دق الدلجة محمد عبد الماجد الرهيب عاوز ليه (مهاجم) قاطع و(مدافع) صلد و(فانلة) جديدة اي مدير فني عندما يتحدث عن استعداداته للمباراة القادمة وعن كروته الرابحة في المباراة بتحدث عن مهاجمه المحترف. دي الحاجة البنعرفها. وبنفهم فيها. بتكلم عن حارسه الاسطوري. لاعب وسطه الفلتة. جمهوره الذي لا يخسر فريقه وهو يسانده. يعني لغاية الساعة البكتب ليكم فيها دي ..ما في مدير فني واحد في العالم حدثنا مثلا عن ازمة الغاز. او ازمة الرغيف. او المواصلات. الكلام دا ما عندو علاقة بالكورة – ما تقعدوا تفتحوا في خشومكم متل الزول القالوا ليه رمضان قرب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). محسن سيد لمن يكون قايد ليه فريق فنيا وسوف يواجه الهلال بيحدثنا عن (فانلته). لا مهاجم. ولا حارس. ولا مجلس ادارة. ولا ازمة الغاز. فانلته التى خرج مرة وقال انه يتفأل بها ..وانه لم يسبق ان خسر بها. فانلتو دي لا عرفنها (بكيه). لا عرفناها (ميسي). اسمح لينا يا محسن سيد نقول ليك فانلتك دي (ليقاتها) ضعيفة. اتهردت عديل كدا. فانلتك دي من زمن صالح سنار بيلعب في الهلال ..وانت بتلعب بيها ضد الهلال. كل مباراة للهلال شابكنا عندي (فانلة) ما بخسر بيها. وكل مباراة للهلال ..شايفنو في بداية المباراة عامل لينا بيها (ارهاب) وحايم بيها في الخط. ونحن اصلا ما عندنا اعصاب. لو في زول فتح التلاجة ساكت في مباريات الهلال ..بنقول قون. قاعدين على الهبشة. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). محسن سيد بدل ما يهتم بفريقه ..بيهتم ب (فانلة). شغال بالفانلة اكتر من فريقه. تمرين المباراة بيعمل ليها غسيل. التسخينة (مكوة). وناس ديكور وعمر عثمان وخضر ما في زول شغال بيهم. محسن سيد تركيزو كلو على (الفانلة). عاوز يغلب الهلال ب (الفانلة). بعتمد على الشغل (النفسي) – عارف الهلال (فنيا) ما في فريق بيقدر عليه. هذا الكلام طبعا لو صاح .والفانلة ما بتخسر اصلو..محسن سيد مفروض يكون قائدا فنيا لفريق برشلونة الاسباني. لو (الفانلة) بتغلب ليك ..البقعدك من الجماعة ديل شنو؟. معليش يا (انريكي) شوف ليك (فانلة) تانية. اقصد شوف ليك نادي اخر. محسن سيد لعب فريقه مريخ كوستي 8 مباريات ..خسر في 6 مباريات وكسب مباراتين فقط. مع ذلك عندما كان يستعد فريقه لمواجهة الهلال كان بحدثنا عن (فانلته) التى لم يخسر بها. معقولة يكون محسن سيد في ال (5) مباريات خسرها مريخ كوستي لم يلبس (الفانلة). انت وقت بتغلب بيها …بتخليها في (الكنبة) ليه؟. اقصد بتخليها في (الدولاب) على شنو؟. زولكم لابسها في مباراة مريخ كوستي امام الاهلي شندي ..مريخ كوستي غلب الاهلي شندي برباعية. قالوا ليك مجلس ادارة مريخ كوستي (ناس يوسف ابوحميد) بدل ما يحفزوا اللاعبين ..حفزوا (الفانلة). غلبت ليهم. اللجنة الفنية ذاتها قالوا ليك بعد مباراة مريخ كوستي واهلي شندي اختارت (فانلة) محسن سيد كنجم للمباراة. ناس ديكور مساكين …يجقلبوا المباراة كلها والشكر ل (فانلة) محسن سيد. يغلبوا يقولوا ليك (الفانلة). يتغلبوا يقولوا ليك الحارس والحكم ..وارضية الملعب. خلاص يا يوسف ابوحميد ..مفروض بعد مباراة الامس تعملوا جزاءات على (فانلة) محسن سيد. هي الغلبتكم. اخصموا منها حق الغسيل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). الموضوع طبعا كلو (ارهاب) ساكت. وشغل نفسي لا غير. فقد تعودنا من محسن سيد ذلك منذ ان كان مديرا فنيا لفريق مريخ الفاشر. غايتو يا محسن سيد لو فانلتك دي فيها سر ..