دق الدلجة محمد عبد الماجد ديل (جنايني) غلبهم يجيبوه..عاوزنهم يجيبوا ليكم (بكري بشير)
* ناس (الصدي) و (الزعيم) و (الزاوية) الليلة لو واصلوا في مسلسلهم اليومي (المريخ يسجل عطرون والوك اليوم) مفروض يوزعوا ليهم مع (الخبر) (تسالي وترمس وجرم). * ولو جابوا مع الخبر (عيش ريف) برضو بكونوا ما قصروا. * نحن الخبر دا من يوم 11 نوفمبر بنقرأ فيه. * لا شفنا عطرون ولا الوك. * ولا شفنا في اليوم التاني (اعتذار). * تاني بقولوا ليك المريخ يسجل عطرون والوك. * فترنا. * تسجيل عطرون والوك في المريخ بقى زي ازمة الغاز. * الجماعة كل يوم يقولوا ليك الازمة انفرجت. * وغاز مافي. * والوك وبكري بشير وعطرون ما بتسجلوا. * لكن تعالوا نحصحص (الخبر). * ونشوف التحت الوسادة. * هل قصدت صحف المريخ احراج لجنة التسيير وذلك بنشر خبر غير صحيح. * تسجيل عطرون والوك لم تكتمل خطواته ..وهناك معوقات تحول دون تسجيل اللاعبين في كشوفات المريخ في التوقيت المعلن عنه – مع ذلك فان صحف المريخ تقصد احراج مجلس المريخ بالترويج اليومي لخبر تسجيل عطرون والوك وبكري بشير. * دا شغل بتاع (تحريض) ساكت. * واحراج للمجلس. * اخبار (الغتاتة) نحن بنعرفها. * ربما اعلام المريخ الموالي لجمال الوالي استغل ضعف خبرة المجلس وصار يتحدث باسمهم. * نحن اسامة ونسي دا ما بنقبل فيه. * الزول محترم وبشتغل في النور ..وما بحب اللف والدوران. * كل يوم يقولوا ليك المريخ يسجل عطرون والوك وبكري بشير. * الحيلة نفسها استعملتها صحف المريخ مع المدرب الفرنسي غارزيتو الذي اكدوا حسم امره واستمراره مع المريخ. * وما في كلام زي دا. * قصدوا ان يضعوا المجلس تحت الضغط. * كان يمكن للمجلس من البداية ان ينفي هذه الاخبار بدلا من ان يترك الامر هكذا لاعلام المريخ ليظهر المجلس بهذا الضعف. * اسامة ونسي واضح انه من القيادات الادارية المتميزة ..ربما ينقصه فقط (المال). * لو وجد اسامة ونسي نصف الدعم الذي وجده جمال الوالي ممكن يقلب المريخ في سنة ونص (برشلونة). * هذه شهادة بانت لنا من خلال مواقف ظهرت من اسامة ونسي …وهو امر يجب ان نشهد به ..رغم ان الهلالاب ارتاحوا بعض الشيء لهذا المجلس. * راحة الهلالاب لهذا المجلس لم تكن لضعفه وانما لقلة امواله ..وهذا ما جعل الهلال يتسيّد الساحة. * جمال الوالي كانت تدعمه الدولة بالمال واللوائح والاستثناء ..وقد فعلت له الدولة كل شيء ..فكان من الطبيعي ان يحدث هذه الضجة. * وهي ضجة في النهاية بدون طحين. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * من بين الاخبار التى خرجت من مجلس المريخ في شأن غارزيتو قولهم ان غارزيتو طالب ب (جنايني). * المدلك عرفناه. * مدرب الحراس ما قلنا شيء. * الطيب. * مساعد مساعد مساعد المدرب. * يجيب ابنو ويقول هو المدرب العام وهو المدرب الفعلي ما في مشكلة. * لكن الموضوع يصل للمطالبة بتعيين (جنايني) للفريق دي اول مرة نسمع بيها في الاجهزة الفنية. * انتوا يا (غازريتو) جايبنك لمشروع الجزيرة. * شغلوك في جنينة السيد علي. * جنايني شنو؟..البعينوه ليك يا غارزيتو. * انتوا عارفين انا لمن سمعت الخبر دا فكرت في شنو؟. * فكرت في انو غارزيتو دا عندو ولد تاني غير انطوانيو (جنايني). * وصاحبكم زي ما اتحرفن وجاب ولدو مكانيكي كهربة السيارات عاوز يتحرفن ويجيب ولدو (الجنايني). * انت يا غارزيتو (الجنايني) عاوز بيه شنو في المريخ؟. * فكرت في منقة شندي!!. * موز كسلا. * تفاح الباوقة. * الزول دا يكون بقرأ اعمدتنا دي وإلّا شنو؟. * احتمال يكون سمع ب (الزهور الورد) جعفر علي والريح علي ..