في السلك بابكر سلك سعر الصرف *طبعافي حاجه اسمها سعر الصرف *وهو السعر الموازي لعملة دولة معينه عالميا *زمان القصه دي كان اسمها العمله الصعبه *كانت صعبه شديد *حتي بالنسبه لينا في السودان كانت صعبه *لكن متوفره *جنيهنا (قرش بلغة اليوم ) كان بجيب تلاته دولار ونص *الصعبه كانت عملتنا نحنا *ما الدولار والاسترليني *المهم *مافي داعي للبكاء علي اللبن المسكوب *فلقد بكينا علي الاطلال حتي ظنينا ان شعارنا هو *قفا نبكي من ذكري حبيب ومنزل *نبكي ساي *بي جوعارو في بعض الاحيان *من ذكري حبيب ومنزل *الناس كلها طفشت *جزء بره البلد *وجزء باع بيتو ومشي غرب الحارات عشان يعيش بالفرق *المهم *سعر الصرف بالنسبه للدول المرطبه ممتاز *وبالنسبه للدول التعبانه الواقعه في الواطه دي مشكله *عملتها ما بتساوي هلله *وشعوبها تشحد الله *وحكوماتها في الخطب الحماسيه *ما علينا *سعر الصرف ده جبت سيرتو للمقارنه بين نقطه في مجموعة الاقوياء *ونقطه في مجموعة السموحاب *فالنقطه في مجموعه فيها وفاق البطل البجروا منو الناس *والاتحاد الخطر *والعلمه المنو هداف الدوري الجزائري واحسن صانع لعب وافضل مدافع في الدوري الجزائري *النقطه في موجوعه زي دي *بسعر الصرف العالمي تعادل عشرين نقطه من عملة مجموعة سموحه والتطواني بشقيه *المغربي والسوداني *شن جاب لي جاب *المهم *تصويبه واحد بالرأس نفذها التطواني جات قون *يعني مشكلة الحراسه قائمه *وهدف البرازيلي حقيقي بضحك *شخصيا ضحكت فيهو كتير *زول يجيب قون *يغلبو يجري يحتفل بي قونو ؟؟؟ *الزول معسم *رطوبه ؟؟؟؟ *مارطوبه *قاوت ؟؟؟ *ماقاوت *فكك ؟؟؟ *مافكك *كل الحاصل دخل المابتداوي *الكبر يا عمك *والاهداف الزي دي بجيبها اللاعبين الكبار سنا *يعني لو ختيت الكورة في الحته دي لي بشري وهبه او بشاره *مية مره بدخلوها قون *بس مابقدروا يجروا محتفلين بالهدف *البرازيلي ابو اسرة كريمه بلعب بيكم ياروشا *افرض ما جات فاول بره الخط *يقعد ساي زي الفنيله الكت ؟؟؟؟؟ *لكن بصراحه قون التطواني التايواني زي ماقال كتاب الكوره *الباص من لاعب الوسط للطرف اليمين *الطرف لقي الارض خلا *بقي زي الطالع من الحصاحيصا وفات اربجي *عينو لي فداسي هناااااااااااااك *خلا *وتقدم *عكسيه زي ماقال كتاب الكورة صفحة سبعطاشر *والمهاجم مشي عليها *اخد خطوه خلي ليك اتير راجي الصف *ومن اعلي نقطه *زي مابقول كتاب الكورة *وشبال *مكسيم لي اسي راجي اتير يقوم *المهم *التطواني كفريق زنطور *برغم النقص الكبير في تشكيلتو الاساسيه *الا انو كان الافضل *امتلك اي شئ *الا الشجاعه التهديفيه *ماشاتوا *كان شاتوا *كان الكوكي اسي مع اولادو وبناتو *ربنا قاسم ليك مرتب شهر تاني يا كوكي *ايها الناس *الكبير *الما مع الزناطير *الوقف الجزائر علي فرد رجل *شرف البلد *ولاننا المرشح الاول *خلينا الاحتفالات *ولازم نبدا في مواصلة مشوار معسكر الجزائر الناجح جدا *الناجح برغم كيد الكائدين *الناجح جوه عين اجعص حقود *نواصل المشوار *لانها سكة المطار *ايها الناس *الاعداد ليس اعداد لاعب فقط *بل هو اعداد جمهور كمان *لازم نعد العدة *ونبطل تنظير وافتراضات *غرزه بعرف شغلو كويس *واي زول فينا يجب ان يقوم بي المطلوب منو كاملا *انها ادوار متكامله *من اجل وصول جماعي للمطار *وصدقوني *المجموعه البهناك *الاربعه ما بصعدوا *فرق عمله ساااااي وسعر موازي *مابقدروا *حقو يبيعوا ويمشوا غرب الحارات *ايها الناس *الجمهور عليهو دور كبير *نشجع وبس *ومن عزام ولي قدام *وقدام حدها المطار *ايها الناس *بسعر الصرف *التعادل مع سطيف المخيف بالجزائر *يساوي هزيمة مجموعة السموحاب كلها جوه دياره *شن جاب لي جاب يا سموحاب *لكن بصراحه *قون جابسون عبرت ولا ماعبرت !!!! *اقول ليكم حاجه عبرت *ايها الناس *لو زول شغال في يوغندا بصرف خمسه الف شلن يوغندي *وزول شغال في شيكاغو بصرف اربعه الف دولار امريكي *البصرف اكتر منو يا روشا ؟؟؟؟ *عرفت كيف الاربعه بتكون قدر الخمسه خمسه الف مره ؟؟؟؟ *فرق العمله يا عمك *بي شلنكم ده ما ظنيت بتجيبوا شئ *ايها الناس *الماعندو قديم ماعندو جديد *ونحنا بي قديمنا نحمد سيدنا *سيظل الزنطور زنطور *الزنطور ما بطول *نجلي الفكره ونعمل علي رفع راس البلد دي فوق *ونعيد ذكري الشهيد الزبير عندما هتف بالمطار *فوق فوق مريخنا فوق *فوق فوق سودانا فوق *كمان يا محمد عبدالماجد غالطنا وقول الزبير في المطار قال فوق فوق هلالنا فوق ؟؟؟ *مسجله يا اخوي *وحتي الشهيد وقتها اعلن عن هدية للرياضيين بمناسبة مانديلا *الهديه كانت المدينه الرياضيه القاعده اسي دي *حقتنا *ايها الناس *حتي هتاف فوق فوق حقنا *لان جمهور المريخ هو من ابتدعه *ولان الجماعه بقلدوا وبشيلوا الحاجه *ويجوا يغالطونا *حقو نفتح عيننا كبيره *اليومين دي شايفهم دايرين يسرقوا كلمة الشفوت *الكلمه دي حقتنا *وانا من اطلقها علي جمهور المريخ *وكانت ايام الاعمده تحت مسمي *يا نتشفتن يا نتبشتن *ايام هنو وراجي *واتشفتنا *وما اتبشتنا *ومن يومها واختارت الجماهير الحمراء كلمة الشفوت *تعبيرا عنهم وعن كبرياء امة *اليومين دي شايفها قاعده تتنشل *الشفوت هم جماهير المريخ *والشفت هو من ينتمي للمريخ *سواء اداري او لاعب او جهاز فني او مشجع *بطلوا حركات وابتكروا ليكم حاجه براكم *واتشفتني *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *سرقوا كراسي كافتيريا البرلمان قالوا لينا *الحمد لله الماسرقوا كراسي البرلمان زاتو يا والينا *كان محنه ودخلت علينا *سرقه ومن البرلمان يا والينا !!!!!! *الله يستر علينا *البنوم ليها تاني شنو يا والينا سلك كهربا ننساك كيف والكلب قرب يقول للعربيه تعالي بدري ما تساهري بينا والي لقاء سلك