…و…. محمد عبد الماجد محترف المريخ بعملوا ليه اختبارات في (الاملاء) وشراب (اللبن) …و اتخيلوا معاي الموسم الجديد – شكل المريخ ح يكون كيف؟..(اصبروا ما تتقانعوا لي من اول سطر). انا ح امشي ليكم في الموضوع سطر – سطر لمن يقع ليكم. المريخابي تاني ح يدخل ليك مباريات المريخ (30) دقيقة ما بكون عارف المريخ شايت على وين؟. ما فاهم اي حاجة. الواحد فيهم بيسأل بي استحياء شديد المريخ ياتو فيهم؟. حتى لو كان المريخ بيلعب امام النسور – ح تحصل لخبطة شديدة. اللون براهو ما بحلكم. انتوا كان بتقدروا (لونكم) – كان المريخ كلو بقى من الهلال. هسع نعرفكم كيف؟. نفركم بي شنو؟. مريخ (الارشيف) العالمي. مريخ (من الامس). انا قبل كدا قلت ليكم المسألة دي (شرحتها ليكم) لكن عاوزين الاعادة. الكلام يقولوه ليكم الف مرة. نحن (الشفوت) القدامكم ديل – لو عاوزين نفرتك تاني (تمرين) للمريخ – نقوم نعمل اجتماع لقدماء لاعبي الهلال. لاعب ما بجي تمرين المريخ. كلهم ح يكونوا في اجتماع قدماء لاعبي الهلال. الكلام دا قلتوا ليكم قبل كدا – قعدتوا تغالطوا فيني – وقلتوا انا قاصد المريخ – وكلامك دا ما صاح. وبلة جابر ما عندو ذنب. اها كلامي وقع ليكم. استوعبتوه – نحن ما بنتكلم ساكت. خلوا الكلام دا ..واحد فيكم من غير تحديد (عشان ما تقولوا مقصودة). اي واحد فيكم يجيب ليه صورة قديمة للهلال – صورة قل (10) سنوات – قبل (15) سنة – ويعاين في الصورة سمح. ح تلقوا (7) من الفي الصورة دي – بلعبوا في المريخ الان. اكتر من كدا اعمل ليكم شنو؟. اوقع ليكم الكلام كيف؟. الموضوع دا انا ما بخليه – شفتوا عشان ابقى واضح معاكم – انا الموسم القادم كلو ح اشتغل في الحتة دي. تزعلوا. تضايقوا. تمشوا مجلس الصحافة والمطبوعات. تمشوا اعالي النيل – نحن الموضوع دا ما بنخليه. ح نشتغل (ارشفة) كتابية للهلال. وح نجيب على هذا الاساس ناس اكرم الهادي سليم والباشا وبكري المدينة وتراوري وهيثم مصطفي وعمر بخيت ذاتو. اصبروا لينا انتوا بس. وروقوا المنقة – واقعدوا لينا بعيد. و… (وشنو تاني؟). عندي ليكم (فكرة) – ما تطلعوها برة العمود دا. غير (الارشفة) دي – في اضاعة فرص كمان. يضيعوا في الفرص زي السوداني البكون مغترب (21) سنة…اول ما يرجع يعمل ليه (ركشة) ويقعد على كدا. غربة السنين كلها عملها في (ركشة). او زي الزول البكون صابر الشهر كلو. (30) يوم منتظر الماهية. اول ما يصرف يمشي يكب الماهية كلها في (بطيخة) ويرجع البيت على كدا. بقى الشهر يكملو (دين) وسلفيات. نوع دا نحن بننصحو يصور (البطيخة) في الموبايل عشان تبقى ليه (عزاء) ساعة الشدة. تعالوا شوفوا (البزار) دا. ادخلوا مباريات المريخ – وعاينو في المقصورة – لمن تلقوا الناس في المقصورة بشدوا في شعرهم – اعرفوا طوالي انو الفريق البضيّع في الفرص دي – هو المريخ. باعتبار ما قلنا – ان المريخ بقى ما بتعرف…(المريخ ياتو في ديل؟). تراوري يضيّع ليه فرصة – ويعاين في السماء – تقول (مداح). وعنكبة بعد (24) مباراة رسمية وودية مع المريخ – طلع ليه بي (كورنر) واحد. ونحن ما بنلوم (عنكبة) – عشان