دق الدلجة محمد عبد الماجد (بصمة) طارق العشري ظهرت اقصد (السبحة) حكاية التوم بنت حتل الدمل …الزولة دي ما عندها (حكاية). ولا في زولة في الاساس بالاسم دا. عشان من البداية اكون معاكم واضح. وما يبقى ليكم الكلام (تولاق). التولاق انا ذاتي ما عارفو. ما عاوز ابقى ليكم زي المسلسلات التركية ..البطل 36 حلقة بيضرب للبطلة تلفون. البطلة ما بترد عليه إلّا في الحلقة ال (37). 36 حلقة (جرس بس). زي حركات بناتنا ديل …الواحدة عندها حنك واحد. تقول ليك التلفون كان بعيد. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لكن طول ما الكلام جاب الكلام ..قالوا ليك في (هندي) عامل فيها زول خطير. هندي ما روسي. هندي مشلخ 191. زول صعب. وفاهم اي حاجة. وعارف اي شيء. الهندي دا ..كان مدرب (اسود)..مشى ليه على قرية وقال ليهم انا عندي قدرة ادخل (الارنب) دورة تدربية 90 يوم اقلب الارنب (اسد). زي بتاعين تعلم اللغة الانجلزية في اسبوع. ناس القرية قالوا ليه انت ما عندك موضوع. كلام زي دا ما بحصل. ولا في السينما الهندية ..انت زول بتبالغ ساكت. لو الارنب بتتقلب اسد ما في ارنب كان قعد لينا في الواطة. يعني تاني الاولاد في المدرسة بدل (أ) اسد يقولوا (أ) ارنب. الهندي قال ليهم ..جيبوا لي (الارنب)..وادوني بس (90) يوم ..لو ما قلبت ليكم (الارنب) اسد ..ما تختوا ايديكم في ايديا. الهنود طبعا ما عندهم حركة (ما تختوا ايديكم في ايديا)..دي دخلتها ليكم من عندي براي ..بي مناسبة هدف الشيخ موكورو. امس الشيخ موكورو جاب ليه قون في (الرابطة) فرتكها ليك ربط – ربط. لجنة الاستئنافات لو شافت الهدف دا ..تنزل الرابطة تاني من الممتاز. الهنود فتحوا ليك غلاط مع الهندي. في واحد منهم قال ليهم ..الغلاط على شنو؟..نحن نجيب للهندي ابو رأس دا (الارنب) ونعطيه مهلة (90) يوم ..نشوفو بيعمل شنو؟. جابوا ليه (الارنب)…وفاتورة الموية. الهندي قال ليهم فاتورة الموية في شنو كمان؟. قالوا ليه الجماعة ديل دخلوا لينا (فاتورة الموية) في اي شيء. الارنب الاجابوها ..في الارانب كانت ارنب (مضبلنة) كدا – بي قرش ما تشتريها. الهندي قال ليهم بعد (90) يوم لو قلبتها ليكم (اسد) بتدويني شنو؟. قالوا ليه بنديك (ملوة) دهب. الهندي قال ليهم تمام ..استلم ليك (الارنب) ودخل ليك بيها في معسكر مقفولة. لكن دي اول مرة اسمع لي ب (ملوة) دهب. الارنب بعد اسبوعين …اتنفشت كدا وجابت ليها حركات اسود. وناس القرية بيراقبوا في الموقف. الارنب بعد تلاتة اسابيع ..مشيتها في الشارع اتغيرت. الارنب بعد شهر صوتها بقى صوت اسد ..وشكلها شكل ارنب. والهندي شغال تدربيات ..صباح ومساء. وناس الحلة براقبوا في الموقف. بعد (40) يوم …الارنب لقت ليها ارنب تانية ضربتها ليك زي الما حصل شيء. ودا دليل (توحش). دليل تنكر للنوع. بعد (50) يوم …الارنب ..ضنبها بقى ضنب اسد عديل كدا. ناس القرية قالوا انتوا (الهندي) دا جادي في الشغل وإلّا شنو؟..نحن ملوة (الدهب) نجيبها ليه من وين؟. الارنب وقت قفلت الشهرين في (التدريبات) مع (الهندي) دا ..ناس القرية بقوا يلقطوا في (صيغة) النسوان. عاوزين يجمعوا ليهم (ملوة). والهندي شغال. وقت المدة قربت ..تدريبات الهندي بقت شغالة صباح ومساء. في اليوم ال (90) ناس القرية …اقتحموا ليك المعسكر عاوزين يشوفوا (الارنب) اتقلبت (اسد) بالتدريبات ..وإلّا الهندي دا بتكلم ساكت. دخلوا ليك المعسكر …لقوا ليك الارنب بتاكل ليك في (الهندي). الهندي مقطع لحمة – لحمة. واحد من ناس القرية ..قال ليه انت وقت عندك قدرة على ان تقلب (الارنب) ..اسد …بالتدريبات ..ما كان يكون عندك القدرة على اقناع (الارنب) انك (مدربها). او على الاقل كان قبل ما تصل للمرحلة الخطيرة دي ..تتصل بي ناس حرس الصيد. هسع لجنة الاستئنافات زي الهندي دا. قلبت (الوصيف) بطل. لكن اللجنة انضربت ..اتأكلت ..هسع في زول بيجيب ليك سيرة لسمير فضل. يمين سمير فضل دا تاني في لجنة شعبية ما يدخلوه. اللجنة دي سمعتها انتهت. