سودارس :

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

كورة سودانية نشر في كورة سودانية يوم 14 - 08 - 2014

محمد عبد الماجد
..و….
مع غارزيتو – بكري المدينة براهو ح يطلب من (الفيفا) توقفو
ناس المريخ ديل براهم بحبو (المشاكل).
بفتشو للمشاكل فتيش.
بولعوها – ويقعدوا يعاينو.
جابوا ليهم (قنبلة) ودفنوها في استاد المريخ.
ممكن تنفجر في اي لحظة.
في زول عاقل يا جماعة بتعاقد مع (غارزيتو) بعد السن دي.
قالوا ليك غارزيتو (ولدو) بقى يدخل معاه في مشاكل.
الزول وقت يتقدم في السن (كلامو) بكتر – ومشاكلو بتزيد.
انتوا ناقصين.
جايبين ليكم مدرب اي لاعب عمرو فوق ال (30) سنة عنده فوقو رأي.
المريخ معظم لاعبيه في كشفه الحالي اتجاوزوا الثلاثين.
معظم لاعبي المريخ تجاوزوا ال (35) سنة.
مما يعني ذلك ان غارزيتو سوف يدخل في صراعات وخلافات كبيرة مع كل لاعبي المريخ.
المعروف ان غارزيتو كان عندو رأي في (بكري المدينة) وهو غير مقتنع بمستواه.
تمت الناقصة.
دي مشكلة جاهزة.
وغارزيتو كان قد دخل في خلافات ومشاكل كثيرة مع بكري المدينة عندما كان
غارزيتو يدرب الهلال.
بكري المدينة الذي انتقل من الهلال الى المريخ من دون شك انتقل وهو
محمل بالهواجس.
وهو سوف يعاني من (غربة) عريضة في المريخ.
وسوف تكتمل (غربة) بكري المدينة عندما يحضر غارزيتو للاشراف على فريق المريخ.
تستاهل يا بكري المدينة.
بعد كدا الكورة اقنع منها.
غارزيتو زول صعب ..واتقدمت به السن – وبكري المدينة لاعب بعيد عن الاحتراف.
الى الان بكري المدينة شايل سكينو.
كلام زي دا مع غارزيتو ما بنفع.
وهذا يعني وقوع اشكاليات كبيرة بين بكري المدينة وغارزيتو.
بكري المدينة سوف يندم على اللحظة التى جاء فيها للمريخ.
بل ان بكري المدينة سوف يسأل الله من ان توقفه (الفيفا).
بكري المدينة ح يكون اسرع من مجلس الهلال للذهاب بالفيفا.
افتكر ان بكري المدينة بعد كدا ما عاوز عقاب.
مفروض ناس الهلال يخلوه ويصرفوا نظر عن الذهاب للفيفا.
ليس هناك عقاب لبكري المدينة اكبر من ان يلعب في المريخ تحت قيادة غارزيتو.
الهلال لو اوقف بكري المدينة عن طريق (الفيفا) سوف يكون قدم خدمة كبيرة
لبكري المدينة.
بل سوف يكون قدم خدمة كبيرة كذلك للمريخ.
اقصى عقوبة يمكن ان يتعرض لها بكري المدينة – هو ان يلعب تحت قيادة
المدرب غارزيتو.
بعد كدا يا ناس الهلال ارفعوا ايدكم من الموضوع.
الخبط ح يدور في دوار المريخ.
الضرب ح يظهر.
غارزيتو ايضا عندو رأي سلبي في اللاعب علاءالدين يوسف.
وعلاءالدين يوسف ايضا لاعب (انفعالي) وهو قد دخل في صدامات كبيرة مع
غارزيتو عندما كان فييرا وغارزيتو في الهلال.
وكأن المريخ بشترى المشاكل الان جاهزة – وكاملة وهو يأتي بغارزيتو في
وجود بكري المدينة وعلاءالدين يوسف.
الى جانب بكري المدينة وعلاءالدين يوسف سوف تصطدم مجموعة كبيرة في
المريخ مع المدرب غارزيتو.
ويمكننا ان نراهن منذ الان على خلافات ومشاكل كبيرة سوف تظهر في الساحة
المريخية في الموسم الجديد.
غارزيتو في الهلال لم يحقق نجاح يذكر رغم من ان غارزيتو اسم كبير
والهلال اكثر انضابطا والتزاما من المريخ.
لكن مع ذلك الهلال فقد الكثير في عهد غارزيتو ولولا المدرب الوطني صلاح
محمد آدم لخرج الهلال من ذلك الموسم بدون حمص.
نراهن ان المريخ سوف يخرج في الموسم الجديد خال الوفاض – ان لم يستدرك
الموقف قبل فوات الاوان.
حقيقة نحن سعداء جدا بتعاقد المريخ مع المدرب غارزيتو ونتمنى ان تكتمل
خطوات التعاقد مع غارزيتو.
نحن في شوق حقيقي لمشاهدة غارزيتو في المريخ.
اشراف غارزيتو على المريخ يجعلنا نتوقع العديد من الاحداث والامور التى
سوف تحدث في المريخ في مقبل الايام القادمة.
اول حاجة – ابن غارزيتو سوف يكون اساسي في الجهاز الفني للمريخ وهذا
امر سوف يقلص مساحة محسن سيد وبرهان تية.
ودي مشكلة تانية.
المعروف ان ابن غارزيتو هو الذي كان يسيطر على الامور حتى في وجود
والده عندما كان غارزيتو المدير الفني للهلال.
كذلك يمكن ان نشاهد (ايكانغا) مرة اخرى في السودان ليكون ضمن لاعبي
المريخ بعد التسجيلات القادمة.
ايضا سوف تظهر في المريخ كتلة المحترفين وسوف يكون لهم وجود
وقوة…وممكن يتمردوا بعد ان يسيطروا سيطرة كاملة على المريخ.
تراوري سيجد عناية خاصة في الفترة القادمة – لأن غارزيتو مقتنع بمستواه
الفني وهو الذي رشحه للدخول في كشوفات الهلال.
لن يكون هناك وجود او اثر للاعبين الوطنيين في المريخ بعد العدد الكبير
من المحترفين في كشوفات المريخ.
غارزيتو بميل نحو اللاعبين الاجانب – وقد يكون عندو رأي في اللاعب
الوطني باعتباره اكثر فوضى.
والما بشتري يتفرج.
النار ولعت.
و…
وانتهى.

انقر هنا لقراءة الخبر من مصدره.