للامانة كدا ناس مريخ الفاشر مشوا قدام عشان ما عندهم (عبدالصمد) و(مقصورة طايرة) لمن مزمل ابوالقاسم يكتب (المريخ ابوزرد) بكون قاصد ياتو مريخ؟..مريخ الفاشر ام مريخ ام درمان؟ غايتو لو بتفكروا يا ناس المريخ مباراة الاياب مع كابوسكورب يلعبها ليكم مريخ الفاشر مريخ (السلاطين) اتقدم على مريخ (بلة وضفر وجعفر)...علي جعفر دا لو لعب في (ريال مدريد) بنزلوا الدرجة الثانية * ما عاوز اقول ليكم كرتونة الساردين فيها كم علبة؟. * بقول ليكم ..انتوا ما تتكلموا. * فيها (3) علب بس. * ما تزعلوا. * دا لو ما بقى فيها علبتين. * الزمن بقى صعب ..اي حاجة نقصت. * ما عاوز اقول ليكم دستة البرتقال فيها كم برتقالة؟. * بجاوب ليكم ..انتوا ما تقولوا شيء...خايف عليكم من (الاحراج). * دستة البرتقال فيها (4) برتقالات ...المحلية قامت بالباقي. * كيلو الموز فيه كم كيلو؟. * فيه (وقية) واحدة. * الاسبوع بقى فيه اربعة ايام. * الواحد يطلع الشغل الصباح يوم (الاحد) ..يرجع في نفس اليوم اخر اليوم (الخميس). * اي حاجة اتغيرت. * مريخ الفاشر ...اتقدم على مريخ ام درمان. * يا شماتة أحمد بدير فيكم؟. * أحمد بدير دخلو شنو؟. * وينها البطولات المحمولة جوا؟. * وينو معتصم جعفر؟ ...(الاتحاد) شغال تحت امركم ..ويتقدموا عليكم مريخ الفاشر. * مريخ (السلاطين) اتقدم على مريخ بلة جابر وضفر وعلي جعفر. * علي جعفر دا لو لعب في (ريال مدريد) ينزلوا الدرجة الثانية. * يا شماتة أحمد حلمي فيكم. * أحمد حلمي دخلو شنو؟. * يا سلك مفروض تذاكروا (مريخ الفاشر) كويس. * تشوفوا حسن كمال. * وعجبكو الهندسية. * مالكم ومال راجي عبدالعاطي؟. * اكتبوا لينا يا سلك عن (مريخ الفاشر)..تحاشيا للاحراج. * اكتبوا لينا عن شرف الدين أحمد موسى ..المدرب الذي قاد المريخ (الابن) الى مركز الوصافة ليكون وصيفا للهلال في الدوري الممتاز. * بعدين ابشركم ..مريخ الفاشر برضو عندو (والي). * يعني الحالة واحدة. * الوالي بتاع مريخ الفاشر عثمان محمد يوسف كبر...ما بسأل في والي المريخ. * بس للامانة كدا ناس مريخ الفاشر ما عندهم (عبدالصمد) وما عندهم (مقصورة طايرة). * اصلو انتوا ما في شيء مضيعاكم يا ناس مريخ ام درمان غير عبدالصمد والمقصورة الطايرة. * والخرفان الكتيرة. * ناس مريخ الفاشر ديل الى الان ما ضبحوا ليهم (خروف). * ماشيين بالبركة ساكت. * ولا بختاروا (الحكام). * ولا عندهم (وفد مقدمة). * شغالين كيري. * الزعيم منو هسع؟. * مريخ ام درمان ام مريخ الفاشر؟. * يا شماتة محمد مهدي الفادني فيكم. * محمد مهدي الفادني دخلو شنو؟. * مباراة القمة ..هلال مريخ ام درمان – ام هلال مريخ الفاشر. * بقينا نتلخبط. * مريخ الفاشر ...ما اكتفى بالفوز على (المريخ) في ملعبه ووسط جمهوره وبدون شرطة في الاسابيع الماضية. * مريخ الفاشر ما اكتفى بالفوز على مريخ ام درمان ومريخ الفاشر بيلعب ناقص ..ومريخ ام درمان احتسبوا ليه (ضربة جزاء). * مريخ الفاشر احتل موقع المريخ (الاب) واصبح مريخ الفاشر (وصيفا) للهلال..