محمد عبد الماجد دق الدلجة انتوا بكري المدينة ملياراتو دي شالها منكم (بصل) ؟ زمان كان وقت يقولوا لينا في حفلة في مربع واحد ..وحفلة في مربع سبعة.. وحفلة في مربع تسعة كنا بنشوف صلاح بن البادية شغال وين؟. ونمشي عليه. هسع وقت يقولوا لينا في حفلة في المنشية ..وفي حفلة في ابوروف..وفي حفلة في المزاد. اول حاجة بنشوف (طه سليمان) شغال وين؟. عشان نمشي على الحفلة الما شغال فيها طه سليمان. الراجل ..قالوا ليك في البيت هارش زوجتو..كلمتو في البيت زي السيف. ما بردد كلمتو. كلمتو واحدة – زول صعب ..وجنب وما بتفاهم كمان. الراجل دا كل يوم لمن يقوم الصباح ويكون طالع للشغل ..بعد ما يطلع خلاص من البيت ..ويصل للشارع التاني ..برجع تاني للمرا ..وبقول ليه يا ولية اوعك ارجع بعدين والقاك عاملة لينا (بامية مفروكة) في الغدا. بقول للمدام كدا ويردع الباب وراه. صاحبكم برجع المساء…وبرضو بردع الباب قدامو وقت يدخل البيت..ويقول لزوجتو ..اها عملتي لينا شنو في الغدا؟. المدام تقول ليه (بامية مفروكة). الراجل يقول ليها تسلم ايدك. بكرة الراجل بقوم من الصباح عشان يمشي الشغل. يطلع من البيت ويصل للشارع الرابع. يتذكر. يجي راجع البيت ..ويقول للمدام يا وليه الليلة اوعك تعملي لينا (عدس) في الغدا ..عندي حيرقان. عمكم يا رجع المساء ..ويقول للمدام ..اها عملتي لينا شنو في الغدا؟. المدام تقول ليه عملت ليكم (عدس). زولكم يقول ليها تسلم ايدك انتي ..جيبي العدس يا روحي ما في (حيرقان) كتل ليه زول. بكرة يطلع ويقول ليها اوعك من (الويكاب). كلو ولا الويكاب. اعملي اي حاجة. بس ابعدي لي من الويكاب. الراجل يرجع المساء ..ويقول للمدام اها عملتي لينا شنو في الغدا؟. المدام تقول ليه ويكاب. الراجل يقول ليها : عليك الله في اطعم من الويكاب. النسوان اصلا بحبن يمشن عكس رغبة الزوج في موضوع الغداء. زولكم ..انتبه بعد (21) سنة..ان زوجتو الملاح البقول ليها ما تعملي في الغدا ..بتعملو. عشان كدا قال احسن يتحرفن عليها. يوم كان نفسو ..في (فراخ)..قال ليها يا (مرا) اوعك من (الفراخ)…الفراخ المشوية ومدخدخة كدا حُرق – حُرق ..وملحها طالع شوية. اوعك من الفراخ بترفع لي الضغط. زولكم حذرها ليك من الفراخ وطلع على كدا. المساء عمكم جاء عشمان في (الفراخ)..دخل ليك البيت ..واول ما شم ليك ريحة الفراخ مشعشة في البيت ، روحو رقدت ..قال ليها جيبي الغدا. الولية جابت ليه (قرع). قال ليها دا شنو يا ولية؟ ..موش انا قلت ليك ما تعملي (فراخ)…القرع الدخلو هنا شنو؟. قالت ليه بلحيل. قال ليها طيب ريحة الفراخ دي شنو؟. قالت ليه دي عملتها لي اولادك ..انت قلت ما بتنفع معاك عشان (الضغط)..قمت عملت ليك (القرع) دا. الراجل قال ليها شوفي يا ولية انا صبرت عليك (21) سنة ..لكن كمان الموضوع يصل مرحلة (القرع) والله ساعة ما بصبر عليك تاني..طوالي تمشي بيت ابوك. دقيقة ما بقعد معاك. شفتوا الفهم دا كيف؟. في حاجات في هذا الشبه. في شبه كدا. زي الزول وقت يكون تعبان شديد. عندو اعراض الملاريا كلها. تمشي تفحص ..الدكتور يقول ليك بعد ما يعاين في نتيجة الفحص طلع ما في ملاريا. انت بتخاف ..وتقول للدكتور طيب طلعت شنو يا دكتور؟. الدكتور يقول ليك والله انا (شاكي) في… ثبتو طوالي..