المريخ كلو لعب امام بايرن ميونخ (97) دقيقة (كورنر) ما طلع بيه. ورجعوا فرحانين بالحكاية دي. اتخيلوا المريخ في الموسم الجديد – (اعتبروا الفيفا عملت فيها طرشه وما سألت بكري المدينة). و… (اتخيلوا كدا). اعتبروا ناس الهلال ما صعّدوا الموضوع فوق. تعالوا شوفوا بكري المدينة وتراوري وعنبكة في تشكيلة واحدة. دي قطيعة جاهزة. فلايت. زغللة في العيون. زحلقة في الحلق. تمزق في الحواجب. ضمور في الرموش. ضرب في الركب. بكري وتراوري وعنكبة قدام. بلة وضفر وعلي جعفر ورا. محل ما تقبلو مشكلة. ناس المريخ ديل عاوزين ليهم نص زي (كورس) كمال ترباس في التمانينات. يشيل من ديل ويودي لي ديك. عاوزين ليكم (شيالين). شوفوا ليكم مجموعة جديدة ان شاءالله من السوق العربي. تراوري وبكري وعنكبة…كارثة..مشكلة. ديل هم البيضيعوا ذاتهم (20) فرصة في كل (40) قون مضمون زي الناس الماشيين ليهم عزومة وما عارفين البيت. يصلوا البيت – ويقوموا يرجعوا تاني. تاني يصلوا البيت…يلم فيهم (شافع) يطلعهم من الحلة – يوصف ليهم (صهريج) تاني. ديل ناس تراوري وبكري ذاتهم – يصل القون مية مرة – كورنر ما بجيبوه. لو ما ناس الفاضل ابوشنب والفاتح وديدي والمعز شطة – الموسم كلو (قون) ما تجيبوه. الضياعين العالميين. المشكلة بكري وتراوري ما بتفاهمو – يعني تاني لمن تضيع فرصة من المريخ الشكلة ح تدور في خط (18). يا محسن سيد خليك قريب. ما تبعد. العكاكيز – والسكاكين – ما تديك الدرب. ونحن ح نقعد نتفرج. والله لا فاضيين لينا لي حجز ولا حاجة. نحن بكري المدينة دا نحجز فيه (3) سنوات. فترنا. ويا ريت لو الحكاية بتقيف على كدا. يا ريت لو بققت على المشاكل بس. الكشافات – تشيل شيلتها. قالوا ليك الكشافة الجنوبية في استاد المريخ – وقت قالوا ليها المريخ سجل (بكري المدينة) 7 لمبات في الكشافة طفن. الكشافة ختت ايدها في رأسها – وقالت يا جماعة ما بالغتو معانا عديل كدا..بكري وعنكبة وتراوري في تشكيلة واحدة. الكشافات طوالي فكرن في الهجرة. نحن بي صراحة كدا – والكلام دا ما كنا بنقولو. بكري المدينة كنا في الهلال بنغطي عليه بي مدثر كاريكا. بكري المدنية في الهلال كان عامل لينا ازمة في (الكشافات). كلو يوم – نحن شايلين (الكشافة) وفي حوادث ام درمان. في المريخ بتغطوا عليه بي منو؟. بي عنكبة؟. بي تراوري؟. يا عالم. قولوا كلام غير دا؟. الشيء العرفناه – وما طلع في الجرايد. ناس المريخ قالوا ليك المحترف الاجنبي ما بعملوا ليه اختبارات فنية..ولا فحوصات طبية. ناس المريخ قالوا ليك المحترف بعملوا ليه اختبار (املاء) لو نجح – بسجلوه. لو ما نجح كمان بحولوه اهلي الخرطوم. اما الفحوصات الطبية فهي (كباية لبن). المحترف لو شرب اللبن وما جاتو (قبضة) يبقى ما عندي مشكلة. لو كمان قعد يتلولو – بكون عندو رباط صليبي. عليكم الله – من الله خلقكم – في علاقة بين الرباط الصليبي والحليب. ناس المريخ ديل بقطعوا ليهم حاجات من رأسهم – وعاوزننا نصدقها. انتوا تعالوا هنا. (نمر) الخرطوم دا غير (نمر) الخرطوم داك. عشان كدا السلطات العليا ادخلت في الموضوع. و… وانتهى
