دق الدلجة محمد عبد الماجد هلال التبلدي اتعادل معانا و (الغاز) غلبنا عديل كدا لمن المريخ كان عندو (مقصورة) وما عندو (كورة) – كان الموضوع دا بيذكرني ليك بي قصة الزول القال لي ولدو لازم تغطي قدحك وتعرس بنت عمك. الولد قال لي ابوه – لكن يا ابوي الزول دي ما سمحة. ابوه قال ليه الزولة دي عندها اطيان وعندها املاك ..سماحتها انت عاوز بيها شنو؟. هسع ناس المريخ طبعا لا كورة ولا مقصورة. شايلنها ب (الذكرى الخالدة). اعلام المريخ الى الآن بغني لي جمال الوالي. المريخ الى الآن ما واجه ليه فريق عندو قدرة …المريخ بي حالتو دي لو مشى (جياد) بياخد سبعة. ما تشمتوا ساكت في تعادلنا مع هلال الابيض. الكلام دا راجيكم اصعب منو؟. في انتظاركم الكثير – بمجلس تسيركم دا …(تعادل) واحد ح يفرتكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الهلال اتعادل مع هلال التبلدي في الابيض – الناس كلها ح تقوم وتتكلم. البلد ما ح تقعد. ح يخلوا مويتهم. وكهربتهم. وغازهم. ويمسكوا ليك في الهلال. انتوا عارفين رمضان باقى ليه كم يوم؟. رمضان باقى ليه خمس شهور واسبوع. اقعدوا اتغالطوا لي كدا – لمن يقولوا ليكم رمضان بكرة. تعادل الهلال احسن تفكوه. ما تمسكوه لينا موضوع. طبعا اي زول ح يمسك ليك جهة ويقعد ينتقد منها. زي (الملاية) القديمة في السقط. اي زول بيجر فيها من طرف. فلاحتكم بس في الهلال. او زي الزول البيجروه خمسين. اي واحد قاعد يقول ليه ما كان تفك الكرت دا. وكان تنزل. والكرت داك فوتو ساكت. الزول البكون قاعد برة في الكوشتينة بعمل ليك فيها (محمود الخطيب). نحن بنصب (انتقادنا) حسب موقفنا من الموضوع. مثلا لو في (عرس)…اي زول بيمشي العرس ..بقوم ينتقد ليك العرس من الحتة العندو معاها اختلاف. العندو مشكلة مع العروس او اهلها – بمشي العرس واول ما تظهر العروس على الشاشات يعاين ليها كدا ويقول ليك : (العروسة كبيرة بس). والعندو مشكلة مع العريس ..بقول ليك (العريس عندو صلعة). ولو العريس ما عندو صلعة – ممكن يقول ليك العريس بدلتو كبيرة بس. في زول تاني بكون ما عندو مشكلة مع العروس ..بقوم يقول ليك في العرس : والله العروس دي عندها ام صعبة خلاص. وممكن الزول يخلي الحاجات دي كلها ويقبل ليك على (الفنان). عليكم الله الفنان دا جايبنو لينا من وين؟. في ناس بخلوا الفنان ..ويقبلوا ليك على العشا. الصحن كعب. والبارد مسخن. عليكم الله العاوز ليه بارد (بارد) في البرد دا منو؟. هسع الانتقادات التى سوف توجه للهلال سوف تكون حسب موقف الزول. اي زول شايل ليه انطباع معين – في اول تعادل بفرغو ليك. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لمن الهلال يتعادل (النقة) بتكتر. البيعمل ليه (نضارة) طبية مخصوص للانتقادات ، ويقيف في الباب – عشان اي زول يمر فيه بقول ليه عارف النتيجة. يقولوا ليه نتيجة شنو؟. يقول ليهم الهلال اتعادل. ويقعد ينظر. يطلع النضارة من عيونو ويرجعها تاني. تصور الهلال بعد معسكرو الفي تونس داك – وبعد الجوهرة الزرقاء – اتعادل مع هلال الابيض. فريق فيه (6) محترفين وعنده الجوهرة الزرقاء ويتعادل مع هلال الابيض. التنظير بيكتر. الغاز – الانبوبة تبقى ب (75) جنيه – ما في زول قاعد يقول حاجة. نحن اصلنا بتاعين تنظير. اي واحد بطلع نفسو من الموضوع ..وبرمي ليك الموضوع في الطرف التاني. يعني ممكن تلقى ليك واحد ..مشكلتو في الدنيا دي (الجرايد). ما بخلي ليه (جريدة). الجريدة يقراها سبع مرات. واول ما يحصل تعادل او خسارة – يقول ليك ناس الجرايد ديل بنفخوا ساكت. بالله البيقرأ الجرايد – يقول الهلال برشلونة تاني ما بتقدر تعمل ليه حاجة. والله ما في حاجة بتعملها فينا غير (الجرايد). الناس ديل يكتبوا ساكت – عاوزين يبيعوا جرايدهم بس. زولكم البتفاصح دا ..