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). حسب مفهوم الحلة (بصلة). والفول (زيت). والعرس (فطور عريس). والشهادة (لغة عربية). فان المدرب (شخصية). وطارق العشري عنده (شخصية) المدرب القادر على وضع (بصمته). امس قعدت للمباراة. شفت ليك طارق العشري قاعد ضمن افراد الجهاز الفني مبارك سليمان وهيثم مصطفى. وطارق العشري شارك في (التمرين) الاخير للمباراة رغم ان المباراة امس كانت تحت اشراف مبارك سليمان وهيثم مصطفى. لكن برضو وجود طارق العشري (مؤثر). القعدة دي ليها دور. لو ما طارق العشري …الشيخ موكورو دا لو لعب (11) سنة ما بجيب ليه قون زي القون دا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). بعد المباراة قلت احسن اعملها كبيرة واقول (بصمة) طارق العشري ظهرت في المباراة. رجعت تاني وقلت المريخاب ديل ما بريحونا. وح يطلعوا لينا ناس (سلك) ويقولوا لينا اصلو ما معقول. واصلو ما ممكن. وما في مدرب بصمتو بتظهر في 12 ساعة. دا مدرب وإلا رقم وطني البصمتو بتظهر سريع كدا. فكرت كدا ..وفتشت لي اي حاجة للعشري ..يكون عندها اثر ايجابي في المباراة. لقيت ليك طارق العشري شايل ليه (سبحة). قلت خلاص ..السر في (السبحة). بالمناسبة طارق العشري ..معروف بسلوكه المهذب ..واخلاقه القويمة ..هو مدرب قليل الكلام. وقليل التصريحات. مع كل الاندية التى قادها كان يظهر ب (سبحته)..وكان في كل هدف بيسجد حمدا لله. يعني (سجدة) طارق العشري ح نشوفها قريب ان شاءالله في مباريات الهلال. وسبحة طارق العشري …بتميز (الشيخ) طارق العشري. عشان كدا السلوك والانضباط ..ح يكون عنوان الجهاز الفني في الفترة القادمة. طبعا الكلام دا من غير ما نسحب كلامنا على قرارات الكاردينال الارتجالية والتى اطاح فيها بالفرنسي كافالي. الدفاع عن كافالي لا يعني اطلاقا الاساءة لطارق العشري. بل ان دفاعانا عن كافالي هو في حقيقة الامر دفاع عن (طارق العشري). عشان الكاردينال واعلامه ما يقلب لينا الشريط بعد (5) مباريات. الكاردينال كان قد ادلى بتصريح …لا يمكن ان يصدر من رئيس نادي. الكاردينال قال في تصريحات صحفية انه ممكن يبدل المدير الفني في كل دقيقة. هذا اعلان مبكر للحرب. وترويج لعدم الاستقرار. طارق العشري لو لم يجد الاجواء المناسبة والمناخ الملائم ما بقعد ليكم. برجع تاني يوم. مطلوب من الكاردينال ان يدعم الجهاز الفني ..وان يدعو الى الاستقرار بدلا من ذلك التصريح (الفوضوي). ما في رئيس نادي بقول كدا. دا ما كلام مسؤول. اقتربت مشاركة الهلال في البطولة الافريقية ..ودخل الممتاز للمباريات الحامية. هذه البطولات لكي يتقدم فيها الهلال لا بد من (الاستقرار) الفني بغض النظر عن المدرب الذي يقود الجهاز الفني. امنحوا طارق العشري الفرصة الكافية وادعموه. الهلال اكثر ما يحتاج اليه هو (الاستقرار). نفتقد الاستقرار. الموسم الماضي (الانسحاب) ..تسبب في عدم الاستقرار الاداري والفني للهلال. هذا الموسم لا نريد ان يهد الكاردينال استقرار الفريق باستبدال المدير الفني في كل دقيقة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… و الحمدلله الجوهرة الزرقاء ما ماسكها (مدير فني). لكن جماعتنا ديل لو عارفين ليهم حرف صيني واحد ..كانوا قالوا المهندس الصيني المسؤول عن بناء الجوهرة الزرقاء ..ما ناقش حاجة. كان طيروه. عبداللطيف بويا ..محتاج يقعد شوية في (الكنبة)..وجهة نظر ..ما قرار فني. بويا بيرتكب مخالفات من غير داعي ..وبتصرف في كثير من الاحيان بصورة تحرج الفريق. لو ان هناك مشكلة في دفاع الهلال ..فهي في الطرف الشمال. عمار الدمازين ..الثقة احيانا برضو بتكون مشكلة اذا كانت زايدة. اجمل ما في مباراة الامس هدف الشيخ موكورو ..ومحافظة الهلال على شباكه نظيفة. اللهم احفظها نعمة دائمة. ابيكو …النجم الدائم لمباريات الهلال. مكسيم …الزول دا لقيتوه وين؟. مباراة الهلال القادمة امام مريخ كوستي سوف تكون اكثر امتاعا ان شاءالله. شيبوب باقى ليه شهرين و22 يوم. ……….. السيدة (ل) – العيد لو وقع (جمعة)..الوقفة تبقى (الخميس)!!…دي ما عاوزة ليها مجهود (ذهني). وقرّط على كدا.
