بابكر سلك طريقة وليست تشكيلة *المدرب الشاطر يعتمد علي طريقة لعب لا علي تشكيلة محددة *لذا نجد مستوي الاداء في المريخ وشكل الاداء لايختلف كثيرا مهما اختلفت التشكيلة *القصة تكتيك وانضباط *كلو يوم يؤكد زولفا المغمور انه افضل من مية مشهور *واذا ادرنا الاحلال والابدال وفقا لتوجيهات زولفا *صدقوني الاميرة السمراء الموسم القادم بتتجرتق في القلعة الحمراء *بس نبرد ونصفي النية *ايها الناس *ناس روشا بلقوا الناس ديل وين؟ *معقولة!!!! *نقول مبروك *نسوي شنو عاد *البجي اول السودان بقولوا ليهو مبروك *والبجيب تلاتة واربعين في المية برضو بقولوا ليهو مبروك *لذا مبروك ياروشا *فالحصة وطن *ووطن بعزو باقي *مكانو في جوة المآقي *صحيح فقير ريو السواقي *بس مكانو في نفوسنا باقي *وبجهودنا حايبقي راقي *وطن *ايها الناس *كلو يوم بقولها *علاج المصابين *وبالذات ضياء الدين *علاج زي ماقال كتاب طب اصابات الملاعب صفحة واحد *لانستعجل عودتهم للملعب *لانهم صغار وامامهم طريق طويل للامتاع والابداع *يجب ان نتعامل مع هذا الملف بوعي واهتمام *ماداير اقول بمنهجية وعلمية *لانو هيك تعبير بثير حفيظة اخوة لنا *نحبهم ولا نحب ان نغضبهم *بل نحبهم ونحب الكيان الذي يجمعنا بهم *حتي كلمة الكيان دي ممكن تقرب حاجب بعضنا من حاجبه الآخر *لذا نستبدلها بالمريخ *ايها الناس *عودة سومانا *ادارة ملف الاحلال كما يحب الجهاز الفني *علاج المصابين *كلها ملفات لاتتحمل اللف ولا الدوران *وعلي المجلس انجازها بدرجة الامتياز *حتي لانضع له لافته علي طابق شاخور مكتوب عليها *تسقط بس *للمجلس طبعا *الله لاتريح الكيبورد ده *اي حرف ندوسو دوس *حرف بتحرك باللمس مافي *ايها الناس *زي ديل ناس روشا بلقوهم وين؟؟؟ *والله نحنا نلقي حظ زي ده *موش مانديلا *المهاتما غاندي زاتو نجيبو بي غنمايتو الشايلة ديك *ايها الناس *فيما يتعلق باعادة تأهيل الاستاد *الثورة مستمرة *وتحتاج للدعم المادي الفوري *العندو قرش حبابو *والعندو الف حبابو *والعندو دولار *يفكو في البنك ويجينا *وياحبذا لو عالجنا مجلسنا بالصدمة *وساهم كافراد في نفرة الحبيب الجار *الكمساري طقطق ليكم ياقريش *سامعني يا اسد؟ *ماتضحكوا مزمز علينا *دخلوا ايدينكم في جيوبكم *عقارب بنقبل *لانو النية صافية *ايها الناس *قون بوي حلو *ذكرني فجة الموت *ايها الناس *ان تنصروا الله ينصركم *اها *نجي لي شمارات والي الخرتوم *والينا *وهل يكمن الحل في البحصل؟؟؟ سلك كهربا ننساك كيف والكلب قال لكل فعل رد فعل مساو له في القوة مضاد له في الاتجاه.. ماقريتوا فيزياء انتوا؟؟؟ والي لقاء سلك
