دق الدلجة محمد عبد الماجد مباراة تلعب تحت شعار (سري للغاية) سواق القطر. سواق القندران. سواق الركشة. بتاع الفرن. سيد البيت. الزول الواقف ساي. الزول العندو وجع ضرس. الزول الما عندو موضوع. العاوز يسافر ويطلع من البلد … الباع حواشتو… الفكر يعرس تاني. ديل كلهم ما عندهم علاقة بي البعمل فيه اتحاد كورة القدم السوداني – الجماعة ديل لو كان فيهم (فرامي) واحد ما كان بطلعوا قراراتهم (معجونة) كدا. في اتحاد كورة بيجتمع يوم الجمعة …(عقد) هو؟؟؟. غايتو لمن تكونوا عاوزين تعملوا ليكم حاجة للمريخ …يوم الجمعة تجوا من بيتوكم عشان تلخبطوا (القواعد) وتمدوا الموسم وترجعوا. العجور. البطاطيس. الليمون. القرع. الاسود. الشطة الخضراء. لجنة الاستئنافات. كل هذه الاشياء …ما عندها علاقة بي (الطبخة) التى عملها الاتحاد العام لكورة القدم السوداني. انتوا الناس ديل قايلين في رأسنا دا في (قنابير). زارعين (فجل). قايمين (سداري). الناس ديل بعملوا في (القوانين) اي شيء – ما فضل ليهم إلّا يحولوا (موقف الخرطوم) من استاد الخرطوم الى شمال كردفان عشان يلعبوا كورتهم على مزاجهم يوم الاحد. يلخبطوا زي ما عاوزين. اللخبطة دي فيها حاجة ؟!!. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). يتخيل لي كدا (طمام البطن) ما عندو اي علاقة بي الشيء البعمل فيه اتحاد الكورة (مجدي واسامة) – طمام البطن ارحم. على الاقل طمام البطن ..(ليمونة) بتشيلو ليك. البعملوا فيه ناس مجدي شمس الدين (جنينة ليمون) ما بتشيلو. الليمون دا فيه حاجة؟!!. يعدين نحن لو جينا للجد ..وصنقعنا في هواء الله البارد دا ..زول ما قادر يحافظ على (جوازه) بقدر يحافظ على كورتنا. الصنقيع فيه حاجة!!. زول يرجعوه من سويسرا تفتكروا ما برجعوه من استاد الخرطوم. دا بتثقوا فيه كيف؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). سنة 1703 – السنة دي قاطعها من رأسي – كان حكم المباراة قبل ما يحسب (ضربة الجزاء) برجع لمكتب العمل ثم يعود ليحسب ضربة الجزاء او يصرفها. الوقت داك الكورة كانت كورة (مكاتب). لجنة الاستئنافات كورة في (عطبرة) بترجع ل (القضارف) عشان تمنح المريخ في (ام درمان) تلاتة نقاط ساكت كدا. علكيم الله هسع لو في زول وقعت فيه صاقعة ..ومات في ساعتو…سبب الوفاة شنو؟. الصاقعة ام لجنة الاستئنافات؟. سنة 1809م – السنة دي قاطعها من رأسي …الكرت الاحمر كان لونو (بيجي). والخروف كان ضكر بط. وسلطة الاسود كان بعملوها ب (البامية). والملوخية كانت (فجل). وشارع البلدية كان بوديك قاعة الصداقة. ودار الرياضة ام درمان كانت في جبل اولياء. نحن ما قايلين بعد العمر دا – بعد كل هذه السنوات الاتحاد العام لكورة القدم السوداني بيجي يطبق نفس النظرية ونحن في الالفية الثالثة. يا مجدي تلفونك بضرب. شوف ح تحول نقاط المباراة وين؟. ناس اسامة عطا المنان دخلوا الالفية الثالثة بعصرهم الجاهلي في كورة القدم. زمن (الكورنر) بفكو ليك معاهو قفة بلح. البلح فيه حاجة؟!!. معتصم جعفر في اثيوبيا فاز ب (6) اصوات – فضيحة السواد – الاصوات دي على (الألفة) شوية…تجيبك انت يا معتصم جعفر رئيس للاتحاد. وفرحان كمان. حليل زمن (الألفة) كان ليهو شنة ورنة. الالفة زمان بعادل (مدير مدرسة) الآن. ورئيس اتحاد!!. سيكافا دي (هملة) ساكت. (6) اصوات تجيبك رئيس اتحاد سيكافا. وصفيحة طماطم ممكن تجيبك (بطل) للمنافسة. سيكافا دي بي (دو) بتفتح. غطا عام. غطا عام دي فيه حاجة ؟!!. