في السلك بابكر سلك رفع المعاناه عن كاهل جماهير المريخ *الصدفه وحدها هي التي قادت شخصيات قوية للجنة التسير المريخيه *وبدل الحرب الغير معلنه علي الناس ديل *حقو اذا ما دعمناهم بالمسانده *نخليهم يشتغلوا *وما نعرقل عليهم العمل *فرجال بهذا الفهم وبتلك القامات السامقات *يجب ان لايخسرهم المريخ بسبب المشاحنات (الكيمانيه) *ولذا *ادعوكم اخوتي للمسانده *ولا اعني بها السكوت عن الاخفاقات *بل اعني بها المشاركه بالرأي وبالدعم *فان فعلوا خيرا نشكرهم عليه من بعد الله *وان كان الخطأ مصاحبا لعمل قاموا به *فمن الشيطان قبل ان يكون منهم *ننتقدهم بكل ادب ونوضح وجهة نظرنا *لكن ان نعيرهم ونرميهم بالاساءه *فهذا هو عين العيب والله *اخوتي في مجلس التسيير *سير سير يا مجلس التسيير *المهم *البعض بدا يتحدث عن تراوري *والحديث عن ومع تراوري اعتدنا ان يكون في بداية الموسم *هذا المتلاعب الغير منضبط *اذا تواجد في التشكيل يؤدي بانانيه وشوفونيه *لايقدر المجهود الذي يبذله زملائه في الحصول علي الكرة *فيفقدها بكل بساطه دون قتال *ويعمل حركة ملكة جانسي *نحنا ما هنود يا تراوري *ماهنود عشان تجي في بداية الموسم تشيل مقدم العقد وتطفش *وانضباط تراوري يشبه رفع المعاناه عن كاهل الجماهير *فلو رفعت الحكومه المعاناه عن كاهل الجماهير *بنضبط تراوري *فحكومه ترفع شعارا لرفع المعاناه عن كاهل الجماهير *ويصفق نوابها بالبرلمان للزيادات ورفع الدعم *تشبه تراوري الذي يقبض مقدم العقد ويزوغ *ان كنا قد قنعنا من رفع المعاناه عن كاهل جماهير الشعب *ارفعوا المعاناه عن كاهل جماهير المريخ بنسيان ذلك التراوري *وخلوهوا في بطنا *ما تخلونا في بطنو *عقدو ينتهي يمشي يشتكي *ووقتها البينه حاضره *ايها الناس *حرام والله ان تكون لنا كفاءة مثل دكتور مدثر خيري *و لا يدير المكتب التنفيذي *متين حانستفيد من كوادرنا يا ناس !!! *ايها الناس *ضفر عريس *الله تم ليه *بيت مال وعيال يا كابتن *تيمان سريعين كده *عندنا مشكلة اطراف *المهم *سيدا تسيد الموقف بشهادات سمعنا انها مضروبه *مامضروبه ضربه شديده *لكن فيها محاباه *والبطل اصلو بظهر آخر الفيلم ليكمل انتقامه من الخيانا *بصفي حساباتو كلها في المشهد الاخير *وبعدها تلقي في الشاشه كسكته طايحه علي الارض *وكوم ناس ميتين *وغبار *وبرنسيسه متلبده خلف الحانه *وبتاع الحانه تحت البنك *وتلاته انفار يسترقوا النظر *ثم يفروا هاربين *والبطل ينفخ المسدس ويعيده لبيته *ثم *The End *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *الحوار الوطني هامينا *بس قول للناس البتحاوروا يا والينا *يتحاوروا لينا *مايحاورونا ويبيضوها لينا *لاننا كيشه يا والينا *ياما بيضوها لينا *وقول ليهم يا والينا *نحن نؤمن بانشودة الرائع الفنان المبدع لطفي بوشناق التي تقول *انا حلمي بس كلمه واحده ….ان يظل عندي وطن *لاحروب لاخراب ….لا مصائب لا محن *خدوا المناصب والمكاسب ….لكن خلولي الوطن *يا وطن وانت حبيبي …..زانت عزي وتاج راسي *انت يا فخر المواطن ….والمناضل والسياسي *انت اجمل وانت اغلي …وانت اعظم من الكراسي *قول ليهم الكلام ده يا والينا سلك كهربا ننساك كيف والكلب لما يسمع وطن ووطنيه ومواطن بقول الاسماء دي سامعها وين! …سامعها وين….! سامعها وين يا ربي !!!! والي لقاء سلك