دق الدلجة محمد عبد الماجد الدوري السنة دي مع (لفة) الطبق عاوز ليه (لفة) في الشارع قال ليه دي ريحة شنو؟. قال ليه ريحة مطرة؟. قال ليه مطرة شنو في الشتاء دي؟ ..دي يا اخوي ريحة (شية جمر)…شية جمر عديل كدا. وضان كمان. الزول التاني طوالي وقف وقال ليه (شية) والدنيا اخر شهر…انت جنيت؟. اسهل (المطرة) من (شية الجمر) مع الفلسة دي. طبعا الكلام دا ما عندو علاقة بي نزار حامد. ولا كاريكا. ولا بشه. ولا شيبوب. ولا طارق العشري ذاتو. ولا الناس المنتظرين (الخريف) يجي عشان يقعدوا يشكوا من الصالون. التجاني سعيد عندو في (من غير ميعاد) (واللفتة والخصل اللي نامت فوق تسابيح الغريق – وخطاك والهدب المكحل وفتنة التوب الأنيق). ما في اصلو (وصف) بهذا الحشد التفاصيلي الدقيق. نحن ممكن نقبل (اللفتة). لكن (اللفتة) تكون معاها (والخصل اللي نامت فوق تسبايح الغريق) بتبقى صعبة علينا شوية. شوفوا الحتة التانية. بي نفس الطريقة ممكن نقبل (خُطاها) ..وممكن نقبل الهدب المكحل ..لكن كمان تجيب ليها (فتنة التوب الانيق) الموضوع بيبقى استحالة. نحن لو استوعبنا الحكاية ..تفتكروا ناس الكهربة بيستوعبها. هسع يقولوا ليك عاوزين يزيدوا تعريفة الكهرباء. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لو طلعت بيكم على (الحوش). الليلة اليوم دا بالذات يوم نزار حامد. نزار تاني ح يعلمها. يشيل ويقطع. ووقت تمغرب ..بقوم يجيب قونو براهو. ولو (الغلاط) كتر ..نزار حامد بجيب القون التاني. ما في حاجة بتثبتو. ندخل على جوه. الفكرة كانت (مجنونة)…وقتها حسبوه (مخبول) ما عندو شغلة – وعاوز ليه موضوع ساكت. قل الشغل. ذلك كان (خريستوف كولمبس) …فقد تحدي العالم كولمبس ابناء جيله حينما اثبت لهم انه في الامكان الوصول الى الشرق عن طريق السير نحو الغرب. الموضوع نظريا كدا بكون غريب. ولا في زول بيقع ليه. اقول ليكم حاجة – انا الحكاية دي رغم انها اثبتت (عمليا) إلّا اني لغاية الآن ما مقتنع بيها. زي حكاية الناس الما مقتنعين بي ابوعاقلة يلعب طرف يمين. شايفنها صعبة. ديل الناس البيكتبوا الاملاء في السطر ..وما بنزلوا منو. اتجاه واحد. وردي اول ما جاء للعاصمة كان بيغني بالرطانة. عربيه ذاتو كان مكسر. ناس علي شمو وخليل أحمد واسماعيل حسن..ادهشهم صوت وردي فشجعوه على ان يغني بالعربي رغم اللكنة (الحلفاوية) الواضحة في صوت محمد وردي. كتب له اسماعيل حسن ولحن له خليل احمد اول اغنياته العربية (يا طير يا طاير). وغني وردي في بداياته (الليلة يا سمراء) التى خلط فيها بين الكلمة العربية واللحن (النوبي). النوبيين حضارتهم لا تضاهي ..تواضعهم هذا هو الذي ظلمهم وهم اصحاب اقدم الحضارات في العالم. وردي العملو بالعربي ..كاظم الساهر المولود في بلد ابوالطيب المتنبيء ما قدر يعملو. خريستوف كولمبس عشرين سنة متواصلة كان يتردد على ابواب الملوك والامراء عارضا عليهم مشروعه هذا ..امكانية الوصول للشرق عن طريق السير نحو الغرب..سخروا منه وضحكوا عليه وصدوه عن ابوابهم واتهموه بالجنون. ما زول دعمو. قالوا الزول دا ما عندو رأس وإلّا شنو؟. غير ان كولمبس في عام 1492 ابحرت سفنه الثلاث بارادته القوية وعزيمته الحديدية وضربت غربا في المحيط قاصدة الهند شرقا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). تعرض كولمبس لكل المشاق والمخاطر وكادوا ان يفتكوا به فقد كان في نظرهم مجنون ..رجل يريد ان يصل الى الشرق عبر السير غربا. الزول الما عندو موضوع دا شن خبرو؟. الى ان وصل كولمبس الى الهند وجزرها الشرقية عن طريق السير غربا..