محمد عبدالماجد للهلال عدد من المباريات المؤجلة في الدوري الممتاز، الى جانب ان الهلال يركز هذه الأيام في البطولة الافريقية (الكونفدرالية) ، لكن مع ذلك فان الهلال وهو (من منازلهم) متصدراً للدوري الممتاز. ولا في فريق بيلحقنا. نتضرع على كيفنا. نقدل فوق عدلنا. 47 مباراة ، باسم الله ما شاءالله من غير خسارة. 47 مباراة ولا كلمة. يمكن للهلال ان لا يلعب في الدوري الممتاز الشهر القادم كله، مع ذلك فان الهلال سوف يبقى محتفظاً بصدارته لمجموعته. يقيف بويا. نتحرم من نزار حامد. نتحرم من عمار الدمازين. مكسيم يزعل وما يلعب. نلعب بالصف التاني في الممتاز. نشيل المدرب. نجيب محمد الطيب مورينهو. نطلع من دوري ابطال افريقيا. 4 شهور ما نصرف مرتبات. برضو بنحكم صدارتنا على الممتاز. ربما ذلك، لأن الممتاز البطولة المحلية الاولى اكثر تعلقا بالهلال من تعلقه بها، فكل الارقام القياسية يحققها الهلال في الدوري الممتاز. يبقى الممتاز من البطولات المحببة للهلال. أمس فازت برشلونة على فالنسيا في الدوري الاسباني وكان احتفال برشلونة بوصلها للرقم 39 من غير هزيمة في الليغا الاسبانية. برشلونة كسرت أمس رقم ريال سوسييداد الذي كان يحتفظ منذ 1979 م – و 1980 ب (38) مباراة من غير خسارة. ريال سوسييداد في 38 مباراة التي لم يخسر فيها تعادل 17 مرة ، مع ذلك حفظ ذلك الرقم لريال سوسييداد. برشلونة في 39 مباراة تعادلت 7 مرات فقط. الهلال في الدوري الممتاز لم يخسر بحمد الله وفضله في 47 مباراة ، وهذا رقم يعتبر (قياسياً) وننتظر بتوفيق من عند الله ان يمضي فيه الهلال بعيداً ليبقى الدوري الممتاز خالياً من (الهزيمة) بالنسبة للهلال. الله يحفظ لينا تلك الأرقام ، ربنا يزيدها لينا. الرقم يمكن ان يكون عالمياً فاحرصوا على الحفاظ على مثل هذه الارقام. ما عاوزين نتكلم عن الارقام القياسية والتي لم يحققها نادي مع نده في العالم كله. نكتفى بأن المريخ مرة شال الكورة وهرب من أمام الهلال. المريخ ورغم انه يلعب في مجموعة لا يوجد فيها الهلال ولا هلال الابيض ولا الخرطوم الوطني ولا الشرطة القضارف ولا أهلي مروي ولا الامل عطبرة ، إلّا انه مازال يترنح في المجموعة الثانية. يترنح في مجموعة فيها مريخ الفاشر وود هاشم سنار والاهلي الخرطوم ومريخ نيالا. تخيلوا لو ان أهلي مروي كان في مجموعة المريخ. 6 ما كان بتثبت الأهلي مروى وقت يلعب أمام المريخ. المريخ يتبادل الصدارة مع مريخ الفاشر الذي كانت له صدارة الدورى الاولى في مرحلة المجموعات. المريخ كان وصيفاً. والمريخ الآن يتساوى مع مريخ الفاشر في النقاط، ولا يتفوق على مريخ السلاطين إلّا في (الاهداف). ومريخ الفاشر لعب سنترليق في الموسم الماضي من أجل البقاء او الهبوط من الممتاز. مع ذلك ناس المريخ لسانهم قدر كدا. الجماعة ديل متين ح يشعروا بالخجل؟. متين ح يحسوا شوية؟. بقينا نخجل ليهم نحن. الجماعة ديل بي حالتهم دي قاعدين يتكلموا عن ضربة الجزاء التى احتسبت للهلال امام الاهلي مروي في مباراة انتصر فيها الهلال برباعية. وما في أي زول فيهم جاب سيرة ضربة الجزاء التي ارتكبت للهلال في مباراة حي الوادي نيالا مع محمد موسى الطوربيد ولم يحتسبها الحكم. دي بيعملوا فيها رايحين. اتخيلوا نحن في اعلام الهلال ما وقفنا في الضربة دي. عشان الامور بقت عندنا عادية. أكبر من ان نقيف لينا في ضربة جزاء لم تحتسب للهلال. المريخ بهذه الحالة عاوز يمشي يشارك في البطولة العربية. الجماعة ديل نسوا هزيمة (الوحدات) سريعا. لو نسيتوا قديمكم نذكركم. لو بتنسوا ..نقول ليكم. على العموم نحن في البطولة العربية هذه المرة على موعد مع (السبعات) ويمكن كمان تجيب لها (تسعات) عديل كدا. هذه المرة ح نشوف اسماعيل يس في البطولة العربية. الضحك سوف يشرطكم. ناس التاج يعقوب وضياء الدين وياسر قصاري وصلاح نمر ما بثبتوا. ما بنستروا ليكم. ناس كيتا ..