة) .. * قالوا خروف الزول بيكون زي (طبعو) .. * الزول المسكين بيجيب خروف مسكين والزول الصعب بيجيب خروف صعب .. * عشان كده انا بضمن ليكم خروف بكري المدينة ما بيكون زي خروف مهند الطاهر .. * تاريخيا عيد الأضحي هو بمثابة موسم لكل (الترزيه) في السودان .. * الترزي في عيد الأضحي كان بيدخل قروش أكتر من (الهايس) .. * ولان الحال من بعضه أصبح (صاج الطعمية) يدخل قروش أكتر من الترزي .. * بقصد واضح من الحكومة بقينا لا بنلبس مما نصنع ولا بنلبس مما يصنعه الاخرون .. * لبسنا كلو قديم في قديم .. * الواحد فينا بقي لما (لياقة القميص) تتآكل وتتشرط بنقطعها ونخليها (نص لياقة) .. * يعني نظام حركة وكده .. * زمان النسوان كانن بيبدلن (الهدوم) ب(العده) .. * (الهدوم) كانت أكتر من (الهموم) .. * بتاع العده يدهو (عراقي وسروال) يديهم (طقم كبابي شربات) .. * يدهو (بنطلون جنيز) يقوم يديهم (طقم عشاء فاخر) .. * حتي المنديل كان عندو قيمة .. * بتاع العده تديهو منديل يديك (دسته فناجين) . * في السودان عدد البنات الفنانات اكثر من عدد البنات الما فنانات .. * وعدد الفنانين الاولاد أكثر من عدد (الضفادع) .. * علي فكرة .. * السنة دي رغم كثرت الامطار إلا أن هنالك (شح) في عدد (الضفادع) وخاصة في الخرطوم .. * قياسا بالامطار (الراكده والراقده) لم تكن الضفادع بالحجم المتوقع .. * أخشي أن تكون (الضفادع) قد قنعت من خيرنا فينا وهاجرت لتلحق بخيرت شباب البلد الذي هاجر بحثا عن العمل والعيش الكريم .. * غايتو يا مأمون حميدة تصريحك بتاع (البروتينات) داك ما كان موفق خالص .. * البلد بقت خاليه من الضفادع .. * كان (حتي الطير بيجنا جيعان ومن الأطراف بيشبع) وهسه يا كافي البلا (حتي الضفادع شردت) .. * انا بتمني إنو مأمون حميدة يطلع تصريح عاجل يقول فيه : (البعوض غني بالبقوليات) .. * قول كده يا بروف عشان البعوض يلحق الضفادع التى هى قد لحق امات طه .. * في ناس العيد عندهم ياتي علي طريقة (جزء من النص مفقود) .. * ناس يصادفهم العيد وهم يتبادلون التهاني داخل (عنابر المستشفيات الوسخانه) .. * العيد في المستشفي لا طعم له ولا رائحة بخلاف رائحة الوسخ المختلطه برائحة الديتول .. * ناس كتب لهم المرض أن يسكنو في المستشفيات ويتواجدون في العيادات أكثر من منازلهم .. * والله العلي العظيم بعرف لي ناس راقدين في المستشفي منذ رمضان وحتي الان .. * أنتهت قروشهم وباعو ما يملكون من أثاثات ولم يبقي لهم إلا الصبر الجميل .. * أرجو من القارئ الكريم أن يدعو الله الشفاء لكل مريض كتب له ان يبقي طريح الفراش .. * موهبة إيمان لندن الحقيقة تكمن في (لبس النضارات) .. * النضارات المظلله هي موهبة إيمان لندن الوحيدة والدليل علي ذلك أن الشعب السوداني (يحفظ شكل) سبعطاشر نضارة لإيمان بينما لا يحفظ لها ولا أغنية .. * حفظنا نضاراتك بكل أشكالها وألوانها وباقي نحفظ أغنياتك ياأيمان .. ده أذا كان عندك أغنيات أصلا .. * أول مرة في حياتي أشوف لي زول كل موهبته في لبس (النضارات) .. * الموهبه عندك يا بتنا .. * بعد غدا الجمعة يقف حجاج بيت الله الحرام في جبل عرفات الطاهر .. * وعظمة هذا اليوم أن الذي يصومه يكفر له سيئات سنة ماضية وسنة قادمة .. * ونحن أثقلتنا الذنوب الكبير منها والصغير وهي فرصة لكي نتدارك ونعمل عملا صالحا في هذا اليوم .. * هنالك أيام الذنب فيها أكبر من بقية الايام ويوم عرفه من هذه الايام .. * والحسنة مضاعفه بعشر امثالها ومن بعد ذلك الله يضاعف لمن يشاء وقد تصل الحسنه الواحده الي سبعمائة والله أعلم .. * أن شاء الله ربنا يستجيب للدعاء في ذلك اليوم المبارك ويرفع البلاء ويشفي المرضي في كل مكان ويرحم الموتي ويتقبل حج الذين قصدوا بيته الحرام ونسأله ان يوعدنا بزيارة قبر حبيبنا الغالي محمد صلي الله عليه وسلم .. * دعوتي لكم بصيام يوم عرفة وما تنسونا من صالح الدعوات .. * سعر الخروف (الجلاكسي) أغلي من سعر التلفون (الجلاكسي) .. * وسعر الخروف (تلاتين عشرة) أغلي من سعر (الشيلة) .. * الأضحية يا حبايب بالاستطاعة فمن لم يستطيع عليه ان لا يحزن لان الله معه بأذن الله .. * و..و.. * وتعالو شوفو الكنت راجيهو …. (طلع مواطن ساكت) ..
