محمد الطيب الأمين جيسي .. إمتحان لم تنجح فيه لجنة التطبيع !!
* لا أعرف لماذا العقلية الرياضية في السودان (متبلدة). * متبلدة على مر التاريخ (هلال ومريخ وما دونهم). * ليس هنالك أنصاف حلول. * ولا توجد (وسطية) ولا (عقلانية). * يا إما إدارة تتدخل في الأمور الفنية ويا كمان إدارة لا تفقه في الأمور الفنية. * وفي الحالتين أعلاه يتضرر النادي بشكل أو آخر. * وهنا أقدم لجنة تطبيع الهلال نموذج للأزمة الإدارية التي تعاني منها كرة القدم السودانية. * واتحدث بالتحديد عن اللاعب جيسي وبقية أخوانه المحترفين. * قناعتي أن جيسي ك(قيمة فنية) ربما يكون هو من أفضل خمسة أسماء أجنبية مرت علي الهلال. * اتحدث عن جيسي كقيمة فنية. * اتوفق ما اتوفق.. ده ما الموضوع. * قعد في الكنبة ما قعد في الكنبة .. ده ما موضوع. * وزنو زايد ولا وزنو ما زايد .. ده ما موضوع. * هو ك(إبن آدم) لعااااب جدا وما في ذلك شك. * زيادة الوزن لا تعتبر سبب كافي للشطب. * ما في نادي بشطب ليهو لاعب عشان (سمين). * بقى سمين يجب أن تحاسب مدرب اللياقة وتراجع النظام الغذائي للاعب. * ثم ثانياً.. ليه نشطبو وفي الدنيا توجد حاجة إسمها إعارة؟ * ليه كل الحلول عندنا هي الشطب؟ * المدرب قال ما داير جيسي والإدارة نفذت كلام المدرب .. اوكي تمام. * إدارة محترمة ومدرب واضح. * أليس كان من الأفضل إعارة جيسي لأي نادي في القارة لمدة عام؟ * كان ممكن جيسي يطلع معار من الهلال إلى بلاتنيوم النادي الجبناهو منو. * أو يطلع إعارة لأي نادي في الخليج. * ح تقول لي التسجيلات في باقي الدول لسه ما فتحت. * اوكي .. جيسي يقعد لحدي ما التسجيلات تفتح ويطلع إعارة. * ح تقول لي المدرب قال ما داير يشوف خلقتو. * المدرب من حقو لكن كمان المدرب ما هو البيخسر النادي دولارات بهذا الكم. * جيسي يقعد وما يلعب وبعد شهرين التسجيلات تفتح في باقي الدول ويطلع إعارة من الهلال دون أن يخسر الهلال قرش احمر. * يطلع إعارة سنة، على الأقل يكون وزنو نقص ويكون تحت الرقابة. * بعد سنة من الإعارة لقيناهو ما نافع طوالي نعمل المخالصة. * أنت الأنا ضحيت بجيسي الذي يعتبر جوهرة فنية. * ضحيت بيهو صاح؟ * هل ستضمن بقاء ريكاردو لموسم قادم؟ * الله أعلم. * ريكاردو مش قال ليك جيسي ما بتواكب مع فلسفته التدريبية؟ * طيب هل ريكاردو نفسه سيستمر مع الهلال اكثر من عام ولا كيسو ح يطير قبل الفترة دي؟ * يا جماعة ما أي محترف ما نجح معانا نشطبو. * دي خسارة كبيرة. * كده بتخسر مرتين. * بتخسر في التعاقد الأول وبتخسر في المخالصة. * الكاردينال شطب موكورو .. وكان ممكن يعيرو. * وبعد داك تاني رجع فاوض موكورو. * شطب شيبولا .. وكان ممكن يعيرو. * شطب مكسيم أفضل حارس جا البلد دي .. وكان ممكن يعيرو. * الأهلي المصري لما يجيب لاعب وما ينجح بختو في (مزاد علني) للاعارة. * الأندية الكبيرة بتتخلص من اللاعبين غير الناجحين عن طريق الإعارة (عسي ولعل). * الهلال ممكن يكون خسر في (صفقة ومخالصة) جيسي ما لا يقل عن 500 ألف دولار. * قروش قدر دي وقعت البحر. * والآن جيسي حر يمكنه أن ينتقل لأي نادي وبمبلغ كبير لن يجني منه الهلال ولا قرش. * ده عيب الإدارة في السودان. * والله جيسي ده لو اوديهو إعارة أهلى الخرطوم ما بفكو. * انا كادارة بتكلم مع المدرب وبوريهو إنو المخالصة مع جيسي مكلفة ولذلك سنقوم باعارته حتى لا يتضرر النادي. * المدرب ما ح يرفض. * انت عارف انا مرات بجيني إحساس انو المحترف لما يجي الهلال بتعمد يفشل عشان عارف ناس الهلال بشطبو وبدوهو قروش. * المحترف بجينا بقبض لحظة التوقيع وبعد أربعة شهور بقبض لحظة المخالصة. * في أربعة شهور بيشيل مننا 400 أو 500 ألف دولار وببقي مارق. * ما خسران حاجة والله. * قبل اليوم سألت الشغيل عن جيسي فقال لي بالحرف : (لعااااب شديد لكن شكلو جاي من قرية صغيرة في زيمبابوى). * قلت ليهو كيف؟ قال : زول بسيط وخجول وما بتسمع ليهو صوت ومندهش من كل شي حوله وداير زمن عشان يخش في الناس . * يعني ما عندو مشكلة في المهارة والفنيات. * لا أخفي حزني الكبير على ضياع لاعب بقيمة وقامة جيسي. * ابكي عليه والله. * ابكي وانعل زوران في اليوم ألف مرة لأن زوران كان سبباً في تأخر ظهور وتألق جيسي. * الآن الصحافة في زيمبابوى ووسائل التواصل وحتى سادومبا يتحدثون جهراً بأن شطب جيسي غير فني. * هم مستغرب عن شطب أفضل موهبة عندهم. * مستغربون على شطب لاعب ياداب تم اختياره لمنتخب بلاده. * عموماً يجب أن لا يهدر الهلال أمواله بهذه الطريقة الهينة. * نحن نرى كثير من الحسنات للجنة التطبيع الحالية. * ونقر بأن السوباط رجل المرحلة. * ولكن كرة القدم بجانب المال تحتاج لشفوت. * شفوت في شغل الكورة. * نتمنى والله التوفيق لجيسي في مشواره القادم. * ونتمنى التوفيق أيضا للعناصر التي ضمها الهلال وهي إضافة نوعية كبيرة بقيادة ميسي وحسين والمصري. * وكذلك التجديد لنزار وفارس. * نرجو من السوباط أن يتفاوض مباشرة مع أبو عاقلة للتمديد خلال الأيام القادمة. * ملف أبو عاقلة حساس جدا ويحتاج لحسم قبل حلول فترة التسجيلات القادمة. * الله يوفق الهلال يارب. * و.. و.. * ويا الله مطرة.
