في الصمت كلام محمد عثمان بلل (يا ريت كافالي ما يرجع عشان نشوف البرنس يتجدع) كان اكبر حلم لنا هو عودة هيثم مصطفي لاعبا مرة اخري وقائدة للازرق وزعيم الكرة السودانية .. ولم نرمي المنديل نهائيا بعودة نجمنا المحبوب وعندما انتهت فترة الانتقالات الرئيسية ولم يعود البرنس لصفوف الهلال اصابتنا الخيبة خاصة بعد انتشار شائعة عودة اللاعب في الساعات الاخيرة من التسجيلات .. وليعود الكاردينال ليحقق لنا أكبر مفاجأة بأعادة هيثم مصطفي للهلال ولكن ليس لاعباً بل مدربا يا فرحتنا بهذا .. حقيقة كنا سعداء للغاية بعودة البرنس للهلال حتي مدربا او اداريا (ما فارقه معانا) المهم هيثم رجع. وحلمنا تحقق بالفعل وكان بسيطاً للغاية فقط هي رؤية (سيدا) من جديد في الهلال .. لكن فجأة ارتفعت احلامنا من جديد بأن نري في المستقبل القريب هيثم مدربا للهلال وليس مساعدا او مدربا عاما .. اعلم ان الجميع لا يتفق معي في ذلك .. هيثم مصطفي مؤهل تماما ليقود تدريب الهلال ولوحده .. (ياخ وجوده يبعث علي الاطمئنان ويمنح اللاعبين الثقة .. مثل الايام الخوالي التي كان اللاعب يبدع فيها داخل الميادين .. كان الهلال يؤدي بحماس وقوة لوجود القائد المحنك صاحب الامكانيات الفنية الكبيرة الذي قاد الهلال الي التألق في المحافل الداخلية والخارجية. (يا جماعة الخير) هيثم سيقود الهلال لوحده في الجهاز الفني (معقولة نحن لسه بنحلم) (عشان بقي مافي زمن للحلم .. الزول ينوم بي جاي والشمس تطلع بي جاي) حتي سرعة الزمن لاحقنا في نومنا) .. هيثم مصطفي (سيدا) والبرنس مدربا للهلال ( نحمده حمدا كثيرا) ولك الحمد والشكر يا رب .. يا ناس سيدا (شفتوا ربنا دا كريم كيف) كنا بنحلم نشوف هيثم بس في استاد الهلال (والله العظيم انا كنت بحلم كدا) .. نشوف اكثر لاعب سوداني عبر التاريخ تعرض للظلم .. ظلم يقطع القلوب .. انظروا الي الجماهير يوم شطبه من الهلال ومرة اخري يوم توقيعه للمريخ .. ماذا فعلت تلك الجماهير الهلالية .. لقد كنت حاضرا .. رايت رجالا انهمرت دموعهم واخرين دخلوا في غيبوبة .. قسماً لم اري مثل ذلك اليوم في حياتي مرة اخري .. (والله العظيم ربنا نصر هيثم مصطفي) في فترة وجيزة اصبح هيثم مصطفي رقم واحد في الهلال .. هذا يدل علي ان هيثم تعرض للظلم .. (ربنا يديك العافية يا الكاردينال) لقد نصرت واحد من اكثر ابناء الهلال المخلصين .. (هيثم دا يا أهله مستعد يفدي الهلال بروحه) شخصيا اعتبره أفضل لاعب سوداني انجبته الملاعب .. قارنوا بينه وبين بقية النجوم .. هيثم يتفوق علي الجميع (بالارقام .. بالاحصائيات .. بالانجازات .. بأي حاجة انتو عايزنها .. فرحتي هذه نابعة لأن هيثم سيصبح مدرب الهلال لسفر الفرنسي كافالي الي باريس لقضاء عطلة اعياد الميلاد. (الخواجي دا ما يغير رأيو ويقول تاني ما جاي) .. بس عشان نشوف قيادة سيدا الحقيقية .. هيثم مصطفي افضل من يقود الهلال لاعبا ومدربا .. (زول بحب الهلال اكتر من نفسو) .. بالتأكيد الهلال سيكون الافضل وسيبذل قصاري جهده حتي يري الهلال الافضل (حماس ساي) هيثم دا بخلي الهلال يشيل الكؤوس. لله درك يا (سيدا). شكرا الكاردينال. (صمت اخير) .. في يوم الجمعة اكثروا من الصلاة علي افضل خلق الله. (اللهم صلي وسلم علي حبيبك ونبيك محمد عدد خلقك ورضا نفسك وزنة عرشك ومداد كلماتك).