وقام طالب ب (جنايني). * الغريبة …سمعت لي خبر حايم ان علي جعفر سافر الى امريكا. * معقولة بس. * والله يا علي جعفر (ولاءالدين موسي) يلم فيك في (البيت الابيض) يشيل ليك الكلي واللوز والذاكرة. * ما يخلي ليك شيء. * الجواز ذاتو بصادروا منك. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * قدر ما حسبتها. * قدر ما فكرت. * وضربتها. * ونزلت بالواحد. * وطلعت بي ابنوبة الغاز. * يا زول ابنوبة الغاز الجابها هنا شنو؟. * ما تلبخط لينا. * انبوبة الغاز فيها حاجة. * قدر ما حاولت القي لي مخرج – واعرف ليه غارزيتو طالب ب (جنايني) ما لقيت لي تفسير لهذا الطلب. * الزول دا يكون عاوز يرفض التعاقد مع المريخ بصورة ظريفة – قام طلب ليه (جنايني) في الجهاز الفني للمريخ. * انتوا عارفين لو مجلس المريخ نفذ ليه الطلب وجاب ليه (الجنايني) ..كان غارزيتو ح يطالب ب (استاذ جغرافيا). * ح تقولوا لي (استاذ الجغرافيا) ح يعمل بيه شنو؟. * ح اقول ليكم اول (الجنايني) كان ح يعمل بيه شنو يعني؟. * الزول دا لو قعد اسبوع تاني كان ح يطالب ليه ب (جزار). * وما بعيد يقول عاوز ليه (وكيل نيابة) عشان يتفرغ للكتابات البكتبوها عنو. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * في واحد من الجماعة وقت قرأ الخبر ..قعد يحك في رأسو. * ما عرف يعمل شنو؟. * صاحبكم قال لي انت تعال هنا غارزيتو دا جنّ. * قلت ليه : ليه بتقول كدا؟. * قال لي الزول دا قال عاوز ليه (جنايني)…وناس المريخ ما اتصرفوا كويس. * جمال الوالي (بتشفتن) على الفرنسي ..المرة الفاتت في التسجيلات الماضية قال عاوز (الياسو)…ناس اسامة عطا المنان اتفقوا مع جمال الوالي وقالوا ليه : (السيستم قفل). * هسع ناس اسامة ونسي كانوا يعملوا نفس الشيء. * كانوا وقت غارزيتو طلب (الجنايني) كانوا يقولوا ليه : (السيستم) قفل ..فراني تاني ما بفتحو. * كانوا اتخارجوا من (المطب) دا بدون خسائر. * بعدين انتوا تعالوا هنا …غارزيتو الجنايني يعمل بيه شنو ؟..بعد ما جابوا ليه (كريم الحسن). * الزول دا (جنايني) رسمي. * كورة شنو البلعبها ليكم (كريم الحسن). * كورة كريم الحسن دا ..كورة زول (جنايني) ساكت. * عشان كدا ..وزي ما قلنا ليكم علي جعفر والريح علي (الزهور والورد)..نقول ليكم كريم الحسن دا من الليلة هو (الجنايني). * اسموا (الجنايني). * الزول دا جنينة ساكت. * تاني وقت نقول الجنايني بنكون قاصدين (كريم الحسن). * ووقت تقول كريم الحسن ..بنكون قاصدين (الجنايني). * خلاص الموضوع بقى واضح يا جماعة. * تاني ما بنرجع ليكم ليه. * كريم الحسن انتهى. * اقنعو منو. * امير كمال (تقيل) وكريم الحسن ابوالتقلة ذاتها ..ديل لو لعبوا في تشكيلة واحدة ..لو فكيت ليك (صينية باسطة) تدخل. * صينية الباسطة الدخلها هنا شنو؟. * صينية الباسطة فيها حاجة. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * على العموم كدا – وخلاصة الكلام ..غارزيتو قنع من (بكري المدينة). * عشان كدا طالب ب (الجنايني). * انتوا قايلين لو مجلس المريخ وافق ليه على الطلب ..غارزيتو ما بعمل (الجنايني) كابتن للمريخ. * وتاني يوم ما بقول ليهم عاوز لي (حدادي). * ………….. و * بي صراحة كدا. * وبدون زعل. * اذا مجلس المريخ (جنايني) غلبه يجيبه لي غارزيتو …عاوزنهم يجيبوا ليكم بكري بشير. * او الوك. * انتوا بتتكلموا كيف؟. * جنايني ما قدروا عليه. * يا غارزيتو هسع لو مسكت الزمالك بتعمل حركاتك دي. * يعني ممكن تقول لي مرتضي منصور عاوز لي (جنايني). * يمين تقول للمصرين كدا ..يرجعوك تاني السودان. * جنايني نحن جايبنك مرشد زراعي. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * …………. * السيدة (ل)…الجو الايامات دي زي الفطير بي اللبن …يا زول الدخل الفطير بي اللبن بالجو شنو؟. * وقرّط على كدا.