محمد الطيب الأمين صدق أو لا تصدق .. سوداكال يُهدي رمضان عجب (مُزيل عرق)!! * بتذكر زمان إحنا اتنين (حبينا) بت واحدة. * أنا كنت مراهن على (الكلام وحسن التعبير). * وصاحبي داك مراهن على (الهدايا وحسن التدبير) . * شبك لي البت دي هدايا لما أنا ذاتي بقيت ما متوازن. * والزمن داك أغلى هدية ممكن تجيبها للبت (مُزيل عرق). * هو كل ما يقابلها يديها (مُزيل عرق) . * وأنا كل ما اقابلها بقرأ ليها شعر. * قابلتها في شارعنا وقلت ليها : (الغروب بسألني منك وامسياتنا في شوق إليك والرمال الناعمة مشتاقة لمشيك). * لما قلت ليها كده لما بلعت ريقها. * تاني يوم هو قابلها جاب ليها (مُزيل عرق). * الله يقطع سنين العرق وسنين المُزيل. * بعد أسبوع قابلتها وقلت ليها : (أحلى منك قايلة بلقى ولا غيرك ممكن أبقى). * هو قابلها جاب ليها ربع دستة (منكير). * أنا اديتها (منديل ورق) وكتبت عليهو (ليلي دون الناس كلو آهات). * هو قابلها جاب ليها (12) قويشة بتاعت بلاستيك وبرضو معاها مُزيل عرق. * غايتو البت دي ما أظن تكون (عِرقت) قريب. * قلت أطلع من الشعر السوداني وأدخل ليها في الشعر الجاهلي والفصيح. * قلت ليها : (وما كنت ممن يدخل العشق قلبه ولكن من يُبصر جفونك يعشق) . * هو قابلها جاب ليها (نظارة شمسية). * قلت ليها : (ما عجبي موت المحبين في الهوى ولكن بقاء العاشقين عجيب). * هو قابلها جاب ليها (ساعة يد) لونها أحمر. * أنا دخلت ليها في غناء الحقيبة ثم ما خليت الكاشف ولا أبو صلاح. * حتى (من الاسكلا وحلا) دي قلتها ليها. * وصلت معاها لحدي (الفينا مشهودة) و(بتريد اللطام). * (نشيد العلم) ذاتو قريتو ليها. * لكن في النهاية (ود اللذينا) اداني القاضية وعزمها (باسطة بالحليب). * والزمن داك لما تعزم بت باسطة الحلة كلها بتتكلم بالعزومة دي. * الباسطة أحدثت الفرق ومال قلبها نحو (السكريات) وأنا قلبي ضاع. * ومن يومها قررت ما أدخل في علاقة محتاجة رأس مال. * وبما أن ذلك كذلك فإن ما يحدث بنادي المريخ يشبه ما كان يحدث بيننا أنا وصاحبي داك. * سوداكال مراهن على (الهدايا وحسن التدبير). * والكندو مراهن على (الكلام وحسن التعبير). * مجلس الإدارة (جناح سوداكال) بيجي تمرين المريخ وبجيب (موز). * ومجلس المريخ (جناح الكندو) بيجي التمرين وبجيب (بلح). * طبعاً سوداكال هو (بتاع مُزيل العرق) أما الكندو فهو زي (العبدلله) بتاع (ليلي دون الناس كلو آهات). * في المريخ (2) رئيس. * وكل رئيس عندو دائرة كرة ومنسق إعلامي. * سوداكال اتعاقد مع غارزيتو وسيصل يوم الاتنين. * والكندو اتعاقد مع كلارك وسيصل يوم الاتنين. * دي يحلوها كيف؟ * الحل بس .. المدرب الطيارتو بتجي بالأول هو اليدرب الفريق. * البيصل أول بس. * غير كده ما في حل والله. * مجلس سوداكال بيقول التمرين عصر ، مجلس الكندو بقول التمرين مساء. * سوداكال بقول سيف تيري يتعالج في القاهرة ، الكندو بيقول تيري يتعالج في السلاح الطبي. * السؤال المهم .. لعيبة المريخ مع سوداكال ولا مع الكندو؟ * أنا غايتو ما عارف لكن ناس رمضان عجب ديل بتوعين سكريات سااااااكت. * وأنا ما بفسر وانت ما تقصر. * (الباسطة) ح تحدث الفارق يا الكندو يا أخوي. * و.. و.. * وليلي دون الناس كلو ……. (ضفادع وبعوض).