خالد عزالدين الساندوتش !! عندما كنا نعمل في طيبة الذكر صحيفة المشاهد كان الاخ علي البيتي يعمل سكرتيرا للتحرير .. وكان هناك شاب متدرب لم يستلطفه الاخ علي .. لم يكن يعطيه مهام عمل كثيرة ويرفض ان يُنزل اسمه مع اي مادة يكتبها .. ومن المؤكد ان الصحفي المتدرب او المبتدئ يكون في قمة السعادة عندما يظهر اسمه .. كان المتدرب يطلب دوما من علي البيتي ان ينزل له اسمه ولو لمرة واحدة وكان علي يرفض دوما بحجة ان مجلس الصحافة يمنع نشر اسم اي صحفي الا اذا كان معه القيد الصحفي !! اجتهد هذا الشاب وامتحن للقيد الصحفي واصبح متخصصا في تغطية اخبار (ميدان عقرب) ومرت الايام ومازال علي البيتي مصرا علي عدم انزال اسمه فاضطر المتدرب لتقديم شكوى لادارة الصحيفة التي سألت علي البيتي عن سبب عدم نشر اسمه مع المادة التي يكتبها رغم انه نال القيد الصحفي فرد علي البيتي (هو ميدان عقرب ده عايز لي قيد صحفي) !! الشخص (المكاجرك) مكاجرك .. لو عندك قيد ولا ما عندك قيد اسمك ما بنزل !! لو جيتو بجاي بجيك بجاي .. يقول ليك المريخ احرز بطولة دبي الدولية وجاب كاس جوي .. تهزم المريخ ذاتو في الامارات ذاتا .. يقول ليك دي مباراة واحدة ! ويقولوا ليك الدرع ما كاس !! وانا متاكد لو الهلال حمل الدرع بالطيارة يقولوا ليك نحن جينا بسودانيير وانتو جيتو بالاماراتيه !! يتحدثوا عن الحكام الذين يدعمون الهلال في الدوري الممتاز .. تنتصر عليهم بحكم اماراتي وبهدف عكسي يقولوا ليك الهلال محظوظ !! تذكرهم بان اكبر بطولاتهم التي احرزوها كانت بضربات الحظ والترجيحية وبالهواء والغبار البدخل الكوره براهو .. يقولوا ليك الدنيا حظوظ ! فريق تختوا زي الحشوة في الساندوتش برضو يتحدث عن الندية .. تهزموا في اخر مباراتين واحدة بره وواحدة جوه برضو يتكلم معاك !! تقفل علي الساندوتش ببطولتين واحدة فيها كاس وواحدة فيها درع برضو (يفرفر) نتحدث عن الخريجين الاوائل يقولوا ليك مافي حاجة اسمها خريجين .. التاريخ امامهم .. الستة رؤساء الاوائل على التوالي من الخريجين الاوائل وبرضو يغالطوا ليك التاريخ .. يقولوا ليك المريخ تأسس سنة 1908 ولا واحد يذكر ليك أتاسس كيف .. ولا وين ! وهل كان هناك نادي .. ومن هم المؤسسين .. تكتشف انو في اولاد حلة في المسالمة بلعبوا بكورة تقريبا في تلك السنين !! وبعد ذلك تكتشف انو المسالمة نفسه كان موجودا ولا يوجد نادي اسمه المريخ !! ويحدثونك عن ان الهلال جاء من ضلع المريخ والهلال اصلا فكرة مختلفة تماما عن المريخ .. ده فريق كورة وده نادي خريجين .. اصلا مافي علاقة .. نادي تاسس في اجتماع واضح وصريح في منزل معروف بمجموعة معروفة بجمعية عمومية وقدم طلبا لتسجيله لاسباب معروفة وتم اختيار رئيس من الخريجين الاوائل المعروفين علي مستوي السودان وشعاره الهلال ومازال يحتفل بليلة المولد ورمضان ! من فريق المسالمة .. لاحظ فريق اولاد الحي .. جاء شاب اسمه فتح الله بشارة وانضم لركب الشباب المثقفين الذين يريدون ان يؤسسوا نادي علي فكرة .. اعجبته الفكرة رغم اختلافات كثيرة في الثقافة بينه وبين المؤسسين ولكن الفكرة اعجبته فانضم لها .. يقولون لك ان فتح الله بشارة من المريخ وهو الذي رفض تماما ان يكون هناك فريق حي اسمه المريخ علي حساب (المسالمة) وهو الذي اختار هلال الخريجين منذ البداية ! يحدثونك عن تواريخ عديدة لنادي واحد وعن اسماء عديدة فيكتشفون انهم في النهاية يريدون ان يغطوا حقيقة ثابته بان اسم المريخ لا يمكن الا ان يكون رد فعل لاسم الهلال !! هو التاريخ الواضح الناصع البياض .. يقولون لك انتصارات المريخ علي الهلال اكثر.. قصص وحكاوي يمكن ان يقولها اي شخص .. انتصرنا عليكم في سوق القش ! وبعدها مباشرة يقولون لك ان المباراة لم تكتمل .. وقصة من الصعب جدا ان لم يكن من المستحيل ان تتاكد منها ! ويحدثونك عن مباراة المدرسة الاهلية .. يقولون لك هناك شاب كان جالسا يتفرج طلبوا منه المشاركة .. شارك فاحرز هدف … احكي ليكم عن مباراة المدرسة الاميرية .. الهلال غلب المريخ سبعة صفر .. احرزهم شلبايه !! لا يمكن ان نكتب التاريخ هكذا .. التاريخ الواضح الصريح يجب ان يكون مسنودا بمستندات واضحة .. الهلال انتصر علي المريخ في اخر مباراة في الدوري الممتاز .. المستندات موجودة في كل الصحف وقناة الملاعب !! بعدها سافر الهلال للامارات والتقي بالمريخ في المباراة الثانية علي التوالي .. انتصر الهلال علي المريخ بهدف (نعسان) كل الناس (صاحية) وشافت الهدف .. المباراة منقولة علي اكثر من 30 قناة .. جدل مافي .. ده (الساندوتش) وبعد ده يقولوا ليك الهلال وما الهلال وبتكلموا .. انتو مفروض تنسوا الموضوع ده زي عشرة سنين ! ما تجيبوا سيرة الهلال والكاسات المحمولة جوا واللقاءات الخارجية والحكام .. عشان نحن ما نرد عليكم ونذكركم بالدوحة ودوري الابطال والمجموعات والنشاة والتاريخ والدوري الممتاز الذي لا يقبل اي جدال ودوري السودان وامتداد القوة الزرقاء وعدم وجود ندية اصلا في البطولة الكبرى .. اجمل مافي مباراة (الدرع) الصوت العالي للمذيع .. الان تكريم الفريق (الوصيف) هذه هي الحقيقة الموثقة في التاريخ .. المريخ عبارة عن وصيف للهلال احتل مكان الموردة في هذه الوصافة ! والموردة هي النادي الذي أسس علي فكرة مثل الهلال .. بشعار حمل الوان الكلية الحربية !! عرفتوا ناس المريخ ما بحبوا يتكلموا عن التاريخ لييه .. وبزعلوا لما نجيب سيرة الخريجين الاوائل !! كنت عايز اكتب عن المباراة نفسها لكن نعست .. انتو نسيتو ما انا اسمي خالد !!