بينما تدحرج المريخ الاب ليصبح (وصيفا) لاهلي شندي. * فضيحة السواد. * وعيب الشوم. * يا شماتة دريد لحام فيكم. * دريد لحام دخلو شنو؟. * دي شنو اللخبطة دي؟. * المريخ (الاب) اصبح في المركز الرابع والمريخ (الابن) في مركز الوصافة. * بقينا نخجل ليكم. * انتوا بكري المدينة دا سجلتوه عندكم عاوزين تفتحوا ليه (بنشر). * عاوزين تعملوا ليه (موجات صوتية). * المريخ ام درمان جاء في المركز الرابع مع (الخرطوم الوطني). * المركز الرابع (مشترك). * الغريبة المريخ والخرطوم الوطني رعايتهما طالعة من جهة واحدة. * الاهلي شندي قفز للمركز الثالث. * المريخ الفاشر (المريخ الابن) جاء في المركز الثاني. * المريخ ام درمان (المريخ الاب) جاء في المركز الرابع ..وكمان (مشترك). * يا شماتة سعاد الصباح فيكم. * سعاد الصباح دخلها شنو؟. * ما قادرين نصدق. * الكلام دا جد. * الكلام دا منطقي. * ما في احترام. * ما في تقدير. * ما في مسؤولية. * ما في احساس. * ما في شعور. * الابن بتقدم على الاب. * عدم مسؤولية. * عدم احترام. * عدم تقدير. * و الله زمان الواحد يركب ليه (حافلة) الزول الكبير لو ما لقى ليه مقعد فاضى في الحافلة يقيفوا ليه (26) نفر في الحافلة. * الحافلة كلها تقيف. * (26) نفر يقيفوا لي عمك ..بما فيهم (السوّاق). * تعال شوف هسع ...(المريخ الابن) بتقدم على (المريخ الاب). * زمان ما في كلام زي دا. * ولا بقبلوا بالحاجات دي. * دا شنو عدم الاحترام دا؟. * يا شماتة عبدالرحمن الابنودي فيكم. * عبدالرحمن الابنودي دخلو شنو؟. * لكن تستاهلوا يا ناس المريخ ..انتوا فاضيين لي من الدفاع عن بكري المدنية. * اها بكري المدينة جابكم في المركز الرابع (مشترك). * اصلو ما صاح. * ولا جميلة من المريخ الفاشر. * في زول في الدنيا بتقدم على والدو. * الزمن اتغير. * الزمن دا عادي جدا تلقى (الابن) عندو تلاتة عربيات ..و(الاب) حايم بالركشة. * انتوا يا ناس المريخ (الابن) ما كفاية عليكم انكم غلبتوا المريخ (الاب) في استاده وبدون شرطة وبتلعبوا بي عشرة. * ما كفاية. * كمان عاوزين تتقدموا على المريخ (الاب) في روليت الدوري الممتاز. * و الله بالجد بقى ما في احترام. * ما في تقدير. * ولا في بر بالوالدين. * يا شماتة شيرين عبدالوهاب فيكم. * شيرين عبدالوهاب دخلها شنو؟. * زمان وقت اسمع جمال الوالي بقول في المريخ في معارضة مستترة. * في معارضة مختفية. * كنت ما بصدق. * يا دوب صدقت كلام الوالي (والي مريخ ام درمان) عشان الامور تبقى ليكم واضحة. * لو ما في معارضة للمريخ ..ما كان مريخ (الابن) بيحتل مكانة المريخ (الاب). * هسع الواحد مع اللخبطة الحاصلة في المراكز دي ..بنقدر نفرز مريخ ام درمان من مريخ الفاشر كيف؟. * جمال الوالي ساكت تعبان. * القروش البكبها جمال الوالي للمريخ (الاب) لو كان بكبها للسلاطين ديك ..كانوا عملوا ليهم حاجة. * فريق فيه (8) محترفين. * وفيه بكري المدينة. * فيه من الهلال الباشا وعلاءالدين يوسف وعبده جابر وبكري المدينة وتراوري. * وفيه الجهاز الفني للهلال السابق بقيادة غارزيتو. * وعندهم إعلام. * وعندهم الاتحاد العام. * عندهم اي حاجة. * بعد دا كلو بيجوا في المركز الرابع. * يا شماتة ربيع طه فيكم. * ربيع طه دخلو شنو؟. * ومريخ الفاشر بيلعب عشرة وبدون شرطة ..