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). يوشك اتحاد كورة القدم السوداني ان يحول مباريات كورة القدم الى (العمل السري). قرارات الاتحاد بقت زي (المنشورات) يوزعوها انصاص الليالي ويسربوها لصحف المريخ. القرار بطلعوه قبل الاجتماع …ناس مجدي قراراهم بصدروه اول حاجة وبيجتعوا بعد كدا. شغلهم بقى (سري). هكذا يتعامل اتحاد الكورة مع (المباريات) – وقد بلغنا ذلك حتى في مباريات القمة ، لتصبح الرياضة (تنظيم سري). تنظيم سري دي فيها حاجة ؟. اتحاد كورة القدم السوداني في اجتماعه امس (يوم الجمعة) ظل يحول مباراة القمة من مدينة الى مدينة. عرضوها اولا على ام درمان فرفضت ام درمان ذلك. ودوها الكاملين ..ناس الكاملين قالوا مباراة بالصورة دي لا تشرفهم. والله في حوش ود الخليفة ما تتلعب. جابوها استاد الخرطوم. يحولوا فيها من حتة لي حتة زي (جنازة البحر). عليكم الله دي مباراة وإلّا (تحويل رصيد) البحولوا فيها من ملعب الي ملعب. سمعنا بي قطن المحور الوراثي. لكن دي اول مرة نسمع بي مباراة المحور الوراثي. المحور الوراثي دا فيه حاجة؟. قبل ذلك كانت الملاعب في شوق لمباريات (هلال مريخ) قبل ان تصبح مباريات القمة (طريدة) على ذلك النحو ومرفوضة من الجميع. الاتحاد العام الذي عجز من تنظيم مباراة للمنتخب القومي في العاصمة القومية ..اصبح لا يملك ان ينظم مباراة للقمة في حضور جمهور. مرقناها لي كريمة. الجمهور السوداني بكل الوانه – بسمرته وملاحته وعشقه الجميل للهلال والمريخ اصبح ممنوع من متابعة مباراة للهلال والمريخ بسبب هذا الاتحاد الذي جعل الجمهور يصل الى درجة الغليان. درجة الغليان دي فيها حاجة؟. مباريات كورة القدم في السوداني اصبحنا نشعر فيها بتلك (الرهبة) – والخلعة. الاتحاد اصبح يجتمع على رأس كل 24 ساعة ويدعو اعضاء مجلسه للاجتماع وذلك لمد الموسم اولا. وتقديم المباراة 48 ساعة. مبارياتكم بقت زي (الحقن). كل (48) ساعة في حتة. موسمنا هذا من (المد) الذي حدث فيه اضحى متل (الروب) المدفوق. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الليلة ريال مدريد وبرشلونة. تعالوا اتفرجوا. تعالوا شوفوا البحصل. في مباراة اليوم ما ح تسمعوا ب (لجنة الاستئنافات). ولا الجمعية العمومية. ولا المفوضية. ولا فيصل سيحة. ولا خالد النعسان. لو جينا للجد – بعد ان سجلتوا (خالد النعسان) مفروض يطلعوكم من الممتاز ..وترجعوا تلعبوا (تأهيلي). النعسان دا ما بقعدكم في الممتاز. اسبوع ما بتقعدوا معاهو. خالد النعسان. بكري المدينة. اسامة عطا المنان. رمضان عجب. مجدي شمس الدين. امير كمال. سمير فضل. مصعب عمر. الفاتح خضر. ديل كلهم بيلعبوا للمريخ. ………… و السلطات قادرة على تصحيح تلك التجاوزات. الفوضى التى يريد ان يفرضها الاتحاد العام لكورة القدم. السلطات لغت المباراة امس ..عاد الاتحاد وبرمجها تاني يوم. في قوة عين قدر كدا. الحمام. ود ابرق. القمري. البط. الوز. ابوالقنفد. الجداد. النعام. الحاجات دي كلها ما عاوز اقول عنها اي شيء. على كيفي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). …. السيدة (ل) – هل لديكي اقول اخرى. وقرّط على كدا.
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