والبهاجم في الجرايد دي …الغاز ما بجيب سيرتو. ولا بقول كلمة. فلاحتكم بس في الجرايد. وممكن زول تاني يكون عندو مشكة مع الكاردينال. مشكلتو في الدنيا دي (الكاردينال). اي تعادل يردو ليك للكاردينال. يقول ليك الكاردينال ذاتو ما شايف شغلو. عاملها لينا كلها جرايد. بالله الزول دا صورو في الجرايد اكتر من صور بشه ومدثر. يا زول بشه عمل (الجوهرة الزرقاء). كاريكا جاب ليه (طوبة) في الاستاد. انتوا عاوزين الزول البيجيب ليكم (الطوب) وإلّا عاوزين الزول البيجيب ليكم (الاقوان). الزول وقت ما يكون عندو موضوع – بيعمل كدا. يقول ليك هسع (الكسكتة) دي في ليها داعي. الجوهرة الزرقاء ذاتو دا ما وقتها. الجوهرة الزرقاء عاوزة تلعب ليكم. فلاحتكم بس في الكاردينال – هسع الغاز دا بتقدروا تقولوا فيه حاجة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). وممكن مريخابي بدون مناسبة كدا – يقولوا ليه الهلال اتعادل مع هلال التبلدي. طوالي المريخابي يقول هو الهلالاب فاضيين لي من (شيبوب). الناس ديل موضوعهم كلو بقى (شيبوب). تسألهم عن الهلال يقولوا ليك الجوهرة الزرقاء. وتسألهم عن الكورة يقولوا ليك شيبوب. بس فلاحتكم في شيبوب – هسع الغاز دا بتقدروا تقولوا فيه حاجة. عاملين فيها مودبين خالص. اخر تهذب. اخر احترام. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). وممكن تلقى ليك زول بعد التعادل دا يقبل على (كافالي). ممكن تلقوا ليكم زول يطلعوا ليكم زول جابوه من الميناء البري ساكت. يقول ليك والله كافالي دا لا عندو كورة ولا بعرف فيها حاجة. فلاحتكم بس في كافالي. الغاز دا مالكم ما تبقدروا تقولوا فيه حاجة. يا جماعة (الصبر). لو ما عندكم (صبر) ما بتعملوا اي حاجة. اي مدرب بكون عندو (فكرة وخطة) بنفذ فيها. الخطة والفكرة ما بتتطبق من الاسبوع التاني. ولا بتظهر بعد معسكر استمر شهر. المدرب لو ما استمر (6) شهور ما بتقدر تحكم عليه. كافالي طول ما منحتوه الثقة وتم التعاقد معه يجب ان يعطي الوقت الكافي. ما معقول تكونوا عاوزين ليكم مدرب بعد كل مباراتين. لو استمريتوا بالطريقة دي …في السنة دي (19) مدرب ما بثبتكم. اي زول يتحمل مسؤوليته. مشجع. اداري. صحفي. لاعب. مدرب. ما تحملوا المدرب المسؤولية براهو. المشجع نفسو مسؤوليته في هذا التوقيت اهم من مسؤولية (المدرب) نفسه. المشجع يجب ان يصبر في هذا التوقيت. يجب ان يدعم الفريق – وما يصدر انطباعات سلبية عن الجهاز الفني. لو عندكم حاجة عاوزين تقولوها قولوها في الغاز. كافالي دا ما تشطروا عليه ساكت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. و ح تبدأ ملامح الهلال تظهر في الخرطوم. وفروا (الاستقرار) والدعم والمساندة للهلال ..لو عاوزين بطولات. ما في بطولات في الدنيا كلها بتحقق بتغيير المدربين. ما في انتصارات بتجي من غير استقرار. وما في استقرار في ظل التبديلات التى تحدث في الجهاز الفني. اصبروا على فريقكم. وخلوا المدرب ينفذ فكرتو ..وحاسبوه بالجملة. الموسم الماضي تحملنا جميعنا قرار الكاردينال الذي سحب فيه الهلال ..وطار من الهلال الممتاز والكاس. وما في زول قال حاجة. هسع اصبروا على المدرب ..وتأكدوا ان كل البطولات سوف يحققها الهلال اذا دعم هذا المدرب وتوفر له الاستقرار. لو عندكم رأي…قولوه في الغاز. ………. السيدة (ل) – احيانا بتبقى (الضحكة) اوضح عنوان للحزن. وقرّط على كدا.