الدكتور من يقول ليك انا (شاكي) عاوز يجيب اجلكم. عاوز يجيب ليك مرض كعب. كمان نحن ما بنعرف شغل الدكاترة. الواحد فيهم بقرأ في الطب 6 سنوات. وبعمل سنوات امتياز. وسنوات شدة. وبتخصص بعد (12) سنة. عشان يقول ليك انا (شاكي). طيب يا دكتور يا كبير وقت انت بي شهاداتك دي كلها ..وبي صلعتك الكبيرة دي (شاكي) بتاع (المحايات) يقول شنو؟. البعالج بي (الاعشاب) يقول شنو؟. انتوا عارفين…اصلو (الشك) ما خايل مع (الصلعة). الشك يبقى اشتر – اشتر. في واحد متعود كل يوم يقوم الصباح. بقوم من بدري. بمشي على جزار اخدر وسمين ..عندو (21) سكين ..غير السواطير. زولكم دا كل يوم بمشي للجزار ويقول ليه في لحمة؟. الجزار بقول ليه ايوا في. صاحبكم بقول ليه : ضان ولّا عجالي. الجزار بقول ليه : عجالي. زولكم طوالي برجع ..وبقول ليه : الله انا كنت عاوز ضان. بكرة يجي في نفس المواعيد..ويسأل. في لحمة؟. الجزار يقول ليه ايوا في لحمة. صاحبكم يقول ليه : ضان ولّا عجالي؟. الجزار يقول ليه : ضان. زولكم طوالي يرجع ويقول ليه : الله انا كنت عاوز عجالي. زولكم شغال مع الجزار دا السنة كلها بالطريقة دي. يقول ليه في عجالي يقول ليه عاوز ضان. يقول ليه في ضان يقول ليه عاوز عجالي. يوم الجزار ابو (21) سكين دي ..غير السواطير ..سألو صاحبكم من اللحمة. قال ليه في لحمة؟. الجزار قال ليه : بلحيل ..اللحمة موجودة. زولكم كلام الجزار الليلة ما عجبو ..عرف ليك الجزار دا بفكر الليل بي مكر. قال ليه: عجالي ولّا ضان؟. الجزار قال ليه الضان فيّ والعجالي فيّ. زولكم قبل راجع وقال للجزار : لكن قروش مافي ..واتخارج ليك على كدا. انا ما عارف الجزار دا سكاكينو ال (21) ديل خاليهم لي شنو؟. جزار ما عندو رأس. هو زول وقت ما يستعمل (السكاكين) في الظرف الزي دا عاوز يستعملها متين؟. هسع المحيرني في المريخاب ديل ..الصبر الوقع عليهم دا. ديل بقى عندهم جنس صبر. بصبروا صبر. بكري المدينة قالوا ليك في الفاشر يشيل ويطلع في الكور من القون. تقول سمسار. يطلعها من القون. قلت ليهم هو في الخرطوم بعمل كدا ..منتظرين منو حاجة في الفاشر. ناس الفاشر ..قالوا انتوا بكري المدينة دا الى الان بلعب في الهلال. قالوا ليهم : ليه بتقولوا كدا؟. ناس الفاشر قالوا ليهم ..الزول دا يشيل ويطفش في الكور. الزول دا بي حالتو دي ناس الهلال ما ح يوقفو. امس المذيع ..كل ما يقول ليك بكري والقون ..بكري والقون ..بمسك (الكشافات). عنكبة جاب قون. بكري لا. وانغا جاب قون. بكري لا. تقول بكري المدينة دا نازل في الانتخابات. ما عندو اي حاجة. لمن بقيت اشك. بكري المدينة دا الظاهر ناس المريخ قروشو ادوها ليه (بصل). يكونوا صرفوا ليه المليارات (بصل). بكري المدينة لو استلم حافز تسجيلو (كاش) ما بكون بالشتارة دي. اصلو ما بعمل كدا. شغل البصل ظاهر. الكشافات دي ما كشافات قروش. دي كشافات بصل. …… و الحسنة الجميلة في تسجيلات الهلال الاخيرة ..انتقال بكري المدينة للمريخ. مكسب التسجيلات الاول للهلال مكسيم ..وانتقال بكري المدينة للمريخ. ريحتونا من جنس كشافات. الله شاف كشافاتنا. و… السيدة (ل)..الليلة اجازة رسمية من حروف النفي. و.. وقرّض على كدا.
