في الصمت كلام محمد عثمان بلل (انتو عايزين من هيثم شنو) ..؟؟ كثر الحديث في الاونة الاخيرة ان الفرنسي كافالي مدرب الهلال لا يريد الكابتن هيثم مصطفي الي جانبه في الجهاز الفني .. وان هناك الخلافات بين الفرنسي وهيثم وصلت الي قمتها .. وعلي ارض الواقع لا نجد شيئاً من هذا القبيل هيثم والفرنسي يتحدثان ويتحاوران يوميا في تدريبات الهلال والبرنس يجد كل الاحترام والتقدير من كافالي وجميع اللاعبين. (يا جماعة عليكم الله خلوا هيثم في حالو) .. هذا الفتي عاني الكثير عقب شطبه من الهلال وعاني اكثر من اجل العودة الي بيته من جديد .. (والله العظيم الهلال يشهد استقرارا لم نشهد له مثيل في العهد القريب) والمجلس مبسوط جدا من الجهاز الفني والفرنسي يعلم تماما قيمة هيثم وسط الاهلة. هذه الاشاعات هدفها تعطيل مسيرة الهلال التي بدأت في الانطلاق بقوة هذا الموسم .. حيث وضع الحصول علي كافة البطولات الداخلية والخارجية هدف رئيسي .. الهلال حاليا يسير في الطريق الصحيح ومستوي الفريق يتطور من مباراة لاخري وكل هذا النجاح يحتاج لمزيد من الاستقرار. ومروجو الاشاعات يعلمون تماما بوجود هيثم سيكون حال الهلال مختلف جدا وهاهي الايام تؤكد صحة ذلك .. (واي زول عايز يعرف حقيقة استقرار الهلال تعال وشوف التناغم الكبير بين الفرنسي وهيثم في التمارين والمباريات) .. احيط الجميع علما .. هيثم اكثر هلالي ينشد استقرار الفريق والبرنس متطلع جدا ولا يحب الفشل .. فغيرته التي لازمته عندما كان لاعبا كان بسبب عشقه للهلال وعدم الوقوع في الفشل. لا نريد منكم سوي ان تتركوا هيثم في حاله دعوه يعمل بصمت .. (وعيلكم الله حصل سمعتو هيثم صرح في الصحف انو هاجم زول او اتكلم عن نفسو) اتركوا امير الكرة السودانية وافضل لاعب انجبته الملاعب السودانية حتي الان في شأنه .. (نحن هيثم دا عاجبنا حتي لو جاء وقعد في المدرجات ساي). فليعلم الجميع ان سبب الهجوم المتواصل علي هيثم هو الحقد (شفاكم الله من هذا المرض) عندما تجد اعداءك في تصاعد فأعلم انك حققت نجاحا كبيرا .. وهيثم ظل يحقق النجاح وحاربوا من اجل ان لا يعود هيثم لاعباً ليتفاجئوا عبر رئيس الهلال الكاردينال بإعادة هيثم للهلال لكن مدربا. اتركوا هيثم مصطفي في حاله (زي ما هو ما شغال بيكم). هيثم تحمل ما لا يتحمله انسان آخر. النجاح سيكون حليف البرنس مع الهلال. ونتوقع لهيثم الكثير من النجاحات مع سيد البلد. (صمت اخير) .. الهلال مفخرة داخل وخارج الجوهرة. (انتو عايزين من هيثم شنو) ..؟؟
