محمد الطيب الأمين الخياطة (داير ما يدور) !! * قديماً إتفق علماء علم الجمال على أن (الخضرة والماء والوجه الحسن) هي عناصر الجمال الثلاثة .. * هذا يعتبر مثلث (الجمال) .. * وإذا توفرت (الحضرة والماء) ولم يتوفر (الوجه الحسن) فهذا لا يسقط الجمال .. * وإذا توفر (الوجه الحسن والماء) ولم تتوفر (الخضرة) فهذا أيضاً لا يسقط الجمال . * والمستفاد أن لكل شئ عناصر .. * ولذلك أعتقد أن عناصر الخسارة ب(السبعة) في كرة القدم هي : (البرد ومازدا والأردن) .. * إذا توفرت هذه العناصر الثلاثة سيخر الفريق ب(السبعة) .. * وحتى لا يظن البعض أنني أقصد بهذا الحديث المريخ الشهير ب(المدفور) أقول: أي فريق إتوفر ليهو (مازدا والبرد والأردن) ح يخسر بالسبعة .. * المريخ الآن توفر عنده (اثنين) من هذه العناصر الثلاثة، والاثنين هما: (البرد ومازدا) .. * ناقصاكم الأردن بس .. * والله حقو تمشوا الأردن زيارة مع البرد ده .. * البرد ومازدا والأردن إرتبطوا بذكريات مريخية صعبة جداً .. * أول مرة في حياتي أشوف لي فريق بيخسر بسبب البرد.. * وغايتو جنس غايتو .. * في هذه الأيام أصبحت (الجوهرة الزرقاء) مثل (شيلة العروس) .. * كل زول عايز يجي يتفرج قبل الإفتتاح .. * زمان لما كانوا الناس أهل وأحباب وكانت النفوس طيبة (شيلة العروس) الحلة كلها بتتفرج فيها .. * عرض (الشيلة) للجيران والأهل يستمر حوالي (21) يوماً.. * كل يوم بالنهار تشوف ليك مجموعة من النسوان ماشات يشوفن شيلة العروس .. * وبالعصر مجموعة جديدة من النساء ماشات يشوفن .. * وبعد المغرب مجموعة من البنات ماشات يشوفن الشيلة .. * وأي مرا من النسوان ديل بيكون عندها ملاحظة على حاجة معينة في الشيلة .. * في نسوان بيقولن (التياب ضيقة) وفي ونسوان بيتكلمن عن (الكارينات) وعن (طقم التوب) وعن (الشبشب) الداير (خياطة داير ما يدور) .. * زمان في حلتنا عندنا مرا كل ما تشوف ليها شيلة جديدة بتقول لأم العروس: (الشباشب دي لازم تخيطوها داير ما يدور) .. * المرا دي عندها غرام مع الشباشب .. * زي مازدا عندو غرام مع (التلاتات) .. * الآن الجوهرة الزرقاء بقت زي (الشيلة) .. * آخر وفد زار الجوهرة وإتفج على (الشيلة) هو (معتمد أم درمان) وكان ذلك أمس الأول .. * معتمد أم درمان أشاد بالعمل الذي تم وأكد أن المحلية ستتكفل بسفلتة الشوارع المؤدية للجوهرة .. * يا سعادة المعتمد كنت داير الكاردينال يسفلتها وألا كيف ؟؟ * سفلتة الشوارع هي مسؤولية الولاية والمحلية حتى وإن لم تكن هنالك جوهرة .. * عموماً نرجع ونقول للمريخاب: يوم الخميس عازمنكم الإفتتاح لكن ما تجوا .. * عازمنكم وما تجوا .. * أحضروا الإفتتاح في قناة الهلال .. * وأقول ليكم حاجة .. أي مريخابي يحضر حفل إفتتاح الجوهرة عبر شاشة قناة الهلال ما عافين ليهو .. * بس كده .. * المهم .. * غداً يغادر إلي القاهرة مهاجم المريخ السيراليوني فوفانا وذلك من أجل الحصول على (حقنة معينة) ومن ثم يعود .. * إعلام المريخ السالب قال وأكد أن السيراليوني إصابته تحتاج ل(حقنة معينة) .. * وأنا والله أدفع (7) سنوات من عمري الوحيد ده وأعرف ال(حقنة المعينة دي حقت شنو) ؟؟ * حاجة تكسف والله .. * كسب منتخبنا الوطني الرهان في أولى مبارياته أمس وقد ظهر أفراده بمستوى جيد قياساً بفترة الإعداد (الخالية من المباريات الودية الحقيقة).. * منتخبنا يمكن أن يظهر بشكل أفضل في اللقاء القادم وتبدو حظوظه كبيرة بعد فوز الأمس بخطف إحدى بطاقات الترقي للدور القادم .. * بطولة الأمم الأفريقية للمحليين تضم لاعبين صغار في السن وعلى مستوى عالي من المهارة والقدرات البدنية .. * نرجو من الكاردينال أن يركز في هذه البطولة حتى يجد من يدعم به صفوف الهلال في التسجيلات القادمة .. * البطولة دي تعتبر (بترينا للعرض) .. * الكاردينال وفي (تصريح مُعيب جدا) قال : تلاتة شهور ما لاقي لي محترف سوبر .. * معقولة دي ؟؟ * والله تلاتة شهور دي لو عايز ليك (إبرة في كوم كوشة) بتلقاها .. * مشكلة الكاردينال مرات (بيسرح بينا) .. * تلاتة شهور دي لو جدعت ليّ (تلجة جوة البحر بلقاها ليك) .. * هسه ما فات شئ .. * ركزوا في هذه البطولة حتى تختاروا مهاجم سوبر ويمكن الإتفاق معه منذ الآن .. * أعلن مجلس المريخ أنه اليوم سيقوم بتقديم المدرب مازدا للإعلام .. * المُقدم ما مُوصل .. * مازدا كمان عايز ليهو تقديم ؟؟ * مساكين ناس المريخ عاجباهم (حركة تقديم المدربين للإعلام).. * عجبتهم الحركة لكن ما لقوا ليهم مدرب أجنبي يقدموه للإعلام .. * ما لقوا مدرب أجنبي عشان كده إتوكلوا وقالوا ح يقدموا مازدا .. * مازدا سيحدثنا اليوم عن تخطيطه الفني لقيادة مريخ (2018) .. * أحسب أن إعلام المريخ ومن خلال المؤتمر الصحفي اليوم سيسأل مازدا عن ما هي خطته لمحاربة (التلاتات) .. * أحسب ذلك .. * وأي زول طبعاً حر في (محاسيبو) .. * محاسيبو ب(الصاء) ؟؟ * وغايتو الله يكفينا شر (المُصدي) اللمعتو الأيام .. * ونركب صافنات ونجيبة (حسانية) وأصلو الزول بيموت والذكرى تفضل حية .. * و..و.. * والريد البعيد مشوارو أنا آه من نارو..