…و… محمد عبد الماجد دبي ناس يمشوا ليها للتفاوض وناس يمشوا ليها للعلاج …و واحد لاقى ليه زول في المطار (شايل شنطو زي المفك) – قال ليه زي ما بقول اي زول في الحتة دي : (ماشى وين الليلة من الصباح دا؟). كأنو (الصباح) بقع في المطار فقط. انت تعال هنا – اول (المفك) بشيل ليه شنط. لو ما بخاف الكضب اقول ليكم الكلام دا حصل في (فيلم هندي). لا اقول ليكم فيلم هندي – لا اقول ليكم خطاب للبرلمان. الزول مرات بتلخبط في (البرد). خلاص التسجيلات انتهت وعاوز تقبل لينا على (البرد). عليك الله (االبرد) دا ما تهبشو لينا. دا اصلو ما فيه كلام. ما تقعد تنظر لينا ساكت (نحن فترنا من التنظير). البلد كلها تنظر. الحكومة تنظر. والمعارضة تنظر. وفي ناس لا حكومة ولا معارضة – والغريبة بعد دا كلو كمان بنظروا. ناس يقولوا ليك هيثم مصطفى مفروض يرجع الهلال – وناس يقولوا ليك والله احسن حتة ليه الاهلي شندي. المهم طلع من المريخ. الله شافو. المعز محجوب بعد سنة – بمشي يقعد في البيت. حد يغالط. وبعد ما يقعد (موسم) في البيت …ح يمشي يلعب في الاهلي شندي. خط سير اللاعبون الذين لم يجدد الهلال تعاقدهم كدا. ولا تغالطوا. نحن عارفين اي شيء. نحن ناقشين الموضوع كلو. سنة في المريخ. وسنة في البيت. والسنة التالتة في الاهلي شندي. يفصل بين المريخ والاهلي شندي (البيت). طبعا هيثم مصطفى اثبت ان القعاد في البيت احسن من اللعب في المريخ. انا ما عارف ناس (الباشا) مستحملين الكلام دا كيف؟. الجبابركم شنو؟. البصبركم شنو؟. امشوا بيوتكم اقعدوا فيها – احسن ليكم من (التلتلة) البعمل فيها جمال الوالي. التنظير مدور زي (الرغيف). كمان قولوا الرغيف ما (مدور). ناس يقولوا ليك فيصل العجب (اعاد) قيده مرة تانية في مريخ الفاشر..ومريخ ام درمان سجل المعز محجوب. انتوا (عجبكم) دا يا ناس المريخ ما شايفنو – عشان تسجلوا في (اولاد) الهلال. غايتو الزول البلعب معاكم اصلو ما بتحترموه. لا بتحترمو ولا بتقدرو. فيصل العجب زول قال ليه ح نعيد تسجيلك عشان تختم مسيرتك الرياضية في المريخ مافي. كأنهم ما بعرفوه. نكروه. بيان ساكت ما طلع في حق العجب – ولا بيان. المريخاب اعترضوا وقالوا كيف الهلال يطلع بيان ويقول فيه انه لا يرغب في تجديد التعاقد مع ثلاثة من كباتنه الكبار. ونحن بحسن نية صدقنا اعتراضهم (وقلنا المريخاب ديل طيبين شديد). نسينا ان فيصل العجب كان كابتن للمريخ ومجلس المريخ انهى ارتباطه مع الكابتن فيصل العجب بصورة ما حضارية. بصورة ما جميلة. اخير مجلس الهلال طلع بيان وقال فيه انه لا يرغب في التجديد لكباتنه عمر بخيت والمعز محجوب ومهند الطاهر. ناس المريخ عكسوا الحكاية واجبروا فيصل العجب على كتابة خطاب اعتزال. احسن الكاردينال. فيصل العجب إلتزم بالاعتزال وقعد في (كوبر) 6 شهور. مجلس المريخ لم يلتزم بوعده الذي قطعه مع فيصل العجب …(بقوا تلفوناته ما يردوها). فيصل رجع لممارسة هوايته ..