وبيجي في المركز الثاني. * يا جماعة نحن من باب الاحترام. * ومن باب التقدير. * والمسؤولية. * تاني زول في المركز الرابع ما يتكلم معانا. * نحن ما فاضيين للحاجات دي. * ولا عندنا وقت للروابع. * والرابع ذاتو يا ريت لو جابوها (سليقة). * تتخيلوا الرابع مشترك مع الخرطوم الوطني. * المريخ بقوا في المركز الرابع بيضايقوه. * يا حليل المريخ. * وبرّد يا. * انا بتكلم عن مريخ ناس ضفر ..عشان الامور تبقى ليكم واضحة. * وبرّد يا. * هسع في داعي لجريدة (الصدى). * وجريدة (الزعيم). * وجريدة (الزاوية) مشترك. * والمريخ في المركز الرابع. * مفروض الجرايد دي كلها يحولوها لمريخ (السلاطين). * ما عاوزين نقرأ لينا عمود في فريق في المركز الرابع. * بعدين يا جماعة (الجيل) الجديد دا اصلو كدا. * جيل متعلم. * وجيل فاهم. * وبعرف اي حاجة في التكنلوجيا. * عشان كدا منطقى مع (الثورة) الحصلت في الجيل الجديد دا ..طبيعي المريخ الابن يتقدم على المريخ الاب. * العالم بقى كدا. * لكن يمين ..نحن هلال الابيض او هلال الفاشر او هلال كادوقلي يتقدم علينا في روليت الدوري الممتاز ..إلّا نشيل (اعمدتنا) ننزلها في صحف استرالية. * ولا بنكتب ليكم هنا. * نحن حاجات زي دي في الهلال ما عندنا ولا بنقبل بيها. * كل شيء ولا الاحترام. * إلا الاحترام. * هسع تاني نفرزهم كيف؟. * نعرفهم بي ياتو طريقة. * لمن مزمل ابوالقاسم يكتب (المريخ ابوزرد) بكون قاصد ياتو مريخ؟. * مريخ الفاشر ام مريخ ام درمان؟. * ولمن مامون ابوشيبة يقول عندنا (ضربة جزاء) بكون قاصد منو؟. * مريخ ام درمان ام مريخ الفاشر؟. * ولمن بابكر سلك ..يقول ايها الناس..بكون قاصد ياتو ناس ..ناس حسن كمال ام ناس علي جعفر؟. * غايتو لو بتفكروا يا ناس المريخ مباراة الاياب مع كابوسكورب يلعبها ليكم مريخ الفاشر. * ناسكم (الروابع) ديل ما بنستروا. * لا بنستروا ولا حاجة. * وبرّد يا. * ............... * ملحوظة : كمان عدم الاحترام وصل للحد دا. هوامش * نبيل الكوكي وصل في موعده. * الظاهر المدرب دا خطير. * من مواعيدو ظاهر عليه ..مدرب منضبط ..وخطير. * اول مرة مدرب يجينا في موعده. * الفاتح النقر ما قصر. * قاد الهلال في ظروف صعبة. * تصدر بفارق مريح من النقاط في الممتاز. * وحسم امر التأهل الافريقي من ام درمان. * التحية والتقدير للمدرب الفاتح النقر. * الكوكي لو ما فهم الاوضاع ..وعرف الاجواء ..مفروض يراقب من بعيد حتى مايو القادم. * ما عاوزين نفقد اي نقطة. * وما عاوزين استهتار. * وعدم مسؤولية. * وفي انتظار توقيع عقد (الجوهرة الزرقاء). * الكاردينال وعد ..وصدق في وعده. * هذه اشياء كلها تحسب لصالح الكاردينال. * بس يا كاردينال ...كرّب الشغل ..وانجز التسجيلات. * يكون ما عندك اي مشكلة. * يا ناس المريخ .. الله يستر عليكم من (الحفيد). * الله يستر عليكم من مريخ كوستي ..الفريق ماشي صاح. * يعني الابن ..والحفيد ح يتقدموا على الاب. * .............. * عاجل : بعد كدا يا جمال الوالي مفروض تبدأوا اتصالاتكم مع سكرتير سيكافا.