فسرها في انها بتحولك من مريخ لي مريخ. يعني من كي لي كي. محسن سيد درب فريق مريخ الفاشر. وجاء من مريخ الفاشر ودرب مريخ ام درمان. بعد مريخ ام درمان اتجه محسن سيد الى مريخ كوستي. عليك الله يا محسن سيد (الصبر) دا لقيتو وين؟. (المرارخة) ديل بتسحملهم كيف؟. يلقاهو وين كيف؟..وهو من سنة 2011 بحدثنا عن (فانلته) المبروكة والتى لا يخسر بها. اتوقع ان يقود محسن سيد في المرحلة المقبلة مريخ نيالا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). معقولة بس مريخكم خسران (5) مباريات من (7) مباريات قبل مباراة الهلال وبتتكلموا عن الانتصار عن الهلال. ما في فانلة بتغلب ليها فريق. ولا في حافز. ولا تصريحات. ألعبوا كورتكم بس…وكان عاوزين تتكلوا على (فانلة) محسن سيد واطتكم اصبحت. بتلحقوا الميرغني كسلا. عشان كدا مريخ كوستي في التسجيلات القادمة يشوف ليه حارس مرمى (خبرة). ويشوف ليه مهاجم قاطع كدا ومحترف. ومدافع (صلد). وتغيروا لينا بالمرة كدا (فانلة) محسن سيد. شوفوا ليكم فانلة (جديدة)..المشكلة واضحة بقت في (الفانلة). اشطبوها. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). هذا لا يمنعنا ان نقول ان مريخ كوستي امس امام الهلال قدم مباراة كبيرة. وان الفريق شكل ضغط كبير على الهلال في الشوط الثاني. بل ان مريخ كوستي منذ ان سجل هدفه في شباك الهلال ..تقدم وشكل ضغط كبير على الهلال. خاصة في اخر (20) دقيقة ..حيث كان من الامكان ان يدرك مريخ كوستي التعادل…لولا يقظة مكسيم وخبراته الكبيرة. الهلال في الشوط الثاني جنح الى تشتيت الكورة واخراجها برة الملعب ..تارة جدعة وتارة ضربة ركنية. مع تعدد المخالفات التى ارتكبها دفاع الهلال. هذا الامر لا بد للجهاز الفني ان يراجعها. ما كان للهلال ان يتراجع بهذا الشكل ..حتى وان كان منتصرا – لأن المحافظة على النصر تأتي بتأكيده. المهم عندنا ان الهلال تجاوز محطة صعبة ..وخرج بكامل النقاط من مدينة كوستي الجميلة. التى نتوقف اجلالا عند جماهيرها ..وملعبها الرائع. كذلك لا بد من القول ان اندية كوستي بتلعب كورة وبتقدم كورة حقيقية ..هذا الامر بالنسبة لمريخ كوستي والرابطة ايضا. الهلال الآن عبر محطة كوستي كما عبر من قبل محطة كادوقلي ..وانهى مباراته في الابيض امام هلال الرمال بتعادل. الدرب مازال طويل في الدوري الممتاز ..تبقت للهلال محطة شندي ومحطة عطبرة ..(ولاية نهر النيل). اضافة الى الفاشر التى سوف يلعب فيها الهلال في الدورة الثانية امام مريخها وهلالها. لكن نستطيع الآن ان نقول ان الهلال قطع 50% من مباريات الولايات الصعبة والشاقة. …………. و خطورة مباريات كوستي انها جاءت بعد اقالة المدير الفني للهلال كافالي. وبقت الخطورة ان طارق العشري حديث عهد بالهلال. الهلال سوف يلعب في المرحلة القادمة في الخرطوم قبل ان يلعب افريقيا ثم يأتي للمغادرة الى شندي ليلعب امام نيلها ..ثم عطبرة لمواجهة قمتها. عندما نصل الى هذا التوقيت سوف يكون الهلال ان شاءالله وصل الى المستوى المطلوب. طبعا ما عاوزين نقول اصبروا على العشري. الكلام دا لسه. بدري عليه. لكن فتحوا عينكم. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………… السيدة (ل) – الحلنقي منع محمد الامين (بتتعلم من الايام)..يعني تاني نتعلم ليكم من المساعد الاول لحكم المباراة. وقرّط على كدا.