وصدام سنجة ومحمد داؤود وصالح العجب ما بنجيب ليكم سيرتهم. ديل ما بنسألكم منهم. صدام سنجة دا قالوا لو قعد في الكنبة (ثغرة). صلاح نمر في البطولة العربية السابقة ظهر في لقطة وهو قاعد يتشهق. شالتو نومة. العرب كلهم قعدوا يتكلموا علينا. عاوزين تلعبوا في البطولة العربية بي ضفر والتاج ابراهيم وخالد النعسان. قاعدين تبالغوا. بتبالغوا عديل كدا. مباراة المريخ أم درمان ومريخ نيالا ، ومع ان الأول يتصدر مجموعته والثاني يتذيلها، إلّا انه ما كان في أي فرق بين المريخين. واحد. لخبطة ودوشة. وعك. صلاح نمر ذاتو ما بتعرفو لاعب مع منو؟. مرة كدا. ومرة كدا. وكان لاحمد آدم وضح انه ثغرة كبيرة في دفاع المريخ ، أي فريق عاوز يغلب المريخ يركز على (بيبو). ركزوا على (بيبو) ثغرة 5 ضلف. بيبو يلقى ليه كورة ثابتة يجيب منها قون، وينوم على كدا. التش ذاتو الايامات دي (فكت) منو؟. يقوم ويقع. يا زول مالك؟. التش عاوز يمر ليه من تلاتة لعيبة ثم يمرر الكورة بعد ذلك. وهو ما بقدر على الكلام دا. عشان أي ضغط عليه بيفقد الكورة. اضغطوا على التش تهزموا المريخ. مريخ نيالا أنهى الشوط الأول متقدماً على المريخ ام درمان بهدفين دون رد. ما كنت بعرف مريخ ام درمان لو ما الحكم حاول يتظارف ويتراشق قام احتسب ضربة الجزاء. الحكم من احتسب ضربة الجزاء قدرت افرق بين مريخ أم درمان ومريخ نيالا. أصلاً مريخ أم درمان بتعرف بي ضربات الجزاء. عرفت ليكم مريخ أم درمان طوالي. لكن هسع وبعد التعادل 2 / 2 مع مريخ نيالا ، تعالوا نشوف الفرق شنو بين مريخ أم درمان ومريخ نيالا. مريخ ام درمان بكتبوا عنه ناس معاوية الجاك وهيثم كابو. شغالين (نفخ) في مريخ أم درمان. مريخ نيالا ما عندو كلام زي دا. مريخ ام درمان عندو (مجلسين). مجلس شرعي. ومجلس حكومي. مريخ نيالا عندو فد مجلس. مريخ أم درمان عندو خدمة (الحكام). مرة ضربات جزاء. ومرة حالات طرد. مريخ نيالا ما عندو الحبة. مريخ نيالا ما عندو (جوهرة). ومريخ أم درمان برضو. مريخ نيالا قاعد ساي، ما مشارك في أي بطولة افريقية. ومريخ ام درمان برضو. مريخ نيالا ما عندو (قناة). ومريخ أم درمان برضو. الناس ديل على كدا يبقى ما عندهم أي فرق من مريخ نيالا. مريخ نيالا جاب هدفين في مريخ ام درمان في الشوط الاول. ومريخ ام درمان عمل نفس الشيء في الشوط التاني. عشان النتيجة تبقى 2 / 2. الناس ديل في (النتيجة) متعادلين. مريخ أم درمان ما عارف يلقاها من منو؟. من مريخ الفاشر (المتصدر). ام من مريخ نيالا (المتذيل). حاجة عجيبة. ………… ملحوظة : بقيتوا تلخبطوا الزول. هوامش الاتحاد العربي عندما رفض الهلال المشاركة في البطولة العربية لماذا لم يمنح فرصة الهلال فريق سوداني آخر. معقولة السعودية 4 فرق. مصر 3 فرق. وتونس 3 فرق. والسودان فريق واحد. فرصة السودان منحت لتونس. نحن (الدولارات) ما بتزغلل عيونا. شيلوا دولاراتكم عليكم وقت دي لائحتكم. يحفظ للكاردينال ويحسب له حضوره للسودان من الخارج ليكون مع الهلال في كل المباريات الصعبة. هذا أمر يجب ان نحفظه للكاردينال. يتواجد رئيس الهلال في الأوقات الصعبة. ووجود الرئيس مهم، على الاقل فان رئيس الهلال أنهى مشكلة اوتارا. كما حسم أمر شيبولا. التجديد لشيبولا وحسم أمره سوف يجعل اللاعب يقدم المزيد في المباريات القادمة. اوتارا ومكسيم يحتاجوا للدعم. الدعم المعنوي قبل المادي. المحترفون بصمتهم واضحة في الملاعب. المريخ اصبح بدون بصمة عشان ما عندو محترفين. مرة فوق. ومرة تحت. على الهلال ان يحافظ على تلك الاسماء التى يملكها. لا نحتاج لأكثر من محترف سوبر في فترة التسجيلات القادمة. لن تجدوا أفضل من مكسيم. ولن تجدوا افضل من اوتارا وشيبولا. اما جيوفاني فهو يقدم في بصمة لوحده. الهلال هو النادي العربي الوحيد الذي استطاع ان يقول للاتحاد العربي لا. حتى الأهلي المصري وبسبب سيطرة تركي آل الشيخ عليه ما استطاع يقول لا. على العموم الدولارات بتعمل اكتر من كدا. الحمدلله الهلال عندو مناعة من هذه الاشياء. الهلال عندو موقف. والموقف في حد ذاتو جدير بالاحترام والتقدير بغض النظر عن أي شيء آخر. المجلس البيقدر يقول لا ما تخافوا عليه. ونحن عندنا مجلس قال لا. والف لا كمان. الهلال غادر صباح اليوم. كل التمنيات والدعوات للهلال السوداني بتحقيق انتصار على اكوا يوناتيد في نيجيريا. وان شاءالله الهلال يعود ببطاقة التأهل لمرحلة المجموعات. وابقوا على سفر. …………. عاجل : اذا كنتوا مع مريخ نيالا بتعملوا كدا، مع الهلال وهلال الابيض بعدين ح تعملوا شنو؟.
