دق الدلجة محمد عبد الماجد بقت عليكم (نسور) وخراب (امير) نحن قاعدين في (قوز الرملة)…متفنين في التراب ولا جايبين خبر. ولا شغالين بالموضوع. وعشان اثبت ليكم ذلك ..كنا بنتكلم عن فريق (الارسنال)…قدر ما يبقى على (البطولة) يقوم يعتذر. الارسنال دا لو كان مشارك في بطولة براهو – بشيل فيها الميداليات البرونزية. الذهبية ولا تحلموا بيها مع (الارسنال) دا. قاعدين كدا – ولا هنا. ولا شغالين لينا بي زول. جانا شافع (مطيميس) – قال لينا (الريح ود سبط البلح) – وقعت فيه (صاقعة) ، قسمتو على اربعة. موبايلو طلع برة الشبكة. وهو ذاتو بقى يتكلم برة رأسو. بيجيب ليه في كلام (دُراب) ساكت – زي (شريط الكاسيت) وقت يعضّي. وقت يمسك في الترس. صوت حمد الريح يبقى ليك زي صوت الريح ود حمد. بقلب براهو. يدخل ليك (الرحيل) في (الوصية). (الساقية) يجيبها ليك في (يا مرية). البلم الدوش مع صلاح احمد ابراهيم شنو؟. لو ما ساي. قاعدين كدا. عاوزين نقوم نمشي على (الريح ود سبط البلح) بعد الصاقعة الوقعت فيه – (خليفة ود الشارع الطويل) ، قال لينا دي ما (صاقعة) دي (تمانية) الهلال. الزول دا مستهبل ساكت. رجعنا قعدنا. قلنا ان بقت على (تمانية) الهلال ان شاءالله يموت فيها – عامل (اضنينو) المتل سرج العجلة الدبل. التمانية بتنتهي منو؟. بتكتلو. الزول دا فد قون في (النسور) بقوم ليه نفسو – هسع مع (التمانية) دي لو اتماسك بكون فوت. لو قريب في احمد شرفي. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). التمانية ذاتها كتيرة. لو جينا للجد – كترتوها. مسختوها. تمانية ليه؟ – انتوا قالوا ليكم ناس (الامير) ديل شغالين في (الحصاد). عندهم (نفير). شغالين في (الهجرة). وزارة الرعاية. تمانية دي نحن زمان في (جداول الضرب) قاعدة تجهجهنا – حافظين الجداول كلها – إلّا جدول تمانية. تجوا انتوا يا بشه تعملوها في (الكورة). تمانية مع (السكرى) بتكتل. مع الضغط – موت جاهز. لو عندك (صلعة) وراثية ساكت مع (التمانية) دي ممكن تروح فيها. الفرحة البتمرق في الحوش – بتكرفس (الملايات). وتمد عيونك زي (اول الشهر). الطعم بيبقى ليك – طعم صلصة حرقانة ..صلصة حرقانة. عندنا جلاليب (زُرق) ما بنطلعها ونلبسها إلّا لمن الهلال يغلب (تمانية). بندسها. بنفرها من (الدولاب) – ونخوجل بيها في الحلة….نشق بيها الفريق. ونقيف في حيطة (سليمان ود الكُتر). نضمينا بيبقى براهو لمن الهلال يغلب (تمانية). لا بتعرفو انجليزي – لا بتعرفو فرنسي. شيء ملخبط كدا. بين بين. الدوش مع شوية عاطف خيري. وقت الهلال يغلب تمانية..الما عندو (منديل) بيعمل ليه (منديل) لزوم (القشرة)…والفكة في النفس. لو ما عاوز تعطس ..بتعطس. قشرة ساكت. بنفكها في نفسنا. نعمل شاي اللبن – بدون (لبن) – مع (التمانية) دي (اللبن) نعمل بيها شنو؟. نقننو بدون (قُنانة) – بقول ليكم من الصباح هو شاي لبن بدون (لبن) ، يعني صعبة عليه يبقى (مقنن) من غير (قُنانة). يعني بقت على (القُنانة). القُنانة مع اقوان بشه الاربعة نعمل بيها ايه؟. تخلوا الموضوع الرئيسي وتمسكوا ليك في حاجات هامشية. يزيدوا ليهم (الموية)..يكلمونا عن برمجة النيل الازرق في رمضان. مالكم انتوا؟. شوفوا (نسوركم) وين؟. اطلعوا منها. مفروض بعد (التمانية) دي – تقيفوا من الباسطة. والطحنية. والفول المصلح. والكرسي العلي الشباك. هوا نضيف ..ما في ليكم. بشه دا. بشه الشفوتو امس بي اقوانو الاربعة دي لو مسّكوه مشروع الجزيرة – (القمح) في (الصيف) بينجح ليكم. خلوه الشتاء. كمان نحن بنلعب. لو ناس المريخ عاوزين يشتكوا بعد المباراة مفروض يشتكوا. ما تصبحوها. التمانية كتيرة. وللامانة كدا – بشه دا لو امس دخل المباراة ما شايل ليه (سماعة) طبيب بكون بالغ. الشغل البعمل فيه بشه دا شغل زول شايل (سماعتو). بشه بتحسس (الهدف) قبل ما يسجلو. مرتضي حارس الامير من الاهداف التمانية بقى زي استاذ الجغرافيا البدرس ليه في حصة انجليزي. ما فاهم فيه اي شيء. مرتضي حارس الامير – من الاهداف التمانية بقى زي (جدودنا زمان وصونا على الوطن). ما عارف (الشبه) دا جاني من وين؟. المهم جاني وكتبتو ليكم. حاجة لقيتها قدامي كدا – وركبتها ليكم في النص. ما عارف. لكن شاعر انو (التمانية) دي كتيرة. في طعم (حرجل). و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). لمن الهلال يغلب (تمانية) – بنشغل (وردي) بدون (وردي). وندور ليك في (بشوف في شخصك احلامي)..