محمد الطيب بالعربى الكسيح زهجنا من الكتابة في تسجيلات الهلال !! * اسوأ (سبعة) حاجات في الدنيا دى (خمسة) هى: الراجل البيحلق شنبو وعدم الشخصية والمسكول البيجيك من رقم غريب .. * والمسكول البيجي من رقم غريب بيشبه في تفاصيله شخصية صلاح إدريس .. * ما عارف لكن كل ما يجيني مسكول من رقم غريب بتذكر صلاح ادريس .. * لاتوجد علاقة بين صلاح والرقم الغريب ولكن بالنسبة لي هنالك وجه شبه .. * ربما يكون وجه الشبه هو ان صلاح ادريس اصبح لحد كبير (رقما غريبا) في هاتف الهلال .. * الذي يطالع كتابات صلاح إدريس من حين إلى آخر يدرك ان صلاح عبارة عن (مسكول من رقم غريب) .. * والذي ضرب الرقم القياسي في الغرابة هو الكاردينال .. * الكاردينال وضح إنه كان بحاجة لادارة نادي صغير قبل ان يصبح رئيسا لنادي الهلال .. * او كان على الاقل يكون عضو في مجلس الهلال خلال السنوات الماضية قبل ان يأتي رئيساً .. * عدم التدرج مشكلة كبيرة تظهر في إدارة الكاردينال للهلال الآن .. * آخر تقليعات مجلس الهلال تسجيل ايهاب زغبير .. * وايهاب زغبير ما عندو مكانة في الهلال اللهم إلا يكون صديق شخصي لبعض الاعلاميين التابعين للمجلس .. * جائز يكون ايهاب ده بيرد على مكالمات صحفيين المجلس عشان كده طالبوا بتسجيله في الهلال .. * كل شئ وارد في البلد دي .. * بياتو فهم رشحتو زغبير؟؟ * زغبير لا افضل من المعز ولا افضل من جمعة .. * زغبير إتشطب من المريخ تلاتة مرات وإتسجل اربعة مرات .. * يعنى (غرقان) في الوصافة .. * وعاش في مجتمع المريخ لدرجة تجعله لا يستطيع العيش بعيدا ان مجتمع المريخ .. * وبالنسبة لينا مجتمع المريخ معروف هو شنو!! * معروف جدا .. * ايهاب زول مستهتر وما بينفع الهلال .. * سنبارك للمجلس إذا إعتمد على يونس الطيب بدلا عن ايهاب زغبير .. * هذا تخبط .. * إذا كان الكاردينال يظن ان تسجيل ايهاب وفيصل موسى سيكون ضربة للمريخ يبقى غلطان .. * غلطان وستين غلطان .. * لو جبت لينا فيصل موسى وبلة جابر وايهاب زغبير وعلى جعفر وامير كمال ما بترد الصاع بتاع بكري المدينة .. * عشان ما تغش نفسك ساكت .. * بكري المدينة ممكن نغفر ليك ذهابه للمريخ في حالة واحدة بس .. * تسجل لينا رمضان عجب وابراهومة .. * غير كده كشف المريخ ما فيهو زول بيستاهل يلبس شعار الهلال .. * نحترم فيصل موسى وموهبته العالية ولكن تسجيله كان من اجل الرد للمريخ وهو رد اقبح من الذنب .. * الكاردينال رأسو ضرب .. * وبطريقتو دى ما ح يسجل .. * ح يتلفت كده لما التسجيلات تنتهى .. * المحترفين كلو يوم بيغيرو مواعيد الوصول .. * والخوف بعدين لما يصلو بالسلامة نلقاهم زي بانغورا المصاب .. * بمناسبة بانغورا .. * قبل تلاتة ايام كتبنا في هذه الزواية وقلنا بالحرف: (المريخ سيكمل اتفاقه مع لاعب محترف وهذا اللاعب عندما يصل الخرطوم ويجرى الكشف الطبي ح يقولوا مصاب وذلك تقليدا للهلال) .. * اقسم بالله الكلام ده كتبتو هنا قبل تلاتة او اربعة ايام .. * وبالفعل المريخ جاب محترف وعملوا ليهو الكشف وقالوا مصاب .. * وانا متأكد بنسبة مية في المية إنو المحترف ده لا مصاب ولا حاجة .. * نصييييح .. * لكن كمان المريخ لازم يقلد الهلال .. * لازم يتمو النقص بتاعهم .. * المحترف ده هسه الهلال لو عمل ليهو كشف طبي بيكون (نزلة) ما عندو .. * لكن المريخ قال مصاب عشان الناس تقول المريخ فيهو شفافية .. * الناس ديل اصلهم كده .. * بيقلدونا في اي حاجة .. * قلت ليكم حتى في خيباتنا وفشلنا بقلدونا .. * عشان كده عمرهم ما ح يتقدمو .. * والله انا لما شفت فرحة المريخ الخاصة باعفاء المريخ من التمهيدى الدنيا دي مسخت لي .. * الناس ديل فرحو فرح غريب كونهم لن يلعبوا التمهيدي .. * فعلا والله الهلال ده عظيم .. * ناس بتفرح لأنها ما ح تلعب التمهيدي!! * سبحان الله .. * نرجع ونقول .. * ايهاب زغبير ده الكاردينال ممكن يسجلو في اى حتة غير الهلال .. * ولو سجل في الهلال ما بينجح وما بيلعب .. * ولو نجح (شنبي ده يوم في الظلط) .. * ايهاب زغبير شنو وطعمية شنو .. * قوم لف .. * والله زهجنا من الكتابة في تسجيلات الهلال وفي الكاردينال .. * احسن تجنسو جمعة ويكون الاحتياطي يونس الطيب .. * بدل التخبط والعشوائية البتعملو فيها دى اخير تخلو جمعة .. * الكاردينال داير يمسك بينا زمن وإحنا والله ما فاضين ليك .. * المحترفين البتبشرنا بيهم ما شفنا منهم زول غير بوتاكو .. * ومحترف من هسه بيماطل في الحضور ما بينفع معانا .. * لو كمان انت ما عندك قروش قول ما عندي .. * عشان ما تضيع لينا زمنا في الفاضى .. * قلت ما داير عمر ومهند ومعز .. * وإحنا عارفين إنك طلعت البيان خوفا من جمال الوالى بعد ذهاب بكري .. * طيب وينا تسجيلاتك؟؟ * وينا لجنتك العاطلة؟؟ * جمهور الهلال لو سكت للكاردينال السنة الجاية المركز التالت ما بنلم فيهو .. * ده شاعر خيالو واسع وبطريقتو دي بيضيع الهلال .. * و..و.. * واعذريني (الدمعة) ديا …(بايته لكن كانت في التلاجة) ..