ثم مات كولمبس بعد ذلك بعد ان اكتشف قارتين جديدتين. بعد (العلم) دا – جماعتكم ديل شايفينها غريبة وصعبة ومستحيلة ان يلعب ابوعاقلة في الطرف اليمين وهو لاعب ارتكاز. يا جماعة العالم تطور – انتوا واقفين لغاية الآن في عقلية (طفش الكورة) وطلعها. ديل شغالين الى الآن بفقه (التقريشة). علما ان ابوعاقلة لاعب صغير في السن ويمكن تشكيله على الخانة التى يحتاجه فيه الهلال – خاصة وهو فيه صفات (الجوكر). لكن الناس البحفظو جدول تلاتة بي طريقة واحدة نعمل ليهم شنو؟. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الهلال الليلة عندو مباراة ..وهي مباراة صعبة. ما عاوزين نكتر الكلام. اي مباراة في الولايات صعبة ..رغم ان كوستي هي المدينة الوحيدة التى لا يتعرقل فيها الهلال. يمكن عشان ناس كوستي كلهم هلالاب ..وقلوبهم بيضاء زي نيلهم الابيض. ويمكن عشان ملعب كوستي افضل من الملاعب الولائية الاخرى. ويمكن عشان اندية كوستي بتلعب كورتها بس ..ما عندها (غتاتة) اندية الولايات. نحن ناس ولايات وعارفين غتاتة الاندية هناك. الهلال موفق مع اندية كوستي ..رغم ان الهلال لو لعب في (جياد) دي ..(الرجفة) بتحصل على طريقة الراحل المقيم والهلالي الفخيم صاحب المقام الرفيع عبدالمولي الصديق. خاصة ان الدوري الممتاز السنة دي مع (لفة) الطبق – عاوز ليه (لفة) في الشارع. الاعصاب بقت ما بتسحمل. نقيف في الباب ..ونطلع نلف ..ونرجع نشوف النتيجة. والزمن وقت يفوت ..والهلال ما جايب ليه قون …تمسخ عليك الدنيا. حذاري من تكرير نتيجة مباراة هلال الابيض. عاوزين الهلال يحسم لينا المباراة من الشوط الاول. من ربع الساعة الاول. عاوزين نقعد في المباراة ونستمتع بيها. احسموا لينا موضوع (النتيجة) مبكرا. الانتصار على الاهلي شندي جاء متأخرا. وحرق اعصابنا حريقة لأن الانتصار جاء بهدف وحيد. الكلام دا الليلة ما عازونو. عاوزين نحسم المباراة ان شاءالله مبكرا. وحكاية ابوعاقلة يمين. وليه ولاءالدين ما لعب عليكم الله خلونا منها. طارق العشري ذاتو ما عندو قضية بالمباراة اليوم ..عشان ما تقعدوا (تنظروا) ساكت. حافطوا على نظافة شباكم ..(نعمة محفوظة ان شاءالله) ..واحترسوا من الاصابات والكروت المباراة القادمة اصعب والهلال يلعب امام مريخ كوستي بعد اسبوع. يمكن تتعرضوا لمضاياقات من (الحكام) وظلم – هذا امر اعتدنا عليه ..ما تشتغلوا بيه كتير. ألعبوا كورتكم بس. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). قدر الهلال هذا الموسم وضعه ان يلعب اول مبارياته في كادوقلي والابيض. ثم يأتي للخرطوم ليواجه مريخ نيالا واهلي مدني والاهلي شندي. كل هذه المباريات في حقيقة الامر مباريات صعبة وشاقة على الهلال. القرعة (المطبوخة) جعلت الهلال يلعب الاسبوع السادس والسابع على التوالي في كوستي. وناس المريخ يلعبوا مع الامير والنيل شندي واندية كوستي في الخرطوم. وبعد دا كلو بيلبسوا في (الكمامات). المريخ في شندي ح يعمل شنو؟. في الابيض. في عطبرة. اذا كانت (الكمامات) بتلبسوها في استادكم..وامام الوافد الجديد النيل شندي. و موضوع كافالي دا ما بنخليه ..بنرجع ليه في الوقت المناسب. عشان نشوف ال (14) سبب التى كانت سببا في الاطاحة ب (كافالي) حسب كلام الكاردينال. بس دا ما وقتو. اي حاجة في وقتها احسن. الروقة سمحة. ما تستعجلوا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……. السيدة (ل) – اللون الاخضر ما شرط يكون اخضر لو لابس نضارة خضراء. وقرّط على كدا.