من غير (نص)…النص نعمل بيه شنو مع البعمل فيه (كاريكا) دا؟. نحن وقت يجيبوا لينا الواقع قدامنا – الاحلام نعمل بيها شنو؟. امس من الفرحة – فتحت الموبايل – لقيت ليك الموبايل بي رصيدو وهو (جنيه) ما كان فيه. وقفت في (العداد) – لقيت ليك عداد الكهربة – مستف كهربة. جات من وين؟…ما عارف. الكهربة دي جنت؟؟. فتحت (الدولاب) لقيت ال (21) جلابية ..مغسلة ومكوية. اتكوت متين ما عارف؟. الله يسألني ما كانت (مكوية). لمن الهلال يغلب (تمانية) – عصير الليمون بنعملو بدون (ليمون). كمان (الليمون) مع (المرارة) البفقع فيها (الشيخ موكورو) نعمل بيه شنو؟. غايتو شيخ موكورو دا – امس بكون دخل بي (سبحتو). وابريقو. بشه بي السماعة. والشيخ موكورو بي السبحة. الزول دا كان بعمل في عمائل – والله العظيم لمن شلت هم لي الجهاز الفني واحتياطي فريق الامير. الناس ديل وقت كانوا بجيبوهم في (الكنبة) – كان بجيبوهم ليك زي بتاعين (تهريب البشر). قراصنة بس. قاطعين. بجيبوهم ليك مخلوعين جنس خلعة. غايتو الزول الكان واقف في الخط من ناس الامير – (التمانية) دي بتكون جابت ليه (تحرجل) في القصبة الهوائية. ما تسألوني من (التحرجل) – عشان انا ذاتي ما عارفها ؟…لكن (القصبة الهوائية) ممكن اباصيها ليكم. بمنطقها ليكم زي (الدُراش). ما تسألوني اكتر من كدا. جنكم اسئلة. ما تبقوا لي زي امتحان الجغرافيا. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). وقت الهلال يغلب (تمانية) بنقيف في (الركن) – المريخاب بخلوا لينا (الشارع). من يشوفنا – يتغابوا فينا العرفة. عاد يقولوا شنو؟. بقت عليهم (نسور) وخراب (امير). يقولوا ليكم شنو؟. يوصولها ليكم كيف؟. يحلوها بي ياتو طريقة؟. اقعد ليكم في الواطة دي – واشرحها ليكم قون – قون. تمانية اقوان. اسبوع المرور العربي في مارس؟. البلد دي ما فيها (سمسم). ما فيها (عدس). تمانية كتيرة. اي (غفير) مدرسة مفروض يفتحوا معاه (تحقيق). بتاع (الفرن) ما يخلوه. التمانية دي في (الرغيف) – الواحد وقت يقولوا ليه جيب ليك تمانية رغيفات بشوفها كتيرة. قابلكم زول بيشتري ليه تماينة كيلو باسطة!!. قابلتكم دي؟. من الله خلقكم – لاقيتو ليكم زول شايل ليه تمانية كيلو موز!!. يا جماعة الحقيقة – مفروض الزول يقولها. كان على الامير. وكان على النسور. تمانية!!. السماية ذاتها بيعملوها في سبعة!!. غايتو اظن كدا – والله اعلم (طبق النيلين) دا امس حولتوه (شلق) ما (شرق). بعدين يا ناس الامير ما كان تلبسو (ابيض). امس كان تلبسو (احمر). عشان التمانية تبقى منطقية. الغريبة امس لا في مطرة. ولا في كتاحة. ولا في حُفر. معقولة (ازمة الغاز) تعمل كدا؟!!. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ………. و هسع (الرصة) دي – الحفلة دي لو كان فيها (شيبوب) كان بتقيف في التمانية. شيبوب لو نزل مع ناس بشه ديل (الطماطم) بتدق الدلجة. بتنزل الواطة. العنب ذاتو بيرخص. العنب – العنب – العنب. حالتها دي بدون (شيبوب). العنب – العنب – العنب. المباراة القادمة مع منو؟. العنب – العنب – العنب. التمانية القادمة ..تمانية ياتو فريق؟. العنب – العنب – العنب. وضحوا لينا الصورة. عشان نبقى عارفين بس. العنب – العنب – العنب. عاوزين نفهم!!. احكوا لينا. قولوا لينا شوربة العدس ممكن تبقى بدون عدس. غايتو امس جربنا اي حاجة. العنب – العنب – العنب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). ……….. السيدة (ل) – افتحي ليك قوس واكتبي فيه (اسطوانة غاز) ، وما تجيبي سيرتي!!. وقرّط على كدا.
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