واتسجل في المريخ الفاشر – واعاد قيده مرة اخرى في مريخ الفاشر وناس المريخ بتكلموا عن (كباتن) الهلال. يعني انتوا يا مريخاب عاوزين تحترموا كباتن الهلال اكتر من احترامكم لكابتنكم فيصل العجب. المهم ما عاوز اكتر ليكم (التنظير) – لكن البلد كلها بتنظر (انا اعمل ليكم شنو؟). اقل واحد لو قابلك بيديك (محاضرة) في اعارة جمعة جينارو من كوبر. اعارة جمعة من كوبر – حيرت المريخاب ، ما فهموا فيها اي حاجة. خلتهم بدون ما يشعروا يرجعوا (اكرا) من الاهلي الخرطوم بعد (18) ساعة من ابداء الرغبة للعب في الاهلي. اصلا ناس الاهلي الخرطوم (رغبتهم) هي (رغبة) جمال الوالي – اصلهم ما عندهم رغبة مع الاندية. الموضوع دا نحن ما بنخيله. ح نشغلوا ليكم زي (البصمة). بس انتظروا وما تقلبوا الصفحة وما تمشوا بعيد. في حاجات كتيرة راجينكم بيها. ارجع ليكم للزول الكان في بداية العمود – (تطيروا القصة من الرأس). قلت ليكم في زول سأل ليه زول تاني في المطار قال ليه انت من الصباح كدا ماشى وين؟. يقولوا ليكم الكلام الف مرة. صاحبكم قال ليه : (ماشى الاردن والله). ماشي الاردن لي شنو؟. ماشي الاردن (علاج) من يوم ما قمت سمعت ليك بي زول سافر الاردن (سياحة). من الله خلقكم شفتوا ليكم زول جاهو عقد عمل من الاردن. سمعتوا ليكم بي شهر عسل في الاردن. الاردن دي نحن من الابتدائية عارفين الناس بسافروا ليها للعلاج. قبل ما الناس يكتشفوا المرض – كانوا بسافروا الاردن للعلاج. هسع ناس المريخ عاوزين يعكسوا الآية. اي حاجة عاكسنها. اي حاجة قالبنها ناس المريخ ديل. الناس بسافروا الاردن للعلاج – ودبي بسافروا ليها للتجارة. ناس المريخ سافروا الاردن للهزيمة – (انضربوا سبعة وجوا راجعين) ، السبعة دي نحن هنا في السودان في الامطار والسيول والفيضانات ما قاعدين نسمع بيها. السبعة سمعنا بيها في المريخ في (برد). برد يقطع النخرة. الحاجة القلبوها المريخاب – سفرهم (دبي) للعلاج. اتغلبوا في الاردن بتاعة (العلاج) وسافروا (دبي) بتاعة (التجارة) للعلاج. انتوا الكان بدرسكم (جغرافيا) منو؟. انتوا ما كنتوا شايلين جغرافيا. ولا معلومات عامة. ليه انتوا بتعملوا كدا. دا فهم شنو يا عالم؟. قالوا ليك (اكرا) بعد ابداء الرغبة للعب في الاهلي الخرطوم اتسجل في المريخ وسافر دبي للعلاج. هو وقت مصاب سجلتوه ليه؟. الزول دا (ابداء رغبة) كتيرة عليه. قالوا ليك في ابداء الرغبة نفسو قام. الركب ما فيها ولا رباط صليبي واحد. يا مزمل ابوالقاسم …انت قلت بوتاكو مصاب. اها انتوا (اكرا) مصاب ..وبالثابتة والبتقرير الطبي كمان – مع ذلك سجلتوه. وسفرتوه الامارات كمان عشان العلاج. و… (شنو تاني؟). في حاجة اكتر من كدا. ناس المريخ ديل لو بشوفوا الحاجات البعملوا فيها دي – كلهم كانوا بشجعوا (الخرطوم الوطني). في الهلال نحن طبعا ما بنقبلهم. ما عندنا ليهم طريقة. مجموعهم ما بدخلهم الهلال. و… انتوا تعالوا هنا اتعشيتوا؟. عشا شنو يا زول؟. كمان العشا عندو علاقة مع الحكومة – مالكم انتوا؟. يا زول اطلع. و… انتهى..
